ಅಟ್ಲಾಂಟಾ, ಜು.17: ‘ಹಾಲಿ ಚಾಂಪಿಯನ್’ ಅರ್ಜೆಂಟೀನಾ ಮತ್ತು ಸ್ಪೇನ್(Argentina vs Spain) ನಡುವಣ ಫಿಫಾ ವಿಶ್ವಕಪ್ ಫೈನಲ್(FIFA World Cup 2026 final) ಪಂದ್ಯ ಭಾನುವಾರ ನಡೆಯಲಿದೆ. ಈ ಪಂದ್ಯ ಕಣ್ತುಂಬಿಕೊಳ್ಳಲು ಫುಟ್ಭಾಲ್ ಅಭಿಮಾನಿಗಳು ಚಾತಕ ಪಕ್ಷಿಯಂತೆ ಕಾದು ಕುಳಿತಿದ್ದಾರೆ. ಫೈನಲ್ಗೆ ಫಿಫಾ ಪಂದ್ಯದ ಅಧಿಕಾರಿಗಳ ಪಟ್ಟಿಯನ್ನು ಶನಿವಾರ ಪ್ರಕಟಿಸಿತು.
ಸ್ಲಾವ್ಕೊ ವಿನ್ಸಿಕ್ ವಿಶ್ವಕಪ್ ಫೈನಲ್ನ ಮುಖ್ಯ ರೆಫರಿಯಾಗಿ ಕಾರ್ಯನಿರ್ವಹಿಸಲಿದ್ದಾರೆ. ಅವರು ಹಾಲಿ ಟೂರ್ನಮೆಂಟ್ನಲ್ಲಿ ಮೂರು ಪಂದ್ಯಗಳಲ್ಲಿ ರೆಫರಿಯಾಗಿದ್ದರು. 32ರ ಸುತ್ತಿನಲ್ಲಿ ಮೆಕ್ಸಿಕೊ ಮತ್ತು ಈಕ್ವೆಡಾರ್ ನಡುವಿನ ಘರ್ಷಣೆಯಲ್ಲಿ ಕೊನೆಯದಾಗಿ ಕಾರ್ಯನಿರ್ವಹಿಸಿದ್ದರು. ವಿನ್ಸಿಕ್ ಅವರೊಂದಿಗೆ ಟೊಮಾಜ್ ಕ್ಲಾನ್ಕ್ನಿಕ್ ಮತ್ತು ಆಂಡ್ರಾಜ್ ಕೊವಾಸಿಕ್ ಎರಡನೇ ಸಹಾಯಕರಾಗಿ ಕಾರ್ಯನಿರ್ವಹಿಸಲಿದ್ದಾರೆ. ಹೆಚ್ಚುವರಿಯಾಗಿ, ಅಧಮ್ ಮಖದ್ಮೆಹ್ ಈ ಪಂದ್ಯದಲ್ಲಿ ನಾಲ್ಕನೇ ಅಧಿಕಾರಿಯಾಗಿರುತ್ತಾರೆ.
ವಿಶ್ವಕಪ್ ಫೈನಲ್ನಲ್ಲಿ ಸ್ಪೇನ್ ವಿರುದ್ಧ ಆಡಲಿರುವ ಅರ್ಜೆಂಟೀನಾ ತಂಡದ ಮೇಲೆ ಅನೇಕರ ಕಣ್ಣುಗಳು ನೆಟ್ಟಿದೆ. ಹಾಲಿ ಚಾಂಪಿಯನ್ಗಳು ಸೆಮಿಫೈನಲ್ನಲ್ಲಿ ಅಸಾಧಾರಣ ಪ್ರದರ್ಶನ ನೀಡಿ ಇಂಗ್ಲೆಂಡ್ ಅನ್ನು 1-2 ಅಂತರದಿಂದ ಸೋಲಿಸಿದರು. ಪಂದ್ಯದುದ್ದಕ್ಕೂ ಹಿಂದುಳಿದ ನಂತರ, ಅರ್ಜೆಂಟೀನಾ ಏಳು ನಿಮಿಷಗಳಲ್ಲಿ ಎರಡು ಗೋಲುಗಳನ್ನು ಗಳಿಸಿ ಇಂಗ್ಲೆಂಡ್ ತಂಡವನ್ನು ಮಣಿಸಿತ್ತು. 60 ವರ್ಷಗಳ ನಂತರ ವಿಶ್ವಕಪ್ ಜಯಿಸುವ ಇಂಗ್ಲೆಂಡ್ ಆಟಗಾರರ ಕನಸು ಕಮರಿತು. ಮೊದಲ ಸೆಮಿಫೈನಲ್ ಪಂದ್ಯದಲ್ಲಿ ಸ್ಫೇನ್ ತಂಡ ಫ್ರಾನ್ಸ್ ವಿರುದ್ಧ ಗೆದ್ದು ಫೈನಲ್ ಪ್ರವೇಶಿಸಿತ್ತು.
ಫೈನಲ್ ಪಂದ್ಯಕ್ಕೆ ಟ್ರಂಪ್
ಅರ್ಜೆಂಟೀನಾ ಮತ್ತು ಸ್ಪೇನ್ ನಡುವಿನ 2026 ರ ಫಿಫಾ ವಿಶ್ವ ಕಪ್ ಫೈನಲ್ನಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಭಾನುವಾರ ನ್ಯೂಯಾರ್ಕ್ ಪ್ರದೇಶದಲ್ಲಿ ಭಾಗವಹಿಸಲಿದ್ದಾರೆ ಎಂದು ಶ್ವೇತಭವನದ ಪತ್ರಿಕಾ ಕಾರ್ಯದರ್ಶಿ ಕ್ಯಾರೋಲಿನ್ ಲೀವಿಟ್ ತಿಳಿಸಿದ್ದಾರೆ. ಫೈನಲ್ ಪಂದ್ಯ ನ್ಯೂಯಾರ್ಕ್/ನ್ಯೂಜೆರ್ಸಿ ಕ್ರೀಡಾಂಗಣದಲ್ಲಿ ನಡೆಯಲಿದೆ.
Spain vs Argentina ನಡುವೆ ಫಿಫಾ ವಿಶ್ವಕಪ್ ಗೆಲ್ಲುವ ನೆಚ್ಚಿನ ತಂಡ ಯಾವುದು?
ಕಳೆದ ವರ್ಷ ಚೆಲ್ಸಿಯಾ ಮತ್ತು ಪ್ಯಾರಿಸ್ ಸೇಂಟ್-ಜರ್ಮೈನ್ ನಡುವಿನ ಫಿಫಾ ಕ್ಲಬ್ ವಿಶ್ವಕಪ್ ಫೈನಲ್ನಲ್ಲಿ ಟ್ರಂಪ್ ಉಪಸ್ಥಿತರಿದ್ದರು, ಅಧ್ಯಕ್ಷರು ಪ್ರೀಮಿಯರ್ ಲೀಗ್ ಕ್ಲಬ್ಗೆ ಟ್ರೋಫಿಯನ್ನು ಪ್ರದಾನ ಮಾಡಿದ್ದರು. ಈ ಬಾರಿಯೂ ಫಿಫಾ ವಿಶ್ವಕಪ್ ಟ್ರೋಫಿ ಪ್ರದಾನ ಮಾಡುವ ಸಾಧ್ಯತೆಯಿದೆ.
"ಭಾನುವಾರ ನಡೆಯಲಿರುವ ಅಂತಿಮ ಪಂದ್ಯಕ್ಕಾಗಿ ನಾವು ಕಾತರದಿಂದ ಕಾಯುತ್ತಿದ್ದೇವೆ, ಮತ್ತು ಅಧ್ಯಕ್ಷರು ಭಾಗವಹಿಸಲು ಕಾತರದಿಂದ ಕಾಯುತ್ತಿದ್ದಾರೆಂದು ನನಗೆ ತಿಳಿದಿದೆ. ಅವರ ಹಾಜರಾತಿಯು ಅಮೆರಿಕಾದ ಇತಿಹಾಸದಲ್ಲಿ ಅತಿ ಹೆಚ್ಚು ವೀಕ್ಷಿಸಲ್ಪಟ್ಟ, ಅತ್ಯಂತ ಸುರಕ್ಷಿತ ಮತ್ತು ಅತ್ಯಂತ ಯಶಸ್ವಿ ವಿಶ್ವಕಪ್ ಆಗಲಿದೆ" ಎಂದು ಲೀವಿಟ್ ಪತ್ರಿಕಾಗೋಷ್ಠಿಯಲ್ಲಿ ಸುದ್ದಿಗಾರರಿಗೆ ತಿಳಿಸಿದರು.
ಶುಕ್ರವಾರ ನ್ಯೂಯಾರ್ಕ್ ನಗರದ ಟ್ರಂಪ್ ಟವರ್ನಲ್ಲಿ ನಡೆಯಲಿರುವ ಫಿಫಾ ಸ್ವಾಗತ ಸಮಾರಂಭದಲ್ಲಿ ಅಮೆರಿಕ ಅಧ್ಯಕ್ಷರು ಭಾಗವಹಿಸಲಿದ್ದಾರೆ ಎಂದು ಲೀವಿಟ್ ಹೇಳಿದರು.