Viral Video: ಮೇಕೆ ನುಂಗಿದ ದೈತ್ಯ ಹೆಬ್ಬಾವನ್ನು ಕೊಡಲಿಯಿಂದ ಹೊಡೆದು ಕೊಂದ ಕಿಡಿಗೇಡಿಗಳು; ಶಾಕಿಂಗ್‌ ವಿಡಿಯೊ ಇಲ್ಲಿದೆ

ಝಾನ್ಸಿ: ದೈತ್ಯ ಹೆಬ್ಬಾವನ್ನು ಗ್ರಾಮಸ್ಥರು ಕ್ರೂರವಾಗಿ ಕೊಂದಿರುವ ಆಘಾತಕಾರಿ ಘಟನೆ ಉತ್ತರ ಪ್ರದೇಶದ ಝಾನ್ಸಿಯಲ್ಲಿ (Jhansi) ನಡೆದಿದೆ. ರೈತರೊಬ್ಬರ ಮೇಕೆಯನ್ನು ಹೆಬ್ಬಾವಿನಿಂದ ರಕ್ಷಿಸುವ ಸಲುವಾಗಿ ಗ್ರಾಮಸ್ಥರು ದೈತ್ಯ ಹಾವನ್ನು ಕೊಂದಿದ್ದಾರೆ ಎನ್ನಲಾಗಿದೆ. ಗ್ರಾಮಸ್ಥರು, ಸತ್ತ ಮೇಕೆ ಮತ್ತು ಹೆಬ್ಬಾವನ್ನು (Python) ರಸ್ತೆಯ ಮೇಲೆ ಎಳೆದುಕೊಂಡು ಹೋಗುತ್ತಿರುವ ವಿಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ (Viral Video) ಆಗಿದೆ.

ರಕಾಸಾ ಪೊಲೀಸ್ ಠಾಣಾ ವ್ಯಾಪ್ತಿಯ ಪುನವಾಲಿ ಗ್ರಾಮದಲ್ಲಿ ಈ ಘಟನೆ ನಡೆದಿದ್ದು, ಸುಮಾರು 15 ರಿಂದ 20 ಅಡಿ ಉದ್ದದ ಬೃಹತ್ ಹೆಬ್ಬಾವನ್ನು ಕೊಲ್ಲಲಾಗಿದೆ. ಹೊಲದಲ್ಲಿ ಮೇಯುತ್ತಿದ್ದ ಮೇಕೆಯ ಮೇಲೆ ದಾಳಿ ಮಾಡಿದ ಹೆಬ್ಬಾವು ಅದನ್ನು ನುಂಗಿದ ನಂತರ ಗ್ರಾಮಸ್ಥರು, ಹೆಬ್ಬಾವನ್ನು ಹೊಡೆದು ಕೊಂದಿದ್ದಾರೆ.

ವರದಿಗಳ ಪ್ರಕಾರ, 35 ವರ್ಷದ ಜಸ್ವಂತ್ ರಜಪೂತ್ ಎಂದು ಗುರುತಿಸಲಾದ ರೈತ, ರಾಜ್‌ಘಾಟ್ ಕಾಲುವೆಯ ಬಳಿಯ ಹೊಲದಲ್ಲಿ ತನ್ನ ಮೇಕೆಗಳು ಮತ್ತು ದನಗಳನ್ನು ಮೇಯಿಸುತ್ತಿದ್ದ. ಈ ಪ್ರದೇಶವು ಮಿತಿಮೀರಿ ಬೆಳೆದ ಪೊದೆಗಳಿಂದ ಆವೃತವಾಗಿದ್ದು, ಅಲ್ಲಿ ಪ್ರಾಣಿಗಳು ಮೇಯುತ್ತಿದ್ದವು. ಇದ್ದಕ್ಕಿದ್ದಂತೆ, ಹುಲ್ಲಿನಿಂದ ಒಂದು ದೊಡ್ಡ ಹೆಬ್ಬಾವು ಹೊರಬಂದು ಮೇಕೆಯ ಮೇಲೆ ದಾಳಿ ಮಾಡಿದೆ. ಮೇಕೆಯನ್ನು ಹಿಡಿದ ಹೆಬ್ಬಾವು ನುಂಗಲು ಪ್ರಾರಂಭಿಸಿತು.

ಮೇಕೆಯ ಜೋರಾಗಿ ಕೂಗುವುದರ ಧ್ವನಿ ಕೇಳಿದ ಜಸ್ವಂತ್ ಸ್ಥಳಕ್ಕೆ ಧಾವಿಸಿದರು. ಹಾವು ಮೇಕೆಯ ಸುತ್ತಲೂ ಸುತ್ತಿಕೊಂಡು ಅದನ್ನು ನುಂಗಲು ಪ್ರಯತ್ನಿಸುತ್ತಿರುವುದನ್ನು ನೋಡಿ ಗಾಬರಿಗೊಂಡರು. ಜಸ್ವಂತ್‌ನ ಕಿರುಚಾಟ ಕೇಳಿ ಇತರೆ ಗ್ರಾಮಸ್ಥರು ಕೂಡ ಸ್ಥಳಕ್ಕೆ ಧಾವಿಸಿದರು. ಕೋಲು, ರಾಡ್‌ಗಳು ಮತ್ತು ಕೊಡಲಿಯೊಂದಿಗೆ ಸ್ಥಳಕ್ಕಾಗಮಿಸಿದ ಗ್ರಾಮಸ್ಥರು ಮೇಕೆಯನ್ನು ಹೆಬ್ಬಾವಿನಿಂದ ರಕ್ಷಿಸಿದರು.

ಇದನ್ನೂ ಓದಿ: Viral Video: ನಡುರಸ್ತೆಯಲ್ಲೇ ಕಂಬಕ್ಕೆ ಕಟ್ಟಿ ಯೋಧನ ಮೇಲೆ ಡೆಡ್ಲಿ ಅಟ್ಯಾಕ್‌! ಆಘಾತಕಾರಿ ವಿಡಿಯೊ ವೈರಲ್

ಮೇಕೆಯನ್ನು ರಕ್ಷಿಸಲು ಗ್ರಾಮಸ್ಥರು ಹೆಬ್ಬಾವಿನ ಮೇಲೆ ದಾಳಿ ಮಾಡಿರುವುದನ್ನು ವಿಡಿಯೊದಲ್ಲಿ ನೋಡಬಹುದು. ಗ್ರಾಮಸ್ಥರಲ್ಲೊಬ್ಬ ಪೊದೆಗಳಲ್ಲಿ ಅಡಗಿದ್ದ ಹೆಬ್ಬಾವನ್ನು ನೋಡಿ ಕೊಡಲಿಯಿಂದ ಹೊಡೆದಿದ್ದಾನೆ. ಆದರೆ, ಮೇಕೆಯನ್ನು ರಕ್ಷಿಸಲು ಸಾಧ್ಯವಾಗಲಿಲ್ಲ. ಅದಾಗಲೇ ಅದು ಸತ್ತು ಹೋಗಿತ್ತು. ಕೊಡಲಿಯಿಂದ ದಾಳಿ ಮಾಡಿದ್ದರಿಂದ ಹೆಬ್ಬಾವು ಕೂಡ ಸ್ಥಳದಲ್ಲೇ ಸಾವನ್ನಪ್ಪಿತು. ಪದೇ ಪದೇ ಹೊಡೆದ ಪರಿಣಾಮ ಹೆಬ್ಬಾವು ಸಾವನ್ನಪ್ಪಿತು.

ನಂತರ ಗ್ರಾಮಸ್ಥರು ಮೇಕೆ ಮತ್ತು ಹೆಬ್ಬಾವನ್ನು ರಸ್ತೆಯ ಮೇಲೆ ಎಳೆದುಕೊಂಡು ಹೋಗಿದ್ದಾರೆ. ವಿಡಿಯೊದಲ್ಲಿ ಒಬ್ಬ ಗ್ರಾಮಸ್ಥರು ಕಪ್ಪು ಮೇಕೆಯ ಮೃತದೇಹವನ್ನು ಎಳೆದುಕೊಂಡು ಹೋಗುತ್ತಿರುವುದನ್ನು ಮತ್ತು ಇನ್ನೊಬ್ಬರು ಸತ್ತ ಹಾವನ್ನು ಉದ್ದನೆಯ ಕೋಲಿನಿಂದ ಎಳೆಯುತ್ತಿರುವುದನ್ನು ಕಾಣಬಹುದು.

ವಿಡಿಯೊ ವೀಕ್ಷಿಸಿ:

ಈ ದೈತ್ಯ ಹಾವು ಹಠಾತ್ತನೆ ಕಾಣಿಸಿಕೊಂಡ ಘಟನೆಯು ಆ ಪ್ರದೇಶದ ರೈತರಲ್ಲಿ ಭೀತಿಯನ್ನು ಸೃಷ್ಟಿಸಿದೆ. ಮಹಿಳೆಯರು ಮತ್ತು ಮಕ್ಕಳು ಸದ್ಯ ಹೊಲ ಅಥವಾ ಕಾಲುವೆಯ ಬಳಿ ಹೋಗದಂತೆ ತಿಳಿಸಿದ್ದಾರೆ. ಮಳೆಗಾಲದಲ್ಲಿ ಸಾಮಾನ್ಯವಾಗಿ ಹಾವುಗಳು ವಸತಿ ಪ್ರದೇಶಗಳಲ್ಲಿ ಕಂಡುಬರುವ ಘಟನೆಗಳು ಹೆಚ್ಚಾಗಿವೆ.

ಸದ್ಯ, ಈ ವಿಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದ್ದು, ಗ್ರಾಮಸ್ಥರು ಹಾವಿನ ಜೀವವನ್ನು ಉಳಿಸಿ ಅರಣ್ಯ ಇಲಾಖೆಗೆ ಕರೆ ಮಾಡಿ ಸರೀಸೃಪವನ್ನು ರಕ್ಷಿಸಬೇಕಾಗಿತ್ತು. ಮಾನವರು, ಪ್ರಕೃತಿಯಲ್ಲಿ ಪ್ರಾಣಿಗಳಿಗೆ ಇರುವ ಸ್ಥಾನವನ್ನು ಗೌರವಿಸಿ, ಅವರೊಂದಿಗೆ ಸಾಮರಸ್ಯದಿಂದ ಬದುಕುವುದನ್ನು ಕಲಿಯಬೇಕು ಎಂದು ಕೆಲ ಸಾಮಾಜಿಕ ಮಾಧ್ಯಮ ಬಳಕೆದಾರರು ತಿಳಿಸಿದ್ದಾರೆ.