ಭಾರತ-ವೆಸ್ಟ್ ಇಂಡೀಸ್ ಟಿ20ಐ ಪಂದ್ಯದ ಉಚಿತ ಪಾಸ್‌ಗಳು 6 ಸಾವಿರ ರೂ.ಗೆ ಮಾರಾಟ; ನಾಲ್ವರ ಬಂಧನ

ಹೈದರಾಬಾದ್‌, ಅ.14: ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವಿನ ನಾಲ್ಕನೇ ಟಿ20 ಪಂದ್ಯದ ಉಚಿತ ಟಿಕೆಟ್‌ಗಳನ್ನು ಕಾಳಸಂತೆಯಲ್ಲಿ (Black market) ಮಾರಾಟ ಮಾಡಿದ ಆರೋಪದ ಮೇಲೆ ಹೈದರಾಬಾದ್ ಪೊಲೀಸರು ಹೈದರಾಬಾದ್ ಕ್ರಿಕೆಟ್ ಅಸೋಸಿಯೇಷನ್ ​​(HCA) ಸದಸ್ಯರೊಬ್ಬರನ್ನು ಹಾಗೂ ಇತರ ಮೂವರನ್ನು ಬಂಧಿಸಿದ್ದಾರೆ.

ಉಪ್ಪಲ್‌ನ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಬುಧವಾರ ನಡೆಯಲಿರುವ ಪಂದ್ಯಕ್ಕೂ ಮುನ್ನ, "ಮಾರಾಟಕ್ಕಲ್ಲ" (NOT FOR SALE) ಎಂದು ನಮೂದಿಸಲಾಗಿದ್ದ 11 ಪಂದ್ಯದ ಪಾಸ್‌ಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ಆರೋಪಿಗಳನ್ನು HCA ಸದಸ್ಯ ಸತೀಶ್ ಚಂದ್ರ ಶ್ರೀವಾಸ್ತವ, ಅವರ ಪುತ್ರ ಆಕರ್ಷಿತ್ ಶ್ರೀವಾಸ್ತವ, ಅವಿನಾಶ್ ದಾರಕ್ ಮತ್ತು ಮೋಹಿತ್ ಸೋಮಾನಿ ಎಂದು ಗುರುತಿಸಲಾಗಿದೆ. ಅಕ್ಟೋಬರ್ 12 ರಂದು ಬೇಗಂ ಬಜಾರ್‌ನ ಎಸ್‌ಡಿ ಮಾಲ್ (SD Mall) ಬಳಿ ಟಿಕೆಟ್‌ಗಳ ಮಾರಾಟ ನಡೆಯುತ್ತಿದೆ ಎಂಬ ಮಾಹಿತಿ ಗೋಶಾಮಹಲ್ ಪೊಲೀಸರಿಗೆ ಲಭ್ಯವಾದ ನಂತರ ಈ ಪ್ರಕರಣ ಬೆಳಕಿಗೆ ಬಂದಿದೆ.

ಸಹಾಯಕ ಸಬ್-ಇನ್ಸ್‌ಪೆಕ್ಟರ್ ವಿ. ಜನಾರ್ದನ ನಾಯಕ್ ನೇತೃತ್ವದ ಪೊಲೀಸ್ ತಂಡವು ರಾತ್ರಿ ಸುಮಾರು 9 ಗಂಟೆಗೆ ದಾರಕ್ ಮತ್ತು ಸೋಮಾನಿ ಅವರನ್ನು ವಶಕ್ಕೆ ಪಡೆಯಿತು. ಕ್ರಿಕೆಟ್ ಪಾಸುಗಳಲ್ಲದೆ, ಅಧಿಕಾರಿಗಳು ನವರಾತ್ರಿ ದಾಂಡಿಯಾ ಕಾರ್ಯಕ್ರಮದ ಎಂಟು ಪಾಸ್‌ಗಳು, 5,000 ರೂಪಾಯಿ ನಗದು, ಮೊಬೈಲ್ ಫೋನ್‌ಗಳು ಮತ್ತು ದ್ವಿಚಕ್ರ ವಾಹನವೊಂದನ್ನು ವಶಪಡಿಸಿಕೊಂಡರು.

ಪೊಲೀಸರ ಪ್ರಕಾರ, ವಿಚಾರಣೆಯ ವೇಳೆ ದಾರಕ್ ಮತ್ತು ಸೋಮಾನಿ ಅವರು ಆಕರ್ಷಿತ್ ಅವರಿಂದ ಉಚಿತ ಟಿಕೆಟ್‌ಗಳನ್ನು ಪಡೆದಿದ್ದಾಗಿ ಹಾಗೂ ಅವುಗಳನ್ನು ವಾಟ್ಸಾಪ್ ಮತ್ತು ಇನ್‌ಸ್ಟಾಗ್ರಾಮ್‌ನಲ್ಲಿ ಹೆಚ್ಚಿನ ಬೆಲೆಗೆ ಮಾರಾಟ ಮಾಡಲು ಪ್ರಚಾರ ಮಾಡುತ್ತಿದ್ದಾಗಿ ತಿಳಿಸಿದ್ದಾರೆ.

ಡರ್ಬನ್ ಟೆಸ್ಟ್‌ ಸೋಲು; ಡಬ್ಲ್ಯೂಟಿಸಿ ಅಂಕಪಟ್ಟಿಯಲ್ಲಿ ಕುಸಿತ ಕಂಡ ದಕ್ಷಿಣ ಆಫ್ರಿಕಾ

ಗೋಶಾಮಹಲ್ ಇನ್ಸ್‌ಪೆಕ್ಟರ್ ಬಿ. ಶ್ರವಣ್ ಕುಮಾರ್ ಅವರು ತಿಳಿಸಿದಂತೆ, ಪೆವಿಲಿಯನ್‌ಗೆ ಅನುಗುಣವಾಗಿ ಟಿಕೆಟ್‌ಗಳನ್ನು ತಲಾ 3,500 ರಿಂದ 6,000 ರೂಪಾಯಿಗಳಿಗೆ ಮಾರಾಟ ಮಾಡಲಾಗುತ್ತಿತ್ತು. ಆಕರ್ಷಿತ್ ಅವರು ಎಚ್‌ಸಿಎ (HCA) ಸದಸ್ಯರಾಗಿರುವ ತಮ್ಮ ತಂದೆಯಿಂದ ಪಾಸ್‌ಗಳನ್ನು ಪಡೆದುಕೊಂಡು, ಸೋಮಾನಿ ಅವರ ಸಹಾಯದೊಂದಿಗೆ ಮಾರಾಟಕ್ಕಾಗಿ ದಾರಕ್ ಅವರಿಗೆ ಹಸ್ತಾಂತರಿಸಿದ್ದರು ಎಂದು ಆರೋಪಿಸಲಾಗಿದೆ.

ಆರೋಪಿಯು ಸುಮಾರು ಒಂಬತ್ತು ಉಚಿತ ಟಿಕೆಟ್‌ಗಳನ್ನು ಮಾರಾಟ ಮಾಡಿದ್ದಾನೆ ಎಂದು ಇನ್ಸ್‌ಪೆಕ್ಟರ್ ತಿಳಿಸಿದರು. ಸತೀಶ್ ಚಂದ್ರ ಶ್ರೀವಾಸ್ತವ ಅವರಿಗೆ ಎಷ್ಟು ಪಾಸ್‌ಗಳನ್ನು ನೀಡಲಾಗಿತ್ತು ಎಂಬುದನ್ನು ಖಚಿತಪಡಿಸಿಕೊಳ್ಳಲು ಪೊಲೀಸರು ಎಚ್‌ಸಿಎ (HCA) ಗೆ ಪತ್ರ ಬರೆಯಲಿದ್ದಾರೆ.