ನೊರೊ ವೈರಸ್-ಹಂಟಾವೈರಸ್ ಆತಂಕದ ನಡುವೆ ಮತ್ತೆ ವೈರಲ್ ಆದ ಬಾಬಾ ವಂಗಾ ಭವಿಷ್ಯ!

ನವದೆಹಲಿ: ಜಾಗತಿಕವಾಗಿ ನೊರೊವೈರಸ್ (Norovirus) ಮತ್ತು ಹಂಟಾವೈರಸ್ (Hantavirus) ಪ್ರಕರಣಗಳು ಗಣನೀಯವಾಗಿ ಹೆಚ್ಚಾಗುತ್ತಿರುವ ಬೆನ್ನಲ್ಲೇ, ಬಲ್ಗೇರಿಯಾದ ಅಂಧ ಪ್ರವಾದಿ ಬಾಬಾ ವಂಗಾ (Baba Vanga) ಅವರ ಹೆಸರು ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತೆ ಮುಂಚೂಣಿಗೆ ಬಂದಿದೆ. 1996ರಲ್ಲಿ ನಿಧನರಾದ ಇವರು, ಹಿಂದೆ ನಡೆದ 9/11 ದಾಳಿ ಮತ್ತು ಕೋವಿಡ್-19 (Covid 19) ಸಾಂಕ್ರಾಮಿಕದಂತಹ ಜಾಗತಿಕ ಘಟನೆಗಳನ್ನು ನಿಖರವಾಗಿ ಮುನ್ಸೂಚಿಸಿದ್ದರು ಎಂದು ಅವರ ಬೆಂಬಲಿಗರು ಬಲವಾಗಿ ನಂಬುತ್ತಾರೆ. ಪ್ರಸ್ತುತ 2026ರಲ್ಲಿ ಜಗತ್ತು ಎದುರಿಸುತ್ತಿರುವ ಆರೋಗ್ಯ ಬಿಕ್ಕಟ್ಟಿಗೂ ಬಾಬಾ ವಂಗಾ ಅವರ ಭವಿಷ್ಯಕ್ಕೂ ನಂಟಿದೆ ಎಂಬ ವಾದಗಳು ಈಗ ಅಂತರ್ಜಾಲದಲ್ಲಿ ಭಾರಿ ಸಂಚಲನ ಮತ್ತು ಆತಂಕ ಸೃಷ್ಟಿಸಿವೆ.

ಪ್ರಸ್ತುತ ಜಾಗತಿಕ ಆರೋಗ್ಯ ಪರಿಸ್ಥಿತಿ

ಇತ್ತೀಚಿನ ದಿನಗಳಲ್ಲಿ ಎರಡು ವಿಭಿನ್ನ ವೈರಸ್‌ಗಳು ಜಗತ್ತಿನ ವಿವಿಧ ಭಾಗಗಳಲ್ಲಿ ಆತಂಕ ಮೂಡಿಸುತ್ತಿವೆ. ಮೊದಲನೆಯದಾಗಿ, ಅಮೆರಿಕ ಮತ್ತು ಇಂಗ್ಲೆಂಡ್‌ನಲ್ಲಿ ನೊರೊವೈರಸ್ ಪ್ರಕರಣಗಳು ಗಣನೀಯವಾಗಿ ಏರಿಕೆಯಾಗಿದ್ದು, ಜನರಲ್ಲಿ ತೀವ್ರ ಆತಂಕ ಮೂಡಿಸಿದೆ. ಎರಡನೆಯದಾಗಿ, ಏಪ್ರಿಲ್ 2026ರಲ್ಲಿ ಡಚ್ ಪ್ರವಾಸಿ ಹಡಗು 'ಎಂವಿ ಹೊಂಡಿಯಸ್'ನಲ್ಲಿ ತೀವ್ರ ಉಸಿರಾಟದ ಸಮಸ್ಯೆಗೆ ಕಾರಣವಾಗುವ ಹಂತಾವೈರಸ್ ಅಡಿಯಲ್ಲಿ ಬರುವ 'ಆಂಡಿಸ್ ವೈರಸ್' ಹರಡಿ ಮೂವರು ಸಾವನ್ನಪ್ಪಿದ್ದರು. ಇದು ವಿಶ್ವ ಆರೋಗ್ಯ ಸಂಸ್ಥೆಯ ತೀವ್ರ ನಿಗಾಕ್ಕೆ ಕಾರಣವಾಗಿದ್ದು, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತನಿಖೆಗಳು ನಡೆಯುತ್ತಿವೆ.

Norovirus: ಐಷಾರಾಮಿ ಹಡಗಿನಲ್ಲಿದ್ದ ನೂರಾರು ಜನರ ಪ್ರಾಣಕ್ಕೆ ಸಂಚಕಾರ- ಅಷ್ಟಕ್ಕೂ ಆಗಿದ್ದೇನು?

ಬಾಬಾ ವಂಗಾ ಭವಿಷ್ಯದ ನಂಟು ಮತ್ತು ಸತ್ಯಾಸತ್ಯತೆ

ವಂಗಾ ಅವರ ಅನುಯಾಯಿಗಳ ಪ್ರಕಾರ, ಅವರು 2025 ರಿಂದ 2027ರ ಅವಧಿಯಲ್ಲಿ ಜಗತ್ತು "ಸಂಪೂರ್ಣವಾಗಿ ಅಪರಿಚಿತ ವೈದ್ಯಕೀಯ ಪರಿಸ್ಥಿತಿಗಳನ್ನು" ಮತ್ತು ಹೊಸ ರೋಗಗಳನ್ನು ಎದುರಿಸಲಿದೆ ಎಂದು ಎಚ್ಚರಿಸಿದ್ದರು. ಚಿಕಿತ್ಸೆಗೆ ಮಣಿಯದ ಮತ್ತು ಜಾಗತಿಕ ಆರೋಗ್ಯ ವ್ಯವಸ್ಥೆಯನ್ನು ಹದಗೆಡಿಸುವ ವೈರಸ್‌ಗಳು ಬರಲಿವೆ ಎಂದು ಅವರು ಹೇಳಿದ್ದಾರೆ ಎನ್ನಲಾದ ಸಾಲುಗಳನ್ನು ಈಗಿನ ವೈರಸ್ ಪ್ರಕರಣಗಳಿಗೆ ಹೋಲಿಸಿ ವೈರಲ್ ಮಾಡಲಾಗುತ್ತಿದೆ.

ಆದರೆ, ಐತಿಹಾಸಿಕ ದಾಖಲೆಗಳನ್ನು ಮತ್ತು ಅವರ ಮೂಲ ಭವಿಷ್ಯವಾಣಿಗಳನ್ನು ಸೂಕ್ಷ್ಮವಾಗಿ ಪರಿಶೀಲಿಸಿದಾಗ, ಬಾಬಾ ವಂಗಾ ಅವರು ಎಲ್ಲೂ ಕೂಡ "ಹಂಟಾವೈರಸ್" ಅಥವಾ "ನೊರೊವೈರಸ್" ಎಂಬ ಹೆಸರುಗಳನ್ನು ನಿರ್ದಿಷ್ಟವಾಗಿ ಉಲ್ಲೇಖಿಸಿಲ್ಲ ಎಂಬುದು ಸ್ಪಷ್ಟವಾಗುತ್ತದೆ. ಅವರು ಭವಿಷ್ಯದ ಸಾಂಕ್ರಾಮಿಕ ರೋಗಗಳ ಬಗ್ಗೆ ನೀಡಿದ್ದ ಅಸ್ಪಷ್ಟ ಮತ್ತು ಸಾಮಾನ್ಯ ಹೇಳಿಕೆಗಳನ್ನು ಈಗಿನ ವೈರಸ್ ಹರಡುವಿಕೆಗೆ ಅನ್ವಯಿಸಿ ಜನರಲ್ಲಿ ಭಯ ಹುಟ್ಟಿಸಲಾಗುತ್ತಿದೆ. ಯಾವುದೇ ವೈಜ್ಞಾನಿಕ ಆಧಾರವಿಲ್ಲದ ಇಂತಹ ಹಳೆಯ ಪ್ರವಾದನೆಗಳನ್ನು ನಂಬಿ ಆತಂಕ ಪಡುವ ಬದಲು, ಪ್ರಸ್ತುತ ಆರೋಗ್ಯ ಸಂಸ್ಥೆಗಳು ಸೂಚಿಸುವ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳುವುದು ಮತ್ತು ವೈಜ್ಞಾನಿಕ ಮಾಹಿತಿಯನ್ನು ಅವಲಂಬಿಸುವುದು ಇಂದಿನ ತುರ್ತು ಅಗತ್ಯವಾಗಿದೆ. ಸೋಷಿಯಲ್ ಮೀಡಿಯಾಗಳಲ್ಲಿ ಹರಡುವ ಇಂತಹ ವದಂತಿಗಳ ಬಗ್ಗೆ ಜಾಗರೂಕರಾಗಿರುವುದು ಕ್ಷೇಮ.