ಗ್ರಾಹಕರಲ್ಲಿ ಡಿಜಿಟಲ್ ಸಾಕ್ಷರತೆಗೆ ‘ಸಬಲೀಕೃತ ಗ್ರಾಹಕರಾಗಿರಿ’ ಅಭಿಯಾನ

ನವದೆಹಲಿ: ಗ್ರಾಹಕರಲ್ಲಿ ಡಿಜಿಟಲ್ ಸಾಕ್ಷರತೆ ಮೂಡಿಸಲು ಕೇಂದ್ರ ಗ್ರಾಹಕ ವ್ಯವಹಾರಗಳ ಇಲಾಖೆ ಡಿಜಿಟಲ್ ಅಲ್ಲಿ ಪ್ರಸಿದ್ಧಿ ಪಡೆದಿರುವ ಮೆಟಾ ಸಹಯೋಗದಲ್ಲಿ ‘ಸಬಲೀಕೃತ ಗ್ರಾಹಕರಾಗಿರಿ’ ಅಭಿಯಾನ ಆರಂಭಿಸಿದೆ. ಕೇಂದ್ರ ಗ್ರಾಹಕ ವ್ಯವಹಾರಗಳ ಇಲಾಖೆ ಸಚಿವ ಪ್ರಲ್ಹಾದ್‌ ಜೋಶಿ (Pralhad Joshi) ಮತ್ತು ಮೆಟಾದ ಮುಖ್ಯ ಜಾಗತಿಕ ವ್ಯವಹಾರಗಳ ಅಧಿಕಾರಿ ಜೋಯಲ್ ಕಪ್ಲಾನ್ ಅವರು ದೆಹಲಿಯಲ್ಲಿ ಇಂದು ʼಸಬಲೀಕೃತ ಗ್ರಾಹಕರಾಗಿರಿʼ ಅಭಿಯಾನದ ಹೊಸ ಸಹಯೋಗವನ್ನು ಘೋಷಿಸಿದರು. 'ಜಾಗೋ ಗ್ರಾಹಕ ಜಾಗೋ' ಅಡಿಯಲ್ಲಿ ಡಿಜಿಟಲ್ ಸಾಕ್ಷರತಾ ಉಪಕ್ರಮಗಳ ಮೂಲಕ ಗ್ರಾಹಕರನ್ನು ಸಬಲೀಕರಣಗೊಳಿಸಲು ಮತ್ತು ಗ್ರಾಹಕರಿಗೆ ನ್ಯಾಯಬದ್ಧ ರಕ್ಷಣೆ ಒದಗಿಸಲು ಗ್ರಾಹಕ ಇಲಾಖೆ ಈ ಹೊಸ ಅಭಿಯಾನ ಹಾಕಿಕೊಂಡಿದೆ.

ಮೆಟಾ ಪಾಲುದಾರಿಕೆ ಉದ್ಘಾಟನೆ ವೇಳೆ ಸಚಿವ ಪ್ರಲ್ಹಾದ್‌ ಜೋಶಿ ಮಾತನಾಡಿ, ನಾಗರಿಕರು ಡಿಜಿಟಲ್, ಆನ್‌ಲೈನ್‌ ವಂಚನೆಯಿಂದ ತಮ್ಮನ್ನು ರಕ್ಷಿಸಿಕೊಳ್ಳಲು ಅಗತ್ಯ ಸಾಧನ ಮತ್ತು ಜ್ಞಾನ ನೀಡಲು ಮೆಟಾ ಸಹಯೋಗದಲ್ಲಿ ʼಸಬಲೀಕೃತ ಗ್ರಾಹಕರಾಗಿರಿʼ ಅಭಿಯಾನ ನಡೆಸುತ್ತಿದ್ದು, ದೇಶದ ದೂರದ ಪ್ರದೇಶಗಳನ್ನೂ ತಲುಪುತ್ತವೆ ಎಂದು ಹೇಳಿದರು.

ಸುಸ್ಥಿರ ಮತ್ತು ಸುರಕ್ಷಿತ ಡಿಜಿಟಲ್ ಅನುಭವಕ್ಕೆ ಗ್ರಾಹಕರಲ್ಲಿ ಜಾಗೃತಿ ಪ್ರಮುಖವಾಗಿದೆ. ಅದರಂತೆ ಈ ಅಭಿಯಾನವು ಗ್ರಾಹಕ ರಕ್ಷಣಾ ಕ್ರಮಗಳನ್ನು ಬಲಪಡಿಸುತ್ತದೆ ಮತ್ತು ಭಾರತೀಯ ಗ್ರಾಹಕರನ್ನು ಸಬಲೀಕರಣಗೊಳಿಸುವ ನಮ್ಮ ಬದ್ಧತೆಯನ್ನು ಬಲಪಡಿಸುತ್ತದೆ ಎಂದು ಪ್ರತಿಪಾದಿಸಿದರು.

'ಸಬಲೀಕೃತ ಗ್ರಾಹಕರಾಗಿರಿ' ಮೆಟಾ ಜಂಟಿ ಅಭಿಯಾನವು ಗ್ರಾಹಕರಿಗೆ ಬರುವ ಆನ್‌ಲೈನ್ ಬೆದರಿಕೆಗಳನ್ನು ಗುರುತಿಸುವುದು ಮತ್ತು ಬಲವಾದ ಪಾಸ್‌ವರ್ಡ್‌ಗಳ ಬಳಕೆ, ಆನ್‌ಲೈನ್ ಮಾಹಿತಿ ಪರಿಶೀಲನೆ ಮತ್ತು ಅನುಮಾನಾಸ್ಪದ ಚಟುವಟಿಕೆಯನ್ನು ವರದಿ ಮಾಡುವುದು ಸೇರಿದಂತೆ ಆರೋಗ್ಯಕರ ಆನ್‌ಲೈನ್ ಅಭ್ಯಾಸಗಳನ್ನು ಉತ್ತೇಜಿಸುತ್ತದೆ. ಈ ನಿಟ್ಟಿನಲ್ಲಿ ಭಾರತೀಯರಿಗೆ ಶಿಕ್ಷಣ ನೀಡಲು ಪ್ರಯತ್ನಿಸುತ್ತದೆ ಎಂದು ತಿಳಿಸಿದರು.

ಈ ವೇಳೆ ಬೆಂಗಳೂರಿನ ನ್ಯಾಷನಲ್ ಲಾ ಸ್ಕೂಲ್ ಆಫ್ ಇಂಡಿಯಾ ಯೂನಿವರ್ಸಿಟಿಯಲ್ಲಿ ವಿಭಾಗವು ಸ್ಥಾಪಿಸಿದ ಮತ್ತು ಮೆಟಾ ಬೆಂಬಲಿಸಿದ ಅಧ್ಯಕ್ಷರು ಬಾಂಬೆ ಐಐಟಿಯೊಂದಿಗೆ ನಿಯೋಜಿಸಲಾದ ಜಂಟಿ ಯೋಜನೆ ಬಗ್ಗೆ ಕೇಂದ್ರ ಸಚಿವರ ಗಮನ ಸೆಳೆದರು.

ನಾಗರಿಕ-ಕೇಂದ್ರಿತ ಚಾಟ್‌ಬಾಟ್

'ಗ್ರಾಹಕ್‌ ನ್ಯಾಯ್' ಅನ್ನು ರಚಿಸುವಲ್ಲಿ ಮೆಟಾದ ದೊಡ್ಡ ಭಾಷಾ ಮಾದರಿಯಾದ ಲಾಮಾ 2 ಅನ್ನು ಬಳಸಿಕೊಳ್ಳುವ ಕಾರ್ಯಸಾಧ್ಯತೆ ಬಗ್ಗೆ ಈ ಯೋಜನೆ ಪರಿಶೋಧಿಸುತ್ತದೆ. 'ಚಾಟ್‌ಬಾಟ್' ಗ್ರಾಹಕ ಹಕ್ಕುಗಳ ಮಾಹಿತಿಗೆ ಪ್ರವೇಶ ಹೆಚ್ಚಿಸುತ್ತದೆ. ಇದು ದೂರು ಸಲ್ಲಿಸಲು ಮತ್ತು ಹೆಚ್ಚು ಪರಿಣಾಮಕಾರಿಯಾಗಿ ಪರಿಹರಿಸಲು ಒಂದು ಪರಿಹಾರ ಸಾಧನವಾಗಿದೆ. ಚಾಟ್‌ಬಾಟ್ ಈಗ ಕ್ಲೋಸ್ಡ್ ಗ್ರೂಪ್ ಬೀಟಾ ಪರೀಕ್ಷೆಗೆ ಸಿದ್ಧವಾಗಿದೆ ಮತ್ತು ಅದರ ಪರೀಕ್ಷೆ ಪೂರ್ಣಗೊಂಡ ನಂತರ ಅಧಿಕೃತವಾಗಿ ಪ್ರಾರಂಭಿಸಲಾಗುತ್ತದೆ ಮತ್ತು DoCA ಯ ವೆಬ್‌ಸೈಟ್‌ಗೆ ಸಂಯೋಜಿಸಲಾಗುತ್ತದೆ.

ಗ್ರಾಹಕ ವ್ಯವಹಾರಗಳ ಇಲಾಖೆ ಕಾರ್ಯದರ್ಶಿ ನಿಧಿ ಖರೆ ಮಾತನಾಡಿ, ಗ್ರಾಹಕರ ಹಕ್ಕುಗಳನ್ನು ಎತ್ತಿ ಹಿಡಿಯುವ ಮತ್ತು ರಕ್ಷಿಸುವಲ್ಲಿ ಸರ್ಕಾರ ದೃಢವಾದ ಬದ್ಧತೆ ತೋರುತ್ತಿದೆ ಎಂದು ಹೇಳಿದರು.

ʼತಂತ್ರಜ್ಞಾನ ತುಂಬಾ ವೇಗದಲ್ಲಿ ಪ್ರಗತಿ ಹೊಂದುತ್ತಿದ್ದು, ಜನರಿಗೆ ಆನ್‌ಲೈನ್‌ ಸುರಕ್ಷೆ ಕಷ್ಟಕರವಾಗಿದೆ. ಹೀಗಾಗಿ ಮೆಟಾದ ಪಾಲುದಾರಿಕೆಯೊಂದಿಗೆ ಹೊಸ ಅಭಿಯಾನ ಆರಂಭಿಸುತ್ತಿದ್ದೇವೆʼ ಎಂದು ಮೆಟಾದ ಮುಖ್ಯ ಜಾಗತಿಕ ವ್ಯವಹಾರಗಳ ಅಧಿಕಾರಿ ಜೋಯಲ್ ಕಪ್ಲಾನ್ ಹೇಳಿದರು.

ಗ್ರಾಹಕರು ದಾರಿ ತಪ್ಪಿಸುವ ಜಾಹೀರಾತು, ಟೆಲಿ-ಮಾರ್ಕೆಟಿಂಗ್, ನೇರ ಮಾರಾಟ, ಇ-ಕಾಮರ್ಸ್ ಮುಂತಾದ ಅನ್ಯಾಯದ ವ್ಯಾಪಾರ ಮತ್ತು ಅನೈತಿಕ ವ್ಯವಹಾರ ಪದ್ಧತಿಗಳ ಹೊಸ ರೂಪಗಳಿಗೆ ಗುರಿಯಾಗಿದ್ದಾರೆ ಅಂಥ ಗ್ರಾಹಕರಿಗೆ ಆಗುವ ಹಾನಿ ತಡೆಗಟ್ಟಲು ಸೂಕ್ತ ಮತ್ತು ತ್ವರಿತ ಕಾರ್ಯನಿರ್ವಾಹಕ ಮಧ್ಯಸ್ಥಿಕೆ ಬೇಕಾಗುತ್ತವೆ ಎಂದು ಅಭಿಪ್ರಾಯಿಸಿದರು.

ಕೇಂದ್ರ ಗ್ರಾಹಕ ಸಂರಕ್ಷಣಾ ಪ್ರಾಧಿಕಾರ

ಗ್ರಾಹಕರ ಹಕ್ಕುಗಳನ್ನು ಉತ್ತೇಜಿಸಲು, ರಕ್ಷಿಸಲು ಮತ್ತು ಜಾರಿಗೊಳಿಸಲು, ಗ್ರಾಹಕ ಸಂರಕ್ಷಣಾ ಕಾಯ್ದೆ 2019ರ ಸೆಕ್ಷನ್ 10ರ ಅಡಿಯಲ್ಲಿ ಕೇಂದ್ರ ಗ್ರಾಹಕ ಸಂರಕ್ಷಣಾ ಪ್ರಾಧಿಕಾರ (CCPA) ಎಂಬ ಕಾರ್ಯನಿರ್ವಾಹಕ ಸಂಸ್ಥೆಯನ್ನು ಸ್ಥಾಪಿಸಿದ್ದು, ಅದೂ ಗ್ರಾಹಕರ ನೆರವಿಗೆ ಬರುತ್ತದೆ.

₹50 ಲಕ್ಷ ದಂಡ ವಿಧಿಸುತ್ತದೆ ಸಿಸಿಪಿಎ

ಸೆಕ್ಷನ್ 19ರ ಪ್ರಕಾರ CCPA ಕೇಂದ್ರ ಸರ್ಕಾರದಿಂದ ಮಾಹಿತಿ, ದೂರು ಅಥವಾ ನಿರ್ದೇಶನಗಳನ್ನು ಪಡೆದಾಗ ಅಥವಾ ತನ್ನದೇ ಆದ ಮನವಿ ಮೇರೆಗೆ, ಗ್ರಾಹಕ ಹಕ್ಕುಗಳ ಉಲ್ಲಂಘನೆ, ಅನ್ಯಾಯದ ವ್ಯಾಪಾರ ಪದ್ಧತಿ, ಯಾವುದೇ ಸುಳ್ಳು ಅಥವಾ ದಾರಿ ತಪ್ಪಿಸುವ ಜಾಹೀರಾತು ಎಂಬುದು ಕಂಡುಬಂದರೆ ಮಹಾ ನಿರ್ದೇಶಕರಿಂದ ತನಿಖೆ ನಡೆಸಲಾಗುತ್ತದೆ. ಸೆಕ್ಷನ್ 20 ಮತ್ತು 21ರ ಅಡಿಯಲ್ಲಿ ₹ 50 ಲಕ್ಷವರೆಗೆ ದಂಡ ವಿಧಿಸುವ ಅಧಿಕಾರವನ್ನು CCPA ಹೊಂದಿದೆ.

ಈ ಸುದ್ದಿಯನ್ನೂ ಓದಿ | Karnataka Weather: ರಾಜ್ಯದಲ್ಲಿ ಬಿರುಬಿಸಿಲು; ಕಲಬುರಗಿಯಲ್ಲಿ 40 ಡಿ.ಸೆ. ಗಡಿ ದಾಟಿದ ಉಷ್ಣಾಂಶ!

ಗ್ರಾಹಕ ಇಲಾಖೆ ʼಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ಸೆಲೆಬ್ರಿಟಿಗಳು, ಪ್ರಭಾವಿಗಳು ಮತ್ತು ವರ್ಚುವಲ್ ಪ್ರಭಾವಿಗಳಿಗೆ ಅನುಮೋದನೆಗಳ ಜ್ಞಾನʼ ಎಂಬ ಕಿರು ಪುಸ್ತಕವನ್ನು ಸಹ ಪ್ರಕಟಿಸಿದೆ. ಈಗ ಗ್ರಾಹಕ ನ್ಯಾಯ ಚಾಟ್‌ಬಾಕ್ಸ್ ಮೂಲಕ ಗ್ರಾಹಕರ ಕುಂದುಕೊರತೆ ಪರಿಹಾರಕ್ಕಾಗಿ 'ಸಬಲೀಕೃತ ಗ್ರಾಹಕರಾಗಿರಿ' ಅಭಿಯಾನದ ಮೂಲಕ ಡಿಜಿಟಲ್ ಸಾಕ್ಷರತೆ ಹೆಚ್ಚಿಸುವಲ್ಲಿ ಮಹತ್ತರ ಹೆಜ್ಜೆಯಿರಿಸಿದೆ.