ನವದೆಹಲಿ: ನ್ಯೂಜಿಲೆಂಡ್ ವೇಗಿ ಕೈಲ್ ಜೇಮಿಸನ್ (Kyle Jamieson) ಅವರು ವಿರಾಟ್ ಕೊಹ್ಲಿ (Virat Kohli) ಮತ್ತು ರೋಹಿತ್ ಶರ್ಮಾ (Rohit Sharma) ಅವರ ವಿರುದ್ಧ ಮೈದಾನದಲ್ಲಿ ಕಣಕ್ಕೆ ಇಳಿಯಲು ಉತ್ಸುಕರಾಗಿದ್ದಾರೆ. ಐದು ಪಂದ್ಯಗಳ ಏಕದಿನ ಸರಣಿಗಾಗಿ ಈ ಇಬ್ಬರು ಭಾರತೀಯ ಸ್ಟಾರ್ ಆಟಗಾರರು ನ್ಯೂಜಿಲೆಂಡ್‌ಗೆ ಮರಳಲಿದ್ದು, ಬಹುಶಃ ಇದು ಈ ಇಬ್ಬರ ದಿಗ್ಗಜರ ಪಾಲಿಗೆ ಕೊನೆಯ ಪ್ರವಾಸವಾಗಬಹುದು. ಈ ಬಗ್ಗೆ ಕಿವೀಸ್‌ ವೇಗಿ ಕೈಲ್ ಜೇಮಿಸನ್ ಅವರು ಪ್ರತಿಕ್ರಿಯೆ ನೀಡಿದ್ದಾರೆ.
ಈ ಏಕದಿನ ಸರಣಿಯು ಭಾರತ ತಂಡಕ್ಕೆ ಅತ್ಯಂತ ಮಹತ್ವದ್ದಾಗಿದೆ. ಸವಾಲಿನ ಪರಿಸ್ಥಿತಿಗಳಲ್ಲಿ ಆಡಲು ಭಾರತ ಎಷ್ಟರ ಮಟ್ಟಿಗೆ ಸಿದ್ಧವಾಗಿದೆ ಎಂಬುದನ್ನು ತಿಳಿದುಕೊಳ್ಳಲು ಈ ಸರಣಿ ನೆರವಾಗಲಿದೆ. ಇದರ ಜೊತೆಗೆ, ಮುಂಬರುವ ವಿಶ್ವಕಪ್‌ ಟೂರ್ನಿಯಲ್ಲಿ ಸ್ಥಾನ ಪಡೆಯುವ ಗುರಿ ಹೊಂದಿರುವ ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿಗೂ ಈ ಸರಣಿ ಪ್ರಮುಖ ಪರೀಕ್ಷೆಯಾಗಲಿದೆ. ನ್ಯೂಜಿಲೆಂಡ್‌ನಲ್ಲಿ ಉತ್ತಮ ಪ್ರದರ್ಶನ ನೀಡಿದರೆ, ಈ ಇಬ್ಬರು ಆಟಗಾರರು ಭಾರತ ತಂಡದಲ್ಲಿ ಸ್ಥಾನ ಪಡೆಯುವ ಅವಕಾಶ ಹೆಚ್ಚಾಗಲಿದೆ.
ಈ ಕುರಿತು ಮಾತನಾಡಿದ ಕೈಲ್ ಜೇಮಿಸನ್, “ಇದು ಅಭಿಮಾನಿಗಳಿಗೆ ತುಂಬಾ ಸಂತೋಷದ ವಿಷಯ ಎಂದು ನಾನು ಭಾವಿಸುತ್ತೇನೆ. ನೀವು ಹೇಳಿದಂತೆ, ತವರಿನ ಮೈದಾನದಲ್ಲಿ ಅವರನ್ನು ನೋಡುವ ಅಭಿಮಾನಿಗಳಿಗೆ ಇದು ಕೊನೆಯ ಅವಕಾಶವಾಗಿರಬಹುದು. ಅವರ ವಿರುದ್ಧ ಆಡಲು ಅವಕಾಶ ಪಡೆಯುವ ನಮ್ಮಂತಹ ಆಟಗಾರರಿಗೂ ಅವರೊಂದಿಗೆ ಮೈದಾನ ಹಂಚಿಕೊಳ್ಳುವುದು ಯಾವಾಗಲೂ ವಿಶೇಷ ಅನುಭವ. ಎದುರಾಳಿ ತಂಡ ಯಾವುದು ಅಥವಾ ಪಂದ್ಯ ಎಲ್ಲಿ ನಡೆಯುತ್ತದೆ ಎಂಬುದು ಮುಖ್ಯವಲ್ಲ. ಈ ಬಾರಿಯೂ ಅದು ಭಿನ್ನವಾಗಿರುವುದಿಲ್ಲ. ತವರಿನಲ್ಲೇ ಮತ್ತೊಮ್ಮೆ ಅವರ ವಿರುದ್ಧ ಸೆಣಸಾಡಲು ಸಂತೋಷವಾಗಲಿದೆ” ಎಂದು ಸುದ್ದಿಗಾರರಿಗೆ ತಿಳಿಸಿದರು.
IND vs NZ: ಟಿ20ಐ ಸರಣಿಯ ಬಳಿಕ ದೇಶಿ ಕ್ರಿಕೆಟ್‌ಗೆ ಮರಳಲು ಸಿದ್ದ ಎಂದ ಭುವನೇಶ್ವರ್‌ ಕುಮಾರ್‌!
ಕೊಹ್ಲಿ 100 ಅಂತಾರಾಷ್ಟ್ರೀಯ ಶತಕಗಳ ದಾಖಲೆ ಮುರಿಯಬಹುದೇ?
ಟೆಸ್ಟ್ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ ಬಳಿಕವೂ ವಿರಾಟ್ ಕೊಹ್ಲಿ ಅತ್ಯುತ್ತಮ ಮತ್ತು ಸ್ಥಿರ ಪ್ರದರ್ಶನ ನೀಡುತ್ತಿದ್ದಾರೆ. ಅವರು ಈಗಾಗಲೇ ತಮ್ಮ ಅಂತಾರಾಷ್ಟ್ರೀಯ ಶತಕಗಳ ಸಂಖ್ಯೆಯನ್ನು 86ಕ್ಕೆ ಏರಿಸಿಕೊಂಡಿದ್ದಾರೆ. ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡೂಲ್ಕರ್ ಅವರ 100 ಅಂತಾರಾಷ್ಟ್ರೀಯ ಶತಕಗಳ ವಿಶ್ವ ದಾಖಲೆಯನ್ನು ಸರಿಗಟ್ಟಲು ಕೊಹ್ಲಿಗೆ ಇನ್ನೂ 14 ಶತಕಗಳ ಅಗತ್ಯವಿದೆ.
ಕೊಹ್ಲಿ ಈ ಐತಿಹಾಸಿಕ ಮೈಲುಗಲ್ಲು ತಲುಪಬಹುದೇ ಎಂದು ಕೈಲ್ ಜೇಮಿಸನ್ ಅವರನ್ನು ಪ್ರಶ್ನಿಸಲಾಯಿತು. ಇದಕ್ಕೆ ಪ್ರತಿಕ್ರಿಯಿಸಿದ ಅವರು, ಕೊಹ್ಲಿ ಇದೇ ರೀತಿಯ ಪ್ರದರ್ಶನ ಮುಂದುವರಿಸಿದರೆ ಇನ್ನೂ ಹಲವು ವರ್ಷಗಳ ಕಾಲ ಕ್ರಿಕೆಟ್ ಆಡಬಹುದು ಎಂದು ಅಭಿಪ್ರಾಯಪಟ್ಟರು. ವಿಶ್ವದರ್ಜೆಯ ಆಟಗಾರರು ತಮ್ಮ ಕೌಶಲವನ್ನು ಸುಲಭವಾಗಿ ಕಳೆದುಕೊಳ್ಳುವುದಿಲ್ಲ. ಕೊಹ್ಲಿ 100 ಅಂತಾರಾಷ್ಟ್ರೀಯ ಶತಕಗಳ ಗುರಿ ತಲುಪುವುದು ಅವರು ಇನ್ನೆಷ್ಟು ವರ್ಷಗಳ ಕಾಲ ಕ್ರಿಕೆಟ್ ಆಡಲು ಬಯಸುತ್ತಾರೆ ಎಂಬುದರ ಮೇಲೆ ಅವಲಂಬಿತವಾಗಿದೆ ಎಂದು ಹೇಳಿದರು.
'ವಿಶ್ವ ದರ್ಜೆಯ ಬ್ಯಾಟಿಂಗ್'; ಅಭಿಷೇಕ್ ಶರ್ಮಾ ಶ್ಲಾಘಿಸಿದ ಡೇರಿಲ್ ಮಿಚೆಲ್
“ಈ ಪ್ರವಾಸದಲ್ಲಿ ಅವರು 100 ಶತಕಗಳ ಗಡಿ ತಲುಪುವುದಿಲ್ಲ. ಹಾಗಾಗಿ ಆ ಬಗ್ಗೆ ನಾವು ಹೆಚ್ಚು ಚಿಂತಿಸುವ ಅಗತ್ಯವಿಲ್ಲ. ಆದರೆ ಅವರು ಇನ್ನೂ ಹಲವು ವರ್ಷಗಳ ಕಾಲ ಕ್ರಿಕೆಟ್ ಆಡಬಹುದು. ಅವರ ಕೌಶಲದ ಮಟ್ಟ ಮತ್ತು ದೈಹಿಕ ಸಾಮರ್ಥ್ಯವನ್ನು ಗಮನಿಸಿದರೆ, ಅವರು ಇನ್ನೂ ಹಲವಾರು ವರ್ಷಗಳ ಕಾಲ ಆಟ ಮುಂದುವರಿಸಬಹುದು. ವಿಶ್ವದರ್ಜೆಯ ಆಟಗಾರರು ತಮ್ಮ ಸಾಮರ್ಥ್ಯವನ್ನು ಅಷ್ಟು ಸುಲಭವಾಗಿ ಕಳೆದುಕೊಳ್ಳುವುದಿಲ್ಲ."
"ಅವರು ಎಷ್ಟು ವರ್ಷಗಳ ಕಾಲ ಆಡಲು ಬಯಸುತ್ತಾರೆ ಎಂಬುದು ಮುಖ್ಯವಾಗುತ್ತದೆ. ಅವರು ಭಾರತ ತಂಡದ ಜೆರ್ಸಿ ಧರಿಸಲಿ, ಆರ್‌ಸಿಬಿ ಜೆರ್ಸಿ ಧರಿಸಲಿ ಅಥವಾ ಬೇರೆ ಯಾವುದೇ ತಂಡದ ಪರ ಆಡಲಿ, ತಮ್ಮ ಅತ್ಯುತ್ತಮ ಆಟವನ್ನು ಮುಂದುವರಿಸುತ್ತಾರೆ ಎಂಬ ವಿಶ್ವಾಸ ನನಗಿದೆ. ಅವರು ವಿಶ್ವದರ್ಜೆಯ ಪ್ರತಿಭೆ ಹೊಂದಿರುವ ಆಟಗಾರ. ಅವರ ವಿರುದ್ಧ ಆಡುವ ಯಾವುದೇ ಆಟಗಾರನಿಗೂ ಅವರು ಯಾವಾಗಲೂ ದೊಡ್ಡ ಸವಾಲಾಗಿರುತ್ತಾರೆ,” ಎಂದು ಕೈಲ್ ಜೇಮಿಸನ್ ತಿಳಿಸಿದ್ದಾರೆ.