ಯುಪಿ ತಂಡದಿಂದ ಮುಂಬೈ ಇಂಡಿಯನ್ಸ್​ಗೆ ವರ್ಗಾವಣೆಯಾದ ತಾರಾ ನೋರಿಸ್​

ಮುಂಬಯಿ, ಅ.13: ಮುಂಬರುವ ಮಹಿಳಾ ಪ್ರೀಮಿಯರ್‌ ಲೀಗ್‌( WPL 2027)ನ ಆಟಗಾರ್ತಿಯರ ಹರಾಜಿಗೂ ಮುನ್ನ, ಮುಂಬೈ ಇಂಡಿಯನ್ಸ್ ತಂಡವು ಯುಪಿ ವಾರಿಯರ್ಸ್‌ನಿಂದ ಅಮೆರಿಕದ ವೇಗದ ಬೌಲರ್ ತಾರಾ ನೋರಿಸ್ ಅವರನ್ನು ಟ್ರೇಡ್ (ವಿನಿಮಯ) ಮೂಲಕ ತನ್ನ ತಂಡಕ್ಕೆ ಸೇರಿಸಿಕೊಂಡಿದೆ. 2026ರ ಋತುವಿಗಾಗಿ ವಾರಿಯರ್ಸ್ ತಂಡವು 10 ಲಕ್ಷ ರೂಪಾಯಿಗಳಿಗೆ ಒಪ್ಪಂದ ಮಾಡಿಕೊಂಡಿದ್ದ ನೋರಿಸ್, ಇದೀಗ ಸಂಪೂರ್ಣ ನಗದು ವ್ಯವಹಾರದ ಮೂಲಕ ಅದೇ ಮೊತ್ತಕ್ಕೆ ಮುಂಬೈ ಇಂಡಿಯನ್ಸ್ ತಂಡವನ್ನು ಸೇರುತ್ತಿದ್ದಾರೆ.

ನೋರಿಸ್ 2023ರಲ್ಲಿ ನಡೆದ ಚೊಚ್ಚಲ ಆವೃತ್ತಿಯಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಪ್ರತಿನಿಧಿಸಿದ್ದರು. ಈ ಲೀಗ್‌ನಲ್ಲಿ ಆಡಿದ ಮೊದಲ 'ಅಸೋಸಿಯೇಟ್' (Associate) ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾದ ಅವರು, 2023ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧದ ಪಂದ್ಯದಲ್ಲಿ ಐದು ವಿಕೆಟ್‌ಗಳನ್ನು ಕಬಳಿಸಿ ಟೂರ್ನಿಯಲ್ಲಿ ಈ ಸಾಧನೆಗೈದ ಮೊದಲ ಬೌಲರ್ ಎಂಬ ದಾಖಲೆಯನ್ನೂ ನಿರ್ಮಿಸಿದ್ದರು. 2021ರಲ್ಲಿ ಅಮೆರಿಕ ಪರ ಪದಾರ್ಪಣೆ ಮಾಡಿದ್ದ ಅವರು 5 ಏಕದಿನ ಮತ್ತು 17 ಟಿ20 ಪಂದ್ಯ ಆಡಿದ್ದಾರೆ.

2024ರ ಸೀಸನ್‌ಗೆ ಮುನ್ನ 'ಕ್ಯಾಪಿಟಲ್ಸ್' ತಂಡವು ಅವರನ್ನು ಬಿಡುಗಡೆ ಮಾಡಿತ್ತು. ನಂತರ WPL 2026ಕ್ಕಾಗಿ 'UPW' ತಂಡದೊಂದಿಗೆ ಅವರು ಎರಡನೇ ಬಾರಿಗೆ ಒಪ್ಪಂದ ಮಾಡಿಕೊಂಡರಾದರೂ, T20 ವಿಶ್ವಕಪ್ ಅರ್ಹತಾ ಸುತ್ತಿನ ಪಂದ್ಯಗಳಿಗಾಗಿ USA ತಂಡಕ್ಕೆ ಆಯ್ಕೆಯಾದ ಕಾರಣ ಅವರು ಈ ಟೂರ್ನಿಯಿಂದ ಹೊರಗುಳಿಯಬೇಕಾಯಿತು.

ಈ ವರ್ಷದ ಆರಂಭದಲ್ಲಿ 'ದಿ ಹಂಡ್ರೆಡ್' (The Hundred) ಟೂರ್ನಿಯಲ್ಲಿ 'ಎಂಐ ಲಂಡನ್' (MI London) ತಂಡವನ್ನು ಪ್ರತಿನಿಧಿಸಿದ್ದ ನೋರಿಸ್, 'ಎಂಐ' (MI) ಫ್ರಾಂಚೈಸಿ ಜೊತೆಗಿನ ಎರಡನೇ ಒಪ್ಪಂದವನ್ನು ಇದೀಗ ಮಾಡಿಕೊಂಡಿದ್ದಾರೆ. ಸೆಪ್ಟೆಂಬರ್ 28ರ ಗಡುವಿನ ವೇಳೆಗೆ 'ವಾರಿಯರ್ಸ್' (Warriorz) ತಂಡವು ನಾರಿಸ್ ಅವರನ್ನು ತಮ್ಮಲ್ಲೇ ಉಳಿಸಿಕೊಂಡಿತ್ತು. ಆ ನಂತರವೇ ಈ ವಿನಿಮಯ ಪ್ರಕ್ರಿಯೆ ನಡೆಯಿತು.

ನಿಶ್ಚಿತಾರ್ಥ ಮುರಿದುಕೊಂಡ ಕೆಲವೇ ವಾರಗಳ ನಂತರ ಮತ್ತೆ ಒಂದಾದ ಪೃಥ್ವಿ ಶಾ-ಆಕೃತಿ

ಈ ವಿನಿಮಯದ ಪರಿಣಾಮವಾಗಿ, ಅಕ್ಟೋಬರ್ 28 ರಂದು ಕೊಚ್ಚಿಯಲ್ಲಿ ನಡೆಯಲಿರುವ ಹರಾಜಿಗೂ ಮುನ್ನವೇ ಮುಂಬೈ ಇಂಡಿಯನ್ಸ್ (MI) ತಮ್ಮ ವಿದೇಶಿ ಆಟಗಾರ್ತಿಯರ ಕೋಟಾವನ್ನು ಭರ್ತಿ ಮಾಡಿಕೊಂಡಿದೆ. ಇದೀಗ ಅವರು 90 ಲಕ್ಷ ರೂಪಾಯಿಗಳ ಬಜೆಟ್ ಮತ್ತು ಗರಿಷ್ಠ ಆರು ಸ್ಥಾನಗಳನ್ನು ಭರ್ತಿ ಮಾಡುವ ಅವಕಾಶದೊಂದಿಗೆ ಹರಾಜಿನಲ್ಲಿ ಪಾಲ್ಗೊಳ್ಳಲಿದ್ದಾರೆ. ಮತ್ತೊಂದೆಡೆ, 'ವಾರಿಯರ್ಸ್' (Warriorz) ತಂಡವು ಗರಿಷ್ಠ ಎಂಟು ಆಟಗಾರ್ತಿಯರನ್ನು ಖರೀದಿಸಲು 3.75 ಕೋಟಿ ರೂಪಾಯಿಗಳನ್ನು ಹೊಂದಿದ್ದು, ಇದರಲ್ಲಿ ಮೂವರು ವಿದೇಶಿ ಆಟಗಾರ್ತಿಯರನ್ನು ಆಯ್ಕೆ ಮಾಡಿಕೊಳ್ಳುವ ಅವಕಾಶವಿದೆ. ಡಬ್ಲ್ಯುಪಿಎಲ್​ 5ನೇ ಆವೃತ್ತಿ 2027ರ ಜನವರಿ 14ರಿಂದ ಫೆಬ್ರವರಿ 7ರವರೆಗೆ ನಡೆಯಲಿದೆ.