ನವದೆಹಲಿ: ಕಾಂಗ್ರೆಸ್‌ ಹಿರಿಯ ನಾಯಕ ದಿಗ್ವಿಜಯ್ ಸಿಂಗ್ (Digvijaya Singh) ಅವರು ರಾಷ್ಟ್ರೀಯ ಸ್ವಯಂಸೇವಕ ಸಂಘ (RSS) ಮತ್ತು ವಿಶ್ವ ಹಿಂದೂ ಪರಿಷತ್ (VHP) ವಿರುದ್ಧ ಗಂಭೀರ ಆರೋಪಗಳನ್ನು ಮಾಡಿದ್ದಾರೆ. ‘ಹಿಂದುತ್ವ’ (Hindutva)ದ ಹೆಸರಿನಲ್ಲಿ ಧಾರ್ಮಿಕ ವಿಭಜನೆ (Religious Division)ಗೆ ಕಾರಣವಾಗುತ್ತಿದೆ ಹಾಗೂ ಸನಾತನ ಧರ್ಮ (Sanatan Dharma)ವನ್ನು ವಿರೂಪಗೊಳಿಸಲಾಗುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ.
Xನಲ್ಲಿ ಹಂಚಿಕೊಂಡ ವಿಡಿಯೋದಲ್ಲಿ ಮಾತನಾಡಿದ ದಿಗ್ವಿಜಯ್ ಸಿಂಗ್, ದೇಶದ ಚರ್ಚೆ ನಿರಂತರವಾಗಿ ‘ಹಿಂದೂ ಧರ್ಮ’ ಮತ್ತು ‘ಹಿಂದುತ್ವ’ದ ಸುತ್ತ ಸುತ್ತುತ್ತಿದೆ ಎಂದು ಹೇಳಿದ್ದು, ಆರ್ ಎಸ್ ಎಸ್ ಮತ್ತು ವಿಎಚ್ ಪಿ ಹಿಂದುತ್ವವನ್ನು ಉತ್ತೇಜಿಸುವ ಮೂಲಕ ಹಿಂದೂ-ಮುಸ್ಲಿಂ, ಹಿಂದೂ-ಸಿಖ್ ಹಾಗೂ ಹಿಂದೂ-ಕ್ರೈಸ್ತ ಸಮುದಾಯಗಳ ನಡುವೆ ವಿಭಜನೆ ಸೃಷ್ಟಿಸಿವೆ ಎಂದು ಅವರು ಆರೋಪಿಸಿದ್ದಾರೆ. ಅಲ್ಲದೇ “ಭಾರತ ಎಲ್ಲರಿಗೂ ಸೇರಿದ್ದು, ವೈವಿಧ್ಯತೆಯಲ್ಲಿ ಏಕತೆ ನಮ್ಮ ಶಕ್ತಿ” ಎಂಬ ಅಭಿಪ್ರಾಯವನ್ನು ಹೊರಹಾಕಿದ್ದಾರೆ.
‘ಹಿಂದೂ’ ಪದದ ಕುರಿತು ದಿಗ್ವಿಜಯ್ ಹೇಳಿಕೆ
ವೇದಗಳು, ಉಪನಿಷತ್ತುಗಳು ಮತ್ತು ಪುರಾಣಗಳಲ್ಲಿ ‘ಹಿಂದೂ’ ಎಂಬ ಪದ ಕಾಣಿಸುವುದಿಲ್ಲ ಎಂದು ದಿಗ್ವಿಜಯ್ ಸಿಂಗ್ ಹೇಳಿದ್ದು, ಆರ್ ಎಸ್ ಎಸ್ ಮತ್ತು ವಿಎಚ್ ಪಿ ಸನಾತನ ಧರ್ಮವನ್ನು ತಮ್ಮದೇ ರೀತಿಯಲ್ಲಿ ವ್ಯಾಖ್ಯಾನಿಸುತ್ತಿವೆ ಎಂದು ಕಿಡಿಕಾರಿದ್ದು, ಈ ಹೇಳಿಕೆಗಳಿಗೂ ರಾಜಕೀಯ ವಲಯದಲ್ಲಿ ತೀವ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ.
ರಾಮಮಂದಿರ ದೇಣಿಗೆ ಕುರಿತು ಗಂಭೀರ ಆರೋಪ
ಅಯೋಧ್ಯೆಯ ರಾಮಮಂದಿರಕ್ಕೆ ಸಂಬಂಧಿಸಿದ ದೇಣಿಗೆಗಳ ಬಗ್ಗೆಯೂ ದಿಗ್ವಿಜಯ್ ಸಿಂಗ್ ಆರೋಪ ಮಾಡಿದ್ದಾರೆ. ರಾಮಮಂದಿರಕ್ಕಾಗಿ ಸಂಗ್ರಹಿಸಲಾದ ಹಣದಲ್ಲಿ ಅಕ್ರಮ ನಡೆದಿದೆ ಹಾಗೂ ವಿಹೆಚ್ ಪಿ ಮೂಲಕ ಬಂದ ದೇಣಿಗೆಗಳನ್ನು ಬಿಜೆಪಿ ಚುನಾವಣಾ ನಿಧಿಗೆ ವರ್ಗಾಯಿಸಲಾಗುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ. ರಾಮ ಜನ್ಮಭೂಮಿ ಟ್ರಸ್ಟ್‌ನ ಪ್ರಧಾನ ಕಾರ್ಯದರ್ಶಿ ಚಂಪತ್ ರೈ ಅವರನ್ನು ಆರ್ ಎಸ್ ಎಸ್ ನೊಂದಿಗೆ ಸಂಪರ್ಕ ಹೊಂದಿರುವ ವ್ಯಕ್ತಿ ಎಂದು ಅವರು ಟೀಕಿಸಿದ್ದಾರೆ. ಈ ಆರೋಪಗಳು ದಿಗ್ವಿಜಯ್ ಸಿಂಗ್ ಅವರ ಹೇಳಿಕೆಗಳಾಗಿದ್ದು, ಅವುಗಳ ಬಗ್ಗೆ ಪ್ರತಿಪಕ್ಷಗಳು ತೀವ್ರವಾಗಿ ಆಕ್ಷೇಪಿಸಿವೆ.
ವಾಟ್ಸಾಪ್–ಇನ್‌ಸ್ಟಾಗ್ರಾಂ ಮೂಲಕ ಉಗ್ರರ ಸಂಪರ್ಕ? ಬೀದರ್‌ನಲ್ಲಿ 7 ಮಂದಿ ವಿರುದ್ಧ FIR ದಾಖಲು
ಬಿಜೆಪಿ ನಾಯಕರ ತೀವ್ರ ವಿರೋಧ
ಮಧ್ಯಪ್ರದೇಶದ ಸಚಿವ ವಿಶ್ವಾಸ್ ಸಾರಂಗ್ ದಿಗ್ವಿಜಯ್ ಸಿಂಗ್ ಹೇಳಿಕೆಗಳನ್ನು ಖಂಡಿಸಿ, ಹಿಂದೂಗಳು, ಸಾಧು-ಸಂತರ ಮತ್ತು ಸನಾತನ ಧರ್ಮವನ್ನು ಅವಮಾನಿಸುವ ಹೇಳಿಕೆಗಳನ್ನು ನೀಡುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ. ಅವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ. ಬಿಜೆಪಿ ಶಾಸಕ ರಾಮ್ ಕದಮ್ ಕೂಡ ದಿಗ್ವಿಜಯ್ ಸಿಂಗ್ ವಿರುದ್ಧ ವಾಗ್ದಾಳಿ ನಡೆಸಿದ್ದು, ಈ ಹಿಂದೆ ಅವರು ‘ಸಾಫ್ರನ್ ಟೆರರ್’ ಎಂಬ ಪದ ಬಳಕೆ ಮಾಡಿದ್ದರು ಎಂದು ಟೀಕಿಸಿದ್ದಾರೆ.
ಅಯೋಧ್ಯೆಯ ಹಲವು ಸಾಧು-ಸಂತರು ಕೂಡ ದಿಗ್ವಿಜಯ್ ಸಿಂಗ್ ಹೇಳಿಕೆಗಳನ್ನು ಖಂಡಿಸಿದ್ದಾರೆ. ಮಹಂತ್ ಸೀತಾರಾಮ್ ದಾಸ್ ಜೀ ಮಹಾರಾಜ್ ಅವರ ಹೇಳಿಕೆಗಳನ್ನು “ಆಧಾರರಹಿತ ಮತ್ತು ಖಂಡನೀಯ” ಎಂದು ಕರೆದರೆ, ಮಹಾಮಂಡಲೇಶ್ವರ ವಿಷ್ಣು ದಾಸ್ ಜೀ ಮಹಾರಾಜ್ ಕಾಂಗ್ರೆಸ್‌ ನಾಯಕರು ಸನಾತನ ಮತ್ತು ಕೇಸರಿ ವಸ್ತ್ರಧಾರಿ ಸಂತರನ್ನು ಗುರಿಯಾಗಿಸುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.
ಈ ವಿವಾದದ ನಡುವೆ ದಿಗ್ವಿಜಯ್ ಸಿಂಗ್ ‘ಸನಾತನ ಸ್ವಾಭಿಮಾನ್ ಯಾತ್ರೆ’ ನಡೆಸಲು ಮುಂದಾಗಿದ್ದು, ಉಜ್ಜಯಿನಿಯಿಂದ ಅಯೋಧ್ಯೆಯವರೆಗೆ ಪಾದಯಾತ್ರೆ ಕೈಗೊಳ್ಳುವುದಾಗಿ ತಿಳಿಸಿದ್ದಾರೆ. ಧರ್ಮದ ಹೆಸರಿನಲ್ಲಿ ನಡೆಯುತ್ತಿರುವ ರಾಜಕೀಯ ಬಳಕೆಯ ಕುರಿತು ಜಾಗೃತಿ ಮೂಡಿಸುವುದು ಯಾತ್ರೆಯ ಉದ್ದೇಶ ಎಂದು ಅವರು ಹೇಳಿದ್ದಾರೆ.