ಗ್ಯಾಂಗ್ಟಕ್, ಸೆ. 24: ಭಾರಿ ಮಳೆಯ ಬಳಿಕ ಸಿಕ್ಕಿಂನ (Sikkim) ಗ್ಯಾಂಗ್ಟಕ್ನ ಟಾಡಾಂಗ್ ಪ್ರದೇಶದಲ್ಲಿ ತಡರಾತ್ರಿ ಭೂಕುಸಿತ (Landslide Hits Sikkim) ಸಂಭವಿಸಿದೆ. ಭೂಕುಸಿತದ ಭಯಾನಕ ವಿಡಿಯೊವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಅದರಲ್ಲಿ ಬಂಡೆಗಳು, ಮಣ್ಣು ಮತ್ತು ಅವಶೇಷಗಳು ಕುಸಿದುಬರುತ್ತಿರುವ ದೃಶ್ಯ ಕಂಡುಬಂದಿದೆ. ಪಶ್ಚಿಮ ಸಿಕ್ಕಿಂನ ಯುಕ್ಸಮ್-ತಾಶಿಡಿಂಗ್ ಕ್ಷೇತ್ರದ ವ್ಯಾಪ್ತಿಯ ರಿಂಬಿ ಗ್ರಾಮದ ಕೆಲವು ಭಾಗಗಳಲ್ಲಿ ಭೂಕುಸಿತ ಸಂಭವಿಸಿದೆ.
ಭಾರಿ ಮಳೆ ಬಳಿಕ ಮಣ್ಣು ಕುಸಿಯಿತು. ದೊಡ್ಡ ಪ್ರಮಾಣದಲ್ಲಿ ಮಣ್ಣು, ಬಂಡೆಗಳು ಕೆಳಕ್ಕೆ ಜಾರಿಕೊಂಡು ಬಂದಿವೆ. ನಿರಂತರ ಮಳೆಯ ಹಿನ್ನೆಲೆಯಲ್ಲಿ, ಹತ್ತಿರದ ಮನೆಗಳು, ಆಸ್ತಿಪಾಸ್ತಿ ಹಾಗೂ ಸಂಪರ್ಕ ವ್ಯವಸ್ಥೆಗೆ ಅಪಾಯ ಎದುರಾಗುವ ಸಾಧ್ಯತೆ ಇರುವುದರಿಂದ ಸ್ಥಳೀಯರಲ್ಲಿ ಆತಂಕ ಹೆಚ್ಚಾಗಿದೆ.
ಕಳೆದ ವಾರ, ಟಾಡಾಂಗ್ನ ಲಿಂಗ್ಡಿಂಗ್ನಲ್ಲಿ ಸಂಭವಿಸಿದ ಭೂಕುಸಿತದಿಂದ ಮನೆಯ ಒಂದು ಭಾಗ ಹಾನಿಗೊಳಗಾಗಿದ್ದು, ಮೊದಲ ಮಹಡಿಯ ಕೋಣೆಗಳಿಗೆ ಮಣ್ಣು ಮತ್ತು ಮಳೆನೀರು ನುಗ್ಗಿದೆ. ಇದರಿಂದಾಗಿ ಮೂರು ನೀರಿನ ಪೈಪ್ಲೈನ್ಗಳು ಸಹ ಹಾನಿಗೊಳಗಾಗಿದ್ದು, ಸ್ಥಳೀಯ ನೀರು ಸರಬರಾಜಿನ ಮೇಲೆ ಪರಿಣಾಮ ಬೀರಿದೆ.
ಇಲ್ಲಿದೆ ವಿಡಿಯೊ:
ಲಿಂಗ್ಡಿಂಗ್ ಜೋರಾ ಬಳಿಯ ರಸ್ತೆಯ ಉದ್ದಕ್ಕೂ ಬೆಳಗಿನ ಜಾವ 3 ಗಂಟೆಯಿಂದ ಬೆಳಗ್ಗೆ 9 ಗಂಟೆಯವರೆಗೆ ಹಲವು ಗಂಟೆ ರಸ್ತೆ ಸಂಪರ್ಕ ಕಡಿತಗೊಂಡಿತ್ತು. ನಂತರ ಕಲ್ಲು, ಮಣ್ಣು ರಾಶಿಗಳನ್ನು ತೆರವುಗೊಳಿಸಿ ಸಂಚಾರವನ್ನು ಪುನಃಸ್ಥಾಪಿಸಲಾಯಿತು.
ರಾಜಧಾನಿ ಬೆಂಗಳೂರಿನಲ್ಲಿ ಮತ್ತೆ ಮಳೆ ಅಬ್ಬರ; ಹಲವೆಡೆ ರಸ್ತೆಗಳು ಜಲಾವೃತ!
ಘಟನೆಯಲ್ಲಿ ಯಾವುದೇ ಸಾವುನೋವುಗಳು ಅಥವಾ ಗಾಯಗಳ ಬಗ್ಗೆ ವರದಿಯಾಗಿಲ್ಲ ಹಾಗೂ ಯಾವುದೇ ಮನೆಗಳು ಅಥವಾ ವಾಹನಗಳಿಗೆ ಹಾನಿಯಾಗಿಲ್ಲ. ಸಿಕ್ಕಿಂನಲ್ಲಿ ರಾತ್ರಿಯಿಡೀ ಸುರಿದ ಭಾರಿ ಮಳೆಯ ನಂತರ ಭೂಕುಸಿತ ಸಂಭವಿಸಿದೆ. ಭಾರಿ ಮಳೆಯ ನಂತರ ಗ್ಯಾಲ್ಶಿಂಗ್ ಜಿಲ್ಲೆಯ ರಿಂಬಿಯ ಭಾಗಗಳಲ್ಲಿ 28 ಮನೆಗಳಲ್ಲಿ ವಾಸಿಸುವ 128 ಜನರನ್ನು ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಲಾಗಿದೆ ಎಂದು ಸಿಕ್ಕಿಂ ರಾಜ್ಯ ವಿಪತ್ತು ನಿರ್ವಹಣಾ ಪ್ರಾಧಿಕಾರ ತಿಳಿಸಿದೆ.
ರಿಂಬಿ ಮತ್ತು ಸಿಂಗ್ಲಿಟಮ್ನಲ್ಲಿ ಪರಿಹಾರ ಮತ್ತು ಪುನಃಸ್ಥಾಪನೆ ಕಾರ್ಯಾಚರಣೆಗಳನ್ನು ನಡೆಸಲಾಯಿತು. ಆಡಳಿತವು ಪೀಡಿತ ಪ್ರದೇಶಗಳಿಂದ ಅವಶೇಷಗಳನ್ನು ತೆರವುಗೊಳಿಸಿತು. ರಿಂಬಿಯಲ್ಲಿ, ನಿಕ್ ಖೋಲ್ಸಾ ಹೊಳೆಯ ಉದ್ದಕ್ಕೂ ಕಸಗಳ ರಾಶಿ ನಿರ್ಮಾಣವಾಗಿದ್ದು, ಮಳೆನೀರಿನಿಂದ ಇವು ಗ್ರಾಮದ ಕಡೆಗೆ ಹರಿಯುತ್ತಿವೆ. ನೀರಿನ ಹರಿವು ಮತ್ತು ಶಿಲಾಖಂಡರಾಶಿಗಳ ಹರಿವು ಹೆಚ್ಚಾದ ನಂತರ ಆ ಪ್ರದೇಶದಲ್ಲಿನ ಸೇತುವೆಯೊಂದು ಕೊಚ್ಚಿಹೋಗಿದೆ.