ನವದೆಹಲಿ: ಇಂಗ್ಲೆಂಡ್‌ನ ದಿಗ್ಗಜ ವೇಗದ ಬೌಲರ್ ಜೇಮ್ಸ್ ಆಂಡರ್ಸನ್ (James Anderson) ಅವರ ಲಂಕಾಶೈರ್ (Lancashire) ಕೌಂಟಿ ತಂಡದೊಂದಿಗಿನ 25 ವರ್ಷಗಳ ಸುದೀರ್ಘ ಪಯಣ ಅಂತ್ಯಗೊಳ್ಳುತ್ತಿದೆ. 2027ರ ಋತುವಿಗೆ ಅವರ ಒಪ್ಪಂದವನ್ನು ನವೀಕರಿಸದಿರಲು ಲಂಕಾಶೈರ್ ನಿರ್ಧರಿಸಿದ್ದು, ಇದರಿಂದ ತಮ್ಮ ಬಾಲ್ಯದ ನೆಚ್ಚಿನ ತಂಡದೊಂದಿಗಿನ ಆಂಡರ್ಸನ್ ಅವರ ಕ್ರಿಕೆಟ್ ಪಯಣಕ್ಕೆ ತೆರೆ ಬೀಳಲಿದೆ. ಈ ನಿರ್ಧಾರದಿಂದ ಆಂಡರ್ಸನ್ ಬೇಸರ ವ್ಯಕ್ತಪಡಿಸಿದ್ದಾರೆ.
44ರ ವಯಸ್ಸಿನ ಆಂಡರ್ಸನ್ 2001ರಲ್ಲಿ ಲಂಕಾಶೈರ್ ಪರ ಚೊಚ್ಚಲ ಪಂದ್ಯವಾಡಿದ್ದರು. 2026ರ ಋತುವಿನಲ್ಲಿ ತಂಡದ ಕೆಂಪು ಚೆಂಡಿನ ಕ್ರಿಕೆಟ್ ನಾಯಕತ್ವವನ್ನೂ ಮೊದಲ ಬಾರಿ ವಹಿಸಿಕೊಂಡಿದ್ದರು. ಈ ವರ್ಷ ಕೌಂಟಿ ಚಾಂಪಿಯನ್‌ಶಿಪ್‌ನಲ್ಲಿ ಅವರು 50 ವಿಕೆಟ್‌ಗಳನ್ನು ಕಬಳಿಸಿದ್ದು, ಪ್ರತಿ ವಿಕೆಟ್‌ಗೆ ಸರಾಸರಿ 17.68 ರನ್ ನೀಡಿದ್ದಾರೆ. ವೈಯಕ್ತಿಕವಾಗಿ ಉತ್ತಮ ಪ್ರದರ್ಶನ ನೀಡಿದರೂ, ತಂಡದ ಪುನರ್‌ರಚನೆಯ ಭಾಗವಾಗಿ ಅವರ ಒಪ್ಪಂದವನ್ನು ವಿಸ್ತರಿಸದಿರಲು ಲಂಕಾಶೈರ್ ನಿರ್ಧರಿಸಿದೆ.
IPL 2027: ಮುಂಬೈ ಇಂಡಿಯನ್ಸ್‌ಗೆ ರೋಹಿತ್ ಶರ್ಮಾ ಮತ್ತೆ ನಾಯಕ? ಹಾರ್ದಿಕ್ ಪಾಂಡ್ಯ ನಿರ್ಗಮನದ ಸುಳಿವು ನೀಡಿದ ಅಶ್ವಿನ್!
ನಿರ್ಧಾರದಿಂದ ಆಂಡರ್ಸನ್‌ಗೆ ಬೇಸರ
ಲಂಕಾಶೈರ್ ತಂಡದೊಂದಿಗಿನ ತಮ್ಮ ಸಂಬಂಧದ ಬಗ್ಗೆ ಮಾತನಾಡಿದ ಆಂಡರ್ಸನ್, ಬಾಲ್ಯದಿಂದಲೂ ಈ ತಂಡವನ್ನು ಬೆಂಬಲಿಸುತ್ತಾ ಬಂದಿದ್ದಾಗಿ ತಿಳಿಸಿದ್ದಾರೆ.
“ನಾನು ಬಾಲಕನಾಗಿದ್ದಾಗಿನಿಂದಲೂ ಲಂಕಾಶೈರ್ ತಂಡವನ್ನು ಬೆಂಬಲಿಸಿದ್ದೇನೆ. 25 ವರ್ಷಗಳ ಕಾಲ ಆ ತಂಡದ ಪರ ಆಡಲು ಸಾಧ್ಯವಾಗಿದ್ದು ನನ್ನ ಕನಸು ನನಸಾದಂತಿತ್ತು. ಓಲ್ಡ್ ಟ್ರಾಫರ್ಡ್ ಮೈದಾನದಲ್ಲಿ ಆಡುವುದೇ ನನಗೆ ವಿಶೇಷ ಅನುಭವವಾಗಿತ್ತು. ತಂಡದ ನಾಯಕನಾಗಿದ್ದ ಕ್ಷಣಗಳೂ ಸೇರಿದಂತೆ ಅನೇಕ ಅದ್ಭುತ ನೆನಪುಗಳಿವೆ. ನನ್ನ ಕೈಯಲ್ಲಿದ್ದರೆ ಈ ಪಯಣ ಹೀಗೆ ಅಂತ್ಯಗೊಳ್ಳುತ್ತಿರಲಿಲ್ಲ. ಆದರೂ, ತಂಡದ ಆಟಗಾರರು ಮತ್ತು ಅಭಿಮಾನಿಗಳಿಗೆ ಮುಂದಿನ ದಿನಗಳಲ್ಲಿ ಶುಭವಾಗಲಿ ಎಂದು ಹಾರೈಸುತ್ತೇನೆ,” ಎಂದು ಆಂಡರ್ಸನ್ ಹೇಳಿದ್ದಾರೆ.
ತಂಡದ ಪುನರ್‌ರಚನೆಗಾಗಿ ನಿರ್ಧಾರ
ಲಂಕಾಶೈರ್ ತಂಡದ ನೂತನ ಕ್ರಿಕೆಟ್ ನಿರ್ದೇಶಕ ಪಾಲ್ ಫಾರ್ಬ್ರೇಸ್, ತಂಡವನ್ನು ಪುನರ್‌ರಚಿಸುವ ಉದ್ದೇಶದಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ತಿಳಿಸಿದ್ದಾರೆ. ಕೌಂಟಿ ಚಾಂಪಿಯನ್‌ಶಿಪ್‌ನ ಎರಡನೇ ವಿಭಾಗದಿಂದ ಮೊದಲ ವಿಭಾಗಕ್ಕೆ ಬಡ್ತಿ ಪಡೆಯುವುದು ಮತ್ತು ಮುಂದಿನ ಮೂರುರಿಂದ ನಾಲ್ಕು ವರ್ಷಗಳಲ್ಲಿ ಪ್ರಶಸ್ತಿಗಾಗಿ ಸ್ಪರ್ಧಿಸುವ ತಂಡವನ್ನು ರೂಪಿಸುವುದು ಕ್ಲಬ್‌ನ ಗುರಿಯಾಗಿದೆ.
2026ರ ಕೌಂಟಿ ಚಾಂಪಿಯನ್‌ಶಿಪ್‌ನ ಎರಡನೇ ವಿಭಾಗದಲ್ಲಿ ಎಂಟು ತಂಡಗಳ ಪೈಕಿ ಲಂಕಾಶೈರ್ ಏಳನೇ ಸ್ಥಾನ ಪಡೆದಿತ್ತು. ಹೀಗಾಗಿ, ಆಟಗಾರರ ಬಳಗ ಹಾಗೂ ವೃತ್ತಿಪರ ಕ್ರಿಕೆಟ್ ವ್ಯವಸ್ಥೆಯಲ್ಲಿ ಬದಲಾವಣೆಗಳನ್ನು ತಕ್ಷಣದಿಂದಲೇ ಆರಂಭಿಸಲು ಕ್ಲಬ್ ನಿರ್ಧರಿಸಿದೆ. ಆಂಡರ್ಸನ್ ಅವರ ಒಪ್ಪಂದವನ್ನು 2027ರ ಋತುವಿಗೆ ವಿಸ್ತರಿಸದಿರುವುದು ಇದೇ ಯೋಜನೆಯ ಭಾಗವಾಗಿದೆ ಎಂದು ಫಾರ್ಬ್ರೇಸ್ ವಿವರಿಸಿದ್ದಾರೆ.
INDW vs ZIMW: ಶತಕ ಬಾರಿಸಿ ಮಿಥಾಲಿ ರಾಜ್ ದಾಖಲೆ ಮುರಿದ ಹರ್ಮನ್‌ಪ್ರೀತ್ ಕೌರ್!
ಲಂಕಾಶೈರ್ ಪರ ಆಂಡರ್ಸನ್ ಅವರ ಸಾಧನೆ
ಲಂಕಾಶೈರ್ ಪರ 112 ಪ್ರಥಮ ದರ್ಜೆ ಪಂದ್ಯಗಳನ್ನು ಆಡಿರುವ ಆಂಡರ್ಸನ್ ಒಟ್ಟು 443 ವಿಕೆಟ್‌ಗಳನ್ನು ಪಡೆದಿದ್ದಾರೆ. 2011ರಲ್ಲಿ ಕೌಂಟಿ ಚಾಂಪಿಯನ್‌ಶಿಪ್ ಪ್ರಶಸ್ತಿ ಗೆದ್ದ ತಂಡದ ಭಾಗವಾಗಿದ್ದರು. 2019ರಲ್ಲಿ ಕೆಂಟ್ ವಿರುದ್ಧದ ಪಂದ್ಯದಲ್ಲಿ ತಮ್ಮ ಪ್ರಥಮ ದರ್ಜೆ ಕ್ರಿಕೆಟ್ ವೃತ್ತಿಜೀವನದ 1,000ನೇ ವಿಕೆಟ್ ಮೈಲುಗಲ್ಲನ್ನೂ ತಲುಪಿದ್ದರು. 2017ರಲ್ಲಿ ಅವರ ಸಾಧನೆಗೆ ಗೌರವ ಸಲ್ಲಿಸುವ ಸಲುವಾಗಿ ಓಲ್ಡ್ ಟ್ರಾಫರ್ಡ್ ಮೈದಾನದ ಪೆವಿಲಿಯನ್ ಎಂಡ್‌ಗೆ ‘ಜೇಮ್ಸ್ ಆಂಡರ್ಸನ್ ಎಂಡ್’ ಎಂದು ಹೆಸರಿಡಲಾಗಿತ್ತು.
ಇಂಗ್ಲೆಂಡ್ ಪರ 188 ಟೆಸ್ಟ್ ಪಂದ್ಯಗಳಲ್ಲಿ 704 ವಿಕೆಟ್‌ಗಳನ್ನು ಪಡೆದಿರುವ ಆಂಡರ್ಸನ್, ಟೆಸ್ಟ್ ಕ್ರಿಕೆಟ್ ಇತಿಹಾಸದ ಅತ್ಯಂತ ಯಶಸ್ವಿ ವೇಗದ ಬೌಲರ್‌ಗಳಲ್ಲಿ ಒಬ್ಬರಾಗಿದ್ದಾರೆ. 2024ರಲ್ಲಿ ಅಂತರರಾಷ್ಟ್ರೀಯ ಕ್ರಿಕೆಟ್‌ಗೆ ವಿದಾಯ ಹೇಳಿದ್ದ ಅವರು, ಆ ಬಳಿಕವೂ ಲಂಕಾಶೈರ್ ಪರ ಆಡುತ್ತಿದ್ದರು. ಇದೀಗ ಕ್ಲಬ್‌ನೊಂದಿಗಿನ ಅವರ ಪಯಣ ಅಂತ್ಯಗೊಳ್ಳುತ್ತಿರುವುದರಿಂದ, ಅವರು ಬೇರೆ ತಂಡದ ಪರ ಆಟ ಮುಂದುವರಿಸುತ್ತಾರೆಯೇ ಅಥವಾ ನಿವೃತ್ತಿ ಘೋಷಿಸುತ್ತಾರೆಯೇ ಎಂಬ ಕುತೂಹಲ ಮೂಡಿದೆ.