ʻಇದು ನನ್ನ ಪಾಲಿಗೆ ಸೂಕ್ತ ಸಮಯʼ‌: ವೃತ್ತಿಪರ ಕ್ರಿಕೆಟ್‌ಗೆ ವಿದಾಯ ಹೇಳಿದ ಡೀನ್‌ ಎಲ್ಗರ್!

ನವದೆಹಲಿ: ದಕ್ಷಿಣ ಆಫ್ರಿಕಾ (South Africa) ಟೆಸ್ಟ್‌ ತಂಡದ ಮಾಜಿ ನಾಯಕ ಡೀನ್‌ ಎಲ್ಗರ್‌ (Dean Elgar) ತಮ್ಮ 39ನೇ ವಯಸ್ಸಿನಲ್ಲಿ ವೃತ್ತಿಪರ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದಾರೆ. ಎಸೆಕ್ಸ್‌ ಕೌಂಟಿ ಕ್ರಿಕೆಟ್‌ ಋತುವಿನ ಅಂತಿಮ ಹಂತಕ್ಕೆ ಸಿದ್ಧತೆ ನಡೆಸುತ್ತಿರುವ ಸಂದರ್ಭದಲ್ಲಿ ಎಲ್ಗರ್‌ ಈ ನಿರ್ಧಾರವನ್ನು ಪ್ರಕಟಿಸಿದ್ದಾರೆ. ಎಲ್ಗರ್‌ ಮೂರು ವರ್ಷಗಳ ಒಪ್ಪಂದದೊಂದಿಗೆ ಎಸ್ಸೆಕ್ಸ್‌ ತಂಡವನ್ನು ಸೇರಿಕೊಂಡಿದ್ದರು. ಇದಕ್ಕೂ ಮುನ್ನ ಅವರು ಸರ್ರೆ ಪರ ಎರಡು ಅವಧಿಯಲ್ಲಿ ಆಡಿದ್ದರು. 2026ರ ಕೌಂಟಿ ಚಾಂಪಿಯನ್‌ಶಿಪ್‌ ಋತುವಿನಲ್ಲಿ ಎಸ್ಸೆಕ್ಸ್‌ ಆಡಿದ ಎಲ್ಲಾ 9 ಪಂದ್ಯಗಳಲ್ಲೂ ಅವರು ಕಣಕ್ಕಿಳಿದಿದ್ದಾರೆ.

ಕೌಂಟಿ ಚಾಂಪಿಯನ್‌ಶಿಪ್‌ ಋತು ಮುಗಿದ ಬಳಿಕ ವೃತ್ತಿಪರ ಕ್ರಿಕೆಟ್‌ನಿಂದ ದೂರವಾಗಲು ವೈಯಕ್ತಿಕ ಹಾಗೂ ಕುಟುಂಬದ ಕಾರಣಗಳೇ ಪ್ರಮುಖ ಕಾರಣ ಎಂದು ಎಲ್ಗರ್‌ ವಿವರಿಸಿದ್ದಾರೆ. ಅವರ ಅಂತಿಮ ಐದು ಕೌಂಟಿ ಚಾಂಪಿಯನ್‌ಶಿಪ್‌ ಪಂದ್ಯಗಳ ಪೈಕಿ ಮೊದಲ ಪಂದ್ಯ ಆಗಸ್ಟ್‌ 27ರಂದು ಚೆಲ್ಮ್ಸ್‌ಫೋರ್ಡ್‌ನಲ್ಲಿ ಸರ್ರೆ ವಿರುದ್ಧ ಆರಂಭವಾಗಲಿದೆ. ಎಸೆಕ್ಸ್‌ ಪ್ರಸ್ತುತ ಡಿವಿಷನ್‌ ಒಂದರಲ್ಲಿ 7ನೇ ಸ್ಥಾನದಲ್ಲಿದೆ. ದಕ್ಷಿಣ ಆಫ್ರಿಕಾ ಪರ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಎಲ್ಗರ್‌, ಇದೀಗ ಕೌಂಟಿ ಕ್ರಿಕೆಟ್‌ ಋತುವಿನ ಅಂತ್ಯದೊಂದಿಗೆ ತಮ್ಮ ದೀರ್ಘ ವೃತ್ತಿಜೀವನಕ್ಕೆ ತೆರೆ ಎಳೆಯಲಿದ್ದಾರೆ.

ICC Test Rankings: ಗಿಲ್‌, ಜೈಸ್ವಾಲ್‌ರನ್ನು ಹಿಂದಿಕ್ಕಿ ಅಗ್ರ 10ರೊಳಗೆ ಲಗ್ಗೆಯಿಟ್ಟ ರಿಷಭ್‌ ಪಂತ್‌!

“ಈಗ ನನಗೆ ನಿವೃತ್ತಿಯಾಗಲು ಇದು ಸರಿಯಾದ ಸಮಯ ಎಂದು ಅನಿಸುತ್ತಿದೆ. ನನಗೆ ಈಗ 39 ವರ್ಷ, ನಾನು ಇನ್ನು ಚಿಕ್ಕವನಾಗುತ್ತಿಲ್ಲ. ಮನೆಯಲ್ಲಿ ಬೆಳೆಯುತ್ತಿರುವ ಕುಟುಂಬವಿದ್ದು, ಅವರೊಂದಿಗೆ ಸಾಕಷ್ಟು ವಿಚಾರಗಳಿವೆ. ನನ್ನ ಕುಟುಂಬ ಬಹಳ ವೇಗವಾಗಿ ಬೆಳೆಯುತ್ತಿದೆ,” ಎಂದು ಎಲ್ಗರ್‌ ತಿಳಿಸಿದ್ದಾರೆ.

2026ರ ಕೌಂಟಿ ಚಾಂಪಿಯನ್‌ಶಿಪ್‌ ಋತುವಿನಲ್ಲಿ ಡೀನ್‌ ಎಲ್ಗರ್‌ ತಮ್ಮ ಸಾಮರ್ಥ್ಯವನ್ನು ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ. ಆರಂಭಿಕ ಬ್ಯಾಟರ್‌ ಆಗಿ ಆಡಿದ ಅವರು 9 ಪಂದ್ಯಗಳಲ್ಲಿ ಒಟ್ಟು 436 ರನ್‌ ಗಳಿಸಿದ್ದಾರೆ. ಈ ಋತುವಿನ ಆರಂಭದಲ್ಲಿ ದಿ ಓವಲ್‌ನಲ್ಲಿ ಸರ್ರೆ ವಿರುದ್ಧ ನಡೆದ ಪಂದ್ಯದಲ್ಲಿ ಎಲ್ಗರ್‌ 92 ರನ್‌ ಹಾಗೂ ಅಜೇಯ 107 ರನ್‌ಗಳ ಮಹತ್ವದ ಇನಿಂಗ್ಸ್‌ಗಳನ್ನು ಆಡಿದ್ದರು. ಅವರ ಈ ಪ್ರದರ್ಶನ, ವೃತ್ತಿಜೀವನದ ಅಂತಿಮ ಹಂತದಲ್ಲೂ ಎಸೆಕ್ಸ್‌ ತಂಡಕ್ಕೆ ಅವರು ಎಷ್ಟು ಪ್ರಮುಖ ಆಟಗಾರರಾಗಿದ್ದಾರೆ ಎಂಬುದನ್ನು ತೋರಿಸಿತು.

IND vs SL: ಕೊಲಂಬೊದಲ್ಲಿ ಶತಕದ ಯಶಸ್ಸಿಗೆ ಕಾರಣರಾದ ಆಟಗಾರನನ್ನು ಹೆಸರಿಸಿದ ಧ್ರುವ್‌ ಜುರೆಲ್‌!

ಆದರೆ ಇದೀಗ ಕುಟುಂಬದೊಂದಿಗೆ ಹೆಚ್ಚು ಸಮಯ ಕಳೆಯುವ ಉದ್ದೇಶದಿಂದ ವೃತ್ತಿಪರ ಕ್ರಿಕೆಟ್‌ನಿಂದ ದೂರವಾಗಲು ಎಲ್ಗರ್‌ ನಿರ್ಧರಿಸಿದ್ದಾರೆ. “ಈಗ ನನಗೆ ಇದು ಸರಿಯಾದ ಸಮಯ. ಮನೆಯಲ್ಲಿದ್ದು ನನ್ನ ಸಂಗಾತಿ ಮತ್ತು ಮಕ್ಕಳೊಂದಿಗೆ ಸಮಯ ಕಳೆಯಲು ನಾನು ಬಯಸುತ್ತೇನೆ,” ಎಂದು ಎಡಗೈ ಬ್ಯಾಟರ್‌ ಎಲ್ಗರ್‌ ಹೇಳಿದ್ದಾರೆ.

ಡೀನ್‌ ಎಲ್ಗರ್‌ ಅವರ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಸಾಧನೆ

ಡೀನ್‌ ಎಲ್ಗರ್‌ ಅವರ ಅಂತಾರಾಷ್ಟ್ರೀಯ ಕ್ರಿಕೆಟ್‌ ವೃತ್ತಿಜೀವನ ದಕ್ಷಿಣ ಆಫ್ರಿಕಾ ಪರ 12 ವರ್ಷಗಳ ಟೆಸ್ಟ್‌ ಕ್ರಿಕೆಟ್‌ ಒಳಗೊಂಡಿದೆ. ಅವರು 2012ರ ನವೆಂಬರ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ದಿ ಡಬ್ಲ್ಯುಎಸಿಎ ಮೈದಾನದಲ್ಲಿ ಟೆಸ್ಟ್‌ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದರು. ಆ ಪಂದ್ಯದಲ್ಲಿ ಎಲ್ಗರ್‌ ಎರಡೂ ಇನಿಂಗ್ಸ್‌ಗಳಲ್ಲಿ ಶೂನ್ಯಕ್ಕೆ ಔಟಾಗಿದ್ದರು. ಆದರೆ ಕೆಲವೇ ತಿಂಗಳುಗಳಲ್ಲಿ ಅವರು ತಮ್ಮ ಸಾಮರ್ಥ್ಯವನ್ನು ಸಾಬೀತುಪಡಿಸಿದರು. 2013ರ ಜನವರಿಯಲ್ಲಿ ನ್ಯೂಜಿಲೆಂಡ್‌ ವಿರುದ್ಧ ಅಜೇಯ 103 ರನ್‌ ಗಳಿಸುವ ಮೂಲಕ ತಮ್ಮ ಚೊಚ್ಚಲ ಟೆಸ್ಟ್‌ ಶತಕ ದಾಖಲಿಸಿದರು.

ತಮ್ಮ ಟೆಸ್ಟ್‌ ವೃತ್ತಿಜೀವನದಲ್ಲಿ ಎಲ್ಗರ್‌ 86 ಪಂದ್ಯಗಳಿಂದ 5,347 ರನ್‌ ಗಳಿಸಿದ್ದಾರೆ. ಇದರಲ್ಲಿ 14 ಶತಕಗಳು ಹಾಗೂ 23 ಅರ್ಧಶತಕಗಳು ಸೇರಿವೆ. ದಕ್ಷಿಣ ಆಫ್ರಿಕಾದ ಟೆಸ್ಟ್‌ ತಂಡದ ಪ್ರಮುಖ ಆರಂಭಿಕ ಬ್ಯಾಟರ್‌ ಹಾಗೂ ನಾಯಕನಾಗಿ ಎಲ್ಗರ್‌ ಹಲವು ವರ್ಷಗಳ ಕಾಲ ತಂಡಕ್ಕೆ ಮಹತ್ವದ ಕೊಡುಗೆ ನೀಡಿದ್ದಾರೆ.