ವೆಲ್ಲಿಂಗ್ಟನ್‌: ನ್ಯೂಜಿಲೆಂಡ್ ವಿರುದ್ಧದ ಮೂರನೇ ಟಿ20 ಪಂದ್ಯದಲ್ಲಿ(IND vs NZ) 35 ಎಸೆತಗಳಲ್ಲಿ ಶತಕ ಸಿಡಿಸಿದ ಅಭಿಷೇಕ್ ಶರ್ಮಾ (Abhishek Sharma), ತಮ್ಮ ಮಾರ್ಗದರ್ಶಕ ಹಾಗೂ ಭಾರತದ ಮಾಜಿ ಆಲ್‌ರೌಂಡರ್ ಯುವರಾಜ್ ಸಿಂಗ್ (Yuvraj Singh) ಅವರ ತಮಾಷೆಯ ಸವಾಲಿಗೆ ನಗುತ್ತಲೇ ಪ್ರತಿಕ್ರಿಯಿಸಿದ್ದಾರೆ. ಯುವರಾಜ್ ಸಿಂಗ್ ಅವರು ಅಭಿಷೇಕ್ ಅವರ ಪಂದ್ಯ ಗೆಲ್ಲಿಸಿಕೊಟ್ಟ ಇನಿಂಗ್ಸ್‌ಗೆ ಅಭಿನಂದನೆ ಸಲ್ಲಿಸಿದ್ದರೂ, 12 ಎಸೆತಗಳಲ್ಲಿ ಅರ್ಧಶತಕ ಗಳಿಸಲು ಇನ್ನೂ ಸಾಧ್ಯವಾಗಿಲ್ಲ ಎಂದು ತಮಾಷೆ ಮಾಡಿದರು.
ಐದು ಪಂದ್ಯಗಳ ಟಿ20ಐ ಸರಣಿಯ ಮೂರನೇ ಪಂದ್ಯದಲ್ಲಿ ಭಾರತ ತಂಡ, ನ್ಯೂಜಿಲೆಂಡ್ ವಿರುದ್ಧ ಆರು ವಿಕೆಟ್‌ಗಳ ಗೆಲುವು ಸಾಧಿಸಿ 3-0ರ ಅಂತರದಲ್ಲಿ ಅಜೇಯ ಮುನ್ನಡೆ ಪಡೆದಿತ್ತು. ಪಂದ್ಯದ ಬಳಿಕ ಯುವರಾಜ್ ಅವರ ಹೇಳಿಕೆಯ ಕುರಿತು ಕೇಳಿದಾಗ ಅಭಿಷೇಕ್ ನಗುತ್ತಲೇ ಉತ್ತರಿಸಿದರು.
“ಆ ಸಮಯದಲ್ಲಿ ಅವರು ಯಾವ ರೀತಿಯ ಕ್ರಿಕೆಟ್ ಆಡುತ್ತಿದ್ದರೋ ನನಗೆ ಗೊತ್ತಿಲ್ಲ. ಆದರೆ, 12 ಎಸೆತಗಳಲ್ಲಿ 50 ರನ್ ಗಳಿಸುವುದು ಅಷ್ಟು ಸುಲಭವಲ್ಲ. ಯಾವುದೇ ಬ್ಯಾಟರ್ ಮೈದಾನಕ್ಕೆ ಇಳಿದು ಹಾಗೆ ಆಡಲು ಪ್ರಯತ್ನಿಸಿದರೂ ಅದು ಕಷ್ಟವೇ. 12 ಎಸೆತಗಳಲ್ಲಿ 50 ರನ್ ಗಳಿಸುವುದು ಸುಲಭವಾಗಿ ಸಾಧ್ಯವಾಗುವುದಿಲ್ಲ. ಅಂತಹ ಸಾಧನೆ ಆಗಾಗ ಮಾತ್ರ ನಡೆಯುತ್ತದೆ,” ಎಂದು ಅಭಿಷೇಕ್ ತಿಳಿಸಿದ್ದಾರೆ.
IND vs NZ 3rd T20I: ಪವರ್‌ಪ್ಲೇನಲ್ಲಿ 118 ರನ್ ಬಾರಿಸಿ ವಿಶ್ವ ದಾಖಲೆ ಬರೆದ ಟೀಮ್‌ ಇಂಡಿಯಾ!
ವೈಯಕ್ತಿಕ ದಾಖಲೆಗಳ ಬೆನ್ನಟ್ಟುವುದು ತಮ್ಮ ಉದ್ದೇಶವಲ್ಲ ಎಂಬುದನ್ನೂ ಅಭಿಷೇಕ್ ಸ್ಪಷ್ಟಪಡಿಸಿದರು. ತಮ್ಮ ಮತ್ತು ಯುವ ಆರಂಭಿಕ ಆಟಗಾರ ವೈಭವ್ ಸೂರ್ಯವಂಶಿ ಅವರ ಯೋಜನೆ ಪವರ್‌ಪ್ಲೇನಲ್ಲಿ ಗರಿಷ್ಠ ರನ್ ಗಳಿಸಿ ನ್ಯೂಜಿಲೆಂಡ್ ತಂಡದ ಮೇಲೆ ಆರಂಭದಿಂದಲೇ ಒತ್ತಡ ಹೇರುವುದಾಗಿತ್ತು.
“ಬ್ಯಾಟರ್‌ಗಳಾಗಿ ನಾವು ವೈಯಕ್ತಿಕ ದಾಖಲೆಗಳಿಗಾಗಿ ಆಡುವುದಿಲ್ಲ. ತಂಡವನ್ನು ಗೆಲ್ಲಿಸುವುದೇ ನಮ್ಮ ಗುರಿ. ವಿಶೇಷವಾಗಿ ವೈಭವ್ ಕೂಡ ಇಲ್ಲಿದ್ದಾರೆ. ಪವರ್‌ಪ್ಲೇನಲ್ಲಿ ಉತ್ತಮವಾಗಿ ಆಡಬೇಕು ಎಂಬುದು ನಮ್ಮ ಯೋಜನೆಯಾಗಿತ್ತು. ಇದೇ ರೀತಿಯ ಆಟವನ್ನು ಸರಣಿಯುದ್ದಕ್ಕೂ ಮುಂದುವರಿಸಲು ಬಯಸುತ್ತೇವೆ. ನಮ್ಮ ಯೋಜನೆ ಯಶಸ್ವಿಯಾಯಿತು” ಎಂದು ಅಭಿಷೇಕ್ ತಿಳಿಸಿದರು.
ಯುವರಾಜ್ ಸಿಂಗ್ 2007ರ ಟಿ20 ವಿಶ್ವಕಪ್‌ ಟೂನಲ್ಲಿ ಇಂಗ್ಲೆಂಡ್ ವಿರುದ್ಧ ಕೇವಲ 12 ಎಸೆತಗಳಲ್ಲಿ ಅರ್ಧಶತಕ ಸಿಡಿಸಿ ವಿಶ್ವ ದಾಖಲೆ ನಿರ್ಮಿಸಿದ್ದರು. ಸ್ಟುವರ್ಟ್ ಬ್ರಾಡ್ ಅವರ ಒಂದೇ ಓವರ್‌ನಲ್ಲಿ ಆರು ಸಿಕ್ಸರ್‌ಗಳನ್ನು ಬಾರಿಸಿದ್ದ ಯುವರಾಜ್ ಅವರ ಆ ಸಾಧನೆ ಇಂದಿಗೂ ಕ್ರಿಕೆಟ್ ಅಭಿಮಾನಿಗಳ ನೆನಪಿನಲ್ಲಿ ಉಳಿದಿದೆ. ಅವರ ದಾಖಲೆಯ ಸಾಧನೆಯನ್ನು ತಮಾಷೆಯಾಗಿ ಉಲ್ಲೇಖಿಸುವ ಮೂಲಕ ಅಭಿಷೇಕ್ ತಮ್ಮ ಉತ್ತರದಿಂದ ಅಭಿಮಾನಿಗಳ ಗಮನ ಸೆಳೆದಿದ್ದಾರೆ.