ಅಸ್ಸಾಂನ ಟೀ ಗಾರ್ಡನ್ಗೆ ನರೇಂದ್ರ ಮೋದಿ ಭೇಟಿ; ಕಾರ್ಮಿಕರೊಂದಿಗೆ ಚಹಾ ಎಲೆ ಕಿತ್ತು, ಸೆಲ್ಫಿಗೆ ಪೋಸ್ ನೀಡಿದ ಪ್ರಧಾನಿ
ʼʼಚಹಾ ಅಸ್ಸಾಂನ ಆತ್ಮ. ಇಲ್ಲಿನ ಚಹಾ ಜಗತ್ತಿನಾದ್ಯಂತ ಪಸರಿಸಿದೆʼʼ-ಅಸ್ಸಾಂನ ಚಹಾ ತೋಟಕ್ಕೆ ಭೇಟಿ ನೀಡಿದ ಪ್ರಧಾನಿ ನರೇಂದ್ರ ಮೋದಿ ಉದ್ಘರಿಸಿದ ಪರಿ ಇದು. ಏಪ್ರಿಲ್ 1ರಂದು ಅಸ್ಸಾಂನ ದಿಬ್ರುಗಢಕ್ಕೆ ತೆರಳಿದ ಮೋದಿ ಅಲ್ಲಿನ ಚಹಾ ತೋಟಕ್ಕೆ ಭೇಟಿ ನೀಡಿ ಒಂದಷ್ಟು ಹೊತ್ತು ಕಳೆದರು. ಅಲ್ಲಿನ ಕಾರ್ಮಿಕರೊಂದಿಗೆ ಸೇರಿ ತಾವೂ ಚಹಾ ಎಲೆ ಕಿತ್ತರು. ಜತೆಗೆ ಅವರೊಂದಿಗೆ ಮಾತುಕತೆ ನಡೆಸಿದರು. ಹರಟೆ ಹೊಡೆದರು. ಸೆಲ್ಫಿಗೆ ಪೋಸ್ ನೀಡಿದರು. ಮಾತ್ರವಲ್ಲ ಅಸ್ಸಾಂನ ಸಾಂಪ್ರದಾಯಿಕ ಹಾಡಿಗೆ ಕಿವಿಯಾದರು, ಜಾನಪದ ನೃತ್ಯವನ್ನು ಆನಂದಿಸಿದರು. ಹೀಗೆ ಚಾಯ್ವಾಲಾ ಮೋದಿ ಚಹಾ ತೋಟದಲ್ಲಿ ಮಿಂಚು ಹರಿಸಿದರು.
ಅಸ್ಸಾಂನ ಚಹಾ ತೋಟದಲ್ಲಿ ಪ್ರಧಾನಿ ನರೇಂದ್ರ ಮೋದಿ -
ಸೋಶಿಯಲ್ ಮೀಡಿಯಾದಲ್ಲಿ ಫೋಟೊ, ವಿಡಿಯೊ ಹಂಚಿಕೊಂಡ ಮೋದಿ
ಅಸ್ಸಾಂನ ಚಹಾ ತೋಟದಲ್ಲಿ ಕಳೆದ ಕ್ಷಣವನ್ನು ನರೇಂದ್ರ ಮೋದಿ ತಮ್ಮ ಸೋಶಿಯಲ್ ಮೀಡಿಯಾ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ʼʼಇವತ್ತು ಬೆಳಗ್ಗೆ ದಿಬ್ರುಗಢದ ಚಹಾ ತೋಟಕ್ಕೆ ತೆರಳಿ ಅಲ್ಲಿ ಕೆಲಸ ಮಾಡುತ್ತಿದ್ದ ಮಹಿಳೆಯರೊಂದಿಗೆ ಮಾತುಕತೆ ನಡೆಸಿದೆ. ಇದೊಂದು ಅವಿಸ್ಮರಣೀಯ ಅನುಭವʼʼ ಎಂದು ಅವರು ಬರೆದುಕೊಂಡಿದ್ದಾರೆ.
ಸೆಲ್ಫಿ, ಹಾಡು, ಹರಟೆ
ದಿಬ್ರುಗಢ ಟೀ ಎಸ್ಟೇಟ್ಗೆ ಆಗಮಿಸಿದ ಪ್ರಧಾನಿಯನ್ನು ಕಂಡು ಕಾರ್ಮಿಕರು ಒಂದು ಕ್ಷಣ ಬೆರಗಾದರು. ಅವರೊಂದಿಗೆ ಬೆರೆತ ಮೋದಿ ತಾವು ಚಹಾ ಎಲೆಗಳನ್ನು ಕಿತ್ತು ಅವರಿಗೆ ನೆರವಾದರು. ಬಳಿಕ ಮೋದಿಯೊಂದಿಗ ಕಾರ್ಮಿಕರು ಸೆಲ್ಫಿ ಕ್ಲಿಕ್ಕಿಸಿಕೊಂಡರು. ಈ ವೇಳೆ ಅಸ್ಸಾಂನ ಸಾಂಪ್ರದಾಯುಕ ಹಾಡು, ಕುಣಿತಗಳ ಪ್ರದರ್ಶನವೂ ನಡೆಯಿತು.
ಚಾಯ್ವಾಲಾ
ಪ್ರಧಾನಿ ಮೋದಿ ಚಾಯ್ವಾಲಾ ಎಂದೇ ಪ್ರಸಿದ್ಧ. ಅವರು ಇದನ್ನೇ ಕಾರ್ಮಿಕರ ಜತೆ ಹಂಚಿಕೊಂಡರು. ʼʼನಾನೂ ಚಾಯ್ ವಾಲಾ. ನಿಮಗೆ ಗೊತ್ತಲ್ಲ? ನಾನು ಚಿಕ್ಕಂದಿನಲ್ಲಿ ಚಹಾ ಮಾರಾಟ ಮಾಡಿದ್ದೇನೆʼʼ ಎಂದು ಹೇಳಿದರು. ಸೆಲ್ಫಿ ತೆಗೆದ ಮಹಿಳೆ ಜತೆ, ʼʼಫೋಟೊ ಕ್ಲಿಕ್ಕಿಸುವುದರಲ್ಲಿ ನೀವು ಪರಿಣಿತರಾಗಿದ್ದೀರಿʼʼ ಎಂದು ಹೇಳಿ ಕಾಲೆಳೆದರು.
ಯೋಗ-ಕ್ಷೇಮ ವಿಚಾರಣೆ
ಚಹಾ ತೋಟದ ಕಾರ್ಮಿಕರ ಯೋಗ-ಕ್ಷೇಮ ವಿಚಾರಿಸಿದ ಮೋದಿ ಅವರ ಮಕ್ಕಳ ಬಗ್ಗೆಯೂ ಕೇಳಿ ತಿಳಿದುಕೊಂಡರು. ಅವರು ಉನ್ನತ ಹುದ್ದೆ ಅಲಂಕರಿಸುವಂತಾಗಲಿ ಎಂದು ಹಾರೈಸಿದರು.
ನೀವು ಗುರು ಇದ್ದಂತೆ
ಇದೇ ವೇಳೆ ಚಹಾ ಎಲೆ ಕೀಳಲು ಹೇಳಿಕೊಟ್ಟ ಮಹಿಳೆಯನ್ನು ಮೋದಿ ಹೊಗಳಿದರು. ʼʼನೀವು ನನಗೆ ಗುರುಗಳಿದ್ದಂತೆʼʼ ಎಂದರು.
ಅಸ್ಸಾಂನಲ್ಲಿ ಮಿಂಚಿನ ಪ್ರಚಾರ
ಅಸ್ಸಾಂನಲ್ಲಿ ಚುನಾವಣೆ ಘೋಷಣೆಯಾಗಿದ್ದು, ರಾಜಕೀಯ ಚಟುವಟಿಕೆ ಬಿರುಸಾಗಿದೆ. ಈ ಹಿನ್ನೆಲೆಯಲ್ಲಿ ಮೋದಿ ಬಿಜೆಪಿ ಪರ ಪ್ರಚಾರ ನಡೆಸಲು ಅಸ್ಸಾಂಗೆ ಅಗಮಿಸಿದ್ದರು. 126 ಕ್ಷೇತ್ರಗಳ ಅಸ್ಸಾಂ ವಿಧಾನಸಭೆಗೆ ಏಪ್ರಿಲ್ 9ರಂದು ಮತದಾನ ನಡೆಯಲಿದ್ದು, ಮೇ 4ರಂದು ಫಲಿತಾಂಶ ಹೊರ ಬೀಳಲಿದೆ.