ತಮಿಳುನಾಡು ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್‌ಗೆ ಭಾರಿ ಮುಖಭಂಗ: ಟಿವಿಕೆ ಅಭ್ಯರ್ಥಿ ವಿ.ಎಸ್. ಬಾಬು ವಿರುದ್ಧ ಸೋಲು

ಚೆನ್ನೈ, ಮೇ 4: ತಮಿಳುನಾಡು ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್‌ಗೆ (M.K. Stalin) ಭಾರಿ ಮುಖಭಂಗವಾಗಿದೆ. ತಮ್ಮ ತವರು ಕ್ಷೇತ್ರದಲ್ಲೇ ಅವರು ಸೋಲಿನ ಕಹಿಯುಂಡಿದ್ದಾರೆ. 2026ರ ತಮಿಳುನಾಡು ವಿಧಾನಸಭಾ ಚುನಾವಣೆಯ (Tamil Nadu Election) ಅತ್ಯಂತ ದೊಡ್ಡ ರಾಜಕೀಯ ಪಲ್ಲಟವೊಂದರಲ್ಲಿ, ತಮಿಳಗ ವೆಟ್ರಿ ಕಳಗಂ (TVK) ಪಕ್ಷದ ವಿ.ಎಸ್. ಬಾಬು ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಅವರನ್ನು ಅವರ ಭದ್ರಕೋಟೆಯಾದ ಕೊಳತ್ತೂರು ಕ್ಷೇತ್ರದಲ್ಲೇ ಸೋಲಿಸಿ ಅಚ್ಚರಿ ಮೂಡಿಸಿದ್ದಾರೆ.

ಚುನಾವಣಾ ಆಯೋಗದ ವೆಬ್‌ಸೈಟ್‌ನಲ್ಲಿ ಲಭ್ಯವಿರುವ ಮಾಹಿತಿಯ ಪ್ರಕಾರ, ಚೊಚ್ಚಲ ಚುನಾವಣೆಯನ್ನು ಎದುರಿಸುತ್ತಿರುವ ಟಿವಿಕೆ ಪಕ್ಷದ ಬಾಬು, ಏಪ್ರಿಲ್ 23ರಂದು ನಡೆದ ಚುನಾವಣೆಯ 22 ಸುತ್ತುಗಳ ಮತ ಎಣಿಕೆಯ ನಂತರ ಡಿಎಂಕೆ ದಿಗ್ಗಜ ಸ್ಟಾಲಿನ್ ಅವರನ್ನು 9,000ಕ್ಕೂ ಹೆಚ್ಚು ಮತಗಳ ಅಂತರದಿಂದ ಸೋಲಿಸಿದ್ದಾರೆ.

ಬಾಬು ಅವರು 82,000ಕ್ಕೂ ಹೆಚ್ಚು ಮತಗಳನ್ನು ಪಡೆದರೆ, 2011ರಿಂದ ಈ ಕ್ಷೇತ್ರವನ್ನು ಪ್ರತಿನಿಧಿಸುತ್ತಿದ್ದ ಸ್ಟಾಲಿನ್ ಸುಮಾರು 73,000 ಮತಗಳನ್ನು ಪಡೆದಿದ್ದಾರೆ. ಎಐಎಡಿಎಂಕೆಯ ಆರ್. ಸಂತಾನಕೃಷ್ಣನ್ 14,000 ಮತಗಳೊಂದಿಗೆ ಮೂರನೇ ಸ್ಥಾನಕ್ಕೆ ತೃಪ್ತಿಪಟ್ಟಿದ್ದಾರೆ.

ತಂದೆ ಕ್ರಿಶ್ಚಿಯನ್‌, ತಾಯಿ ಹಿಂದೂ; ಎರಡೂ ಧರ್ಮದಲ್ಲಿ ನಂಬಿಕೆ ಇಟ್ಟಿರುವ ʻದಳಪತಿʼ ವಿಜಯ್‌

2021ರಲ್ಲಿ ಸ್ಟಾಲಿನ್ ಎಐಎಡಿಎಂಕೆಯ ಆದಿ ರಾಜಾರಾಂ ವಿರುದ್ಧ 70,000ಕ್ಕೂ ಹೆಚ್ಚು ಮತಗಳ ಅಂತರದಿಂದ ಗೆದ್ದಿದ್ದರು. ಅದೇ ಆದಿ ರಾಜಾರಾಂ ಚೇಪಾಕ್-ತಿರುವಲ್ಲಿಕೇಣಿ ಕ್ಷೇತ್ರದಲ್ಲಿ ಸ್ಟಾಲಿನ್ ಪುತ್ರ ಉದಯನಿಧಿ ಸ್ಟಾಲಿನ್ ವಿರುದ್ಧ ಸೋತಿದ್ದರು.

ವಿ.ಎಸ್. ಬಾಬು ಯಾರು?

ವಿ.ಎಸ್. ಬಾಬು ಈ ಹಿಂದೆ ತಮಿಳುನಾಡು ರಾಜಕೀಯದಲ್ಲಿ ಪ್ರಾಬಲ್ಯ ಹೊಂದಿರುವ ಡಿಎಂಕೆ ಮತ್ತು ಎಐಎಡಿಎಂಕೆ ಎರಡೂ ಪಕ್ಷಗಳೊಂದಿಗೆ ಗುರುತಿಸಿಕೊಂಡಿದ್ದರು. 75 ವರ್ಷದ ಅವರು 2006ರಿಂದ 2011ರವರೆಗೆ ಪುರಸವಾಲ್ಕಂ ಕ್ಷೇತ್ರದ ಶಾಸಕರಾಗಿ ಸೇವೆ ಸಲ್ಲಿಸಿದ್ದರು. ಅಲ್ಲದೆ 2011ರವರೆಗೆ ಉತ್ತರ ಚೆನ್ನೈ ಜಿಲ್ಲೆಯ ಡಿಎಂಕೆ ಜಿಲ್ಲಾ ಕಾರ್ಯದರ್ಶಿಯಾಗಿಯೂ ಆಗಿದ್ದರು.

2011ರ ವಿಧಾನಸಭಾ ಚುನಾವಣೆಯ ಸಮಯದಲ್ಲಿ ಅವರು ಕೊಳತ್ತೂರು ಕ್ಷೇತ್ರದ ಉಸ್ತುವಾರಿ ವಹಿಸಿದ್ದರು. ಆದರೆ ಆ ಚುನಾವಣೆಯಲ್ಲಿ ಸ್ಟಾಲಿನ್ ಅತ್ಯಲ್ಪ ಮತಗಳ ಅಂತರದಿಂದ ಗೆದ್ದಿದ್ದಕ್ಕಾಗಿ ಡಿಎಂಕೆ ಇವರನ್ನು ಪ್ರಶ್ನಿಸಿತ್ತು. ನಂತರ ಇವರನ್ನು ಉಸ್ತುವಾರಿ ಸ್ಥಾನದಿಂದ ಬದಲಾಯಿಸಲಾಗಿತ್ತು.

ಇದಾದ ಬಳಿಕ ಅವರು ಎಐಎಡಿಎಂಕೆ ಸೇರಿದ್ದರು. ಈ ವರ್ಷ ಅವರು ಟಿವಿಕೆ ಸೇರಿದರು. ಪ್ರಸ್ತುತ ಪಕ್ಷದ ಜಂಟಿ ಪ್ರಧಾನ ಕಾರ್ಯದರ್ಶಿಯಾಗಿದ್ದಾರೆ. ಡಿಎಂಕೆ ಮತ್ತು ಎಐಎಡಿಎಂಕೆ ವಿರುದ್ಧ ನಟ ವಿಜಯ್ 2024ರಲ್ಲಿ ಈ ಪಕ್ಷವನ್ನು ಪ್ರಾರಂಭಿಸಿದ್ದರು.

ರಾಜಕೀಯ ಗುರು ಮಮತಾ ಬ್ಯಾನರ್ಜಿ ವಿರುದ್ಧವೇ ತೊಡೆ ತಟ್ಟಿದ ಸುವೇಂದು ಅಧಿಕಾರಿ

ತಮಿಳುನಾಡು ಚುನಾವಣೆಯಲ್ಲಿ ಡಿಎಂಕೆ, ಎಐಎಡಿಎಂಕೆಗೆ ಟಿವಿಕೆ ಹೊಡೆತ

ಆಡಳಿತಾರೂಢ ಡಿಎಂಕೆ ಮತ್ತು ಪ್ರಮುಖ ವಿರೋಧ ಪಕ್ಷ ಎಐಎಡಿಎಂಕೆಗೆ ಟಿವಿಕೆ ದೊಡ್ಡ ಹೊಡೆತ ನೀಡುವ ಸಾಧ್ಯತೆ ಇದೆ. ರಾಜ್ಯದ 234 ಸ್ಥಾನಗಳಲ್ಲಿ ವಿಜಯ್ ಅವರ ಪಕ್ಷವು ಪ್ರಸ್ತುತ 107 ಸ್ಥಾನಗಳಲ್ಲಿ ಮುಂದಿದೆ. ಎಐಎಡಿಎಂಕೆ 47 ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸುತ್ತಿದ್ದರೆ, ಡಿಎಂಕೆ 35 ಸ್ಥಾನಗಳಲ್ಲಿ ಮುಂದಿದೆ.

ಚುನಾವಣಾ ಆಯೋಗದ ಅಂಕಿ-ಅಂಶಗಳ ಪ್ರಕಾರ, ಡಿಎಂಕೆ ಪ್ರಧಾನ ಕಾರ್ಯದರ್ಶಿ ದುರೈಮುರುಗನ್, ತಂಗಂ ತೆನ್ನರಸು, ಟಿಆರ್‌ಬಿ ರಾಜಾ, ಮಾ ಸುಬ್ರಮಣಿಯನ್, ಪಿ.ಕೆ. ಶೇಕರ್ ಬಾಬು, ಇವಿ ವೇಲು, ಕೆ.ಎನ್. ನೆಹರೂ, ಗೇತಾ ಜೀವನ್ ಮತ್ತು ಕೆಕೆಎಸ್‌ಎಸ್‌ಆರ್ ರಾಮಚಂದ್ರನ್ ಸೇರಿದಂತೆ ಹತ್ತಕ್ಕೂ ಹೆಚ್ಚು ತಮಿಳುನಾಡು ಸಚಿವರು ಹಿಂದೆ ಬಿದ್ದಿದ್ದಾರೆ.

ಇದು ಹೀಗೆಯೇ ಮುಂದುವರಿದರೆ, ತಾವು ಸ್ಪರ್ಧಿಸಿರುವ ತಿರುಚಿ (ಪೂರ್ವ) ಮತ್ತು ಪೆರಂಬೂರ್ ಎಂಬ ಎರಡೂ ಕ್ಷೇತ್ರಗಳಲ್ಲಿ ಮುನ್ನಡೆ ಸಾಧಿಸಿರುವ 51 ವರ್ಷದ ವಿಜಯ್, ತಮಿಳುನಾಡಿನ ಇತಿಹಾಸದಲ್ಲೇ ಅತಿದೊಡ್ಡ ರಾಜಕೀಯ ಸಂಚಲನವಾಗಿಸಲಿದ್ದಾರೆ. ವಿಜಯ್ ಅವರ ಟಿವಿಕೆ 118 ಸ್ಥಾನಗಳ ಬಹುಮತದ ಗಡಿಯನ್ನು ದಾಟಿದರೆ ಇತಿಹಾಸ ಸೃಷ್ಟಿಸುತ್ತದೆ. ಸ್ಥಾಪನೆಯಾದ ಕೇವಲ ಎರಡು ವರ್ಷಗಳಲ್ಲಿ ಯಾವುದೇ ಪಕ್ಷವು ತಮಿಳುನಾಡಿನಲ್ಲಿ ಅಧಿಕಾರ ವಹಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿಲ್ಲ.