ಬೆಂಗಳೂರು: ಹಿಂದೂ ಧರ್ಮದಲ್ಲಿ ಶನಿವಾರವನ್ನು ಶನಿ ದೇವರ ಆರಾಧನೆಗೆ ಅತ್ಯಂತ ಪವಿತ್ರ ದಿನವೆಂದು ಪರಿಗಣಿಸಲಾಗುತ್ತದೆ. ಈ ದಿನ ಭಕ್ತಿಭಾವದಿಂದ ಶನಿ ದೇವರನ್ನು ಪೂಜಿಸಿ, ಕೆಲವು ಧಾರ್ಮಿಕ ನಿಯಮಗಳನ್ನು ಪಾಲಿಸಿದರೆ ಶನಿದೇವನ ಕೃಪೆ ದೊರೆಯುತ್ತದೆ ಹಾಗೂ ಜೀವನದಲ್ಲಿನ ಅಡೆತಡೆಗಳು ಮತ್ತು ಕಷ್ಟಗಳು ದೂರವಾಗುತ್ತವೆ ಎಂಬ ನಂಬಿಕೆಯಿದೆ. ಅನೇಕ ಭಕ್ತರು ಈ ದಿನ ಉಪವಾಸ ಆಚರಿಸಿ, ವಿಶೇಷ ಪೂಜೆ ಮತ್ತು ದಾನಧರ್ಮಗಳನ್ನು ನೆರವೇರಿಸುತ್ತಾರೆ. ವಿಶೇಷವಾಗಿ ಆಷಾಢ ಮಾಸದ ಶನಿವಾರಗಳಲ್ಲಿ ಜ್ಯೋತಿಷ್ಯ ಶಾಸ್ತ್ರದ ಸಲಹೆಯಂತೆ(Astro Tips) ಶನಿ ಆರಾಧನೆಗೆ ಹೆಚ್ಚಿನ ಮಹತ್ವವಿದ್ದು, ಈ ದಿನ ಯಾವ ಕಾರ್ಯಗಳನ್ನು ಮಾಡಬೇಕು ಮತ್ತು ಯಾವವುಗಳನ್ನು ತಪ್ಪಿಸಬೇಕು ಎಂಬುದನ್ನು ತಿಳಿದು ಪಾಲಿಸುವುದು ಶುಭಕರವೆಂದು ಹೇಳಲಾಗುತ್ತದೆ.
ಶನಿವಾರ ಉಪವಾಸ
ಶನಿವಾರ ಉಪವಾಸ ಮಾಡುವವರು ಗಮನಿಸಬೇಕಾದದ್ದು ಶನಿ ದೇವರ ಆಶೀರ್ವಾದಕ್ಕಾಗಿ ಶನಿವಾರ ಉಪವಾಸ ಮಾಡುವವರು ಒಂದು ದಿನ ಮುಂಚಿತವಾಗಿಯೇ ಸಾತ್ವಿಕ ಆಹಾರ ಸೇವಿಸಬೇಕು. ಮಾಂಸಾಹಾರ, ಮದ್ಯಪಾನ ಹಾಗೂ ತಾಮಸಿಕ ಆಹಾರಗಳನ್ನು ತ್ಯಜಿಸುವುದು ಉತ್ತಮ. ಉಪವಾಸದ ದಿನ ಮನಸ್ಸು ಶಾಂತವಾಗಿರಿಸಿ, ದೇವರ ಸ್ಮರಣೆಯಲ್ಲಿ ಸಮಯ ಕಳೆಯುವುದು ಶುಭಕರ.
ಅರಳಿ ಮರಕ್ಕೆ ಪೂಜೆ ಮಾಡಿ
ಶನಿವಾರ ಬೆಳಿಗ್ಗೆ ಸ್ನಾನ ಮಾಡಿದ ಬಳಿಕ ಶನಿ ದೇವರನ್ನು ಸ್ಮರಿಸಿ ಅರಳಿ ಮರಕ್ಕೆ ನೀರನ್ನು ಅರ್ಪಿಸಬೇಕು. ಬಳಿಕ ಅರಳಿ ಮರಕ್ಕೆ ಏಳು ಬಾರಿ ಪ್ರದಕ್ಷಿಣೆ ಹಾಕಿ, ಏಳು ಸುತ್ತು ನೂಲು ಸುತ್ತಿ ಭಕ್ತಿಯಿಂದ ಪೂಜೆ ಸಲ್ಲಿಸುವುದು ಶುಭಕರವೆಂದು ನಂಬಲಾಗಿದೆ.
ಮನಸ್ಸು, ಮಾತು ಮತ್ತು ನಡೆ-ನುಡಿಯಲ್ಲಿ ಶುದ್ಧತೆ ಇರಲಿ
ಈ ದಿನ ಕೋಪ, ಸುಳ್ಳು, ಕಟುವಾದ ಮಾತುಗಳನ್ನು ದೂರವಿಟ್ಟು ಮನಸ್ಸು, ಮಾತು ಹಾಗೂ ಕಾರ್ಯಗಳಲ್ಲಿ ಶುದ್ಧತೆಯನ್ನು ಕಾಪಾಡಬೇಕು. ಉಪವಾಸ ಮಾಡುವವರು ಹಣ್ಣು ಮತ್ತು ಸಾತ್ವಿಕ ಆಹಾರ ಸೇವಿಸಿ, ಶನಿ ಮಹಾತ್ಮೆ ಅಥವಾ ಶನಿ ವ್ರತಕಥೆಯನ್ನು ಓದುವುದು ಅಥವಾ ಕೇಳುವುದು ಉತ್ತಮ. ಸಂಜೆ ಶನಿ ದೇವರಿಗೆ ಆರತಿ ಸಲ್ಲಿಸುವುದು ಸಹ ಶುಭಕರ.
ಶನಿ ದೇವರಿಗೆ ಇಷ್ಟವಾದ ವಸ್ತುಗಳನ್ನು ಅರ್ಪಿಸಿ
ಶನಿವಾರ ಶನಿ ದೇವರಿಗೆ ಕಪ್ಪು ಎಳ್ಳು, ಸಾಸಿವೆ ಎಣ್ಣೆ, ಕಪ್ಪು ಬಟ್ಟೆ ಹಾಗೂ ಕಬ್ಬಿಣದ ವಸ್ತುಗಳನ್ನು ಅರ್ಪಿಸುವುದು ವಿಶೇಷ ಫಲ ನೀಡುತ್ತದೆ ಎಂಬ ನಂಬಿಕೆ ಇದೆ. ಜೊತೆಗೆ ಕಂಬಳಿ ಅಥವಾ ಅಗತ್ಯವಿರುವವರಿಗೆ ದಾನ ಮಾಡುವುದರಿಂದ ಶನಿ ದೋಷಗಳು ನಿವಾರಣೆಯಾಗುತ್ತವೆ ಎಂದು ಹೇಳಲಾಗುತ್ತದೆ.
ಮಂತ್ರ ಹಾಗೂ ಸ್ತೋತ್ರ ಪಠಣಕ್ಕೆ ಮಹತ್ವ ನೀಡಿ
ಶನಿ ದೇವರ ಅನುಗ್ರಹಕ್ಕಾಗಿ ಶನಿ ಮಂತ್ರ, ಶನಿ ಸ್ತೋತ್ರ ಅಥವಾ ಶನಿ ಚಾಲೀಸಾವನ್ನು ಭಕ್ತಿಯಿಂದ ಪಠಿಸುವುದು ಒಳಿತು. ಸ್ನಾನದ ನೀರಿಗೆ ಒಂದು ಚಿಟಿಕೆ ಕೆಂಪು ಚಂದನ ಬೆರೆಸಿ ಸ್ನಾನ ಮಾಡುವುದೂ ಮಂಗಳಕರವೆಂದು ಪರಿಗಣಿಸಲಾಗಿದೆ. ಶನಿ ದೋಷ ನಿವಾರಣೆಗೆ ಶಕ್ತಿಗೆ ಅನುಗುಣವಾಗಿ ದಾನಧರ್ಮಗಳನ್ನು ಮಾಡುವುದೂ ಶುಭ ಫಲ ನೀಡುತ್ತದೆ ಎಂಬ ನಂಬಿಕೆ ಇದೆ.