ಇಂದೋರ್: ಮಧ್ಯಪ್ರದೇಶದ ಇಂದೋರ್‌ನಲ್ಲಿ ಮೂರು ವರ್ಷದ ಜೈನ ಬಾಲಕಿಗೆ ಸಂತಾರ (Santhara Ritual ) ನೀಡಲಾದ ಪ್ರಕರಣವೊಂದು ಇದೀಗ ಬೆಳಕಿಗೆ ಬಂದಿದೆ. ಬಾಲಕಿಗೆ ವಿಯಾನಾ ಜೈನ್‌ಗೆ ಒಂದು ವರ್ಷದ ಹಿಂದೆ ಗೆಡ್ಡೆ ಇರುವುದು ಪತ್ತೆಯಾಗಿತ್ತು. ಆಕೆ ಮುಂಬೈನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಳು. ಜೈನ ಮುನಿಗಳ ಸಲಹೆಯ ಮೇರೆಗೆ ಮಾರ್ಚ್ 21 ರಂದು ಬಾಲಕಿಯ ಪೋಷಕರು ಆಕೆಗೆ ಸಂತಾರ ಸಂಪ್ರದಾಯವನ್ನು ಪಾಲಿಸಿದ್ದಾರೆ. ಧಾರ್ಮಿಕ ಪ್ರಕ್ರಿಯೆ ಮುಗಿದ 10 ನಿಮಿಷಗಳ ನಂತರ ಬಾಲಕಿ ಮೃತಪಟ್ಟಿದ್ದಾಳೆ ಎಂದು ತಿಳಿದು ಬಂದಿದೆ. ಇದು ಜಗತ್ತಿನ ಅತ್ಯಂತ ಕಿರಿಯ ಸಂತಾರ ಅಥವಾ ಸಲ್ಲೇಖನ ಎಂದು ಹೇಳಲಾಗಿದೆ.
ಐಟಿ ವೃತ್ತಿಪರರಾದ ಪಿಯೂಷ್ ಮತ್ತು ವರ್ಷಾ ಜೈನ್ ಅವರ ಏಕೈಕ ಪುತ್ರಿ ವಿಯಾನಾಗೆ ಡಿಸೆಂಬರ್ 2024 ರಲ್ಲಿ ಮೆದುಳಿನ ಗೆಡ್ಡೆ ಇರುವುದು ಪತ್ತೆಯಾಯಿತು. ಮುಂಬೈನಲ್ಲಿ ಶಸ್ತ್ರಚಿಕಿತ್ಸೆ ಸೇರಿದಂತೆ ಚಿಕಿತ್ಸೆ ಪಡೆದ ನಂತರ ಅವರ ಸ್ಥಿತಿ ಸಂಪೂರ್ಣವಾಗಿ ಹದಗೆಟ್ಟಿತ್ತು. ಈ ವರ್ಷದ ಮಾರ್ಚ್ ವೇಳೆಗೆ ಕಾಯಿಲೆ ಉಲ್ಬಣಗೊಂಡಿತು. ಮಾರ್ಚ್ 21 ರಂದು, ಇಂದೋರ್‌ನಲ್ಲಿ ಆಧ್ಯಾತ್ಮಿಕ ನಾಯಕ ರಾಜೇಶ್ ಮುನಿ ಮಹಾರಾಜ್ ಅವರನ್ನು ಭೇಟಿ ಮಾಡಿದಾಗ, ಬಾಲಕಿಗೆ "ಸಾಂತರ"ವನ್ನು ನೀಡಲಾಯಿತು - ಇದು ಸಾವಿಗೆ ಕಾರಣವಾಗುವ ತ್ಯಾಗದ ಧಾರ್ಮಿಕ ಪ್ರತಿಜ್ಞೆಯಾಗಿದೆ.
ಗುರುದೇವ್ ನಮಗೆ ಸ್ಫೂರ್ತಿ ನೀಡಿದರು ಮತ್ತು ಎಲ್ಲವನ್ನೂ ವಿವರಿಸಿದರು. ನಮ್ಮ ಒಪ್ಪಿಗೆಯೊಂದಿಗೆ, 'ಸಾಂತರ' ಮಾಡಲಾಯಿತು, ಮತ್ತು 10 ನಿಮಿಷಗಳ ನಂತರ, ವಿಯಾನಾ ಮೃತಪಟ್ಟಳು ಎಂದು ಆಕೆಯ ತಾಯಿ ವರ್ಷಾ ಜೈನ್ ತಿಳಸಿದ್ದಾರೆ. ನಾವು ಅವಳ 'ಸಾಂತರ'ವನ್ನು ಮಾಡಿಸಬೇಕೆಂಬ ಉದ್ದೇಶದಿಂದ ಹೋಗಿರಲಿಲ್ಲ, ಆದರೆ ಗುರೂಜಿ ಅವಳ ಸ್ಥಿತಿ ಗಂಭೀರವಾಗಿದೆ ಎಂದು ಹೇಳಿ ಅದನ್ನು ಸೂಚಿಸಿದರು. ಕುಟುಂಬದ ಎಲ್ಲರೂ ಒಪ್ಪಿದರು" ಎಂದು ಆಕೆಯ ತಂದೆ ಪಿಯೂಷ್ ಜೈನ್ ಹೇಳಿದರು. ಆಕೆ 'ಸಾಂತರ' ವ್ರತ ಸ್ವೀಕರಿಸಿದ ಅತ್ಯಂತ ಕಿರಿಯ ವ್ಯಕ್ತಿ ಎಂದು ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್‌ನಲ್ಲಿ ದಾಖಲಾಗಿದೆ.
ಸದ್ಯ ಆಕೆಗೆ ಸಂತಾರ ಮಾಡಿಸಿರುವುದರ ಬಗ್ಗೆ ಕಾನೂನು ತಜ್ಞರು ಕಳವಳ ವ್ಯಕ್ತಪಡಿಸಿದ್ದಾರೆ. ಆಗಸ್ಟ್ 2015 ರಲ್ಲಿ, ರಾಜಸ್ಥಾನ ಹೈಕೋರ್ಟ್ 'ಸಾಂತರ' ಕಾನೂನುಬಾಹಿರ ಎಂದು ತೀರ್ಪು ನೀಡಿ, ಭಾರತೀಯ ದಂಡ ಸಂಹಿತೆಯ ಸೆಕ್ಷನ್ 306 ರ ಅಡಿಯಲ್ಲಿ ಆತ್ಮಹತ್ಯೆಗೆ ಸಮನಾಗಿದೆ ಎಂದು ಹೇಳಿತ್ತು. ಘಟನೆಯ ಬಗ್ಗೆ ತಮಗೆ ಮಾಹಿತಿ ಇರಲಿಲ್ಲ ಎಂದು ಇಂದೋರ್ ಪೊಲೀಸರು ತಿಳಿಸಿದ್ದಾರೆ.
ಈ ಸುದ್ದಿಯನ್ನೂ ಓದಿ: Hindalga Jail: ಹಿಂಡಲಗಾ ಜೈಲಿನ ಮತ್ತೊಂದು ಕರ್ಮಕಾಂಡ ಬಟಾಬಯಲು; ಗಾಂಜಾಕ್ಕಾಗಿ ಜೈಲರ್‌ ಮೇಲೆ ಕೈದಿಯಿಂದ ಡೆಡ್ಲಿ ಅಟ್ಯಾಕ್‌
ಏನಿದು ಸಂತಾರ?
ಸಲ್ಲೇಖನ ಎಂದೂ ಕರೆಯಲ್ಪಡುವ ಸಂತಾರವು ಜೈನ ಧಾರ್ಮಿಕ ಆಚರಣೆಯಾಗಿದ್ದು, ಇದರಲ್ಲಿ ಒಬ್ಬ ವ್ಯಕ್ತಿಯು ಸ್ವಯಂಪ್ರೇರಣೆಯಿಂದ ಉಪವಾಸದ ಮೂಲಕ ತಮ್ಮ ಜೀವನವನ್ನು ಕೊನೆಗೊಳಿಸಲು ಆಯ್ಕೆ ಮಾಡಿಕೊಳ್ಳುತ್ತಾನೆ. ಈ ಅಭ್ಯಾಸದಲ್ಲಿ ಆಹಾರ ಮತ್ತು ನೀರನ್ನು ಕ್ರಮೇಣವಾಗಿ ತ್ಯಜಿಸುವುದನ್ನು ಒಳಗೊಂಡಿರುತ್ತದೆ ಮತ್ತು ಆತ್ಮವನ್ನು ಶುದ್ಧೀಕರಿಸುವ ಮತ್ತು ಮುಕ್ತಿಯನ್ನು ಪಡೆಯುವ ಮಾರ್ಗವಾಗಿದೆ. ಕ್ರಿ.ಶ. 4 ನೇ ಶತಮಾನದ ಸುಮಾರಿಗೆ ಬಂದ ಸಮಂತಭದ್ರನ ರತ್ನಕರಂದ ಶ್ರಾವಕಚಾರ ಎಂಬ ಪ್ರಮುಖ ಜೈನ ಗ್ರಂಥವು ಸಂತಾರ ವ್ರತ ಮತ್ತು ಅದನ್ನು ಹೇಗೆ ಅನುಸರಿಸಬೇಕು ಎಂಬುದರ ಸ್ಪಷ್ಟ ವಿವರಣೆಯನ್ನು ನೀಡುತ್ತದೆ.