ಖ್ಯಾತ ಶಿಕ್ಷಕ ಯುಟ್ಯೂಬರ್ ಖಾನ್ ಸರ್‌ಗೆ ವಿವಾಹ ಭಾಗ್ಯ: ತೇಜಸ್ವಿ ಯಾದವ್ ಸೇರಿ ಗಣ್ಯರಿಂದ ಶುಭಾಶಯ
Khan Sir: ಖ್ಯಾತ ಶಿಕ್ಷಕ ಮತ್ತು ಜನಪ್ರಿಯ ಯುಟ್ಯೂಬರ್ ಖಾನ್ ಸರ್ ಇತ್ತೀಚೆಗೆ ವಿವಾಹವಾಗಿದ್ದು, ಆರತಕ್ಷತೆ ಕಾರ್ಯಕ್ರಮದಲ್ಲಿ ಬಿಹಾರದ ವಿರೋಧ ಪಕ್ಷದ ನಾಯಕ ತೇಜಸ್ವಿ ಯಾದವ್ ಸೇರಿದಂತೆ ಹಲವು ಗಣ್ಯರು ಭಾಗವಹಿಸಿದ್ದರು. ಈ ವೇಳೆ ನಡೆದ ತೇಜಸ್ವಿ ಮತ್ತು ಖಾನ್ ಸರ್ ನಡುವಿನ ಹಾಸ್ಯದ ಸಂಭಾಷಣೆಯ ವೈರಲ್ ಆಗಿದೆ.
Sushmitha Jain
Jun 3, 2025 9:08 PM
ಪಾಟ್ನಾ: ಖ್ಯಾತ ಶಿಕ್ಷಕ ಮತ್ತು ಜನಪ್ರಿಯ ಯುಟ್ಯೂಬರ್ ಖಾನ್ ಸರ್ (Khan Sir) (ಫೈಝಲ್ ಖಾನ್) ಇತ್ತೀಚೆಗೆ ವಿವಾಹವಾಗಿದ್ದು, ಈ ಸಮಾರಂಭದಲ್ಲಿ ಬಿಹಾರದ ವಿರೋಧ ಪಕ್ಷದ ನಾಯಕ (Bihar Leader of Opposition) ತೇಜಸ್ವಿ ಯಾದವ್ (Tejashwi Yadav) ಸೇರಿದಂತೆ ಹಲವು ಗಣ್ಯರು ಭಾಗವಹಿಸಿದ್ದರು. ಈ ವೇಳೆ ನಡೆದ ತೇಜಸ್ವಿ ಮತ್ತು ಖಾನ್ ಸರ್ ನಡುವಿನ ಹಾಸ್ಯದ ಸಂಭಾಷಣೆಯ ವಿಡಿಯೊ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಕಾರ್ಯಕ್ರಮದಲ್ಲಿ ತೇಜಸ್ವಿ ಯಾದವ್, ಖಾನ್ ಸರ್ ಅವರಿಗೆ ವಿವಾಹದ ದಿನಾಂಕದ ಬಗ್ಗೆ ಕೇಳಿದ್ದಾರೆ. ಈ ವೇಳೆ ಖಾನ್ ಸರ್ ಹಾಸ್ಯದಿಂದ, “ಇದು ಭಾರತ-ಪಾಕಿಸ್ತಾನ ಒತ್ತಡದ ಸಮಯದಲ್ಲಿ ನಡೆಯಿತು. ನಾನು ನಿಮ್ಮ ಮಾದರಿಯನ್ನೇ ಅನುಸರಿಸಿದೆ ಸರ್” ಎಂದರು. ಇದಕ್ಕೆ ತೇಜಸ್ವಿ ಸೇರಿದಂತೆ ವೇದಿಕೆಯಲ್ಲಿದ್ದವರು ನಗೆಗಡಲಿನಲ್ಲಿ ಮುಳುಗಿದರು. “ಹಾಗಾದರೆ ಸಂಭ್ರಮಾಚರಣೆ ಸರಿಯಾದ ಸಮಯದಲ್ಲಿ ನಡೆದಿದೆ” ಎಂದು ತೇಜಸ್ವಿ ಯಾದವ್ ಸಂತೋಷದಿಂದ ಉತ್ತರಿಸಿದರು.
बिहार के फेमस टीचर 'खान सर' के रिसेप्शन पार्टी में तेजस्वी आए. शादी कब की ? जब पूछा तो खान सर ने तेजस्वी की चुटकी ले ली... pic.twitter.com/GPkpm7KRof
— Thakur Shaktilochan shandilya (@Ershaktilochan) June 3, 2025
ಈ ಸುದ್ದಿಯನ್ನೂ ಓದಿ: Viral Video: ವೃದ್ಧ ದಂಪತಿಯ ರೊಮ್ಯಾಂಟಿಕ್‌ ವಿಡಿಯೊ ಫುಲ್‌ ವೈರಲ್!
ಬಿಹಾರದ ರಾಜ್ಯಪಾಲ ಅರಿಫ್ ಮೊಹಮ್ಮದ್ ಖಾನ್ ಭಾಗವಹಿಸಿ, ವೇದಿಕೆಯಲ್ಲಿ ನವದಂಪತಿಯನ್ನು ಆಶೀರ್ವದಿಸಿದರು. ಖಾನ್ ಸರ್ ಅವರ ಶಿಕ್ಷಣ ಕ್ಷೇತ್ರದ ಕೊಡುಗೆಯನ್ನು ಶ್ಲಾಘಿಸಿದ ಅವರು, ದಂಪತಿಗೆ ಶುಭಕಾಮನೆಗಳನ್ನು ತಿಳಿಸಿದರು. ಉಪಮುಖ್ಯಮಂತ್ರಿ ಸಮ್ರಾಟ್ ಚೌಧರಿ ಕೂಡ ಖಾನ್ ಸರ್‌ಗೆ ಹೂಗುಚ್ಛ ನೀಡಿ ಅಭಿನಂದಿಸಿದ್ದು, ಖಾನ್ ಸರ್ ಅವರಂತಹ ಯುವ ಶಿಕ್ಷಕರು ಬಿಹಾರದ ಭವಿಷ್ಯವನ್ನು ರೂಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ ಎಂದು ಹೊಗಳಿದರು.
ರಾಜಕೀಯ, ಶಿಕ್ಷಣ, ಯುಟ್ಯೂಬ್ ಮತ್ತು ಸಾಮಾಜಿಕ ಜಾಲತಾಣದ ಗಣ್ಯರು ಈ ಸಂಭ್ರಮಾಚರಣೆಯಲ್ಲಿ ಭಾಗವಹಿಸಿದ್ದರು. ಖಾನ್ ಸರ್ ಅವರ ಸಾವಿರಾರು ವಿದ್ಯಾರ್ಥಿಗಳು ಮತ್ತು ಅಭಿಮಾನಿಗಳು ಸ್ಥಳದಲ್ಲಿ ಮತ್ತು ಆನ್‌ಲೈನ್‌ನಲ್ಲಿ ತಮ್ಮ ಹೃತ್ಪೂರ್ವಕ ಶುಭಾಶಯಗಳನ್ನು ತಿಳಿಸಿದ್ದಾರೆ.
ಭಾರತದ ಪ್ರಭಾವಿ ಆನ್‌ಲೈನ್ ಶಿಕ್ಷಕರಲ್ಲಿ ಒಬ್ಬರಾದ ಖಾನ್ ಸರ್ (ಫೈಝಲ್ ಖಾನ್), ತಮ್ಮ ರೋಚಕ ಶಿಕ್ಷಣ ಶೈಲಿಯಿಂದ ಸ್ಪರ್ಧಾತ್ಮಕ ಪರೀಕ್ಷೆಗೆ ತಯಾರಿಯಲ್ಲಿರುವ ವಿದ್ಯಾರ್ಥಿಗಳಲ್ಲಿ ಜನಪ್ರಿಯರಾಗಿದ್ದಾರೆ. ಅಲಹಾಬಾದ್ ವಿಶ್ವವಿದ್ಯಾಲಯದಲ್ಲಿ ವಿಜ್ಞಾನ ಮತ್ತು ಭೂಗೋಳಶಾಸ್ತ್ರದಲ್ಲಿ ಪದವಿ ಪಡೆದ ಖಾನ್ ಸರ್, ಬಿಹಾರದ ಪಾಟ್ನಾದಲ್ಲಿ ಶಿಕ್ಷಣ ಆರಂಭಿಸಿದರು. 2019ರಲ್ಲಿ ಆರಂಭಿಸಿದ ಅವರ ಯುಟ್ಯೂಬ್ ಚಾನೆಲ್ ಖಾನ್ GS ರಿಸರ್ಚ್ ಸೆಂಟರ್ 23 ಮಿಲಿಯನ್‌ಗೂ ಹೆಚ್ಚು ಚಂದಾದಾರರೊಂದಿಗೆ ದೇಶದ ಅತ್ಯಂತ ಜನಪ್ರಿಯ ಶಿಕ್ಷಣ ವೇದಿಕೆಯಾಗಿದೆ.
ಖಾನ್ ಸರ್ UPSC, SSC, ರೈಲ್ವೇ, ಮತ್ತು ಬ್ಯಾಂಕಿಂಗ್ ಪರೀಕ್ಷೆಗಳಿಗೆ ಕಡಿಮೆ ವೆಚ್ಚದ ಆನ್‌ಲೈನ್ ಕೋರ್ಸ್‌ಗಳನ್ನು ಒದಗಿಸುವ ಮೂಲಕ ಶಿಕ್ಷಣವನ್ನು ಎಲ್ಲರಿಗೂ ಸುಲಭಗೊಳಿಸಿದ್ದಾರೆ. 107 ಕೋಟಿ ರೂ. ಮೌಲ್ಯದ ಆಕರ್ಷಕ ಆಫರ್‌ನ್ನು ತಿರಸ್ಕರಿಸಿ, ಕಡಿಮೆ ವೆಚ್ಚದ ಶಿಕ್ಷಣದ ತಮ್ಮ ಗುರಿಗೆ ಬದ್ಧರಾಗಿದ್ದಾರೆ. ಸಂಕೀರ್ಣ ವಿಷಯಗಳನ್ನು ಹಾಸ್ಯ, ಜೀವನಕ್ಕೆ ಸಂಬಂಧಿತ ಉದಾಹರಣೆಗಳು ಮತ್ತು ಸರಳತೆಯಿಂದ ವಿವರಿಸುವ ಅವ ಶೈಲಿಯು ವಿದ್ಯಾರ್ಥಿಗಳಿಗೆ ಕಠಿಣ ವಿಷಯಗಳನ್ನು ಸುಲಭವಾಗಿ ಅರ್ಥ ಮಾಡಿಕೊಳ್ಳಲು ಸಹಾಯ ಮಾಡಿದೆ.