ಉಬರ್ ಚಾಲಕರಾಗಿದ್ದ ಸಲ್ಮಾನ್ ಖಾನ್ ಇಂದು ದೇಶಕ್ಕಾಗಿ ಕಂಚು ಗೆದ್ದ ಸಾಧಕ

ನಗೋಯಾ, ಸೆ.23: ಕೆಲವು ಕ್ರೀಡಾಪಟುಗಳ ಬಗ್ಗೆ ಬರೆಯುವಾಗ, ಓದುವಾಗ ಯಾವಾಗಲೂ ರೋಮಾಂಚನಗೊಳ್ಳುತ್ತೇವೆ. ಕಡು ಬಡತನದಲ್ಲಿ ಬೆಳೆದು ಕೊನೆಗೆ ಯಶಸ್ಸಿನ ಸಾಧನೆಯ ಗೌರಿಶಿಖರವನ್ನು ಏರಿ ಗೆಲುವಿನ ಬಾವುಟ ಹಾರಿಸಿದ ಅದೆಷ್ಟೋ ಕ್ರೀಡಾಪಟುಗಳಿದ್ದಾರೆ. ಇದೀಗ ಈ ಸಾಲಿಗೆ ಐಚಿ-ನಗೋಯಾದಲ್ಲಿ ನಡೆದ 2026ರ ಏಷ್ಯನ್ ಕ್ರೀಡಾಕೂಟದ ರೋಯಿಂಗ್ ಕ್ರೀಡೆಯ ಪುರುಷರ ಡಬಲ್ ಸ್ಕಲ್ಸ್ ವಿಭಾಗದಲ್ಲಿ ಕಂಚಿನ ಪದಕ ಗೆದ್ದ ಸಲ್ಮಾನ್ ಖಾನ್ ಸೇರ್ಪಡೆಗೊಂಡಿದ್ದಾರೆ.

ಗುರುವಾರ ನಡೆದ ಪುರುಷರ ಡಬಲ್ ಸ್ಕಲ್ಸ್ ವಿಭಾಗದಲ್ಲಿ ಸತ್ನಾಮ್ ಸಿಂಗ್ ಅವರೊಂದಿಗೆ ಸಲ್ಮಾನ್ ಖಾನ್ ಕಂಚಿನ ಪದಕವನ್ನು ಗೆದ್ದುಕೊಂಡರು. ಈ ಮೂಲಕ ಈ ವಿಭಾಗದಲ್ಲಿ ಭಾರತವು ತನ್ನ ಚೊಚ್ಚಲ ಪದಕವನ್ನು ತನ್ನದಾಗಿಸಿಕೊಂಡಿತು. ಫೈನಲ್‌ನಲ್ಲಿ ಭಾರತದ ಜೋಡಿಯು 6:13.25 ಸಮಯವನ್ನು ದಾಖಲಿಸಿತು.

ಉಬರ್ ಚಾಲಕ!

ಸಲ್ಮಾನ್ ಪಾಲಿಗೆ ಈ ಪದಕವು ಏಷ್ಯನ್ ಕ್ರೀಡಾಕೂಟದಲ್ಲಿ ಅವರ ಮೊದಲ 'ಪೋಡಿಯಂ ಫಿನಿಶ್' (ವಿಜೇತರ ವೇದಿಕೆ ಏರುವ ಸಾಧನೆ) ಆಗಿದ್ದು, ಭಾರತೀಯ ಸೇನೆಗೆ ಸೇರಿದ ನಂತರವಷ್ಟೇ ಆರಂಭವಾದ ಅವರ ರೋಯಿಂಗ್ (ದೋಣಿ ನಡೆಸುವ ಕ್ರೀಡೆ) ವೃತ್ತಿಜೀವನದಲ್ಲಿ ಮತ್ತೊಂದು ಪ್ರಮುಖ ಮೈಲಿಗಲ್ಲಾಗಿದೆ. ಈ ಕ್ರೀಡೆಯನ್ನು ಪ್ರವೇಶಿಸುವ ಮೊದಲು, ಸಲ್ಮಾನ್ ತಮ್ಮ ಕುಟುಂಬದ ನಿರ್ವಹಣೆಗಾಗಿ ದೆಹಲಿಯಲ್ಲಿ 'ಉಬರ್' (Uber) ವಾಹನವನ್ನು ಚಾಲನೆ ಮಾಡುತ್ತಿದ್ದರು.

ಬಾಲ್ಯದಲ್ಲೇ ತಂದೆ ಯನ್ನು ಕಳೆದುಕೊಂಡ…

ಬಡ ಕುಟುಂಬದಿಂದ ಬಂದ ಸಲ್ಮಾನ್ ಖಾನ್ ಅವರು ಉತ್ತರ ಪ್ರದೇಶದ ಅಮೇಥಿ ಜಿಲ್ಲೆಯ 'ಪ್ಯೂರ್ ಧಿಂಗೈ' (Pure Dhingai) ಎಂಬಲ್ಲಿ ಜನಿಸಿದರು. ಸಲ್ಮಾನ್‌ಗೆ 18 ವರ್ಷವಿದ್ದಾಗ ಡೆಂಗ್ಯೂನಿಂದಾಗಿ ಅವರ ತಂದೆ ಮೃತಪಟ್ಟಾಗ ಅವರ ಜೀವನ ಬದಲಾಯಿತು.

ರೋಶಿಬಿನಾಗೆ ಬೆಳ್ಳಿ, ರೋಯಿಂಗ್‌ನಲ್ಲಿ ಕಂಚು; ಭಾರತದ ಪದಕಗಳ ಸಂಖ್ಯೆ 14ಕ್ಕೆ ಏರಿಕೆ

ಕುಟುಂಬದಲ್ಲಿ ಹಿರಿಯವರಾಗಿದ್ದ ಸಲ್ಮಾನ್‌ ತನ್ನ ಕಿರಿಯ ಒಡಹುಟ್ಟಿದವರನ್ನು ಪೋಷಿಸುವ ಜವಾಬ್ದಾರಿ ತನ್ನ ಹೆಗಲ ಮೇಲೆ ಬಿದ್ದಿದ್ದರಿಂದ, ಭಾರತೀಯ ಸೇನೆಗೆ ಸೇರುವ ಆತನ ಯೋಜನೆಗಳು ಮುಂದೂಡಲ್ಪಟ್ಟವು. ಬದಲಾಗಿ, ಕುಟುಂಬದ ನಿರ್ವಹಣೆಗೆ ನೆರವಾಗಲು ಸಲ್ಮಾನ್ ದೆಹಲಿಯಲ್ಲಿ 'ಊಬರ್' (Uber) ಕ್ಯಾಬ್ ಚಾಲಕನಾಗಿ ಹಗಲು-ರಾತ್ರಿ ದುಡಿಯುತ್ತಾ ಜೀವನೋಪಾಯವನ್ನು ಕಂಡುಕೊಂಡರು.

ಸೇನೆಗೆ ಸೇರುವ ಕನಸು ಮತ್ತೆ ಚಿಗುರಿತು

ಸಲ್ಮಾನ್‌ ಬಾಲ್ಯದಲ್ಲಿ ಸೇನೆ ಸೇರಬೇಕೆಂದು ಕನಸು ಕಂಡಿದ್ದರು. ಆದರೆ ಕುಟುಂಬದ ನಿರ್ವಹಣೆಯ ಕಾರಣದಿಂದ ತಮ್ಮ ಕನಸನ್ನು ಕೈಬಿಟ್ಟಿದ್ದರು. ಆದರೆ ಸಲ್ಮಾನ್ ಅವರ ಎತ್ತರ ಮತ್ತು ದೈಹಿಕ ಸದೃಢತೆಯನ್ನು ಕಂಡ ಅವರ ಸ್ನೇಹಿತನೊಬ್ಬ ನೀಡಿದ ಸಲಹೆಯಿಂದ ಮತ್ತೆ ಸೇನೆಗೆ ಸೇರುವ ಕನಸು ಚಿಗುರೊಡೆಯಿತು. ಅವರು ತಮ್ಮ ಟ್ಯಾಕ್ಸಿಯನ್ನು ಮತ್ತೊಬ್ಬ ಚಾಲಕನಿಗೆ ಒಪ್ಪಿಸಿ, ನೇಮಕಾತಿ ರ್‍ಯಾಲಿ, ವೈದ್ಯಕೀಯ ಹಾಗೂ ಲಿಖಿತ ಪರೀಕ್ಷೆಗಳಲ್ಲಿ ಉತ್ತೀರ್ಣರಾಗುವ ಮೊದಲು ನಾಲ್ಕು ತಿಂಗಳ ಕಾಲ ನೇಮಕಾತಿಗಾಗಿ ಸಿದ್ಧತೆ ನಡೆಸಿದರು.

ಸಲ್ಮಾನ್ 2018ರ ಸೆಪ್ಟೆಂಬರ್ 25ರಂದು ಪುಣೆಯಲ್ಲಿರುವ 'ಬಾಂಬೆ ಇಂಜಿನಿಯರ್ ಗ್ರೂಪ್'ಗೆ ಸೇರ್ಪಡೆಗೊಂಡರು. ಸೈನ್ಯಕ್ಕೆ ಸೇರಿದ ನಂತರವೇ ಅವರಿಗೆ 'ರೋಯಿಂಗ್' (ದೋಣಿ ನಡೆಸುವ ಕ್ರೀಡೆ) ಪರಿಚಯವಾಯಿತು.

ಒತ್ತಾಯದ ಮೇರೆಗೆ ರೋಯಿಂಗ್‌ಗೆ ಸೇರ್ಪಡೆ...

ತರಬೇತುದಾರರಾದ ಸತ್ಯವಾನ್, ಸತೀಶ್ ಸಿರಾತ್ ಮತ್ತು ಪ್ರಭಾತ್ ಮಿಶ್ರಾ ಅವರು ಅವನ ದೈಹಿಕ ಸಾಮರ್ಥ್ಯವನ್ನು ಗಮನಿಸಿ, ಈ ಕ್ರೀಡೆಯನ್ನು ಪ್ರಯತ್ನಿಸುವಂತೆ ಅವರನ್ನು ಪ್ರೋತ್ಸಾಹಿಸಿದರು. ಆರಂಭದಲ್ಲಿ ಸಲ್ಮಾನ್ ಹಿಂಜರಿದಿದ್ದರು, ಏಕೆಂದರೆ ದೋಣಿ ವಿಹಾರ (ರೋಯಿಂಗ್) ಕ್ರೀಡೆಯನ್ನು ಮುಂದುವರಿಸುವ ಯಾವುದೇ ಯೋಜನೆ ಅವರಲ್ಲಿರಲಿಲ್ಲ. ಆದರೆ ತರಬೇತುದಾರರು ಪಟ್ಟುಬಿಡದೆ ಪ್ರಯತ್ನಿಸಿ, ಅಂತಿಮವಾಗಿ ಅವರನ್ನು ದೋಣಿಯಲ್ಲಿ ಕೂರಿಸಿದರು.

ಅವರು ಭಾಗವಹಿಸಿದ ಮೊದಲ 'ಇಂಟರ್-ಸೆಂಟರ್ ರೆಗಟ್ಟಾ' (ನೌಕಾಯಾನ ಸ್ಪರ್ಧೆ) ಅವರಿಗೆ ಬೆಳ್ಳಿ ಪದಕವನ್ನು ತಂದುಕೊಟ್ಟಿತು. ಆ ಬಳಿಕ ಈ ಕ್ರೀಡೆಯಲ್ಲಿ ಮುಂದುವರಿಯಲು ಆತ್ಮವಿಶ್ವಾಸವನ್ನು ನೀಡಿತು. ತರುವಾಯ, ಅವರು ಬೆಟಾಲಿಯನ್ ಮತ್ತು ಇಂಟರ್-ಸೆಂಟರ್ ಸ್ಪರ್ಧೆಗಳಲ್ಲಿ ಪದಕಗಳನ್ನು ಗೆದ್ದರು. ಬಳಿಕ 2021ರಲ್ಲಿ 'ಎರ್ಗೋಮೀಟರ್' ಮಾನದಂಡಗಳನ್ನು ಪೂರೈಸಿ, ಸಿಎಂಇ (CME) ಪುಣೆಯಲ್ಲಿರುವ 'ಆರ್ಮಿ ರೋಯಿಂಗ್ ನೋಡ್'ಗೆ ಆಯ್ಕೆಯಾದರು.

2022 ರಲ್ಲಿ ಗುಜರಾತ್‌ನಲ್ಲಿ ನಡೆದ 36 ನೇ ರಾಷ್ಟ್ರೀಯ ಕ್ರೀಡಾಕೂಟದಲ್ಲಿ ಸಲ್ಮಾನ್ ಚಿನ್ನ ಗೆದ್ದರು. ಆ ವರ್ಷ 5 ನೇ ಒಳಾಂಗಣ ರಾಷ್ಟ್ರೀಯ ಚಾಂಪಿಯನ್‌ಶಿಪ್‌ನಲ್ಲಿ ಚಿನ್ನ ಗೆದ್ದರು. 2023 ರಲ್ಲಿ, ಅವರು ಹಿರಿಯ ರಾಷ್ಟ್ರೀಯ ಚಾಂಪಿಯನ್‌ಶಿಪ್‌ನಲ್ಲಿ ಬೆಳ್ಳಿ ಮತ್ತು ಓಪನ್ ಸ್ಪ್ರಿಂಟ್ ರಾಷ್ಟ್ರೀಯ ಚಾಂಪಿಯನ್‌ಶಿಪ್‌ನಲ್ಲಿ ಚಿನ್ನ ಗೆದ್ದರು.

ಸಲ್ಮಾನ್ ಅವರನ್ನು 2023ರಲ್ಲಿ 'ಟಾರ್ಗೆಟ್ ಒಲಿಂಪಿಕ್ ಪೋಡಿಯಂ ಸ್ಕೀಮ್' (TOPS)ಗೆ ಸೇರ್ಪಡೆಗೊಳಿಸಲಾಯಿತು ಮತ್ತು ಇದರ ಅಡಿಯಲ್ಲಿ ಅವರಿಗೆ 4,09,100 ರೂಪಾಯಿಗಳ ಆರ್ಥಿಕ ನೆರವು ಲಭಿಸಿತು. ಅಲ್ಲದೆ, 'ತರಬೇತಿ ಮತ್ತು ಸ್ಪರ್ಧೆಗಾಗಿನ ವಾರ್ಷಿಕ ಕಾರ್ಯಕ್ರಮ'ದ (Annual Calendar for Training and Competition) ಅಡಿಯಲ್ಲಿ ಅವರು 12,16,589 ರೂಪಾಯಿಗಳನ್ನು ಪಡೆದರು.