Roopa Gururaj Column: ತಾವೇ ನೀಡಿದ ವರದಿಂದ ಹತರಾದ ಮಧು ಕೈಟಭ

ಒಂದೊಳ್ಳೆ ಮಾತು

rgururaj628@gmail.com

ಈ ಬ್ರಹ್ಮಾಂಡವನ್ನು ನಿರ್ದಿಷ್ಟ ಸಮಯದಲ್ಲಿ ಸೃಷ್ಟಿಸುವವನು ವಿಷ್ಣು ಅಷ್ಟೇ ಅಲ್ಲ ಅವನು ಅದೇ ಸೃಷ್ಟಿಗೆ ವಿನಾಶವನ್ನು ತರುವ ಮೂಲಕ ಅಂತ್ಯವನ್ನು ತರುತ್ತಾನೆ. ಸೃಷ್ಟಿಯ ಅಂತ್ಯದ ನಂತರ, ವಿಷ್ಣುವು ತಾಯಿ ಭಗವತಿಯ ಪ್ರಭಾವದಿಂದ ಯೋಗ ನಿದ್ರಾವಸ್ಥೆಯಲ್ಲಿ ದೀರ್ಘಕಾಲ ಉಳಿಯು ತ್ತಾನೆ.

ಅಂತೆಯೇ ವಿಷ್ಣು ಸಮಯಕ್ಕಿಂತ ಮುಂಚಿತವಾಗಿ ಎಚ್ಚರಗೊಳ್ಳುವುದಿಲ್ಲ. ಒಮ್ಮೆ ಒಂದು ನಿಯಮ ವನ್ನು ಮಾಡಿದ ನಂತರ ಯಾರೂ ಆ ನಿಯಮವನ್ನು ಮುರಿಯುವಂತಿಲ್ಲ. ನಿಯಮದಂತೆ ವಿಷ್ಣುವು ಪ್ರಳಯವನ್ನು ಉಂಟು ಮಾಡುವ ಮೂಲಕ ಜಗತ್ತನ್ನು ನಾಶಪಡಿಸಿದನು. ಆಗ ಸುತ್ತಲೂ ನೀರು ಆವರಿಸಿತ್ತು. ಪ್ರಳಯದ ನಂತರ, ಎಂದಿನಂತೆ ಯೋಗನಿದ್ರಾದೇವಿಯು ವಿಷ್ಣುವಿನೊಳಗೆ ಪ್ರವೇಶಿಸಿದಳು ಮತ್ತು ಭಗವತಿ ಯೋಗನಿದ್ರೆಯ ಪ್ರಭಾವದಿಂದ ವಿಷ್ಣುವು ನಿದ್ರಿಸಿದನು.

ತದನಂತರ ಅನೇಕ ಯುಗಗಳು ಸಮಯದಲ್ಲೇ ಕಳೆದವು. ಇದೇ ಸಮಯದಲ್ಲಿ ಮಧು ಮತ್ತು ಕೈಟಭ ಎಂಬ ಇಬ್ಬರು ರಾಕ್ಷಸರು ವಿಷ್ಣುವಿನ ಕಿವಿಯೋಲೆಯಿಂದ ಜನಿಸಿದರು. ಈ ರಾಕ್ಷಸರು ಹುಟ್ಟಿ ನಿಂದಲೇ ಬಹಳ ವಿನಾಶಕಾರಕರು. ಮಧು ಮತ್ತು ಕೈಟಭ ಇಬ್ಬರ ಕುರಿತು ಸುದ್ದಿಗಳು ಬ್ರಹ್ಮಾಂಡ ದಾದ್ಯಂತ ಕೇಳಿಬರುತ್ತಿದ್ದವು. ಆದರೆ ಅಷ್ಟರಲ್ಲಿ ಆಕಾಶದಲ್ಲಿ ತಾಯಿ ಭಗವತಿಯ ಮಂತ್ರಗಳು ಮಾತ್ರ ಕೇಳಿಬರುವುದನ್ನು ಅವರು ಮನಗಂಡು ಭಗವತಿಯ ಶಕ್ತಿಯ ಬಗ್ಗೆ ತಿಳಿದುಕೊಂಡರು.

ಇದನ್ನೂ ಓದಿ: Roopa Gururaj Column: ಪಾರಿವಾಳಕ್ಕಾಗಿ ಜೀವವನ್ನೇ ಒತ್ತೆಯಿಟ್ಟ ಮೇಘರಥ

ನಂತರ ಇಬ್ಬರೂ ಬ್ರಹ್ಮಾಂಡದಲ್ಲಿ ತಮ್ಮ ಶಕ್ತಿಯನ್ನು ಪಡೆಯಲು ಕಠೋರವಾದ ತಪಸ್ಸು ಮಾಡಲು ಪ್ರಾರಂಭಿಸಿದರು. ಮಾತೆ ಭಗವತಿಯು ಅವರ ತಪಸ್ಸಿಗೆ ಪ್ರಸನ್ನಗೊಂಡಳು. ಸಹೋದರರಿ ಬ್ಬರೂ ಇಚ್ಛಾಮರಣದ ವರವನ್ನು ಕೇಳಿದರು. ದೇವಿಯು ಈ ವರವನ್ನು ಕೊಡುವ ಮೂಲಕ ಅವರ ಆಸೆಯನ್ನು ಪೂರೈಸಿದಳು.

ವರದ ನಂತರ ಅವರು ಯುದ್ಧದಲ್ಲಿ ಹೋರಾಡಲು ತಮ್ಮ ಶತ್ರುಗಳನ್ನು ಹುಡುಕಲು ಪ್ರಾರಂಭಿಸಿ ದರು. ಆದರೆ ಆ ಸಮಯದಲ್ಲಿ ಪ್ರಳಯದ ಸಮಯದಲ್ಲಿ ಲೋಕದ ತುಂಬಾ ನೀರಿನ ಹೊರತಾಗಿ ಏನೂ ಕಾಣಲಿಲ್ಲ. ಆಗ ಇದ್ದಕ್ಕಿದ್ದಂತೆ ಮಧು ಮತ್ತು ಕೈಟಭ ಸಹೋದರರಿಬ್ಬರೂ ವಿಷ್ಣುವಿನ ಕಮಲದ ನಾಭಿಯಲ್ಲಿ ಬ್ರಹ್ಮನನ್ನು ಕಂಡು ಯುದ್ಧಕ್ಕೆ ಬರುವಂತೆ ಸವಾಲು ಹಾಕಿದರು.

ಬ್ರಹ್ಮನು ತನ್ನ ಜೀವವನ್ನುಉಳಿಸಿಕೊಳ್ಳಲು ವಿಷ್ಣುವಿನ ಮೊರೆ ಹೋದನು. ಆದರೆ ವಿಷ್ಣುವು ತಾಯಿ ಭಗವತಿಯ ಪ್ರಭಾವದಿಂದ ಯೋಗ ನಿದ್ರೆಯಲ್ಲಿದ್ದರು. ಅಷ್ಟರಲ್ಲಿ ಮಧು - ಕೈಟಭ ಎಂಬ ರಾಕ್ಷಸ ರಿಬ್ಬರೂ ಬ್ರಹ್ಮನ ಕಡೆಗೆ ಓಡತೊಡಗಿದರು. ಬಹಳ ಕಷ್ಟದಿಂದ ಬ್ರಹ್ಮನು ತಾಯಿ ಭಗವತಿ ಯನ್ನು ಸಹಾಯಕ್ಕಾಗಿ ಕರೆದು ಈ ಇಬ್ಬರು ರಾಕ್ಷಸರು ನನ್ನನ್ನು ಕೊಂದರೆ ಬ್ರಹ್ಮಾಂಡವನ್ನು ಯಾರು ರಚಿಸುತ್ತಾರೆ ಎಂದು ಕೇಳಿದನು.

ಬ್ರಹ್ಮನ ಕೋರಿಕೆಯ ಮೇರೆಗೆ, ತಾಯಿ ಭಗವತಿಯು ವಿಷ್ಣುವಿನ ದೇಹವನ್ನು ತೊರೆಯುತ್ತಿದ್ದಂತೆ ವಿಷ್ಣುವಿಗೆ ಎಚ್ಚರವಾಯಿತು. ಈಗ ಮಧು ಮತ್ತು ಕೈಟಭ ವಿಷ್ಣುವಿಗೆ ಯುದ್ಧಕ್ಕೆ ಸವಾಲು ಹಾಕಿದರು. ಭಗವಾನ್ ವಿಷ್ಣುವು ಮಧು ಮತ್ತು ಕೈಟಭರೊಂದಿಗೆ ಹೋರಾಡಲು ಪ್ರಾರಂಭಿಸಿದನು.

ಈ ಯುದ್ಧವು ಐದು ಸಾವಿರ ವರ್ಷಗಳವರೆಗೆ ಮುಂದುವರೆಯಿತು. ಆದರೆ ವಿಷ್ಣುವಿಗೆ ಇಬ್ಬರು ಸಹೋದರರನ್ನು ಕೊಲ್ಲಲು ಸಾಧ್ಯವಾಗಲಿಲ್ಲ. ಆಗ ವಿಷ್ಣು ತಾಯಿ ಭಗವತಿಯ ಸಹಾಯ ಕೇಳಿ ದನು. ತಾಯಿ ಭಗವತಿ ಮಧು ಮತ್ತು ಕೈಟಭ ಇಬ್ಬರನ್ನೂ ತನ್ನ ಪ್ರಭಾವಕ್ಕೆ ಒಳಪಡಿಸಿದಳು; ಇದರಿಂದಾಗಿ ಇಬ್ಬರೂ ಅಹಂಕಾರದ ಅಮಲಿನಲ್ಲಿ ಚಿತ್ತ ಕಳೆದುಕೊಂಡರು.

ಚಿತ್ತಭ್ರಮಣೆಯಾದ ರಾಕ್ಷಸರಿಗೆ ವಿಷ್ಣು -ನಿಮ್ಮ ಜೊತೆ ಯುದ್ಧದಿಂದ ತುಂಬಾ ಸಂತೋಷವಾಗಿದೆ, ಆದ್ದರಿಂದ ಯಾರಾದರೂ ವರವನ್ನು ಕೇಳಬಹುದು! ಎಂದು ಹೇಳಿದನು. ತಾಯಿ ಭಗವತಿಯ ಪ್ರಭಾವದಿಂದ, ಮಧು ಮತ್ತು ಕೈಟಭರು ತಮ್ಮ ಗರ್ವದ ಅಮಲಿನಲ್ಲಿ, ನಾವು ವರ ಕೇಳುವ ಭಿಕ್ಷುಕರಲ್ಲ! ನೀನು ವರವನ್ನು ಕೇಳಲು ಬಯಸಿದರೆ ಅದನ್ನು ನಮ್ಮಿಂದ ಕೇಳು ಮತ್ತು ನಾವು ನಿನಗೆ ವರವನ್ನು ನೀಡುತ್ತೇವೆ! ಎಂದು ಹೇಳಿದರು.

ಇದೇ ಸಮಯಕ್ಕೆ ಕಾದಿದ್ದ ವಿಷ್ಣುವು, - ಸರಿ, ಹಾಗಾದರೆ ವರವನ್ನು ಕೊಡುವುದಾದರೆ ನಿಮ್ಮಿಂದ ನಾನು ಯುದ್ಧದಲ್ಲಿ ಗೆಲ್ಲುವ ವರ ಕೊಡಿ. ಇದರಿಂದ ನಾನು ನಿಮ್ಮಿಬ್ಬರನ್ನೂ ಸಂಹರಿಸುತ್ತೇನೆ ಎಂದನು. ಅಹಂಕಾರದ ಅಮಲಿನಲ್ಲಿದ್ದ ರಾಕ್ಷಸರು ವರವನ್ನು ಕೊಟ್ಟು ಬಿಟ್ಟರು. ತಕ್ಷಣವೇ ವಿಷ್ಣುವು ತನ್ನ ಸುದರ್ಶನ ಚಕ್ರದಿಂದ ಸಹೋದರರಿಬ್ಬರ ಕೊರಳನ್ನು ಕತ್ತರಿಸಿದನು.

ಕೆಲವೊಮ್ಮೆ ಅಹಂಕಾರದ ಅಮಲಿನಲ್ಲಿ ನಮಗೆ ವರವೂ ಶಾಪವಾಗುತ್ತದೆ. ಆದ್ದರಿಂದಲೇ ಎಂದಿಗೂ ಅಹಂಕಾರ ಪಡಬಾರದು.