ಅಮರಾವತಿ, ಜ. 21: ಕನ್ಯೆಯರು ಬೇಕಾಗಿದ್ದಾರೆ. ಮದುವೆಯಾಗಲು ಹುಡುಗಿಯೇ ಸಿಗುತ್ತಿಲ್ಲ ಎಂಬಿತ್ಯಾದಿ ಗೋಳು ಇತ್ತೀಚೆಗೆ ಕೇಳಿ ಬರುತ್ತಿರುವುದು ಸರ್ವೇ ಸಾಮಾನ್ಯ. ಹೆಣ್ಣೆಂದರೆ ಆಸಡ್ಡೆ ತೋರುತ್ತಿದ್ದ ಮಂದಿಗೆ ಇದೀಗ ಹೆಣ್ಣು ಸಿಕ್ಕರೆ ಸಾಕಾಗಿದೆ ಎನ್ನುವಂತಾಗಿದೆ. ರೈತರ ಪರಿಸ್ಥಿತಿಯಂತೂ ಕೇಳುವುದೇ ಬೇಡ. ಆದರೂ ಕೂಡ ವರದಕ್ಷಿಣೆ ಪಿಡುಗು ಮಾತ್ರ ಇನ್ನೂ ತೊಲಗಿಲ್ಲ. ಇದರ ವಿರುದ್ಧ ಹೋರಾಡಲು ಇದೀಗ ಆಂಧ್ರ ಪ್ರದೇಶದ (Andhra Pradesh) ಚಿತ್ತೂರು ಜಿಲ್ಲೆಯ ಇರಾಳ ಮಂಡಲದ ಕಲಿಕಿರಿಪಲ್ಲಿ ಗ್ರಾಮಸ್ಥರು ವಿಭಿನ್ನ ಮಾರ್ಗವನ್ನು ಆರಿಸಿಕೊಂಡಿದ್ದಾರೆ (viral news). ಅದೇನು ಎನ್ನುವ ವಿವರ ಇಲ್ಲಿದೆ.
ಆಂಧ್ರ ಪ್ರದೇಶದಲ್ಲಿ ಚಾಲ್ತಿಯಲ್ಲಿರುವ ವರದಕ್ಷಿಣೆ ಪಿಡುಗಿನ ವಿರುದ್ಧ ಮಾತನಾಡಲು ಗ್ರಾಮಸ್ಥರು ವ್ಯವಸ್ಥೆಯನ್ನು ವಿರೋಧಿಸುವ ಸಂದೇಶವನ್ನು ಸಾರಲು ಒಂದು ಪ್ರಬಲ ಮಾರ್ಗವನ್ನು ಆರಿಸಿಕೊಂಡಿದ್ದಾರೆ. ಸಂಕ್ರಾಂತಿ ಹಬ್ಬದ ಸಮಯದಲ್ಲಿ ಈ ವಿಶೇಷ ಸಂದೇಶ ಸಾರಿದ್ದಾರೆ. ಅರ್ಹ ಯುವಕರು ಉತ್ತಮ ಆದಾಯ ಗಳಿಸುತ್ತಿದ್ದರೂ, ವರದಕ್ಷಿಣೆ ಬೇಡಿಕೆಯು ಅವರ ವಿವಾಹಗಳನ್ನು ಹೇಗೆ ವಿಳಂಬ ಮಾಡುತ್ತಿದೆ ಎಂಬುದನ್ನು ಎತ್ತಿ ತೋರಿಸಲು ಗ್ರಾಮಸ್ಥರು ಗ್ರಾಮದ ಅವಿವಾಹಿತ ಪುರುಷರ ಛಾಯಾಚಿತ್ರಗಳೊಂದಿಗೆ ಬ್ಯಾನರ್ ಹಾಕಿದ್ದಾರೆ.
ಕ್ಯಾನ್ಸರ್ನಿಂದ ಕೂದಲು ಕಳೆದುಕೊಂಡ ಸ್ನೇಹಿತೆಗೆ ಆತ್ಮಸ್ಥೈರ್ಯ ತುಂಬಲು ತಲೆ ಬೋಳಿಸಿಕೊಂಡ ಸಹಪಾಠಿಗಳು!
ಹತ್ತಿರದ ಹಳ್ಳಿಗಳಿಂದ ಹೆಚ್ಚಿನ ಸಂಖ್ಯೆಯ ಜನರು ಭಾಗವಹಿಸುವ ಸಾಂಪ್ರದಾಯಿಕ ಕಾರ್ಯಕ್ರಮವಾದ ಜಾನುವಾರು ಉತ್ಸವದಲ್ಲಿ ಬ್ಯಾನರ್ಗಳನ್ನು ಪ್ರದರ್ಶಿಸಲಾಗಿದೆ. ಉತ್ಸವದಲ್ಲಿ ಹಾಜರಿದ್ದವರು ಸಂದೇಶವನ್ನು ಓದಿ, ಚರ್ಚಿಸಲು ಪ್ರಾರಂಭಿಸಿದ್ದಾರೆ. ಬ್ಯಾನರ್ಗಳಲ್ಲಿ ತೋರಿಸಿರುವ ಅವಿವಾಹಿತ ಪುರುಷರಲ್ಲಿ ಹೆಚ್ಚಿನವರು ವಿದ್ಯಾವಂತರು, ಉದ್ಯೋಗಗಳನ್ನು ಹೊಂದಿದ್ದಾರೆ ಮತ್ತು ಯೋಗ್ಯ ಕುಟುಂಬಗಳಿಂದ ಬಂದವರು ಎಂಬುದನ್ನು ಎತ್ತಿ ತೋರಿಸಲಾಗಿದೆ. ಆದರೂ ಅವರು ಅವಿವಾಹಿತರಾಗಿದ್ದಾರೆ ಎಂದು ಬ್ಯಾನರ್ನಲ್ಲಿ ಬರೆಯಲಾಗಿದೆ.
ಆಂಧ್ರ ಪ್ರದೇಶದಲ್ಲಿ ಇದು ನಡೆಯುತ್ತಿರುವುದು ಅನ್ಯಾಯವಾಗಿರುವುದರಿಂದ ಶಿಕ್ಷಣ ಮತ್ತು ಮೌಲ್ಯಗಳ ಮಹತ್ವವನ್ನು ಒತ್ತಿ ಹೇಳಲು ನಾವು ಈ ಜಾಗೃತಿ ಸಭೆಯನ್ನು ಆಯೋಜಿಸಿದ್ದೇವೆ. ಸಾಮಾನ್ಯ ಮತ್ತು ಮುಗ್ಧ ಜನರನ್ನು ಸಹ ತಪ್ಪು ಅಭ್ಯಾಸಗಳಿಗೆ ತಳ್ಳಲಾಗುತ್ತಿದೆ ಎಂದು ಬ್ಯಾನರ್ ಅಳವಡಿಸಿದ ಗ್ರಾಮಸ್ಥರು ಹೇಳಿದರು.
ವರನ ಕುಟುಂಬಗಳು ಹೆಚ್ಚಿನ ಪ್ರಮಾಣದ ನಗದು, ಚಿನ್ನ ಅಥವಾ ವಾಹನಗಳನ್ನು ಬೇಡಿಕೆ ಇಡುತ್ತಾರೆ ಎಂದು ಜನರು ವಿವರಿಸಿದರು. ಮದುವೆ ಮಾತುಕತೆಯ ಸಮಯದಲ್ಲಿ ಹುಡುಗಿಯರು ಮತ್ತು ಅವರ ಪೋಷಕರನ್ನು ಸಣ್ಣ ಕಾರಣಗಳಿಗೆ ಅವಮಾನಿಸಲಾಗುತ್ತದೆ ಅಥವಾ ತಿರಸ್ಕರಿಸಲಾಗುತ್ತದೆ ಎಂದು ಕೆಲವರು ಹೇಳಿದರು.
ಮದುವೆಯಾಗಲು ಗಂಡಿನ ಕಡೆಯವರು ಕಾರು, ಹಣ ಮತ್ತು ಆಸ್ತಿಯನ್ನು ಬೇಡುತ್ತಿವೆ. ಇದು ಸರಿಯಲ್ಲ. ಈ ಅನ್ಯಾಯವು ಪ್ರತಿಯೊಂದು ಮನೆಯಲ್ಲೂ ನಡೆಯುತ್ತಿದೆ. ಹಣವಿದ್ದರೆ ಏನೂ ತೊಂದರೆ ಇರುವುದಿಲ್ಲ. ಇದ್ದವರು ಕೊಡುತ್ತಾರೆ. ಆದರೆ, ಬಡ ಕುಟುಂಬದವರು ಮಾತ್ರ ಭಾರಿ ಸಂಕಷ್ಟ ಪಡುತ್ತಾರೆ ಎಂದು ಅಲ್ಲಿದ್ದ ಜನರು ಹೇಳಿದರು. ಈ ಬ್ಯಾನರ್ ಅನ್ನು ಅವಮಾನ ಮಾಡಲು ಹಾಕಲಾಗಿಲ್ಲ. ಬದಲಾಗಿ ಎಲ್ಲರೂ ಇದರ ಬಗ್ಗೆ ಚಿಂತಿಸಬೇಕೆಂದು ಹಾಕಲಾಗಿದೆ. ನಿರ್ಧಾರವನ್ನು ಬದಲಾಯಿಸುವುದು ಬಹಳ ಮುಖ್ಯ ಎಂದು ಗ್ರಾಮಸ್ಥರ ಮಾತಾಗಿದೆ.