ಮೊದಲ ಮನೆ ಖರೀದಿಸಲು ಆಲೋಚಿಸುತ್ತಿರುವ ಮಹಿಳೆಯರಿಗೆ ಕೆಲವು ಸಲಹೆಗಳು

ಮನು ಸಿಂಗ್, ಕೋಟಕ್ ಮಹೀಂದ್ರಾ ಬ್ಯಾಂಕ್ ಲಿಮಿಟೆಡ್ ನ ಹೌಸಿಂಗ್ ಫೈನಾನ್ಸ್ ಬಿಸಿನೆಸ್ ಹೆಡ್

ಮನೆ ನಿರ್ಮಾಣ ಮಾಡುವುದು ಅಥವಾ ಖರೀದಿಸುವುದು ಬಹುತೇಕರ ಕನಸಾಗಿರುತ್ತದೆ. ಆ ಕನಸು ಸಾಕಾರಗೊಳಿಸಲು ಅವರೆಲ್ಲಾ ಶ್ರಮಿಸುತ್ತಿರುತ್ತಾರೆ. ಈ ಕನಸು ಸಾಕಾರದ ವಿಚಾರದಲ್ಲಿ ಈಗೀಗ ಮಹಿಳೆಯರು ಮುಂಚೂಣಿಯಲ್ಲಿದ್ದಾರೆ ಎಂಬುದು ವಿಶೇಷವಾಗಿದೆ. ಪ್ರಸ್ತುತ ಭಾರತದಲ್ಲಿ ಮನೆ ಖರೀದಿಯಲ್ಲಿ ಮಹಿಳೆಯರು ಪ್ರಮುಖ ಪಾತ್ರ ವಹಿಸುತ್ತಿದ್ದಾರೆ. ಇತ್ತೀಚಿನ ವಿಶ್ಲೇಷಣೆಯ ಪ್ರಕಾರ 2024ರಲ್ಲಿ ಪ್ರಮುಖ ನಗರ ಪ್ರದೇಶಗಳ ಮಹಿಳೆಯರು ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಶೇಕಡಾ 14 ರಷ್ಟು ಜಾಸ್ತಿ ಆಸ್ತಿ ಖರೀದಿ ಮಾಡಿದ್ದಾರೆ. ಈ ಅಂಕಿಸಂಖ್ಯೆಯು ಅವರ ಆರ್ಥಿಕ ಸ್ವಾತಂತ್ರ್ಯ ಹೆಚ್ಚಿರು ವುದನ್ನು ತೋರಿಸುತ್ತದೆ.

ಪ್ರಖ್ಯಾತ ವಾಸ್ತುಶಿಲ್ಪ ವಿನ್ಯಾಸಕಾರ ಲೆ ಕಾರ್ಬೂಸಿಯರ್ ಹೇಳಿರುವ ಮಾತುಗಳನ್ನು ಇಲ್ಲಿ ನೆನಪಿಸಿಕೊಳ್ಳಬಹುದು. “ಮನೆಯು ಬದುಕಿನ ಖಜಾನೆಯಂತಿರಬೇಕು” ಎನ್ನುತ್ತಾರೆ ಅವರು. ಅದಕ್ಕೆ ಪೂರಕವಾಗಿಯೇ ಭಾರತೀಯ ಮಹಿಳೆಯರು ತಮ್ಮ ಮನೆಗಳನ್ನು ಆರ್ಥಿಕ ಭದ್ರತೆ ಮತ್ತು ಸ್ವಾತಂತ್ರ್ಯ ಒದಗಿಸುವ, ಒಗ್ಗಟ್ಟಿನ ಭಾವ ಮೂಡಿಸುವ ಮತ್ತು ಕುಟುಂಬಕ್ಕೆ ಆರಾಮದಾಯಕ ವಾತಾವರಣವನ್ನು ಒದಗಿಸುವ ಸ್ಥಳವಾಗಿ ನೋಡುತ್ತಿದ್ದಾರೆ. ಹಾಗಾಗಿಯೇ ಮನೆ ಖರೀದಿಗೆ ಮುಂದಾಗುತ್ತಿದ್ದಾರೆ.

ಇದನ್ನೂ ಓದಿ: Vishweshwar Bhat Column: ದುರಂತವೂ, ಭಾಷಾ ಸಮಸ್ಯೆಯೂ

ಮನೆ ಖರೀದಿಸುವ ಮೊದಲು ಏನೇನು ಮಾಡಬೇಕು ಎಂಬುದನ್ನು ಇಲ್ಲಿ ನೋಡೋಣ:

ನಿಮ್ಮ ಆರ್ಥಿಕ ಸಿದ್ಧತೆಯ ಕುರಿತು ಕೂಲಂಕಷವಾಗಿ ತಿಳಿದುಕೊಳ್ಳಿ

ನೀವು ನಿಮಗೆ ಸೂಕ್ತವಾಗುವ ಮನೆಯ ಹುಡುಕಾಟ ಪ್ರಾರಂಭಿಸುವ ಮೊದಲು ನಿಮಗೆ ನಿಮ್ಮ ಜೀವನಕ್ಕೆ ಬೇಕಾಗುವ ಬಜೆಟ್ ಕುರಿತು ಸ್ಪಷ್ಟತೆ ಇರಬೇಕು. ಅಷ್ಟು ಸ್ಪಷ್ಟತೆ ಸಿಕ್ಕ ಬಳಿಕ ಆರ್ಥಿಕ ಸಿದ್ಧತೆ, ಪ್ರಸ್ತುತ ಇರುವ ಆದಾಯ ಮತ್ತು ಆದಾಯ ಸ್ಥಿರತೆ ಹಾಗೂ ಒಟ್ಟಾರೆ ಮರುಪಾವತಿ ಸಾಮರ್ಥ್ಯ ಇತ್ಯಾದಿ ಕುರಿತು ಸ್ಪಷ್ಟತೆ ಪಡೆಯಬೇಕು. ಇತರ ಖರ್ಚುಗಳನ್ನು ಗಣನೆಗೆ ತೆಗೆದು ಕೊಂಡು ಮುಂದಿನ ಲೆಕ್ಕಾಚಾರ ಮಾಡಬೇಕು. ಜೊತೆಗೆ ಕ್ರೆಡಿಟ್ ಸ್ಕೋರ್‌ ಗಳನ್ನು ಪರಿಶೀಲಿಸು ವುದು ಕೂಡ ಮುಖ್ಯ. ಯಾಕೆಂದರೆ ನಿಮಗೆ ಅಗತ್ಯವಿರುವ ಮೊತ್ತವನ್ನು ಸಾಲವಾಗಿ ಪಡೆಯಲು ಯಾವುದೇ ತೊಂದರೆ ಇಲ್ಲ ಎಂಬುದನ್ನು ಮೊದಲೇ ಖಾತ್ರಿಪಡಿಸಿಕೊಳ್ಳಿ.

ಎಷ್ಟು ಉಳಿತಾಯ ಇದೆ ಮತ್ತು ಇತರ ಆಸ್ತಿಪಾಸ್ತಿಗಳ ಕುರಿತು ಲೆಕ್ಕ ಹಾಕುವುದು ಕೂಡ ಮುಖ್ಯ. ತುರ್ತು ನಿಧಿಯನ್ನು ಹೊರತು ಪಡಿಸಿ, ಇತರ ನಿಯಮಿತ ಹೂಡಿಕೆಗಳಿಗೆ ಕೂಡ ಸಾಕಷ್ಟು ದುಡ್ಡು ಮೀಸಲಿಡಬೇಕು. ನೀವು ಇನ್ನೂ ದೀರ್ಘ ವೃತ್ತಿ ಜೀವನವನ್ನು ಹೊಂದಿದ್ದರೆ, ಪಾವತಿಯ ಅವಧಿ ಮತ್ತು ಇಎಂಐಗಳನ್ನು ಲೆಕ್ಕಾಚಾರ ಮಾಡಬಹುದು. ಮನೆ ಖರೀದಿಗಾಗಿ ಸಮಗ್ರ ಯೋಜನೆಯನ್ನು ರಚಿಸಲು ಫೈನಾನ್ಷಿಯಲ್ ಪ್ಲಾನರ್ ಸಹಾಯವನ್ನೂ ಪಡೆಯಬಹುದು.

1. ಗೃಹ ಸಾಲದ ಆಯ್ಕೆಗಳನ್ನು ತಿಳಿಯಿರಿ ಮತ್ತು ಹೋಲಿಕೆ ಮಾಡಿ

ಒಂದೊಳ್ಳೆ ಗೃಹ ಸಾಲವನ್ನು ಆಯ್ಕೆ ಮಾಡುವುದು ಬಹಳ ಮುಖ್ಯ. ವಿವಿಧ ಸಂಸ್ಥೆಗಳು ವಿವಿಧ ರೀತಿಯ ಸಾಲ ಒದಗಿಸುತ್ತವೆ. ಅವುಗಳಲ್ಲಿ ದೊರೆಯುವ ಪ್ರಯೋಜನಗಳನ್ನು ಮೊದಲು ತಿಳಿದು ಕೊಳ್ಳಬೇಕು. ಸಂಪೂರ್ಣ ಎಚ್ಚರಿಕೆಯಿಂದ ಗೃಹ ಸಾಲಗಳ ಕುರಿತು ಸಂಶೋಧನೆ ಮಾಡಬೇಕು. ಉದಾಹರಣೆಗೆ, ನೀವು ಉತ್ತಮ ಕ್ರೆಡಿಟ್ ಸ್ಕೋರ್ ಮತ್ತು ಕೆಲವು ಬ್ಯಾಂಕ್‌ ಗಳ ಜೊತೆಗೆ ಒಳ್ಳೆಯ ಸಂಬಂಧವನ್ನು ಹೊಂದಿದ್ದರೆ ಕಡಿಮೆ ಬಡ್ಡಿದರ ಮತ್ತು ಕಡಿಮೆ ಡೌನ್ ಪೇಮೆಂಟ್ ಸೌಲಭ್ಯವನ್ನು ಪಡೆಯಬಹುದು. ನಂತರ, ಪ್ರಸ್ತುತ ಬಡ್ಡಿದರವನ್ನು ಗಮನದಲ್ಲಿಟ್ಟುಕೊಂಡು ಫಿಕ್ಸ್ ಡ್ ರೇಟ್ (ಸ್ಥಿರ ದರ) ಅಥವಾ ಫ್ಲೋಟಿಂಗ್ ರೇಟ್ (ಅಸ್ಥಿರ ದರ) ಅನ್ನು ಆಯ್ಕೆ ಮಾಡಬೇಕು. ಉದಾಹರಣೆಗೆ ನಿಮಗೆ ಪ್ರಸ್ತುತ ಇರುವ ಬಡ್ಡಿದರ ಸೂಕ್ತವಾಗಿದ್ದು, ಅದು ಮುಂದೆ ಜಾಸ್ತಿಯಾಗಬಹುದು ಎಂದು ನಿಮಗೆ ಅನ್ನಿಸಿದರೆ ನೀವು ಫಿಕ್ಸ್ ಡ್ ರೇಟ್ ಗೃಹ ಸಾಲವನ್ನು ಆಯ್ಕೆ ಮಾಡಿ. ಒಂದು ವೇಳೆ ಬಡ್ಡಿ ದರಗಳು ಅನಿಶ್ಚಿತವಾಗಿರುವುದಾದರೆ ಫ್ಲೋಟಿಂಗ್ ರೇಟ್ ಗೃಹ ಸಾಲವನ್ನು ಆಯ್ಕೆ ಮಾಡಬಹುದು.

ಸಾಮಾನ್ಯವಾಗಿ ಪುರುಷರಿಗಿಂತ ಮಹಿಳೆಯರು ಉತ್ತಮ ಸಾಲಗಾರರು ಎಂಬುದು ಬ್ಯಾಂಕರ್‌ ಗಳ ನಂಬಿಕೆಯಾಗಿದೆ. ಆದ್ದರಿಂದ ಮಹಿಳೆಯರಿಗೆ ಗೃಹ ಸಾಲದ ಅನುಮೋದನೆಗಳು ತ್ವರಿತವಾಗಿ ಮತ್ತು ಸುಲಭವಾಗಿ ಲಭ್ಯವಾಗುತ್ತವೆ. ಅವರಿಂದ ಅಪಾಯ ಕಡಿಮೆ ಆದ್ದರಿಂದ ಮತ್ತು ಸಾಲದಾತರು ಅವರಿಗೆ ರಿಯಾಯಿತಿ ಬಡ್ಡಿದರ ನೀಡುವುದರಿಂದ ಕಡಿಮೆ ಬಡ್ಡಿದರದ ಲಾಭವನ್ನು ಸಹ ಪಡೆಯುತ್ತಾರೆ.

1. ಡೌನ್ ಪೇಮೆಂಟ್ ಮತ್ತು ಇತರ ವೆಚ್ಚಗಳಿಗೆ ಯೋಜನೆ ರೂಪಿಸಿ

ಬಹುತೇಕ ಸಾಲದಾತರು ಸಾಮಾನ್ಯವಾಗಿ ಆಸ್ತಿಯ ಮೌಲ್ಯದ ಶೇಕಡ 20ರಷ್ಟು ಡೌನ್ ಪೇಮೆಂಟ್ ಅನ್ನು ಕೇಳುತ್ತಾರೆ. ಆದರೆ ವಿವಿಧ ಸರ್ಕಾರಿ ಯೋಜನೆಗಳು, ಕೈಗೆಟುಕುವ ದರದ ವಸತಿ ಸಾಲಗಳು ಮತ್ತು ಸಾಲದಾತರ ಜೊತೆಗಿನ ಸಂಬಂಧಗಳನ್ನು ಬಳಸಿಕೊಂಡರೆ ಈ ಡೌನ್ ಪೇಮೆಂಟ್ ಅನ್ನು ಮತ್ತಷ್ಟು ಕಡಿಮೆ ಮಾಡಬಹುದು. ಉದಾಹರಣೆಗೆ, ಪ್ರಧಾನ ಮಂತ್ರಿ ಆವಾಸ್ ಯೋಜನೆ ಅಥವಾ ಕೈಗೆಟುಕುವ ದರದ ವಸತಿ ಸಾಲಗಳು ಕೆಲವೊಮ್ಮೆ ಶೇ.5 ರಿಂದ ಶೇ.10 ರಷ್ಟು ಕಡಿಮೆ ಡೌನ್ ಪೇಮೆಂಟ್ ಮಾಡುವ ಸೌಲಭ್ಯವನ್ನು ಒದಗಿಸುತ್ತವೆ.

ಒಬ್ಬ ಸಾಲಗಾರನಿಗೆ ಮರುಪಾವತಿ ಸಾಮರ್ಥ್ಯ ಎಷ್ಟಿದೆ ಎಂದು ಅರ್ಥಮಾಡಿಕೊಳ್ಳಲು ಸಾಮಾನ್ಯ ವಾಗಿ ಉತ್ತಮ ಕ್ರೆಡಿಟ್ ಸ್ಕೋರ್ ಮತ್ತು ಕಡಿಮೆ ಫಿಕ್ಸ್ ಡ್ ಆಬ್ಲಿಗೇಷನ್ ಟು ಇನ್ ಕಮ್ ರೇಶಿಯೋ (ಎಫ್ಓಐಆರ್) ಅನ್ನು ಆರ್ಥಿಕ ಮಾನದಂಡಗಳಾಗಿ ಬಳಸಲಾಗುತ್ತದೆ. ಎಫ್ಓಐಆರ್ ಎಂದರೆ ಸಾಲಗಾರರ ಒಟ್ಟು ಸ್ಥಿರ ಮಾಸಿಕ ಬಾಧ್ಯತೆಗಳನ್ನು ಲೆಕ್ಕ ಮಾಡಿ ಆ ಒಟ್ಟು ಮೊತ್ತವನ್ನು ಮಾಸಿಕ ಆದಾಯದಿಂದ ಭಾಗಿಸಿದಾಗ ದೊರೆಯುವ ಫಲಿತಾಂಶವನ್ನು 100 ರಿಂದ ಗುಣಿಸುವ ಮೂಲಕ ಲೆಕ್ಕಹಾಕಲಾಗುತ್ತದೆ. ಈಗಿರುವ ಆರ್ಥಿಕ ಬಾಧ್ಯತೆಗಳನ್ನು ಕಡಿಮೆ ಮಾಡುವ ಮೂಲಕ ಈ ರೇಶಿಯೋ ಅನ್ನು ಜಾಸ್ತಿ ಮಾಡಬಹುದಾಗಿದೆ.

ಹಲವು ಬ್ಯಾಂಕ್‌ ಗಳು ‘ಪ್ರೊಪೋರ್ಷನೇಟ್ ರಿಲೀಸ್ ಆಪ್ಷನ್’ ಎಂಬ ಆಯ್ಕೆಯನ್ನು ಒದಗಿಸುತ್ತವೆ. ಇದನ್ನು ಆರಿಸಿಕೊಳ್ಳುವ ಮೂಲಕ ಡೌನ್ ಪೇಮೆಂಟ್ ಅನ್ನು ಕೂಡ ಕಡಿಮೆ ಕಂತುಗಳಲ್ಲಿ ಪಾವತಿಸ ಬಹುದಾಗಿದೆ. ಕೆಲವು ಬ್ಯಾಂಕ್‌ ಗಳು ಆಸ್ತಿ ಮೌಲ್ಯದ ಶೇ.90ರವರೆಗೆ ಸಾಲವನ್ನು ನೀಡುತ್ತವೆ. ಸಾಲಗಾರರು ಡೌನ್ ಪೇಮೆಂಟ್ ಅನ್ನು ಭರಿಸಲು ವೈಯಕ್ತಿಕ ಸಾಲ ಅಥವಾ ಸಿಡಿಗಳ ಮೇಲೆ ಸಾಲ ಪಡೆಯುವ ಯೋಚನೆಯನ್ನೂ ಮಾಡಬಹುದು. ಅಂತಿಮವಾಗಿ, ನಿಮ್ಮ ಸ್ಥಿರ ಆದಾಯ ಮತ್ತು ಉತ್ತಮ ಕ್ರೆಡಿಟ್ ಸ್ಕೋರ್ ನಿಮಗೆ ಅನುಕೂಲಕರ ರೀತಿಯಲ್ಲಿ ನೆರವಾಗುತ್ತದೆ.

ಗೃಹ ಸಾಲಗಳಿಗೆ ಸಂಬಂಧಿಸಿದ ಶುಲ್ಕಗಳ ಮಾಹಿತಿ ಇರಲಿ

ಗೃಹ ಸಾಲದಲ್ಲಿ ಕೆಲವೊಮ್ಮೆ ತೆರೆಮರೆಯಲ್ಲಿ ಕೆಲವು ಆರಂಭಿಕ ಶುಲ್ಕಗಳನ್ನು ವಿಧಿಸಲಾಗುತ್ತದೆ. ಅದನ್ನು ನೀವು ಗಮನಿಸಬೇಕು. ಉದಾಹರಣೆಗೆ, ಗೃಹ ಸಾಲಕ್ಕೆ ಪ್ರೊಸೆಸಿಂಗ್ ಫೀ ಇದೆ. ಒಟ್ಟಾರೆ ಯಾಗಿ ಸಾಲಕ್ಕೆ ಸಂಬಂಧಿತ ಶುಲ್ಕಗಳು, ದಾಖಲೆ ಶುಲ್ಕಗಳು, ಕಾನೂನು ಮತ್ತು ಸರ್ಕಾರಿ ಶುಲ್ಕಗಳು ಇರುತ್ತವೆ. ಅದನ್ನೆಲ್ಲಾ ಮೊದಲೇ ತಿಳಿದುಕೊಂಡಿರಬೇಕು. ಆಸ್ತಿಯ ಮಾರುಕಟ್ಟೆ ಮೌಲ್ಯದ ಶೇ.5-7 ರಷ್ಟಿರುವ ಕಡ್ಡಾಯ ಶುಲ್ಕಗಳಾದ ಸ್ಟಾಂಪ್ ಡ್ಯೂಟಿ, ಶೇ.1 ರಷ್ಟಿರುವ ನೋಂದಣಿ ಶುಲ್ಕ, ಅಥವಾ ಜಿ ಎಸ್ ಟಿಯಂತಹ ಶುಲ್ಕಗಳು ನಿಮ್ಮ ಲೆಕ್ಕದಲ್ಲಿ ಇರುವಂತೆ ನೋಡಿಕೊಳ್ಳಿ.

1. ಸರ್ಕಾರಿ ಯೋಜನೆಗಳು ಮತ್ತು ತೆರಿಗೆ ಪ್ರಯೋಜನಗಳನ್ನು ಬಳಸಿಕೊಳ್ಳಿ

ಸರ್ಕಾರವು ಪ್ರಧಾನ ಮಂತ್ರಿ ಆವಾಸ್ ಯೋಜನೆ ಯಂತಹ ವಿವಿಧ ವಸತಿ ಸಾಲ ಯೋಜನೆಗಳ ಮೂಲಕ ಮಹಿಳಾ ಗೃಹ ಸಾಲಗಾರರಿಗೆ ಉತ್ತಮ ಪ್ರಯೋಜನಗಳನ್ನು ಒದಗಿಸುತ್ತದೆ. ಹಲವು ರಾಜ್ಯಗಳು ಮಹಿಳೆಯರಿಗೆ ಸ್ಟಾಂಪ್ ಡ್ಯೂಟಿ ದರದಲ್ಲಿ ರಿಯಾಯಿತಿ ಒದಗಿಸುತ್ತದೆ. ಇದರಿಂದ ಬಡ್ಡಿ ವೆಚ್ಚ ಮತ್ತು ಸಾಲದ ಇಎಂಐಗಳು ಕಡಿಮೆಯಾಗುತ್ತವೆ.

ಹೆಚ್ಚುವರಿಯಾಗಿ ಭಾರತ ಸರ್ಕಾರವು ಮೊದಲ ಬಾರಿಗೆ ಮನೆ ಖರೀದಿಸುವ ಮಹಿಳೆಯರಿಗೆ ಹಲವು ಪ್ರಯೋಜನಗಳನ್ನು ಒದಗಿಸಲು ಕ್ರಮ ಕೈಗೊಂಡಿದೆ. ಪ್ರಧಾನ ಮಂತ್ರಿ ಆವಾಸ್ ಯೋಜನೆಯು ಆರ್ಥಿಕವಾಗಿ ದುರ್ಬಲ ವರ್ಗದವರಿಗೆ, ಕಡಿಮೆ- ಆದಾಯ ಗುಂಪುಗಳಿಗೆ ಮತ್ತು ಮಧ್ಯಮ ಆದಾಯ ವರ್ಗಗಳಿಗೆ ಶೇ.3 ರಿಂದ ಶೇ.6.5 ರವರೆಗೆ ಬಡ್ಡಿ ಸಬ್ಸಿಡಿಗಳನ್ನು ನೀಡುತ್ತದೆ. ರಾಜ್ಯ ಸರ್ಕಾರಗಳು ಸಹ ಮೊದಲ ಬಾರಿಗೆ ಮನೆ ಖರೀದಿಸುವ ಮಹಿಳೆಯರಿಗೆ ವಿಶೇಷವಾಗಿ ವಿನ್ಯಾಸಗೊಳಿಸಿದ ಇನ್ಸೆಂಟಿವ್ ಗಳನ್ನು ಒದಗಿಸುತ್ತವೆ. ರಾಷ್ಟ್ರೀಯ ವಸತಿ ಬ್ಯಾಂಕ್ ಸ್ಥಾಪಿಸಿರುವ ಕೈಗೆಟುಕುವ ವಸತಿ ನಿಧಿ ಕೂಡ ಮಹಿಳೆಯರಿಗೆ ಆರ್ಥಿಕ ನೆರವನ್ನು ನೀಡುತ್ತದೆ.

ಮಹಿಳಾ ಸಾಲಗಾರರಿಗೆ ಗೃಹ ಸಾಲಗಳ ಮೂಲ ಮೊತ್ತ ಮತ್ತು ಬಡ್ಡಿಗೆ ಸಂಬಂಧಿಸಿದಂತೆ ಹಲವಾರು ತೆರಿಗೆ ಪ್ರಯೋಜನಗಳು ದೊರೆಯುತ್ತವೆ. ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 80ಸಿ ಅಡಿಯಲ್ಲಿ ಸಾಲದ ಮೂಲ ಮೊತ್ತದ ಮರುಪಾವತಿಗೆ 1.5 ಲಕ್ಷ ರೂ.ವರೆಗೆ ವಿನಾಯಿತಿಯನ್ನು ಪಡೆಯಬಹುದು. ಇದಲ್ಲದೆ, ಸೆಕ್ಷನ್ 24(ಬಿ) ಅಡಿಯಲ್ಲಿ, ಗೃಹ ಸಾಲದ ಬಡ್ಡಿಗೆ 2 ಲಕ್ಷ ರೂ.ವರೆಗೆ ವಿನಾಯಿತಿಯನ್ನು ಕ್ಲೈಮ್ ಮಾಡಬಹುದು. ಸಾಲವನ್ನು ಸಂಗಾತಿಯೊಂದಿಗೆ ಜಂಟಿಯಾಗಿ ತೆಗೆದುಕೊಂಡರೆ ಇಬ್ಬರೂ ಅರ್ಜಿದಾರರು ಸ್ವತಂತ್ರವಾಗಿ ಈ ವಿನಾಯಿತಿಗಳನ್ನು ಕ್ಲೈಮ್ ಮಾಡ ಬಹುದು.

1. ಆರ್ಥಿಕ ಸುರಕ್ಷತಾ ಜಾಲವನ್ನು ನಿರ್ಮಿಸಿ

ಸ್ವಂತ ಮನೆಯನ್ನು ಹೊಂದುವುದು ಒಬ್ಬ ಮಹಿಳೆಗೆ ಅಪಾರ ಹೆಮ್ಮೆ ತಂದು ಕೊಡುತ್ತದೆ. ಜೊತೆಗೆ ಭದ್ರತೆ ಮತ್ತು ಸ್ವಾಭಿಮಾನ ಉಂಟು ಮಾಡುತ್ತದೆ. ಸಾಮಾನ್ಯವಾಗಿ ಯಾವುದೇ ಆಸ್ತಿಗಳು ದೀರ್ಘಾವಧಿಯಲ್ಲಿ ಮೌಲ್ಯವರ್ಧನೆ ಹೊಂದುತ್ತವೆ. ಹಾಗಾಗಿ ಮುಂದಿನ ತಲೆಮಾರಿಗೆ ಏನನ್ನಾದರೂ ಕೊಡುವುದಾದರೆ ಇದೊಂದು ಉತ್ತಮ ಆಯ್ಕೆಯಾಗಿದೆ.

ಕೊನೆಯದಾಗಿ ಹೇಳುವುದಾದರೆ ಒಬ್ಬ ಮಹಿಳೆ ಒಂದು ಸ್ವಂತ ಮನೆ ಹೊಂದುವುದು ಸಾಮಾನ್ಯ ವಿಷಯವಲ್ಲ. ಒಬ್ಬ ಮಹಿಳೆ ಕುಟುಂಬಕ್ಕೆ ಆಧಾರವಾಗಿರುತ್ತಾಳೆ. ಮನೆ ಹೊಂದುವ ಮೂಲಕ ಆಕೆ ಆರ್ಥಿಕವಾಗಿ ಸಬಲಳಾಗುತ್ತಾಳೆ. ಹಾಗಾಗಿ ಮನೆ ಎಂಬುದು ಆಕೆಗೆ ಆರ್ಥಿಕವಾಗಿ, ವೈಯಕ್ತಿಕವಾಗಿ ಬಹಳ ಮಹತ್ವದ್ದಾಗಿದೆ. ಈ ನಿಟ್ಟಿನಲ್ಲಿ ಮನೆ ಖರೀದಿಗೆ ಮುಂದಾಗಿರುವ ಪ್ರತಿಯೊಬ್ಬ ಮಹಿಳೆಗೂ ಶುಭ ಹಾರೈಕೆಗಳು.