Crime News: ಹೆಂಡ್ತಿ ರೀಲ್ಸ್​ ಹುಚ್ಚಾಟ ತಡೆಯಲಾಗದೇ ಹೊಡೆದು ಕೊಂದ ಗಂಡ

ನವದೆಹಲಿ: ಸೋಷಿಯಲ್ ಮೀಡಿಯಾದಲ್ಲೇ (Social Media) ಕಾಲ ಕಳೆಯುತ್ತ ರೀಲ್ಸ್ ಮಾಡುತ್ತಿದ್ದ ಪತ್ನಿಯನ್ನು ಪತಿ ಹತ್ಯೆ ಮಾಡಿರುವ ಘಟನೆ ದೆಹಲಿಯಲ್ಲಿ (Delhi) ನಡೆದಿದೆ. ದೆಹಲಿಯ ನಜಾಫ್‌ಗಢದಲ್ಲಿ 35 ವರ್ಷದ ಇ-ರಿಕ್ಷಾ ಚಾಲಕ ಅಮನ್ ಎಂಬಾತ ಇನ್‌ಸ್ಟಾಗ್ರಾಮ್ ರೀಲ್ಸ್ (Instagram Reels) ಮಾಡುವುದನ್ನೇ ಕಾಯಕ ಮಾಡಿಕೊಂಡಿದ್ದ ಪತ್ನಿ ಜತೆ ಆಗಾಗ ಜಗಳವಾಡುತ್ತಿದ್ದ. ಪತ್ನಿಯ ಕುತ್ತಿಗೆ ಬಿಗಿದು ಕೊಲೆ ಮಾಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಪತ್ನಿಯನ್ನು ಕೊಲೆ ಮಾಡಿದ ನಂತರ ಆತ ಸ್ಕಾರ್ಫ್‌ನಿಂದ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಯತ್ನಿಸಿದ್ದಾನೆ, ಆದರೆ ಸ್ಕಾರ್ಫ್ ಕಿತ್ತುಕೊಂಡಿದ್ದರಿಂದ ರಕ್ಷಿಸಲಾಗಿದೆ. ತನಿಖಾಧಿಕಾರಿಗಳ ಪ್ರಕಾರ, ಅಮನ್ ತನ್ನ ಪತ್ನಿಯ ಆನ್‌ಲೈನ್ ಚಟುವಟಿಕೆಗೆ ತೀವ್ರ ವಿರೋಧ ವ್ಯಕ್ತಪಡಿಸುತ್ತಿದ್ದ. ಆಕೆ ತನ್ನನ್ನು "ಸಾಮಾಜಿಕ ಮಾಧ್ಯಮ ಕಲಾವಿದೆ" ಎಂದು ಕರೆದುಕೊಂಡು, ಸುಮಾರು 6,000 ಫಾಲೋವರ್ಸ್‌ ಜತೆ ಚಿಕ್ಕ ವಿಡಿಯೊಗಳನ್ನು ಪೋಸ್ಟ್ ಮಾಡುತ್ತಿದ್ದಳು.

ಅಮನ್ ಆಕೆಯ ಪೋಸ್ಟ್‌ಗಳಿಗೆ ಆಗಾಗ ಆಕ್ಷೇಪ ವ್ಯಕ್ತಪಡಿಸುತ್ತಿದ್ದ, ಈ ವಿಷಯದಲ್ಲಿ ಈ ಹಿಂದೆಯೂ ದೌರ್ಜನ್ಯ ನಡೆಸಿದ್ದ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಈ ದಂಪತಿ 10 ವರ್ಷಗಳ ಹಿಂದೆ ವಿವಾಹವಾಗಿದ್ದು, ಓಲ್ಡ್ ರೋಶನ್‌ಪುರದಲ್ಲಿ ತಮ್ಮ 9 ಮತ್ತು 5 ವರ್ಷದ ಇಬ್ಬರು ಮಕ್ಕಳೊಂದಿಗೆ ವಾಸಿಸುತ್ತಿದ್ದರು. ಇವರು ಮೂಲತಃ ಉತ್ತರ ಪ್ರದೇಶದ ಪಿಲಿಭಿತ್‌ನವರು. ಆಕೆ ಈ ಹಿಂದೆ ಅಮನ್‌ನ ಅಣ್ಣನನ್ನು ಮದುವೆಯಾಗಿದ್ದಳು, ಆತ ಆತ್ಮಹತ್ಯೆ ಮಾಡಿಕೊಂಡಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಸುದ್ದಿಯನ್ನೂ ಓದಿ: Crime News: ಕದ್ದ ವಾಹನದಲ್ಲಿ ಲೈಂಗಿಕ ಕ್ರಿಯೆ ನಡೆಸುತ್ತಿದ್ದ ದಂಪತಿ ಅರೆಸ್ಟ್

ಮಂಗಳವಾರ ಮುಂಜಾನೆ ಜಗಳ ತಾರಕಕ್ಕೇರಿ, ಅಮನ್ ತನ್ನ ಪತ್ನಿಯನ್ನು ಕುತ್ತಿಗೆ ಬಿಗಿದು ಕೊಂದಿದ್ದಾನೆ. ನಂತರ ಆತ ವಿಷ ಸೇವಿಸಿ, ಸ್ಕಾರ್ಫ್‌ನಿಂದ ನೇಣು ಬಿಗಿದುಕೊಂಡಿದ್ದಾನೆ. ಆದರೆ, ಸ್ಕಾರ್ಫ್ ಕಿತ್ತುಕೊಂಡಾಗ, ಆತ "ನಾನು ನನ್ನ ಪತ್ನಿಯನ್ನು ಕೊಂದಿದ್ದೇನೆ" ಎಂದು ಕೂಗುತ್ತಾ ಹೊರಗೆ ಓಡಿದ್ದಾನೆ. ಇದನ್ನು ಗಮನಿಸಿದ ವ್ಯಕ್ತಿ ಬೆಳಿಗ್ಗೆ 4:23ಕ್ಕೆ ಪೊಲೀಸರಿಗೆ ಕರೆ ಮಾಡಿದ್ದಾನೆ. ಪೊಲೀಸರು ಆಗಮಿಸಿದಾಗ, ಮಹಿಳೆ ಮೃತಪಟ್ಟಿದ್ದಳು. ಅಮನ್‌ನನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದ್ದು, ಕೊಲೆ ಪ್ರಕರಣ ದಾಖಲಿಸಲಾಗಿದೆ.

ಕೆಲವೇ ದಿನಗಳ ಹಿಂದೆ ಗ್ರೇಟರ್ ನೊಯ್ಡಾದಲ್ಲಿ 28 ವರ್ಷದ ನಿಕ್ಕಿ ಭಾಟಿಯನ್ನು ಆಕೆಯ ಪತಿ ವಿಪಿನ್ ಭಾಟಿ, ವರದಕ್ಷಿಣೆ ಮತ್ತು ಸೋಷಿಯಲ್ ಮೀಡಿಯಾ ವಿವಾದದಿಂದ ಸಜೀವವಾಗಿ ದಹಿಸಿದ ಘಟನೆಯ ಬೆನ್ನಲ್ಲೇ ಈ ಕೊಲೆ ಸಂಭವಿಸಿದೆ. ನಿಕ್ಕಿ ಮತ್ತು ಆಕೆಯ ಸಹೋದರಿ ಕಾಂಚನ್‌ ಅವರ "ಮೇಕ್‌ಓವರ್ ಬೈ ಕಾಂಚನ್" ಖಾತೆಗೆ 54,000ಕ್ಕೂ ಹೆಚ್ಚು ಅನುಯಾಯಿಗಳಿದ್ದರು. ಈ ಘಟನೆಗಳು ಸಾಮಾಜಿಕ ಮಾಧ್ಯಮದ ಪ್ರಭಾವದಿಂದ ಕೌಟುಂಬಿಕ ಸಂಘರ್ಷಗಳ ಬಗ್ಗೆ ಚರ್ಚೆಗೆ ಕಾರಣವಾಗಿವೆ.