ವಾಷಿಂಗ್ಟನ್, ಮಾ.23: ಅಮೆರಿಕದ 250ನೇ ವಾರ್ಷಿಕೋತ್ಸವದ ಅಂಗವಾಗಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ (Donald Trump) ಅವರ ಚಿತ್ರವನ್ನು 24 ಕ್ಯಾರೆಟ್ ಚಿನ್ನದ ಸ್ಮರಣಾರ್ಥ ನಾಣ್ಯದಲ್ಲಿ (24-karat gold coin) ಅಳವಡಿಸಲು ಚಿಂತಿಸಲಾಗಿದೆ. ಇದೀಗ ಈ ವಿಚಾರ ಭಾರಿ ಚರ್ಚೆಗೆ ಕಾರಣವಾಗಿದೆ. ಈ ವಿನ್ಯಾಸದಲ್ಲಿ ಟ್ರಂಪ್ ಮುಷ್ಟಿ ಬಿಗಿದುಕೊಂಡು ರೆಸಲ್ಯೂಟ್ ಡೆಸ್ಕ್ ಮೇಲೆ ಒರಗಿರುವುದನ್ನು ತೋರಿಸಲಾಗಿದೆ.
ಈ ಹಿಂದೆ, ಅಂದರೆ 1926ರಲ್ಲಿ ಆಗ ಅಮೆರಿಕದ 30ನೇ ಅಧ್ಯಕ್ಷರಾಗಿದ್ದ ಕ್ಯಾಲ್ವಿನ್ ಕೂಲಿಡ್ಜ್ ಅವರ ಚಿತ್ರವನ್ನು ಜಾರ್ಜ್ ವಾಷಿಂಗ್ಟನ್ ಅವರೊಂದಿಗೆ ಸೇರಿಸಲಾಗಿತ್ತು. ಅಮೆರಿಕದ 150ನೇ ಸ್ವಾತಂತ್ರ್ಯ ವಾರ್ಷಿಕೋತ್ಸವವನ್ನು ಆಚರಿಸುವ ಸ್ಮಾರಕ ನಾಣ್ಯದಲ್ಲಿ ಬಳಸಲಾಗಿತ್ತು. ಅಮೆರಿಕದ ಯುಎಸ್ ಕಮಿಷನ್ ಆನ್ ಫೈನ್ ಆರ್ಟ್ಸ್ ಮಾರ್ಚ್ 19ರಂದು ನಡೆದ ಸಭೆಯಲ್ಲಿ ಈ ವಿನ್ಯಾಸಕ್ಕೆ ಅನುಮೋದನೆ ನೀಡಿದೆ. ಅಂತಿಮ ಗಾತ್ರವನ್ನು ನಿರ್ಧರಿಸಿದ ಬಳಿಕ ಈ ಸ್ಮಾರಕ ನಾಣ್ಯವನ್ನು ಟಂಕಿಸಲಾಗುತ್ತದೆ.
ಅಮೆರಿಕದ 250ನೇ ಸ್ವಾತಂತ್ರ್ಯ ವಾರ್ಷಿಕೋತ್ಸವವನ್ನು ಸಮೀಪಿಸುತ್ತಿರುವ ಈ ಸಂದರ್ಭದಲ್ಲಿ, ನಮ್ಮ ದೇಶ ಮತ್ತು ಪ್ರಜಾಪ್ರಭುತ್ವದ ಶಾಶ್ವತ ಆತ್ಮವನ್ನು ಪ್ರತಿಬಿಂಬಿಸುವ ನಾಣ್ಯಗಳನ್ನು ಸಿದ್ಧಪಡಿಸುತ್ತಿರುವುದಕ್ಕೆ ನಾವು ಸಂತೋಷಪಡುತ್ತಿದ್ದೇವೆ. ಇಂತಹ ನಾಣ್ಯದಲ್ಲಿ ಕಾಣಿಸಿಕೊಳ್ಳಲು ನಮ್ಮ ಅಧ್ಯಕ್ಷರಾದ ಡೊನಾಲ್ಡ್ ಟ್ರಂಪ್ ಅವರಿಗಿಂತ ಹೆಚ್ಚು ಪ್ರತೀಕಾತ್ಮಕವಾದ ವ್ಯಕ್ತಿತ್ವ ಇನ್ನಿಲ್ಲ ಎಂದು ಅಮೆರಿಕದ ಖಜಾಂಚಿ ಬ್ರಾಂಡನ್ ಬೀಚ್ ಅವರು ತಿಳಿಸಿದ್ದಾರೆ.
ಮಾತುಕತೆಗೆ ಇರಾನ್ ಸಿದ್ಧವಾದರೂ ನಮಗೆ ಯುದ್ಧ ತೃಪ್ತಿ ಕೊಟ್ಟಿಲ್ಲ ಎಂದ ದೊಡ್ಡಣ್ಣ
ಅಮೆರಿಕದ ಫೆಡರಲ್ ಕಾನೂನಿನ ಪ್ರಕಾರ ಹಾಲಿ ಅಧ್ಯಕ್ಷರ ಚಿತ್ರವನ್ನು ಚಲಾವಣೆಯಲ್ಲಿರುವ ಕರೆನ್ಸಿಯಲ್ಲಿ ಟಂಕಿಸುವುದನ್ನು ನಿಷೇಧಿಸುತ್ತದೆ. ಆದರೆ, ಈ ಸ್ಮರಣಾರ್ಥ ನಾಣ್ಯವು ಆ ವರ್ಗದ ಅಡಿಯಲ್ಲಿ ಬರುವುದಿಲ್ಲ. ಅಂತಿಮ ವಿನ್ಯಾಸ ಮತ್ತು ಟಂಕಸಾಲೆಯ ಅನುಮೋದನೆಯ ಮೇಲೆ ಖಜಾನೆ ಕಾರ್ಯದರ್ಶಿ ಸಂಪೂರ್ಣ ಅಧಿಕಾರವನ್ನು ಹೊಂದಿದ್ದಾರೆ ಎಂದು ಬೀಚ್ ಹೇಳಿದರು.
ಈ ವಿಚಾರವು ರಾಜಕೀಯವಾಗಿ ಕೂಡ ಚರ್ಚೆಗೆ ಕಾರಣವಾಗಿದೆ. ಬೆಂಬಲಿಗರು ಇದನ್ನು ಗೌರವ ಸೂಚಕವೆಂದು ಹೇಳುತ್ತಿದ್ದರೆ. ವಿರೋಧಿಗಳು ಇದು ಸಂಪ್ರದಾಯ ಮತ್ತು ಕಾನೂನುಗಳ ವಿರುದ್ಧವಾಗಿದೆ ಎಂದು ಈ ಪ್ರಸ್ತಾಪವನ್ನು ಟೀಕಿಸಿದ್ದಾರೆ. ಟ್ರಂಪ್ ಚಿತ್ರವಿರುವ ನಾಣ್ಯವು ಸೂಕ್ತವಲ್ಲ, ಅಮೆರಿಕನ್ ಮೌಲ್ಯಗಳಿಗೆ ವಿರುದ್ಧವಾಗಿದೆ ಎಂದು ಹೇಳಿದ್ದಾರೆ.
ರಾಜರು ಮತ್ತು ಸರ್ವಾಧಿಕಾರಿಗಳು ತಮ್ಮ ಮುಖಗಳನ್ನು ನಾಣ್ಯಗಳ ಮೇಲೆ ಟಂಕಿಸುತ್ತಾರೆ. ಪ್ರಜಾಪ್ರಭುತ್ವದ ನಾಯಕರು ಈ ರೀತಿ ಮಾಡುವುದಿಲ್ಲ ಎಂದು ಸೆನೆಟರ್ ಜೆಫ್ ಮರ್ಕ್ಲಿ (ಡಿ-ಒರೆಗಾನ್) ವಾಷಿಂಗ್ಟನ್ ಪೋಸ್ಟ್ ಉಲ್ಲೇಖಿಸಿದೆ.
ಮೋದಿಯನ್ನು ಪ್ರೀತಿಸುತ್ತೇನೆ, ಶೀಘ್ರದಲ್ಲೇ ಭಾರತಕ್ಕೆ ಬರುತ್ತೇನೆ ಎಂದ ಡೊನಾಲ್ಡ್ ಟ್ರಂಪ್
ಈ ನಾಣ್ಯವು ಅಮೆರಿಕದ 250ನೇ ಸ್ವಾತಂತ್ರ್ಯ ವಾರ್ಷಿಕೋತ್ಸವವನ್ನು ಗುರುತಿಸಲು ಖಜಾನಾ ಇಲಾಖೆ ಬಿಡುಗಡೆ ಮಾಡಲು ಯೋಜಿಸಿರುವ ವಿಶೇಷ ಆವೃತ್ತಿಯ ನಾಣ್ಯಗಳು ಮತ್ತು ಪದಕಗಳ ವಿಶಾಲ ಸರಣಿಯ ಭಾಗವಾಗಿರುತ್ತದೆ.
ಅಮೆರಿಕದ ಯುನೈಟೆಡ್ ಸ್ಟೇಟ್ಸ್ ಮಿಂಟ್ ಕೂಡ ಘೋಷಣೆ ಮಾಡಿದ್ದು, ದೇಶದ ಸೆಮಿಕ್ವಿನ್ಸೆಂಟೆನಿಯಲ್ ಅಂಗವಾಗಿ ಡೈಮ್, ಕ್ವಾರ್ಟರ್ ಮತ್ತು ಹಾಫ್ ಡಾಲರ್ ಪರಿಚಿತ ನಾಣ್ಯಗಳಲ್ಲಿ ಒಂದೇ ವರ್ಷದ ವಿಶೇಷ ವಿನ್ಯಾಸ ಬದಲಾವಣೆಗಳನ್ನು ತರಲಾಗುತ್ತದೆ ಎಂದು ತಿಳಿಸಿದೆ.