Asia Cup final: ಏಷ್ಯಾ ಕಪ್ ಫೈನಲ್‌ಗೆ ಕಟ್ಟುನಿಟ್ಟಿನ ಭದ್ರತಾ ಕ್ರಮ ಕೈಗೊಂಡ ದುಬೈ ಪೊಲೀಸರು

ದುಬೈ: ಭಾರತ ಮತ್ತು ಪಾಕಿಸ್ತಾನ ನಡುವಣ ಏಷ್ಯಾಕಪ್‌ ಹೈವೋಲ್ಟೇಜ್‌ ಫೈನಲ್‌(Asia Cup final) ಪಂದ್ಯಕ್ಕೆ ಕೆಲವೇ ಗಂಟೆಗಳು ಬಾಕಿ ಉಳಿದಿವೆ. ಪಂದ್ಯಗಳ ಟಿಕೆಟ್‌ ಕೂಡ ಸೋಲ್ಡ್‌ ಔಟ್‌ ಆಗಿದ್ದು ಇತ್ತಂಡಗಳ ಕ್ರಿಕೆಟ್‌ ಕಾದಾಟಕ್ಕೆ ಅಭಿಮಾನಿಗಳು ತುದಿಗಾಲಲ್ಲಿ ನಿಂತು ಕಾಯುತ್ತಿದ್ದಾರೆ. ಇದೇ ವೇಳೆ ದುಬೈ ಪೊಲೀಸರು ಈ ಪಂದ್ಯಕ್ಕೆ ಕಠಿಣ ಭದ್ರತಾ ಕ್ರಮಗಳನ್ನು ಘೋಷಿಸಿದ್ದಾರೆ. ಸಾರ್ವಜನಿಕ ಸುರಕ್ಷತೆಗೆ ಅಪಾಯವನ್ನುಂಟುಮಾಡುವ, ಸುವ್ಯವಸ್ಥೆಯನ್ನು ಅಡ್ಡಿಪಡಿಸುವ, ದ್ವೇಷ ಅಥವಾ ಜನಾಂಗೀಯತೆಯನ್ನು ಉತ್ತೇಜಿಸುವ ಯಾವುದೇ ಕೃತ್ಯ ಮಾಡಿದರೆ ಜೈಲು ಶಿಕ್ಷೆ ಖಚಿತ ಎಂದು ಎಚ್ಚರಿಕೆ ನೀಡಿದ್ದಾರೆ.

ಕಾಶ್ಮೀರದ ಪಹಲ್ಗಾಮ್‌ನಲ್ಲಿ ಇತ್ತೀಚೆಗೆ ನಡೆದ ಭಯೋತ್ಪಾದಕ ದಾಳಿಗಳು ಮತ್ತು ಆಪರೇಷನ್ ಸಿಂಧೂರ್ ರೂಪದಲ್ಲಿ ಭಾರತ ಪ್ರತೀಕಾರ ತೀರಿಸಿಕೊಂಡ ನಂತರ, ಉಭಯ ರಾಷ್ಟ್ರಗಳ ನಡುವಿನ ಉದ್ವಿಗ್ನತೆ ಹೆಚ್ಚಿರುವ ಹಿನ್ನೆಲೆಯಲ್ಲಿ ಕಠಿಣ ಕ್ರಮಗಳನ್ನು ಕೈಗೊಳ್ಳಲಾಗಿದೆ. ಪಂದ್ಯ ಸುರಕ್ಷಿತವಾಗಿ ಮತ್ತು ಸುಗಮವಾಗಿ ನಡೆಯುವುದನ್ನು ಖಚಿತಪಡಿಸಿಕೊಳ್ಳಲು ಅಧಿಕಾರಿಗಳು ಹಲವು ಮಾರ್ಗಸೂಚಿಗಳನ್ನು ಪ್ರಕಟಿಸಿದ್ದಾರೆ.

ಪಂದ್ಯ ಪ್ರಾರಂಭಕ್ಕೆ ಕನಿಷ್ಠ ಮೂರು ಗಂಟೆಗಳ ಮೊದಲು ಆಗಮಿಸಿ.

ಪ್ರತಿ ಮಾನ್ಯ ಟಿಕೆಟ್‌ಗೆ ಒಂದು ಪ್ರವೇಶ; ಮರು-ಪ್ರವೇಶವನ್ನು ಅನುಮತಿಸಲಾಗುವುದಿಲ್ಲ.

ಮೇಲ್ವಿಚಾರಕರ ಸೂಚನೆಗಳನ್ನು ಮತ್ತು ಎಲ್ಲಾ ಪೋಸ್ಟ್ ಮಾಡಿದ ಚಿಹ್ನೆಗಳನ್ನು ಅನುಸರಿಸಿ.

ಗೊತ್ತುಪಡಿಸಿದ ಪ್ರದೇಶಗಳಲ್ಲಿ ಮಾತ್ರ ವಾಹನ ನಿಲುಗಡೆ ಮಾಡಬೇಕು.

ನಿಷೇಧಿತ ವಸ್ತುಗಳು ಮತ್ತು ನಡವಳಿಕೆಗಳು

ಪಟಾಕಿಗಳು, ಲೇಸರ್ ಪಾಯಿಂಟರ್‌ಗಳು ಮತ್ತು ಯಾವುದೇ ಸುಡುವ ಅಥವಾ ಅಪಾಯಕಾರಿ ವಸ್ತುಗಳ ಬಳಕೆ ಮಾಡುವಂತಿಲ್ಲ.

ಚೂಪಾದ ವಸ್ತುಗಳು, ಆಯುಧಗಳು, ವಿಷಕಾರಿ ವಸ್ತುಗಳು ಮತ್ತು ರಿಮೋಟ್-ನಿಯಂತ್ರಿತ ಸಾಧನಗಳು ನಿಷೇಧ

ದೊಡ್ಡ ಛತ್ರಿಗಳು, ಕ್ಯಾಮೆರಾ ಟ್ರೈಪಾಡ್‌ಗಳು, ಸೆಲ್ಫಿ ಸ್ಟಿಕ್‌ಗಳು ಮತ್ತು ಅನಧಿಕೃತ ವೃತ್ತಿಪರ ಛಾಯಾಗ್ರಹಣ ಮಾಡುವಂತಿಲ್ಲ.

ಆಯೋಜಕರು ಅನುಮೋದಿಸದ ಬ್ಯಾನರ್‌ಗಳು, ಧ್ವಜಗಳು ಅಥವಾ ಚಿಹ್ನೆಗಳು ಬಳಸುವಂತಿಲ್ಲ.