ನವದೆಹಲಿ: ನ್ಯೂಜಿಲೆಂಡ್ ಪ್ರವಾಸದಲ್ಲಿರುವ ಭಾರತ ತಂಡ ಇದೀಗ ಎರಡು ಪಂದ್ಯಗಳ ಟೆಸ್ಟ್ ಸರಣಿಗೆ (IND vs NZ) ಸಜ್ಜಾಗುತ್ತಿದೆ. ಐದು ಪಂದ್ಯಗಳ ಟಿ20ಐ ಸರಣಿಯನ್ನು 2-3 ಅಂತರದಲ್ಲಿ ಹಾಗೂ ಐದು ಪಂದ್ಯಗಳ ಏಕದಿನ ಸರಣಿಯನ್ನು 1-3 ಅಂತರದಲ್ಲಿ ಗೆದ್ದಿರುವ ಟೀಮ್ ಇಂಡಿಯಾ, ಇದೀಗ ಟೆಸ್ಟ್ ಸರಣಿಯಲ್ಲೂ ಗೆಲುವಿನ ನಿರೀಕ್ಷೆಯಲ್ಲಿದೆ.
2025-27ರ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ಗೆ (WTC Final) ಅರ್ಹತೆ ಪಡೆಯುವ ದೃಷ್ಟಿಯಿಂದ ಈ ಸರಣಿ ಭಾರತಕ್ಕೆ ಅತ್ಯಂತ ಮಹತ್ವದ್ದಾಗಿದೆ. ಉಳಿದಿರುವ ಏಳು ಟೆಸ್ಟ್ ಪಂದ್ಯಗಳಲ್ಲಿ ಭಾರತ ಕನಿಷ್ಠ ಆರು ಪಂದ್ಯಗಳನ್ನು ಗೆಲ್ಲಬೇಕಾದ ಒತ್ತಡದಲ್ಲಿದೆ. ಇದರ ನಡುವೆ ಮಾಜಿ ಕ್ರಿಕೆಟಿಗ ದೊಡ್ಡ ಗಣೇಶ್ ಅವರು ನ್ಯೂಜಿಲೆಂಡ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯಕ್ಕೆ ತಮ್ಮ ನೆಚ್ಚಿನ ಪ್ಲೇಯಿಂಗ್ XI ಅನ್ನು ಪ್ರಕಟಿಸಿದ್ದಾರೆ.
2031ರ ಏಕದಿನ ವಿಶ್ವಕಪ್ಗೆ ಭಾರತಕ್ಕೆ ಆತಿಥ್ಯ ಹಕ್ಕು; 2029ರ ಚಾಂಪಿಯನ್ಸ್ ಟ್ರೋಫಿಗೂ ಆತಿಥ್ಯ!
ನಾಲ್ವರು ವೇಗದ ಬೌಲರ್ಗಳಿಗೆ ಅವಕಾಶ ನೀಡಲು ಸಲಹೆ
ದೊಡ್ಡ ಗಣೇಶ್ ತಮ್ಮ ಎಕ್ಸ್ ಖಾತೆಯಲ್ಲಿ ಭಾರತದ ಸಂಭಾವ್ಯ ಪ್ಲೇಯಿಂಗ್ XI ಅನ್ನು ಹಂಚಿಕೊಂಡಿದ್ದಾರೆ. ಅವರ ತಂಡದಲ್ಲಿ ನಾಲ್ವರು ವೇಗದ ಬೌಲರ್ಗಳು ಹಾಗೂ ಏಕೈಕ ಆಲ್ರೌಂಡರ್ ರವೀಂದ್ರ ಜಡೇಜಾಗೆ ಸ್ಥಾನ ನೀಡಿದ್ದಾರೆ. ಏಳು ಮಂದಿ ಪರಿಣಿತ ಬ್ಯಾಟರ್ಗಳೊಂದಿಗೆ ಕಣಕ್ಕಿಳಿಯಬೇಕು. 8ನೇ ಕ್ರಮಾಂಕದ ಬ್ಯಾಟರ್ ಸ್ಥಾನವನ್ನು ತ್ಯಜಿಸಿ ಮತ್ತೊಬ್ಬ ವೇಗದ ಬೌಲರ್ಗೆ ಅವಕಾಶ ನೀಡಬೇಕು ಎಂಬುದು ಅವರ ಅಭಿಪ್ರಾಯ.
ಮೊದಲನೇ ಟೆಸ್ಟ್ಗೆ ದೊಡ್ಡ ಗಣೇಶ್ ಆರಿಸಿದ ಭಾರತದ ಪ್ಲೇಯಿಂಗ್ XI
- ಯಶಸ್ವಿ ಜೈಸ್ವಾಲ್
- ಕೆ.ಎಲ್. ರಾಹುಲ್
- ದೇವದತ್ ಪಡಿಕ್ಕಲ್
- ಶುಭ್ಮನ್ ಗಿಲ್
- ರಿಷಭ್ ಪಂತ್
- ಧ್ರುವ್ ಜುರೆಲ್
- ರವೀಂದ್ರ ಜಡೇಜಾ
- ಆಕಾಶ್ ದೀಪ್
- ಜಸ್ಪ್ರೀತ್ ಬುಮ್ರಾ
- ಪ್ರಸಿಧ್ ಕೃಷ್ಣ
- ಮೊಹಮ್ಮದ್ ಸಿರಾಜ್
ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ ಮುಂದಿನ ಏಕದಿನ ಸರಣಿ ಆಡುವುದು ಯಾವಾಗ?
ತಮ್ಮ ಆಯ್ಕೆಯನ್ನು ಸಮರ್ಥಿಸಿಕೊಂಡಿರುವ ಅವರು, “ಪೂರ್ಣ ಪ್ರಮಾಣದ ವೇಗದ ಬೌಲಿಂಗ್ ದಾಳಿಯೊಂದಿಗೆ ಕಣಕ್ಕಿಳಿಯಬೇಕು. 8ನೇ ಕ್ರಮಾಂಕದ ಬ್ಯಾಟರ್ನಿಂದ ರನ್ಗಳನ್ನು ನಿರೀಕ್ಷಿಸುತ್ತಿದ್ದರೆ, ಆಗಲೇ ನೀವು ಸಂಕಷ್ಟದಲ್ಲಿದ್ದೀರಿ,” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಭಾರತ ಮತ್ತು ನ್ಯೂಜಿಲೆಂಡ್ ನಡುವಿನ ಏಕದಿನ ಸರಣಿಯಲ್ಲಿ ಪಿಚ್ಗಳು ಬೌಲರ್ಗಳಿಗೆ, ಅದರಲ್ಲೂ ವೇಗದ ಬೌಲರ್ಗಳಿಗೆ ಹೆಚ್ಚು ನೆರವು ನೀಡಿದ್ದವು. ಐದು ಪಂದ್ಯಗಳ ಸರಣಿಯಲ್ಲಿ ಕೇವಲ ಎರಡು ಬಾರಿ ಮಾತ್ರ ತಂಡಗಳು 200 ರನ್ಗಳ ಗಡಿ ದಾಟಿದ್ದವು. ವಿಲ್ ಯಂಗ್ 162 ರನ್ ಗಳಿಸಿ ಸರಣಿಯಲ್ಲಿ ಗರಿಷ್ಠ ರನ್ ಸ್ಕೋರರ್ ಎನಿಸಿಕೊಂಡಿದ್ದರು. ಇಡೀ ಸರಣಿಯಲ್ಲಿ ಶತಕ ದಾಖಲಿಸಿದ ಏಕೈಕ ಬ್ಯಾಟರ್ ಕೂಡ ಅವರೇ ಆಗಿದ್ದರು.
ಈ ಅಂಕಿಅಂಶಗಳನ್ನು ಗಮನಿಸಿರುವ ದೊಡ್ಡ ಗಣೇಶ್, ಟೆಸ್ಟ್ ಸರಣಿಯಲ್ಲೂ ಪಿಚ್ಗಳು ವೇಗ, ಬೌನ್ಸ್, ಸ್ವಿಂಗ್ ಮತ್ತು ಸೀಮ್ ಚಲನೆಗೆ ನೆರವಾಗಬಹುದು ಎಂದು ನಿರೀಕ್ಷಿಸಿದ್ದಾರೆ. ಹೀಗಾಗಿ ನಾಲ್ವರು ವೇಗದ ಬೌಲರ್ಗಳೊಂದಿಗೆ ಕಣಕ್ಕಿಳಿಯುವುದು ಸೂಕ್ತ ಎಂಬುದು ಅವರ ವಾದ. ಏಕದಿನ ಸರಣಿಯಲ್ಲೂ ಭಾರತ ನಾಲ್ವರು ವೇಗದ ಬೌಲರ್ಗಳ ಆಯ್ಕೆಯೊಂದಿಗೆ ಕಣಕ್ಕಿಳಿದಿತ್ತು. ಅದೇ ತಂತ್ರವನ್ನು ಟೆಸ್ಟ್ ಸರಣಿಯಲ್ಲೂ ಅನುಸರಿಸುವಂತೆ ಅವರು ಸಲಹೆ ನೀಡಿದ್ದಾರೆ.
ನ್ಯೂಜಿಲೆಂಡ್ನಲ್ಲಿ ಭಾರತದ ಟೆಸ್ಟ್ ದಾಖಲೆ: 58 ವರ್ಷಗಳಲ್ಲಿ 2 ಸರಣಿ ಜಯ, 25 ಪಂದ್ಯಗಳಲ್ಲಿ 10 ಸೋಲು
ತವರಿನಲ್ಲಿ ಸೋಲಿನ ಸೇಡು ತೀರಿಸಿಕೊಳ್ಳಲು ಗಿಲ್ ಪಡೆ ಸಜ್ಜು
ಭಾರತ ಮತ್ತು ನ್ಯೂಜಿಲೆಂಡ್ ನಡುವಿನ ಮೊದಲ ಟೆಸ್ಟ್ ಪಂದ್ಯ ನವೆಂಬರ್ 19ರಿಂದ ವೆಲ್ಲಿಂಗ್ಟನ್ನ ಬೇಸಿನ್ ರಿಸರ್ವ್ನಲ್ಲಿ ಆರಂಭವಾಗಲಿದೆ. ಎರಡನೇ ಟೆಸ್ಟ್ ನವೆಂಬರ್ 27ರಿಂದ ಕ್ರೈಸ್ಟ್ಚರ್ಚ್ನ ಹ್ಯಾಗ್ಲಿ ಓವಲ್ನಲ್ಲಿ ನಡೆಯಲಿದೆ. ನ್ಯೂಜಿಲೆಂಡ್ ತಂಡ ಕೊನೆಯ ಬಾರಿ ಭಾರತಕ್ಕೆ ಪ್ರವಾಸ ಕೈಗೊಂಡಿದ್ದಾಗ, ತವರಿನಲ್ಲೇ ಟೀಮ್ ಇಂಡಿಯಾಗೆ 3-0 ಅಂತರದಲ್ಲಿ ವೈಟ್ವಾಶ್ ಆಘಾತ ನೀಡಿತ್ತು. ಇದರಿಂದ ಭಾರತದ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ ಆಸೆಗೆ ದೊಡ್ಡ ಹೊಡೆತ ಬಿದ್ದಿತ್ತು.
ಈ ಬಾರಿ ಶುಭಮನ್ ಗಿಲ್ ನಾಯಕತ್ವದ ಭಾರತ ತಂಡ ನ್ಯೂಜಿಲೆಂಡ್ ನೆಲದಲ್ಲೇ ಗೆದ್ದು ಸೇಡು ತೀರಿಸಿಕೊಳ್ಳುವ ಗುರಿ ಹೊಂದಿದೆ. ನ್ಯೂಜಿಲೆಂಡ್ನಲ್ಲಿ ಭಾರೀ ಸೋಲು ಅಥವಾ ಸರಣಿ ಸೋಲು ಅನುಭವಿಸಿದರೆ, ಭಾರತದ ಫೈನಲ್ ಅರ್ಹತೆಯ ಹಾದಿ ಮತ್ತಷ್ಟು ಕಠಿಣವಾಗಲಿದೆ. ಏಕೆಂದರೆ ಮುಂದಿನ ದಿನಗಳಲ್ಲಿ ಭಾರತ ತವರಿನಲ್ಲಿ ಆಸ್ಟ್ರೇಲಿಯಾವನ್ನು ಎದುರಿಸಲಿದೆ.