'ಯುನಿಸೆಫ್' ಕುಟುಂಬ ಸೇರಿದ ಸ್ಮೃತಿ ಮಂಧನಾ

ಮುಂಬಯಿ, ಅ.11: ಭಾರತೀಯ ಕ್ರಿಕೆಟ್ ತಾರೆ ಸ್ಮೃತಿ ಮಂಧನಾ ಅವರು ಮಕ್ಕಳ ಹಕ್ಕುಗಳು, ಲಿಂಗ ಸಮಾನತೆ ಮತ್ತು ಬಾಲಕಿಯರಿಗೆ ಸಮಾನ ಅವಕಾಶಗಳಿಗಾಗಿ ಧ್ವನಿ ಎತ್ತುವ ಸಂಕಲ್ಪದೊಂದಿಗೆ, 'ಯುನಿಸೆಫ್ ಇಂಡಿಯಾ'ದ (UNICEF India) 'ಸೆಲೆಬ್ರಿಟಿ ಅಡ್ವೊಕೇಟ್' (ಖ್ಯಾತನಾಮ ರಾಯಭಾರಿ) ಆಗಿ ಸೇರ್ಪಡೆಗೊಳ್ಳುವ ಮೂಲಕ ಕ್ರಿಕೆಟ್ ಮೈದಾನದಾಚೆಗೂ ಮಹತ್ವದ ಹೆಜ್ಜೆ ಇರಿಸಿದ್ದಾರೆ.

ಎಡಗೈ ಬ್ಯಾಟರ್ ಆಗಿರುವ ಇವರು, ಮಕ್ಕಳು ಎದುರಿಸುತ್ತಿರುವ ಸವಾಲುಗಳ ಬಗ್ಗೆ ಜಾಗೃತಿ ಮೂಡಿಸಲು ಹಾಗೂ ಪ್ರತಿಯೊಂದು ಮಗುವೂ ಕಲಿಯಲು, ಆಟವಾಡಲು ಮತ್ತು ತಮ್ಮ ಸಾಮರ್ಥ್ಯವನ್ನು ಸಾಕಾರಗೊಳಿಸಿಕೊಳ್ಳಲು ಸಾಧ್ಯವಾಗುವಂತಹ ಎಲ್ಲರನ್ನೂ ಒಳಗೊಂಡ ವಾತಾವರಣವನ್ನು ಉತ್ತೇಜಿಸಲು ತಮ್ಮ ಪ್ರಭಾವವನ್ನು ಬಳಸಿಕೊಳ್ಳಲಿದ್ದಾರೆ.

ದಕ್ಷಿಣ ಏಷ್ಯಾಕ್ಕಾಗಿ ಯುನಿಸೆಫ್‌ನ (UNICEF) ಪ್ರಾದೇಶಿಕ ಸದ್ಭಾವನಾ ರಾಯಭಾರಿಯಾಗಿ ಕಾರ್ಯನಿರ್ವಹಿಸುತ್ತಿರುವ ಭಾರತದ ದಿಗ್ಗಜ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ಅವರು, ಮಂಧನಾ ಅವರ ಈ ನೇಮಕವನ್ನು ಆತ್ಮೀಯವಾಗಿ ಸ್ವಾಗತಿಸಿದರು.

ಮಕ್ಕಳ ಕಲ್ಯಾಣ, ಆರೋಗ್ಯ ಮತ್ತು ಶಿಕ್ಷಣಕ್ಕೆ ಸಂಬಂಧಿಸಿದ ಉಪಕ್ರಮಗಳನ್ನು ಬೆಂಬಲಿಸುತ್ತಾ, ತೆಂಡೂಲ್ಕರ್ ಅವರು ಈ ಸಂಸ್ಥೆಯೊಂದಿಗೆ ಒಂದು ದಶಕಕ್ಕೂ ಹೆಚ್ಚು ಕಾಲ ಕೆಲಸ ಮಾಡಿದ್ದಾರೆ. ಮಂಧನಾ ಅವರನ್ನು ಯುನಿಸೆಫ್ (UNICEF) ಇಂಡಿಯಾ ಕುಟುಂಬಕ್ಕೆ ಸ್ವಾಗತಿಸಿದ ತೆಂಡೂಲ್ಕರ್, ಈ ಭಾರತೀಯ ತಾರೆ ಮಕ್ಕಳ ಹಕ್ಕುಗಳ ಪರವಾಗಿ ಪ್ರಬಲ ಧ್ವನಿಯಾಗಲಿದ್ದಾರೆ ಎಂಬ ವಿಶ್ವಾಸವನ್ನು ವ್ಯಕ್ತಪಡಿಸಿದರು.

ಕೊಹ್ಲಿಯ ದಶಕದಷ್ಟು ಹಳೆಯ ಟೆಸ್ಟ್ ದಾಖಲೆ ಮುರಿದ ಮ್ಯಾಟ್ ರೆನ್‌ಶಾ

"ಯುನಿಸೆಫ್‌ ಕುಟುಂಬಕ್ಕೆ ಸುಸ್ವಾಗತ, ಮೈದಾನದಲ್ಲಿ ನೀವು ಲಕ್ಷಾಂತರ ಜನರಿಗೆ ಸ್ಫೂರ್ತಿಯಾಗಿದ್ದೀರಿ. ಮೈದಾನದ ಹೊರಗೂ ಮಕ್ಕಳ ಹಕ್ಕುಗಳ ಪರವಾಗಿ ನೀವು ಅತ್ಯುತ್ತಮ ಧ್ವನಿಯಾಗಲಿದ್ದೀರಿ ಎಂಬುದು ನನಗೆ ತಿಳಿದಿದೆ" ಎಂದು ಟ್ವೀಟ್‌ ಮಾಡಿ ಸಚಿನ್‌ ಅವರು ಮಂಧಾನರನ್ನು ಸ್ವಾಗತಿಸಿದರು.

ಬಾಲಕಿಯರು ತಮ್ಮ ಭವಿಷ್ಯವನ್ನು ತಾವೇ ಆಯ್ಕೆ ಮಾಡಿಕೊಳ್ಳುವ ಸ್ವಾತಂತ್ರ್ಯವನ್ನು ಹೊಂದುವಂತಾಗಬೇಕು ಎಂದು ಮಂಧನಾ ವಿಡಿಯೊದಲ್ಲಿ ಹೇಳಿದರು. ಇದೇ ವೇಳೆ ತಮ್ಮ ಬಾಲ್ಯದಲ್ಲಿ ತಮ್ಮ ಪೋಷಕರಿಂದ ದೊರೆತ ಪ್ರೋತ್ಸಾಹ ಹಾಗೂ ಕ್ರೀಡಾ ಆಕಾಂಕ್ಷೆಗಳೊಂದಿಗೆ ಶೈಕ್ಷಣಿಕ ಚಟುವಟಿಕೆಗಳನ್ನೂ ಸಮತೋಲನದಲ್ಲಿ ಕೊಂಡೊಯ್ಯುವಲ್ಲಿ ಎದುರಿಸಿದ ಸವಾಲುಗಳನ್ನು ಹಂಚಿಕೊಂಡರು.

"ನಾನು ಒಂಬತ್ತು ವರ್ಷದವಳಿದ್ದಾಗ, ಕೇವಲ ಮೋಜಿನ ಸಲುವಾಗಿ ನನ್ನ ಸಹೋದರನೊಂದಿಗೆ ನನ್ನ ಮೊದಲ ಕ್ರಿಕೆಟ್ ಆಯ್ಕೆ ಪ್ರಕ್ರಿಯೆಗೆ (ಟ್ರಯಲ್ಸ್) ಹೋಗಿದ್ದೆ. ಆನಂತರವೂ ನಾನು ಬಾಲ್ಯವನ್ನು ಆನಂದಿಸುತ್ತಲೇ ಕ್ರಿಕೆಟ್ ಆಡುವುದನ್ನು ಮುಂದುವರಿಸಿದೆ. ನನ್ನ ತಂದೆ ಯಾವಾಗಲೂ ನನಗೆ ಕ್ರಿಕೆಟ್ ಆಡಲು ಪ್ರೋತ್ಸಾಹ ನೀಡುತ್ತಿದ್ದರು; ಆದರೆ, ವೃತ್ತಿಪರ ಕ್ರಿಕೆಟ್ ಪಯಣ ಮತ್ತು ಶೈಕ್ಷಣಿಕ ವಿದ್ಯಾಭ್ಯಾಸ ಇವೆರಡನ್ನೂ ಏಕಕಾಲದಲ್ಲಿ ನಿಭಾಯಿಸುವುದು ಎಷ್ಟು ಸವಾಲಿನ ವಿಷಯ ಎಂಬುದನ್ನು ನನ್ನ ತಾಯಿ ಚೆನ್ನಾಗಿ ಅರಿತಿದ್ದರು" ಎಂದು ಮಂಧನಾ ಹೇಳಿದರು.

“ನಾನು ನನ್ನ ಆಯ್ಕೆಯನ್ನು ಮಾಡಿಕೊಂಡೆ. ಇಂದು ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಭಾರತವನ್ನು ಹೆಮ್ಮೆಯಿಂದ ಪ್ರತಿನಿಧಿಸುತ್ತಿದ್ದೇನೆ. ಹಿಂದಿರುಗಿ ನೋಡಿದಾಗ, ಪ್ರತಿಯೊಬ್ಬ ಹುಡುಗಿಗೂ ತನ್ನ ಹಾದಿಯನ್ನು ಆಯ್ಕೆ ಮಾಡಿಕೊಳ್ಳುವ, ತನ್ನ ಕನಸುಗಳನ್ನು ಬೆನ್ನಟ್ಟುವ ಮತ್ತು ತಾನು ಯಾವುದರಲ್ಲಿ ಅತ್ಯುತ್ತಮಳಾಗಿದ್ದಾಳೆ ಎಂಬುದನ್ನು ಕಂಡುಕೊಳ್ಳುವ ಸ್ವಾತಂತ್ರ್ಯವಿರಬೇಕು ಎಂಬುದು ನನಗೆ ಅರಿವಾಯಿತು. ಹುಡುಗಿಯಾಗಿರುವುದು ಆಕೆ ಎಷ್ಟು ದೂರ ಸಾಗಬಲ್ಲಳು ಎಂಬುದನ್ನು ನಿರ್ಧರಿಸುವ ಅಂಶವಾಗಬಾರದು” ಎಂದರು.