ಬೆಂಗಳೂರು: ಕೆಎಫ್‌ಸಿ ಪ್ರಿಯರು ಬೆಚ್ಚಿ ಬೀಳುವ ಸುದ್ದಿಯೊಂದು ಇಲ್ಲಿದೆ. ಸಿಲಿಕಾನ್ ಸಿಟಿ ಬೆಂಗಳೂರಿನ (Bengaluru) ಎಚ್‌ಎಸ್‌ಆರ್ ಲೇಔಟ್‌ನಲ್ಲಿರುವ ಕೆಎಫ್‌ಸಿ (KFC) ಔಟ್‌ಲೆಟ್‌ನಿಂದ ತೀವ್ರ ಆತಂಕಕಾರಿ ಘಟನೆಯೊಂದು ಹೊರಬಿದ್ದಿದೆ. ಇದು ಜನಪ್ರಿಯ ಫಾಸ್ಟ್-ಫುಡ್ ಸಂಸ್ಥೆಯ ಆಹಾರ ಸುರಕ್ಷತೆ ಮತ್ತು ನೈರ್ಮಲ್ಯ ಪದ್ಧತಿಗಳ ಬಗ್ಗೆ ಗಂಭೀರ ಕಳವಳವನ್ನು ಹುಟ್ಟುಹಾಕಿದೆ.
ಎಕ್ಸ್‌ನಲ್ಲಿ ಕರ್ನಾಟಕ ಪೋರ್ಟ್ಫೋಲಿಯೋ ಎಂಬ ಪುಟದಲ್ಲಿ ಮಹಿಳೆಯೊಬ್ಬರ ಭಯಾನಕ ಅನುಭವವನ್ನು ಹಂಚಿಕೊಂಡಿದೆ. ವಿವರವಾದ ಪೋಸ್ಟ್‌ನಲ್ಲಿ, ಮಹಿಳೆ ತಾನು ಆರ್ಡರ್ ಮಾಡಿದ ಹಾಟ್ & ಸ್ಪೈಸಿ ಚಿಕನ್ ಜಿಂಗರ್ ಬರ್ಗರ್‌ನಲ್ಲಿ ಅಸಹನೀಯ ದುರ್ವಾಸನೆ ಮತ್ತು ಕೊಳೆತ ಮಾಂಸ ಇರುವುದನ್ನು ಪತ್ತೆಹಚ್ಚಿದ್ದಾರೆ ಎಂದು ತಿಳಿದುಬಂದಿದೆ. ಇದರ ವಿಡಿಯೊವನ್ನು ಹಂಚಿಕೊಳ್ಳಲಾಗಿದ್ದು, ಭಾರಿ ವೈರಲ್ (Viral Video) ಆಗಿದೆ.
ಈ ಬರ್ಗರ್ ಲೋಳೆಸರದಂತಿದ್ದು, ಹಾಳಾದ ಮತ್ತು ಸಂಪೂರ್ಣವಾಗಿ ತಿನ್ನಲು ಯೋಗ್ಯವಾಗಿರಲಿಲ್ಲ ಎಂದು ಹೇಳಲಾಗಿದೆ. ಪೋಸ್ಟ್ ಪ್ರಕಾರ, ಮಹಿಳೆಯು ಕೂಡಲೇ ಔಟ್‌ಲೆಟ್‌ ಸಿಬ್ಬಂದಿಗೆ ಸಮಸ್ಯೆಯನ್ನು ತಿಳಿಸಿದ್ದು, ಬೇರೆ ಬರ್ಗರ್ ಕೊಡುವಂತೆ ವಿನಂತಿಸಿದ್ದಾರೆ. ಸಿಬ್ಬಂದಿಯು ಆ ಮಹಿಳೆಗೆ ಮತ್ತೆ ಬೇರೆ ಬರ್ಗರ್ ತಯಾರಿಸಿ ಕೊಟ್ಟರೂ ಅದು ಕೂಡ ಅದೇ ರೀತಿಯ ದುರ್ವಾಸನೆ ಬರುತ್ತಿತ್ತು ಮತ್ತು ಹಾಳಾದ ಮಾಂಸವು ಅದರಲ್ಲಿತ್ತು. ಇದರಿಂದ ಮಹಿಳೆಯು ಮತ್ತಷ್ಟು ಆಘಾತಗೊಂಡಿದ್ದರು ಎನ್ನಲಾಗಿದೆ.
ವಿಡಿಯೊ ವೀಕ್ಷಿಸಿ:
ಮಹಿಳೆಯು ಮತ್ತೆ ಸಮಸ್ಯೆಯನ್ನು ಸಿಬ್ಬಂದಿ ಬಳಿ ತಿಳಿಸಿದ್ದಾರೆ. ಆದರೆ ಇದನ್ನು ಪರಿಹರಿಸುವ ಬದಲು, ಇದು ಕೇವಲ ಸಾಸ್ ವಾಸನೆ ಎಂದು ಹೇಳಿದ್ದರು. ಕೋಳಿ ಮಾಂಸದ ಬರ್ಗರ್ ನೀಡುವ ಬದಲು, ಸಿಬ್ಬಂದಿ ಅವರಿಗೆ ಸಸ್ಯಾಹಾರಿ ಬರ್ಗರ್ ನೀಡಲು ಪ್ರಯತ್ನಿಸಿದಾಗ ಪರಿಸ್ಥಿತಿ ಇನ್ನಷ್ಟು ಹದಗೆಟ್ಟಿತು. ಚಿಕ್ಕ ಮಕ್ಕಳು ಸೇರಿದಂತೆ ಇತರೆ ಗ್ರಾಹಕರು ಇದೇ ರೀತಿಯ ಹಾಳಾದ ಆಹಾರವನ್ನು ತಿನ್ನುತ್ತಿದ್ದಾರೆ ಎಂದು ತಿಳಿದ ಮಹಿಳೆ ಈ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ.
ಮತ್ತೊಬ್ಬ ಗ್ರಾಹಕರು ಹೊಸ ಬರ್ಗರ್ ನೀಡುವಂತೆ ವಿನಂತಿಸಿದರು. ಆದರೆ ಅವರಿಗೂ ಮತ್ತೊಂದು ಕೊಳೆತ ಮಾಂಸದ ಬರ್ಗರ್ ನೀಡಲಾಯಿತು ಎಂದು ವರದಿಯಾಗಿದೆ. ಸಂಬಂಧಪಟ್ಟ ಗ್ರಾಹಕರು ಅಡುಗೆಮನೆಯನ್ನು ಪರಿಶೀಲಿಸಲು ಮುಂದಾದರು. ವ್ಯವಸ್ಥಾಪಕರು ಲಭ್ಯವಿಲ್ಲ ಮತ್ತು ರಾತ್ರಿ 10 ಗಂಟೆಯ ನಂತರ ಗ್ರಾಹಕರಿಗೆ ಪ್ರವೇಶವನ್ನು ಅನುಮತಿಸಲಾಗುವುದಿಲ್ಲ ಎಂದು ಸಿಬ್ಬಂದಿ ನೆಪ ಹೇಳಿದರು.
ಕೊಳಕು ಮತ್ತು ನೈರ್ಮಲ್ಯವಿಲ್ಲದ ಅಡುಗೆಮನೆ
ಗ್ರಾಹಕರ ಒತ್ತಡದ ನಂತರ, ಅಂತಿಮವಾಗಿ ಅಡುಗೆಮನೆಗೆ ಪ್ರವೇಶಿಸಲಾಯಿತು. ಗ್ರಾಹಕರು ಅಡುಗೆಮನೆಯ ಕೊಳಕು ಮತ್ತು ಅನೈರ್ಮಲ್ಯವನ್ನು ಕಂಡು ಆಘಾತಗೊಂಡರು. ಕೋಳಿ ಮಾಂಸಕ್ಕೆ ಬಳಸುವ ನೀರು ಕೊಳಕು ಮತ್ತು ಕಲುಷಿತವಾಗಿದೆ ಎಂದು ತಿಳಿದುಬಂದಿದೆ. ಈ ದೃಶ್ಯವನ್ನು ಚಿತ್ರೀಕರಿಸಲಾಗಿದ್ದು, ವಿಡಿಯೊವನ್ನು ಹಂಚಿಕೊಳ್ಳಲಾಗಿದೆ.
ಇದನ್ನೂ ಓದಿ: ಕ್ಯಾಬ್‍ನಲ್ಲಿದ್ದ ಅಪರೂಪದ ಸಹಪ್ರಯಾಣಿಕನನ್ನು ಕಂಡು ಅಚ್ಚರಿಗೊಂಡ ಯುವಕ; ಸೆಲ್ಫಿ ವೈರಲ್
ಅಡುಗೆ ಎಣ್ಣೆಯನ್ನು ಪದೇ ಪದೆ ಬಳಸಿರುವುದರಿಂದ ಅದು ಕಪ್ಪಾಗಿದೆ ಎಂದು ಕರ್ನಾಟಕ ಪೋರ್ಟ್ಫೋಲಿಯೋ ಪುಟವು ಆರೋಪಿಸಿದೆ. ಪೋಸ್ಟ್ ಪ್ರಕಾರ, ಕೋಲ್ಡ್ ಸ್ಟೋರೇಜ್ ಪ್ರದೇಶಗಳಲ್ಲಿ ದುರ್ವಾಸನೆ ಬೀರುವ ಮಾಂಸ, ಅಚ್ಚು ಹಾಳೆಗಳು ತುಕ್ಕು ಹಿಡಿದಿರುವುದು ಕಂಡುಬಂತು. ನೆಲವು ಕಲೆಗಳು ಮತ್ತು ಉಗುಳಿನ ಗುರುತುಗಳಿಂದ ಆವೃತವಾಗಿತ್ತು. ಇದನ್ನು ನೋಡಿದ ಗ್ರಾಹಕರಿಗೆ ಅಕ್ಷರಶಃ ತಲೆತಿರುಗುವಂತಾಗಿದೆ.
ಇನ್ನು ಈ ವಿಚಾರಕ್ಕೆ ಸಂಬಂಧಿಸಿದಂತೆ ಕೂಡಲೇ ಪೊಲೀಸರಿಗೆ ಕರೆ ಮಾಡಲಾಗಿದೆ. ಪೊಲೀಸರು ಬಂದ ನಂತರ, ಸಿಬ್ಬಂದಿ ಸುಮಾರು ಅರ್ಧ ಗಂಟೆಗಳ ಕಾಲ ಅಡುಗೆಮನೆಗೆ ಬೀಗ ಹಾಕಿದರು. ಆದರೆ ಸ್ವಿಗ್ಗಿ ಮತ್ತು ಜೊಮಾಟೊ ಆರ್ಡರ್‌ಗಳನ್ನು ಪೂರೈಸುವುದನ್ನು ಮುಂದುವರಿಸಿದರು ಎಂದು ಆರೋಪಿಸಲಾಗಿದೆ. ಈ ಸಮಯದಲ್ಲಿ ಸುಮಾರು 30ರಿಂದ 40 ಡೆಲಿವರಿ ನೀಡಲಾಯಿತು ಎಂದು ವರದಿಯಾಗಿದೆ.