ನವದೆಹಲಿ, ಆ.14: ಹಲವು ವರ್ಷಗಳ ಬಳಿಕ ನಡೆಯಲಿರುವ 2027ರ ಜನಗಣತಿ (Census) ದೇಶದ ಆಡಳಿತ, ಅಭಿವೃದ್ಧಿ ಯೋಜನೆಗಳು ಮತ್ತು ಭವಿಷ್ಯದ ನೀತಿ ರೂಪಿಸಲು ಮಹತ್ವದ ಆಧಾರವಾಗಲಿದೆ. 2027ರ ಜನಗಣತಿಗೆ ಕೇಂದ್ರವು ಪ್ರಶ್ನಾವಳಿಯನ್ನು ಅಂತಿಮಗೊಳಿಸಿದೆ. ನಾಗರಿಕರಿಗೆ ಕೇಳಲಾಗುವ 40 ಪ್ರಶ್ನೆಗಳಲ್ಲಿ ಜಾತಿ, ಧರ್ಮ, ಕೋವಿಡ್ -19 ಲಸಿಕೆ ವಿವರಗಳು (COVID-19 Vaccination), ಆಧಾರ್ ಮತ್ತು ಮೊಬೈಲ್ ಫೋನ್ ಸಂಖ್ಯೆಗಳು ಸೇರಿವೆ.
ಭಾರತದ ರಿಜಿಸ್ಟ್ರಾರ್ ಜನರಲ್ ಹೊರಡಿಸಿದ ಆದೇಶದ ಪ್ರಕಾರ, ಪ್ರಶ್ನಾವಳಿಯಲ್ಲಿ ಒಬ್ಬ ವ್ಯಕ್ತಿಯು ಪರಿಶಿಷ್ಟ ಜಾತಿ ಅಥವಾ ಪರಿಶಿಷ್ಟ ಪಂಗಡಕ್ಕೆ ಸೇರಿದವರೇ ಮತ್ತು ಅವರ ಜಾತಿಯನ್ನು ಒಳಗೊಂಡಂತೆ ವಿವರಗಳನ್ನು ಪಡೆಯಲಾಗುತ್ತದೆ. ಹತ್ತು ವರ್ಷಗಳ ಜನಗಣತಿಯ ಭಾಗವಾಗಿ ಜಾತಿ ಮಾಹಿತಿಯನ್ನು ಸಂಗ್ರಹಿಸುತ್ತಿರುವುದು ಇದೇ ಮೊದಲು. 2021ಕ್ಕೆ ಜನಗಣತಿ ಮಾಡಲು ನಿಗದಿಯಾಗಿತ್ತು. ಆದರೆ ಕೋವಿಡ್ -19 ಸಾಂಕ್ರಾಮಿಕ ರೋಗದಿಂದಾಗಿ ಇದು ಮುಂದೂಡಲ್ಪಟ್ಟಿತು. 2027ರ ಜನಗಣತಿ ನಡೆಸಲು ಕೇಂದ್ರ ಸಚಿವ ಸಂಪುಟವು 11,718 ಕೋಟಿ ರೂ.ಗಳನ್ನು ಅನುಮೋದಿಸಿದೆ.
ಜನಸಂಖ್ಯಾ ಗಣತಿ ಹಂತವು ಸೆಪ್ಟೆಂಬರ್ 1 ರಂದು ಲಡಾಖ್, ಜಮ್ಮು ಮತ್ತು ಕಾಶ್ಮೀರ, ಹಿಮಾಚಲ ಪ್ರದೇಶ ಮತ್ತು ಉತ್ತರಾಖಂಡದ ಹಿಮಭರಿತ ಪ್ರದೇಶಗಳಲ್ಲಿ ಪ್ರಾರಂಭವಾಗಲಿದೆ. ಮನೆ-ಮನೆಗೆ ತೆರಳಿ ನಡೆಸುವ ಸಮೀಕ್ಷೆಗೂ ಮುನ್ನ ಆಗಸ್ಟ್ 17 ರಿಂದ 31 ರವರೆಗೆ ಆನ್ಲೈನ್ ಸ್ವಯಂ ಗಣತಿ ಸೌಲಭ್ಯ ಲಭ್ಯವಿರುತ್ತದೆ. ದೇಶದ ಉಳಿದ ಭಾಗಗಳಲ್ಲಿ, ಮುಂದಿನ ವರ್ಷ ಜನಸಂಖ್ಯಾ ಗಣತಿಯನ್ನು ಕೈಗೊಳ್ಳಲಾಗುವುದು.
''ಗಣತಿಯಲ್ಲಿ ನನ್ನ ಹೆಸರೂ ಸೇರಿಸಿ'': ಸಭಾಂಗಣಕ್ಕೆ ಎಂಟ್ರಿ ಕೊಟ್ಟು ಸೆನ್ಸಸ್ ತರಬೇತಿ ಆಲಿಸಿದ ಮಂಗಣ್ಣ! ವಿಡಿಯೊ ನೋಡಿ
ಜಾತಿ, ಧರ್ಮ, ಕುಟುಂಬ ವಿವರಗಳು
40 ಅಂಶಗಳ ಪ್ರಶ್ನಾವಳಿಯು ಜನಸಂಖ್ಯೆ ಮತ್ತು ವೈಯಕ್ತಿಕ ಮಾಹಿತಿಯನ್ನು ಹೊಂದಿದೆ. ಪ್ರತಿಕ್ರಿಯಿಸಿದವರ ವಯಸ್ಸು, ವಿವಾಹಿತರೇ ಅಥವಾ ಅವಿವಾಹಿತರೇ, ಮದುವೆಯಾದ ವಯಸ್ಸು, ಸಂಗಾತಿ, ರಾಷ್ಟ್ರೀಯತೆ ಮತ್ತು ಧರ್ಮದ ಬಗ್ಗೆ ಕೇಳಲಾಗುತ್ತದೆ. ಪೋಷಕರ ವಿವರಗಳು, ಮಾತೃಭಾಷೆ ಮತ್ತು ತಿಳಿದಿರುವ ಇತರ ಭಾಷೆಗಳು, ಸಾಕ್ಷರತೆ ಮತ್ತು ಡಿಜಿಟಲ್ ಸಾಕ್ಷರತೆಯನ್ನು ಸಹ ದಾಖಲಿಸಲಾಗುತ್ತದೆ.
ಪ್ರಸ್ತುತ ವಿವಾಹಿತರಾಗಿರುವ, ವಿಧವೆಯರು, ವಿಚ್ಛೇದನ ಪಡೆದಿರುವ ಅಥವಾ ಪ್ರತ್ಯೇಕವಾಗಿ ವಾಸಿಸುತ್ತಿರುವ ಮಹಿಳೆಯರಿಗೆ ಸಂಬಂಧಿಸಿದಂತೆ, ಪ್ರಶ್ನಾವಳಿಯಲ್ಲಿ ಮಕ್ಕಳ ಸಂಖ್ಯೆ, ಪ್ರಸ್ತುತ ವಿವಾಹದಿಂದ ಹೊಂದಿರುವ ಮಕ್ಕಳ ಸಂಖ್ಯೆ ಹಾಗೂ ಹಿಂದಿನ ಒಂದು ವರ್ಷದಲ್ಲಿ ಜನಿಸಿದ ಮಕ್ಕಳ ಸಂಖ್ಯೆ ಕುರಿತ ಪ್ರಶ್ನೆಗಳು ಇರಲಿವೆ.
ಜನಗಣತಿ ಕಾರ್ಯಕ್ಕೆ ಜಾತಿ ಪ್ರಶ್ನೆಯು ಒಂದು ಪ್ರಮುಖ ಸೇರ್ಪಡೆಯಾಗಿದೆ. ಪ್ರತಿಕ್ರಿಯಿಸುವವರು ತಮ್ಮ ಜಾತಿಯನ್ನು ತಿಳಿಸುತ್ತಾರೆ, ಅದಕ್ಕೆ ಅನುಗುಣವಾಗಿ ಮಾಹಿತಿಯನ್ನು ದಾಖಲಿಸಲಾಗುತ್ತದೆ. ಕಳೆದ ವರ್ಷ ಏಪ್ರಿಲ್ನಲ್ಲಿ, ಪ್ರಧಾನಿ ನರೇಂದ್ರ ಮೋದಿ ಅಧ್ಯಕ್ಷತೆಯಲ್ಲಿ ನಡೆದ ರಾಜಕೀಯ ವ್ಯವಹಾರಗಳ ಸಂಪುಟ ಸಮಿತಿಯು ಜನಗಣತಿಯಲ್ಲಿ ಜಾತಿಯನ್ನು ಸೇರಿಸುವ ನಿರ್ಧಾರವನ್ನು ತೆಗೆದುಕೊಂಡಿತು.
ಭಾರತದ ಜನಗಣತಿ 2027 ಸುರಕ್ಷತಾ ಮಾರ್ಗದರ್ಶಿ: ವಂಚನೆ ತಪ್ಪಿಸಲು ಈ ಟಿಪ್ಸ್ ಫಾಲೋ ಮಾಡಿ
ಹಾಗೆಯೇ ಕೋವಿಡ್-19 ಲಸಿಕೆಗಳ ಬಗ್ಗೆಯೂ ಪ್ರಶ್ನೆಗಳಿರಲಿವೆ. ಕೋವಿಡ್-19 ಲಸಿಕೆಯನ್ನು ಎಲ್ಲಿ ಪಡೆದರು, ಅವರು ಹೊಂದಿರುವ ಬ್ಯಾಂಕ್ ಖಾತೆಗಳ ಸಂಖ್ಯೆ ಮತ್ತು ಅವರ ಮೊಬೈಲ್ ಸಂಖ್ಯೆಯ ಬಗ್ಗೆ ಕೇಳಲಾಗುತ್ತದೆ. ಅವರ ಬಳಿ ಆಧಾರ್ ಕಾರ್ಡ್, ಮತದಾರರ ಗುರುತಿನ ಚೀಟಿ ಮತ್ತು ಪಾಸ್ಪೋರ್ಟ್ ಸೇರಿದಂತೆ ದಾಖಲೆಗಳಿವೆಯೇ ಮತ್ತು ಚಾಲನಾ ಪರವಾನಗಿ ಇದೆಯೇ ಎಂದು ಕೇಳಲಾಗುತ್ತದೆ. ಜನಗಣತಿಯನ್ನು ಸಂಪೂರ್ಣವಾಗಿ ಡಿಜಿಟಲೀಕರಣ ಮಾಡಲು ಯೋಜಿಸಲಾಗಿದೆ.
ಅಷ್ಟೇ ಅಲ್ಲದೆ, ಶಿಕ್ಷಣ ಮತ್ತು ಉದ್ಯೋಗದ ಬಗ್ಗೆಯೂ ಜನಗಣತಿಯಲ್ಲಿ ಮಾಹಿತಿ ಸಂಗ್ರಹಿಸಲಾಗುತ್ತದೆ. ಉದ್ಯೋಗಕ್ಕೆ ಸಂಬಂಧಿಸಿದ ಪ್ರಶ್ನೆಯಲ್ಲಿ ಒಬ್ಬ ವ್ಯಕ್ತಿಯು ಹಿಂದಿನ ವರ್ಷದಲ್ಲಿ ಕೆಲಸ ಮಾಡಿದ್ದಾನಾ, ಅವರ ಉದ್ಯೋಗ, ಮುಂತಾದ ಮಾಹಿತಿಯನ್ನು ಕೇಳಲಾಗುತ್ತದೆ.