ಜೈಪುರ, ಫೆ. 7: ಚಿನ್ನದ ಬೆಲೆ ಗಗನಕ್ಕೇರುತ್ತಿರುವ ಸಮಯದಲ್ಲಿ, ಕಳ್ಳರ ಭಯವೂ ಶುರುವಾಗಿದೆ. ಈ ಮಧ್ಯೆ ಪಾರಿವಾಳವೊಂದು ಆಭರಣದ ಅಂಗಡಿಯಿಂದ ಚಿನ್ನ ಎಗರಿಸಿರುವ ಅಚ್ಚರಿಯ (Pigeon steals gold chain) ಮತ್ತು ಆಘಾತದ ಘಟನೆ ರಾಜಸ್ಥಾನದ (Rajasthan) ನಾಗೌರ್ನ ದೇಗಾನಾ ನಗರದ ಬೆಳ್ಳಿಯ ಮಾರುಕಟ್ಟೆಯಲ್ಲಿ ನಡೆದಿದೆ. ಗುರುವಾರ (ಫೆಬ್ರವರಿ 5) ಈ ಘಟನೆ ನಡೆದಿದೆ. ಆಭರಣದ ಅಂಗಡಿಯೊಳಗೆ ಬಂದು ಪಾರಿವಾಳವೊಂದು ಸುಮಾರು 1 ಲಕ್ಷ ರುಪಾಯಿ ಮೌಲ್ಯದ ಚಿನ್ನದ ಸರವನ್ನು ತನ್ನ ಕೊಕ್ಕಿನಲ್ಲಿ ಹಿಡಿದುಕೊಂಡು ಹಾರಿಹೋಯಿತು. ಈ ಘಟನೆ ಮಾರುಕಟ್ಟೆಯಲ್ಲಿ ಭೀತಿಯನ್ನು ಉಂಟುಮಾಡಿತು. ಆಭರಣ ವ್ಯಾಪಾರಿ ಇದನ್ನು ನೋಡಿ ಶಾಕ್ ಆಗಿದ್ದಾನೆ. ಆದರೆ ನಂತರ ಚಿನ್ನದ ಸರವನ್ನು ಮಾರುಕಟ್ಟೆಯ ಛಾವಣಿಯಿಂದ ಸುರಕ್ಷಿತವಾಗಿ ವಶಪಡಿಸಿಕೊಳ್ಳಲಾಯಿತು.
ದೇಗಾನಾದ ಬೆಳ್ಳಿಯ ಮಾರುಕಟ್ಟೆಯಲ್ಲಿ ಈ ಘಟನೆ ನಡೆದಿದ್ದು, ಕೆಲವು ಕುಶಲಕರ್ಮಿಗಳು ಆಭರಣ ಅಂಗಡಿಯ ಮೇಲಿನ ಮಹಡಿಯಲ್ಲಿ ಚಿನ್ನದ ಆಭರಣಗಳನ್ನು ತಯಾರಿಸುತ್ತಿದ್ದರು. ಇದ್ದಕ್ಕಿದ್ದಂತೆ, ಒಂದು ಪಾರಿವಾಳ ಅಂಗಡಿಯೊಳಗೆ ಪ್ರವೇಶಿಸಿತು. ಕೆಲವೇ ಕ್ಷಣಗಳಲ್ಲಿ ಚಿನ್ನದ ಸರವನ್ನು ಕೊಕ್ಕಿನಲ್ಲಿ ಕಚ್ಚಿಕೊಂಡು ಹಾರಿಹೋಯಿತು. ಈ ಅಸಾಮಾನ್ಯ ಘಟನೆಯ ನಂತರ ಕುಶಲಕರ್ಮಿಗಳು ಮತ್ತು ಅಂಗಡಿಯವರು ಸ್ವಲ್ಪ ಸಮಯದವರೆಗೆ ದಿಗ್ಭ್ರಮೆಗೊಂಡರು.
ವೀಕ್ ಡೇಸ್ನಲ್ಲಿ ಕನ್ನಡ ಪ್ರೊಫೆಸರ್, ವೀಕೆಂಡ್ನಲ್ಲಿ ಕಿಲಾಡಿ ಕಳ್ಳಿ; 32 ಲಕ್ಷ ಮೌಲ್ಯದ ಚಿನ್ನ, ನಗದು ಕಳ್ಳತನ!
ಪಾರಿವಾಳವು ಅಂಗಡಿಯಿಂದ ಹಾರಿ ಮಾರುಕಟ್ಟೆಯ ಛಾವಣಿಯ ಮೇಲೆ ಕುಳಿತಿತು. ಅಲ್ಲಿ ಅದು ಬಹಳ ಸಮಯದವರೆಗೆ ಕುಳಿತಿತ್ತು. ಇಷ್ಟು ಬೆಲೆಬಾಳುವ ವಸ್ತುವನ್ನು ಈ ರೀತಿ ಸಾಗಿಸುತ್ತಿರುವ ದೃಶ್ಯ ಇಡೀ ಮಾರುಕಟ್ಟೆಯಲ್ಲಿ ಭೀತಿ ಮೂಡಿಸಿತು. ಸ್ಥಳದಲ್ಲಿದ್ದ ಜನರು ಪಾರಿವಾಳದ ಮೇಲೆ ಕಣ್ಣಿಟ್ಟು ಚಿನ್ನದ ಸರವನ್ನು ಸುರಕ್ಷಿತವಾಗಿ ಪಡೆಯಲು ಪ್ರಯತ್ನಿಸಿದರು. ಬಳಿಕ ಪಾರಿವಾಳ ಹಾರಿಹೋಯಿತು. ಆಭರಣ ವ್ಯಾಪಾರಿಯ ಅದೃಷ್ಟ ಚೆನ್ನಾಗಿತ್ತೋ ಏನೋ, ಚಿನ್ನದ ಸರ ಕೆಳಗೆ ಬಿದ್ದಿತು. ಇದರಿಂದಾಗಿ ವ್ಯಾಪಾರಿಗಳು ನೆಮ್ಮದಿಯ ನಿಟ್ಟುಸಿರು ಬಿಟ್ಟರು ಮತ್ತು ಅದನ್ನು ಸುರಕ್ಷಿತವಾಗಿ ವಶಪಡಿಸಿಕೊಂಡರು.
ದೇವಾಲಯದಿಂದ 25 ಲಕ್ಷ ರು. ಕದ್ದ ಕಳ್ಳರು
ಉತ್ತರ ಪ್ರದೇಶದ ಬಾರಾಬಂಕಿಯಲ್ಲಿರುವ ಪುರಾತನ ದೇವಾಲಯವೊಂದರಲ್ಲಿ ಕಳ್ಳತನ ನಡೆದಿದೆ. ದೇವಾಲಯದಿಂದ ಬೆಳ್ಳಿ ಆಭರಣಗಳು, ನಗದು ಮತ್ತು ಸಿಸಿಟಿವಿ ಉಪಕರಣಗಳನ್ನು ಕಳ್ಳರು ಕದ್ದಿದ್ದಾರೆ. ಕದ್ದ ವಸ್ತುಗಳ ಅಂದಾಜು ಮೌಲ್ಯ ಸುಮಾರು 25 ಲಕ್ಷ ರುಪಾಯಿ. ಈ ಘಟನೆಯು ಪ್ರದೇಶದಲ್ಲಿ ಆಕ್ರೋಶಕ್ಕೆ ಕಾರಣವಾಗಿದೆ. ಪೊಲೀಸರು ಈ ಬಗ್ಗೆ ತನಿಖೆ ನಡೆಸುತ್ತಿದ್ದಾರೆ.
ಗ್ರ್ಯಾಮಿ ಪ್ರಶಸ್ತಿ ವಿಜೇತ ರಿಕ್ಕಿ ಕೇಜ್ ಬೆಂಗಳೂರು ನಿವಾಸದಲ್ಲಿ ಕಳ್ಳತನ; ವಿಡಿಯೊ ವೈರಲ್
ಅವಸನೇಶ್ವರ ಮಹಾದೇವ ಶಿವ ದೇವಸ್ಥಾನದಲ್ಲಿ ಕಳ್ಳತನ ನಡೆದಿದೆ. ಬೆಳಗ್ಗಿನ ಜಾವ 3 ಗಂಟೆ ಸುಮಾರಿಗೆ ಈ ಘಟನೆ ಸಂಭವಿಸಿದೆ. ಕಳ್ಳರು ದೇವಾಲಯದ ಹಿಂದಿನ ಮುಖ್ಯ ದ್ವಾರದ ಬೀಗವನ್ನು ಮುರಿದು ಒಳ ಪ್ರವೇಶಿಸಿದ್ದಾರೆ. ಎಲ್ಲ ಆರೋಪಿಗಳು ಗುರುತು ಸಿಗದಂತೆ ಮಂಕಿ ಕ್ಯಾಪ್ ಧರಿಸಿದ್ದರು ಎಂದು ದೇವಾಲಯ ಸಮಿತಿಯ ಅಧ್ಯಕ್ಷ ಸಂಜಯ್ ಗಿರಿ ಹೇಳಿದರು.
ದೇವಾಲಯದ ಗರ್ಭಗುಡಿಯಲ್ಲಿ ಇರಿಸಲಾಗಿದ್ದ ಅಮೂಲ್ಯ ಬೆಳ್ಳಿ ವಸ್ತುಗಳನ್ನು ಕಳ್ಳರು ಗುರಿಯಾಗಿಸಿಕೊಂಡಿದ್ದಾರೆ. ಶಿವಲಿಂಗದ ಮೇಲೆ ಇರಿಸಲಾಗಿದ್ದ ಬೆಳ್ಳಿ ಛತ್ರಿ, ಶಿವಲಿಂಗದ ಸುತ್ತಲಿನ ಬೆಳ್ಳಿ ರೇಖೆ ಮತ್ತು ಇತರ ಬೆಳ್ಳಿ ಆಭರಣಗಳನ್ನು ಅವರು ಕದ್ದಿದ್ದಾರೆ. ಕಾಣಿಕೆ ಹುಂಡಿಯನ್ನು ಒಡೆದು ಅದರೊಳಗಿದ್ದ ಹಣವನ್ನು ಸಹ ಅವರು ತೆಗೆದುಕೊಂಡು ಹೋಗಿದ್ದಾರೆ. ಅಪರಾಧ ಮಾಡಿದ ನಂತರ, ತಮ್ಮ ಗುರುತು ಸಿಗದಂತೆ ಮಾಡಲು ದೇವಾಲಯದ ಆವರಣದಲ್ಲಿ ಅಳವಡಿಸಲಾಗಿದ್ದ ಸಿಸಿಟಿವಿಯನ್ನೇ ಹೊತ್ತೊಯ್ದಿದ್ದಾರೆ.