ವರ್ಕ್ ಫ್ರಮ್ ಹೋಂ ಆದೇಶದ ಬೆನ್ನಲ್ಲೇ ಬೆಳಗಿನ ಜಾವ 4 ಗಂಟೆಗೆ 8,000 ನೌಕರರನ್ನು ವಜಾಗೊಳಿಸಿದ ಮೆಟಾ

ದೆಹಲಿ, ಮೇ 20: ಜಾಗತಿಕ ತಂತ್ರಜ್ಞಾನ ದೈತ್ಯ ಮೆಟಾ (Meta) ಸಂಸ್ಥೆಯು ಕಚೇರಿಯಲ್ಲಿ ಯಾವುದೇ ಗದ್ದಲ ಅಥವಾ ಆತಂಕದ ವಾತಾವರಣ ನಿರ್ಮಾಣವಾಗದಂತೆ ತಡೆಯಲು ಅತ್ಯಂತ ಚಾಣಾಕ್ಷ ಹಾಗೂ ರಹಸ್ಯ ತಂತ್ರವೊಂದನ್ನು ಹೂಡಿದೆ. ಅಮೆರಿಕ ಮತ್ತು ಬ್ರಿಟನ್ ಸೇರಿದಂತೆ ವಿವಿಧ ದೇಶಗಳ ಉದ್ಯೋಗಿಗಳಿಗೆ ಮೊದಲು ಇಂದು ಕಡ್ಡಾಯವಾಗಿ ಮನೆಯಿಂದಲೇ ಕೆಲಸ ಮಾಡಿ (WFH) ಎಂಬ ಸಾಮಾನ್ಯ ಸೂಚನೆ ನೀಡಲಾಯಿತು. ಉದ್ಯೋಗಿಗಳೆಲ್ಲರೂ ಮನೆಯಲ್ಲಿದ್ದಾಗಲೇ, ಸರಿಯಾಗಿ ಬೆಳಗಿನ ಜಾವ 4 ಗಂಟೆಗೆ ಇಮೇಲ್ ಕಳುಹಿಸುವ ಮೂಲಕ ಸದ್ದಿಲ್ಲದೆ ಭಾರಿ ಪ್ರಮಾಣದ ವಜಾ ಪ್ರಕ್ರಿಯೆಯನ್ನು ಆರಂಭಿಸಲಾಗಿದೆ.

ಫೇಸ್‌ಬುಕ್‌ನ ಮಾತೃ ಸಂಸ್ಥೆಯಾದ ಮೆಟಾ ಪ್ಲಾಟ್‌ಫಾರ್ಮ್ಸ್ ತನ್ನ ಒಟ್ಟು ಉದ್ಯೋಗಿಗಳಲ್ಲಿ ಶೇಕಡ 10ರಷ್ಟು, ಅಂದರೆ ಸುಮಾರು 8,000 ನೌಕರರನ್ನು ಕೆಲಸದಿಂದ ವಜಾಗೊಳಿಸಿದೆ. ಸಿಂಗಾಪುರ ಕಚೇರಿಯ ಉದ್ಯೋಗಿಗಳಿಗೆ ಅಲ್ಲಿನ ಸ್ಥಳೀಯ ಸಮಯ ಬೆಳಗಿನ ಜಾವ 4 ಗಂಟೆಗೆ (ಭಾರತೀಯ ಕಾಲಮಾನ ಮಧ್ಯರಾತ್ರಿ 1.30) ಮೊದಲ ಇಮೇಲ್ ತಲುಪಿದೆ.

ಲೇಆಫ್ ಹಿಂದಿರುವ ಎಐ ಮರುಹೊಂದಾಣಿಕೆ

ಮೆಟಾ ಸಂಸ್ಥೆಯು ಈ ಹಿಂದೆ 78,000 ಉದ್ಯೋಗಿಗಳನ್ನು ಹೊಂದಿತ್ತು. ಮುಖ್ಯ ಜನಶಕ್ತಿ ಅಧಿಕಾರಿ (CPO) ಜನೆಲ್ಲೆ ಗೇಲ್ ಅವರ ಇಂಟರ್‌ನಲ್ ಮೆಮೋ ಪತ್ರದ ಪ್ರಕಾರ, ಉಳಿದವರಲ್ಲಿ 7,000 ಉದ್ಯೋಗಿಗಳನ್ನು ಹೊಸ ಎಐ (ಕೃತಕ ಬುದ್ಧಿಮತ್ತೆ) ತಂಡಗಳಿಗೆ ನಿಯೋಜಿಸಲಾಗುತ್ತಿದೆ ಹಾಗೂ 6,000 ಮುಕ್ತ ಹುದ್ದೆಗಳನ್ನು ರದ್ದುಗೊಳಿಸಲಾಗಿದೆ. ಸಂಸ್ಥೆಯ ಮುಖ್ಯಸ್ಥ ಮಾರ್ಕ್ ಜುಕರ್‌ಬರ್ಗ್ ಎಐ ತಂತ್ರಜ್ಞಾನಕ್ಕೆ ಹೆಚ್ಚಿನ ಆದ್ಯತೆ ನೀಡುತ್ತಿದ್ದು, ಈ ವರ್ಷ ಎಐ ಸಂಶೋಧನೆಗಾಗಿ 125ರಿಂದ 145 ಬಿಲಿಯನ್ ಡಾಲರ್ ಹೂಡಿಕೆ ಮಾಡಲು ಯೋಜನೆ ರೂಪಿಸಿದ್ದಾರೆ. ಕಡಿಮೆ ಉದ್ಯೋಗಿಗಳು, ಸಣ್ಣ ತಂಡಗಳು ಮತ್ತು ಎಐ ತಂತ್ರಜ್ಞಾನಕ್ಕೆ ದೊಡ್ಡ ಹೂಡಿಕೆ—ಇದೇ ಈಗ ಮೆಟಾದ ಹೊಸ ಸೂತ್ರವಾಗಿದೆ.

ಮೆಟಾ ಒಳಗಿನ ಆತಂಕ

ಲೇಆಫ್ ಸುದ್ದಿಯು ಕಳೆದ ತಿಂಗಳೇ ಸೋರಿಕೆಯಾಗಿದ್ದರಿಂದ ಉದ್ಯೋಗಿಗಳಲ್ಲಿ ತೀವ್ರ ಅಸಮಾಧಾನವಿತ್ತು. ಇದರ ನಡುವೆ, ಉದ್ಯೋಗಿಗಳ ಮೌಸ್ ಚಲನೆ ಮತ್ತು ಕೀಸ್ಟ್ರೋಕ್‌ಗಳನ್ನು ಟ್ರ್ಯಾಕ್ ಮಾಡುವ ಹೊಸ ಆಂತರಿಕ ಸಾಧನವನ್ನು ಎಐ ತರಬೇತಿಗಾಗಿ ಮೆಟಾ ಬಳಸಿರುವುದು ಬೆಳಕಿಗೆ ಬಂದಿದೆ. ಇದನ್ನು ವಿರೋಧಿಸಿ 1,000 ಕ್ಕೂ ಹೆಚ್ಚು ನೌಕರರು ಅರ್ಜಿಗೆ ಸಹಿ ಹಾಕಿದ್ದಾರೆ. ಮನೆಯಿಂದಲೇ ಕೆಲಸ ಮಾಡುವಂತೆ ಆದೇಶ ನೀಡಿದ್ದರಿಂದ ಯಾವುದೇ ಕಚೇರಿ ಪ್ರತಿಭಟನೆಗಳು ನಡೆಯದಂತೆ ಕಂಪನಿ ನೋಡಿಕೊಂಡಿದೆ. ಕೇವಲ ಮೆಟಾ ಮಾತ್ರವಲ್ಲದೆ ಸಿಸ್ಕೋ, ಮೈಕ್ರೋಸಾಫ್ಟ್, ಅಮೆಜಾನ್ ಮತ್ತು ಒರಾಕಲ್ ಸಂಸ್ಥೆಗಳೂ ಇತ್ತೀಚೆಗೆ ದೊಡ್ಡ ಮಟ್ಟದಲ್ಲಿ ಉದ್ಯೋಗಿಗಳನ್ನು ವಜಾಗೊಳಿಸಿವೆ.

ಇದು ತಾತ್ಕಾಲಿಕವಲ್ಲ, ರಚನಾತ್ಮಕ ಬದಲಾವಣೆ

"ಇದು ಕೇವಲ ತಾತ್ಕಾಲಿಕ ಆರ್ಥಿಕ ಬದಲಾವಣೆಯಲ್ಲ, ಬದಲಿಗೆ ತಂತ್ರಜ್ಞಾನ ವಲಯದಲ್ಲಿನ ಕಾಯಂ ರಚನಾತ್ಮಕ ಬದಲಾವಣೆಯಾಗಿದೆ. ಎಐ ಮತ್ತು ಸ್ವಾಯತ್ತ ವ್ಯವಸ್ಥೆಗಳ ಆಗಮನದಿಂದಾಗಿ ಸಾಫ್ಟ್‌ವೇರ್ ಎಂಜಿನಿಯರಿಂಗ್ ಹಾಗೂ ಡೇಟಾ ಮ್ಯಾನೇಜ್‌ಮೆಂಟ್‌ನಂತಹ ಸಾಂಪ್ರದಾಯಿಕ ಉದ್ಯೋಗಗಳ ಮೌಲ್ಯ ಕಡಿಮೆಯಾಗಿದೆ. ಇನ್ನು ಮುಂದೆ ಕೇವಲ ಕೋಡಿಂಗ್ ಬರೆಯುವವರಲ್ಲ, ಎಐ ಆಧಾರಿತ ಸಂಕೀರ್ಣ ವ್ಯವಸ್ಥೆಗಳನ್ನು ವಿನ್ಯಾಸಗೊಳಿಸುವ ತಂತ್ರಜ್ಞರಿಗೆ ಮಾತ್ರ ಮಾರುಕಟ್ಟೆಯಲ್ಲಿ ಬೇಡಿಕೆ ಇರಲಿದೆ" ಎಂದು ರೆಡೋಕ್ಯೂ (RedoQ) ಸಂಸ್ಥೆಯ ಸಿಇಒ ದೀಪಲ್ ದತ್ತಾ ತಿಳಿಸಿದ್ದಾರೆ.