Vishweshwar Bhat Column: ಖರ್ಗ್‌ ದ್ವೀಪದ ಮಹತ್ವ

ಸಂಪಾದಕೀಯ ಸದ್ಯಶೋಧನೆ

ಹರ್ಮುಜ್ ಜಲಸಂಧಿಯ ಹಾಗೆ, ಪರ್ಷಿಯನ್ ಕೊಲ್ಲಿಯ ಆಳದಲ್ಲಿರುವ ಒಂದು ಸಣ್ಣ ದ್ವೀಪವು ಇಡೀ ದೇಶದ ಭವಿಷ್ಯವನ್ನೇ ನಿರ್ಧರಿಸುತ್ತದೆ ಎಂದರೆ ಅದು ಅಚ್ಚರಿಯ ಸಂಗತಿ ಯೇ ಸರಿ. ಇರಾನಿನ ಬುಶೆಹರ್ ಪ್ರಾಂತ್ಯದ ಕರಾವಳಿಯಿಂದ ಸುಮಾರು 25 ಕಿ.ಮೀ. ದೂರದಲ್ಲಿರುವ ‘ಖರ್ಗ್ ದ್ವೀಪ’ ಇರಾನಿನ ತೈಲ ಸಾಮ್ರಾಜ್ಯದ ಹೃದಯಭಾಗ. ಈ ದ್ವೀಪ ವನ್ನು ವಶಪಡಿಸಿಕೊಳ್ಳಲು ಈಗ ಅಮೆರಿಕ ತುದಿಗಾಲ ಮೇಲೆ ನಿಂತಿದೆ. ಖರ್ಗ್ ದ್ವೀಪವು ಸುಮಾರು 20 ಚದರ ಕಿ.ಮೀ. ವಿಸ್ತೀರ್ಣವನ್ನು ಹೊಂದಿದೆ. ಇದು ಹವಳದ ದಿಬ್ಬಗಳಿಂದ ಕೂಡಿದ ದ್ವೀಪವಾಗಿದ್ದು, ಸಮುದ್ರ ಮಟ್ಟದಿಂದ ಸ್ವಲ್ಪ ಎತ್ತರದಲ್ಲಿದೆ. ಇದರ ಆಯಕಟ್ಟಿನ ಸ್ಥಳವು ಪರ್ಷಿಯನ್ ಕೊಲ್ಲಿಯ ನೌಕಾಯಾನ ಮಾರ್ಗಗಳಿಗೆ ಅತ್ಯಂತ ಹತ್ತಿರದಲ್ಲಿದೆ.

ದ್ವೀಪದ ಹವಾಮಾನವು ಅತಿ ಹೆಚ್ಚು ಆರ್ದ್ರತೆ ಮತ್ತು ಉಷ್ಣಾಂಶದಿಂದ ಕೂಡಿದ್ದು, ಬೇಸಗೆ ಯಲ್ಲಿ ಇಲ್ಲಿನ ಜೀವನ ಅಷ್ಟು ಸುಲಭವಲ್ಲ. ಖರ್ಗ್ ದ್ವೀಪಕ್ಕೆ ಸಾವಿರಾರು ವರ್ಷಗಳ ಇತಿಹಾಸವಿದೆ. ಪ್ರಾಚೀನ ಕಾಲದಲ್ಲಿ ಇದು ನಾವಿಕರಿಗೆ ಒಂದು ಪ್ರಮುಖ ವಿಶ್ರಾಂತಿ ತಾಣವಾಗಿತ್ತು.

ಇಲ್ಲಿ ದೊರೆತಿರುವ ಸಿರಿಯಾಕ್ ಶಾಸನಗಳು ಮತ್ತು ಪಾರ್ಸಿಗಳ (ಜೊರಾಸ್ಟ್ರಿಯನ್) ಬೆಂಕಿಯ ದೇವಾಲಯಗಳ ಅವಶೇಷಗಳು ಈ ದ್ವೀಪವು ಕ್ರಿಶ್ಚಿಯನ್ ಮತ್ತು ಪಾರ್ಸಿ ಸಂಸ್ಕೃತಿಗಳ ಸಂಗಮವಾಗಿತ್ತು ಎಂಬುದಕ್ಕೆ ಸಾಕ್ಷಿ ಒದಗಿಸುತ್ತವೆ.

ಇದನ್ನೂ ಓದಿ: Vishweshwar Bhat Column: ಯುದ್ಧ ಮತ್ತು ಸಾಕುಪ್ರಾಣಿ

18ನೇ ಶತಮಾನದಲ್ಲಿ ಡಚ್ಚರು ಇಲ್ಲಿ ಕೋಟೆಯನ್ನು ನಿರ್ಮಿಸಿ ವ್ಯಾಪಾರ ಕೇಂದ್ರವನ್ನಾಗಿ ಮಾಡಿಕೊಂಡಿದ್ದರು. ಇರಾನಿನ ಆರ್ಥಿಕತೆಗೆ ಖರ್ಗ್ ದ್ವೀಪದ ಕೊಡುಗೆ ಅಪ್ರತಿಮ. ಇರಾನ್ ರಫ್ತು ಮಾಡುವ ಕಚ್ಚಾ ತೈಲದ ಸುಮಾರು ಶೇ. 90ರಿಂದ ಶೇ.95ರಷ್ಟು ಪಾಲು ಈ ದ್ವೀಪದ ಮೂಲಕವೇ ಹಾದುಹೋಗುತ್ತದೆ.

ಇಲ್ಲಿ ಬೃಹತ್ ತೈಲ ಟರ್ಮಿನಲ್‌ಗಳಿವೆ. ವಿಶ್ವದ ಅತಿದೊಡ್ಡ ತೈಲ ಟ್ಯಾಂಕರ್‌ಗಳು ಇಲ್ಲಿ ಲಂಗರು ಹಾಕಬಹುದು. ಇರಾನಿನ ಪ್ರಧಾನ ಭೂಭಾಗದ ತೈಲ ಬಾವಿಗಳಿಂದ ಸಮುದ್ರದ ಅಡಿಯಲ್ಲಿರುವ ಬೃಹತ್ ಪೈಪ್‌ಲೈನ್‌ಗಳ ಮೂಲಕ ತೈಲವು ಈ ದ್ವೀಪಕ್ಕೆ ಬರುತ್ತದೆ. ಇಲ್ಲಿಂದ ಅದನ್ನು ಜಗತ್ತಿನಾದ್ಯಂತ ರವಾನಿಸಲಾಗುತ್ತದೆ.

ದ್ವೀಪದಲ್ಲಿ ಲಕ್ಷಾಂತರ ಬ್ಯಾರೆಲ್ ತೈಲವನ್ನು ಸಂಗ್ರಹಿಸಿಡುವ ಬೃಹತ್ ಟ್ಯಾಂಕ್‌ಗಳಿವೆ. ತನ್ನ ಆರ್ಥಿಕ ಪ್ರಾಮುಖ್ಯದಿಂದಾಗಿಯೇ ಖರ್ಗ್ ದ್ವೀಪವು ಯಾವಾಗಲೂ ಶತ್ರುಗಳ ಗುರಿ ಯಾಗಿದೆ.

1980-88ರ ಅವಧಿಯಲ್ಲಿ ನಡೆದ ಇರಾನ್-ಇರಾಕ್ ಸುದೀರ್ಘ ಯುದ್ಧದಲ್ಲಿ ಇರಾಕ್ ಪಡೆಗಳು ಖರ್ಗ್ ದ್ವೀಪದ ಮೇಲೆ ನೂರಾರು ಬಾರಿ ವೈಮಾನಿಕ ದಾಳಿ ನಡೆಸಿದ್ದವು. ಇರಾನಿ ನ ಆರ್ಥಿಕತೆಯನ್ನು ಕುಸಿಯುವಂತೆ ಮಾಡುವುದು ಇರಾಕ್‌ನ ಉದ್ದೇಶವಾಗಿತ್ತು. ಆದರೂ, ಇರಾನ್ ಈ ದ್ವೀಪದ ರಕ್ಷಣೆಯನ್ನು ಯಶಸ್ವಿಯಾಗಿ ಮಾಡಿತು.

ಇಂದಿಗೂ ಇರಾನ್ ಮತ್ತು ಪಶ್ಚಿಮ ದೇಶಗಳ ನಡುವೆ ಉದ್ವಿಗ್ನತೆ ಉಂಟಾದಾಗ ಖರ್ಗ್ ದ್ವೀಪವು ಸುದ್ದಿಯಲ್ಲಿರುತ್ತದೆ. ಈ ದ್ವೀಪದ ಮೇಲೆ ದಾಳಿಯಾದರೆ ಜಾಗತಿಕ ತೈಲ ಮಾರುಕಟ್ಟೆಯಲ್ಲಿ ತಲ್ಲಣ ಉಂಟಾಗುತ್ತದೆ. ಕೈಗಾರಿಕಾ ಪ್ರದೇಶ ಮಾತ್ರವಲ್ಲದೇ, ಈ ದ್ವೀಪವು ನೈಸರ್ಗಿಕವಾಗಿಯೂ ಶ್ರೀಮಂತವಾಗಿದೆ.

ಇಲ್ಲಿ ವಿಶಿಷ್ಟ ಜಾತಿಯ ಜಿಂಕೆಗಳು ಕಂಡುಬರುತ್ತವೆ. ದ್ವೀಪದ ಸುತ್ತಲಿನ ಹವಳದ ದಿಬ್ಬಗಳು ಸಮುದ್ರ ಜೀವಿಗಳಿಗೆ ಉತ್ತಮ ಆವಾಸಸ್ಥಾನವನ್ನು ಒದಗಿಸಿವೆ. ಆದರೆ, ತೈಲ ಸೋರಿಕೆ ಮತ್ತು ಕೈಗಾರಿಕಾ ಮಾಲಿನ್ಯವು ಇಲ್ಲಿನ ಪರಿಸರಕ್ಕೆ ದೊಡ್ಡ ಸವಾಲಾಗಿದೆ. ಖರ್ಗ್ ದ್ವೀಪದಲ್ಲಿ ತೈಲ ಕಂಪನಿಯ ಉದ್ಯೋಗಿಗಳು ಮತ್ತು ಅವರ ಕುಟುಂಬಗಳು ಹೆಚ್ಚಾಗಿ ವಾಸಿಸುತ್ತವೆ.

ದ್ವೀಪದಲ್ಲಿ ಶಾಲೆಗಳು, ಆಸ್ಪತ್ರೆಗಳು ಮತ್ತು ಮೂಲಭೂತ ಸೌಕರ್ಯಗಳಿವೆ. ಇಲ್ಲಿಗೆ ಹೋಗಲು ವಿಮಾನ ನಿಲ್ದಾಣ ಮತ್ತು ದೋಣಿ ವ್ಯವಸ್ಥೆ ಇದೆ. ಆದರೆ, ಭದ್ರತಾ ಕಾರಣ ಗಳಿಗಾಗಿ ಈ ದ್ವೀಪಕ್ಕೆ ಪ್ರವೇಶವು ಕಟ್ಟುನಿಟ್ಟಿನ ನಿಯಮಗಳಿಗೆ ಒಳಪಟ್ಟಿರುತ್ತದೆ.

ಖರ್ಗ್ ದ್ವೀಪವು ಇರಾನಿನ ಕೇವಲ ಒಂದು ಭೂಪ್ರದೇಶವಲ್ಲ, ಅದು ಆ ದೇಶದ ಶಕ್ತಿ. ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ಈ ದ್ವೀಪಕ್ಕೆ ಇರುವ ಸ್ಥಾನಮಾನ ಅತ್ಯಂತ ದೊಡ್ಡ ದು. ಇತಿಹಾಸ, ತಂತ್ರಜ್ಞಾನ ಮತ್ತು ರಾಜಕೀಯದ ದೃಷ್ಟಿಯಿಂದ ಈ ಸಣ್ಣ ದ್ವೀಪವು ಜಗತ್ತಿನ ಗಮನ ಸೆಳೆಯುತ್ತಲೇ ಇರುತ್ತದೆ.