2026ರ ಏಷ್ಯನ್ ಗೇಮ್ಸ್‌ಗೆ ಸಜ್ಜು: ಐಐಎಸ್‌ನಲ್ಲಿ 75 ಕಬಡ್ಡಿ ಪಟುಗಳಿಗೆ ವಿಶ್ವದರ್ಜೆಯ ತರಬೇತಿ!

ಬೆಂಗಳೂರು: ಇನ್ಸ್‌ಪೈರ್ ಇನ್‌ಸ್ಟಿಟ್ಯೂಟ್ ಆಫ್ ಸ್ಪೋರ್ಟ್ಸ್ (IIS), ಅಮೆಚೂರ್ ಕಬಡ್ಡಿ ಫೆಡರೇಶನ್ ಆಫ್ ಇಂಡಿಯಾ (AKFI) ಮತ್ತು ಮಶಾಲ್ ಸ್ಪೋರ್ಟ್ಸ್ ಸಹಯೋಗದೊಂದಿಗೆ ಮಾರ್ಚ್ 28 ರಿಂದ ಏಪ್ರಿಲ್ 1 ರವರೆಗೆ ಐದು ದಿನಗಳ ರಾಷ್ಟ್ರೀಯ ಕಬಡ್ಡಿ ಸಾಮರ್ಥ್ಯ ಮತ್ತು ಕಂಡೀಷನಿಂಗ್ (Strength and Conditioning) ಶಿಬಿರವನ್ನು ಯಶಸ್ವಿಯಾಗಿ ಆಯೋಜಿಸಿದೆ. ಮುಂಬರುವ 2026 ರ ಏಷ್ಯನ್ ಗೇಮ್ಸ್‌ಗೆ ಸಂಭಾವ್ಯ ಅಭ್ಯರ್ಥಿಗಳಾಗಿರುವ 75 ಗಣ್ಯ ಪುರುಷ ಮತ್ತು ಮಹಿಳಾ ಕಬಡ್ಡಿ ಕ್ರೀಡಾಪಟುಗಳು ಈ ತೀವ್ರತರವಾದ ತರಬೇತಿ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

ಭಾರತದಲ್ಲಿ ಕ್ರೀಡಾ ವಿಜ್ಞಾನವನ್ನು ಮುನ್ನಡೆಸುವ ಮತ್ತು ಉನ್ನತ ಪ್ರದರ್ಶನಕ್ಕೆ ಬೆಂಬಲ ನೀಡುವ IIS ನ ಬದ್ಧತೆಯ ಭಾಗವಾಗಿ, ಈ ಶಿಬಿರವು ಸಮಗ್ರ ವೇಳಾಪಟ್ಟಿಯನ್ನು ಒಳಗೊಂಡಿತ್ತು. ಇದರಲ್ಲಿ ಜಿಮ್ ಮತ್ತು ಟ್ರ್ಯಾಕ್‌ಗಳಲ್ಲಿ ವ್ಯವಸ್ಥಿತ ಸಾಮರ್ಥ್ಯ ಮತ್ತು ಕಂಡೀಷನಿಂಗ್ ಸೆಷನ್‌ಗಳು, ಕಾಂಬ್ಯಾಟ್ ಹಾಲ್‌ನಲ್ಲಿ ಕಬಡ್ಡಿಗೆ ಸಂಬಂಧಿಸಿದ ತಾಂತ್ರಿಕ ತರಬೇತಿ ಹಾಗೂ ಪೂಲ್ ಸೆಷನ್ ಮತ್ತು ಐಸ್ ಬಾತ್‌ಗಳಂತಹ ಚೇತರಿಕೆ (Recovery) ಪ್ರೋಟೋಕಾಲ್‌ಗಳನ್ನು ಅಳವಡಿಸಲಾಗಿತ್ತು. ಇದರೊಂದಿಗೆ ಉದ್ದೀಪನ ಮದ್ದು ತಡೆ (Anti-doping), ಮಹಿಳಾ ಆರೋಗ್ಯ ಜಾಗೃತಿ ಮತ್ತು ಶರೀರಶಾಸ್ತ್ರದಂತಹ ಪ್ರಮುಖ ವಿಷಯಗಳ ಕುರಿತು ಶೈಕ್ಷಣಿಕ ಕಾರ್ಯಾಗಾರಗಳನ್ನು ಸಹ ನಡೆಸಲಾಯಿತು.

ಬೆಂಗಳೂರು ಎಫ್‌ಸಿ ತಂಡಕ್ಕೆ ಸಾವಿಯೊ ಮೆಡೈರಾ ಸೇರ್ಪಡೆ!

ತರಬೇತಿಯನ್ನು ವೈಯಕ್ತಿಕ ಅಗತ್ಯಕ್ಕೆ ತಕ್ಕಂತೆ ರೂಪಿಸಲು ಮತ್ತು ಗರಿಷ್ಠ ಫಲಿತಾಂಶ ಪಡೆಯಲು, ಕಾರ್ಯಕ್ರಮವು ವೈಜ್ಞಾನಿಕ ಮೌಲ್ಯಮಾಪನಗಳೊಂದಿಗೆ ಪ್ರಾರಂಭವಾಯಿತು. ಇದರಲ್ಲಿ ಪ್ರತಿಷ್ಠಿತ 'ಯೋ-ಯೋ' (Yo-Yo) ಪರೀಕ್ಷೆ ಮತ್ತು ವಿವರವಾದ ದೈಹಿಕ ತಪಾಸಣೆಗಳು ಸೇರಿದ್ದವು. ಸಾಮರ್ಥ್ಯ ಮತ್ತು ಕಂಡೀಷನಿಂಗ್ ಮಾಡ್ಯೂಲ್‌ನಲ್ಲಿ ಬಾಕ್ಸಿಂಗ್ ಸರ್ಕ್ಯೂಟ್ ತರಬೇತಿ, ಜಿಮ್ ಮತ್ತು ಟ್ರ್ಯಾಕ್ ಸೆಷನ್‌ಗಳನ್ನು ಅಳವಡಿಸಿಕೊಂಡು, ಕ್ರೀಡಾಪಟುಗಳ ಸಮಗ್ರ ಬೆಳವಣಿಗೆಗೆ ಒತ್ತು ನೀಡಲಾಯಿತು.

IISನ ಪರ್ಫಾರ್ಮೆನ್ಸ್ ಸೈನ್ಸ್ ಮುಖ್ಯಸ್ಥ ಮ್ಯಾಲ್ಕಮ್ ಗೆಲುಕ್ ನೇತೃತ್ವದಲ್ಲಿ, ಹರಿಯಾಣ ಸ್ಟೀಲರ್ಸ್ ಸಾಮರ್ಥ್ಯ ಮತ್ತು ಕಂಡೀಷನಿಂಗ್ ಕೋಚ್ ರಂಜಿತ್ ನಹಕ್ ಮತ್ತು ಇತರ ತಜ್ಞರು ಈ ಶಿಬಿರವನ್ನು ನಡೆಸಿಕೊಟ್ಟರು. ಇದು ಭಾರತದ ಪ್ರಮುಖ ಹೈ-ಪರ್ಫಾರ್ಮೆನ್ಸ್ ತರಬೇತಿ ಕೇಂದ್ರವಾಗಿ IISನ ಸ್ಥಾನವನ್ನು ಮತ್ತಷ್ಟು ಭದ್ರಪಡಿಸಿತು.

IIS ನ ಅಧ್ಯಕ್ಷರಾದ ಮನಿಷಾ ಮಲ್ಹೋತ್ರಾ ಮಾತನಾಡಿ "IISನಲ್ಲಿ ಕಬಡ್ಡಿ ಸಾಮರ್ಥ್ಯ ಮತ್ತು ಕಂಡೀಷನಿಂಗ್ ಶಿಬಿರವನ್ನು ಆಯೋಜಿಸಲು ನಮಗೆ ತುಂಬಾ ಸಂತೋಷವಾಗಿದೆ. ಇದು ನಮ್ಮಲ್ಲಿ ನಡೆದ ಈ ರೀತಿಯ ಮೊದಲ ಶಿಬಿರವಾಗಿದ್ದು, ನಮ್ಮ ತಂಡಕ್ಕೂ ಸಹ ಇದು ಉತ್ತಮ ಕಲಿಕೆಯ ಅನುಭವವಾಗಿದೆ. ಈ ಯೋಜನೆಯಲ್ಲಿ ನಮ್ಮೊಂದಿಗೆ ಪಾಲುದಾರರಾದ AKFI ಮತ್ತು ಮಶಾಲ್ ಸ್ಪೋರ್ಟ್ಸ್‌ಗೆ ನಾವು ಧನ್ಯವಾದಗಳನ್ನು ಅರ್ಪಿಸುತ್ತೇವೆ," ಎಂದರು.

Sony Sports Ten 4 Kannada: ಕನ್ನಡ ಚಾನೆಲ್‌ ಆರಂಭಿಸಿ ಸೋನಿ ಸ್ಪೋರ್ಟ್ಸ್‌ ನೆಟ್‌ವರ್ಕ್‌!

ಭಾರತೀಯ ಕಬಡ್ಡಿ ಆಟಗಾರ ಮತ್ತು ಹರಿಯಾಣ ಸ್ಟೀಲರ್ಸ್ ನಾಯಕ ಜೈದೀಪ್ ದಹಿಯಾ ಮಾತನಾಡಿ "IIS ಈಗ ನನಗೆ ಎರಡನೇ ಮನೆಯಂತಾಗಿದೆ. ಕಳೆದ ಐದು ವರ್ಷಗಳಿಂದ ನಾನು ಹರಿಯಾಣ ಸ್ಟೀಲರ್ಸ್ ಜೊತೆಗೆ IIS ನಲ್ಲಿ ಪ್ರಿ-ಸೀಸನ್ ಶಿಬಿರಗಳಲ್ಲಿ ಭಾಗವಹಿಸುತ್ತಿದ್ದೇನೆ. ಇಲ್ಲಿನ ಸೌಲಭ್ಯಗಳು ಅತ್ಯುತ್ತಮವಾಗಿವೆ ಎಂಬುದು ನಮಗೆಲ್ಲರಿಗೂ ತಿಳಿದಿದೆ, ಆದರೆ ಇಲ್ಲಿನ ಸಿಬ್ಬಂದಿ ಕೂಡ ಅಷ್ಟೇ ವಿಶ್ವದರ್ಜೆಯವರಾಗಿದ್ದಾರೆ," ಎಂದು ಪ್ರಶಂಸಿಸಿದರು.

IS ಸಂಸ್ಥೆಯು ಭಾರತದ ಒಲಿಂಪಿಕ್ ಆಂದೋಲನಕ್ಕೆ ಮಾತ್ರವಲ್ಲದೆ, ವಿಶ್ವದರ್ಜೆಯ ಹೈ-ಪರ್ಫಾರ್ಮೆನ್ಸ್ ಮೂಲಸೌಕರ್ಯ, ವೈಜ್ಞಾನಿಕ ತರಬೇತಿ ವಿಧಾನಗಳು ಮತ್ತು ಕ್ರೀಡಾಪಟುಗಳ ಶಿಕ್ಷಣದ ಮೂಲಕ ವಿವಿಧ ತಂಡಗಳು, ಅಥ್ಲೀಟ್‌ಗಳು ಮತ್ತು ಫೆಡರೇಶನ್‌ಗಳನ್ನು ಬೆಂಬಲಿಸುವ ಮೂಲಕ ಭಾರತದ ಕ್ರೀಡಾ ಪರಿಸರ ವ್ಯವಸ್ಥೆಯನ್ನು ಬಲಪಡಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದೆ.