ಮಹಾಮಾರಿ ಪ್ಲೇಗ್‌ಗೆ ರಷ್ಯಾ ಸಂಶೋಧಕಿ ಬಲಿ; 200 ಜನರು ಕ್ವಾರಂಟೈನ್‌, 5 ಆಸ್ಪತ್ರೆ ಬಂದ್‌

ಮಾಸ್ಕೋ: ರಷ್ಯಾದಲ್ಲಿ ಲ್ಯಾಬ್ ತಂತ್ರಜ್ಞೆಯೊಬ್ಬರು ಮಾರಕ ಪ್ಲೇಗ್ (Plague) ಸೋಂಕಿಗೆ ಬಲಿಯಾಗಿದ್ದಾರೆ ಎಂಬ ಶಂಕೆ ವ್ಯಕ್ತವಾಗಿದ್ದು, ಈ ಘಟನೆಯ ಬೆನ್ನಲ್ಲೇ ಅಲ್ಲಿನ ಅಧಿಕಾರಿಗಳು ತೀವ್ರ ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಂಡಿದ್ದಾರೆ. ರಷ್ಯಾದ ಸೈಬೀರಿಯಾ ಪ್ರದೇಶದ (Russian Researcher Dies Of Plague) ಇರ್ಕುಟ್ಸ್ಕ್‌ನ ಶೆಲೆಖೋವ್‌ನಲ್ಲಿರುವ ಆಂಟಿ-ಪ್ಲೇಗ್ ರಿಸರ್ಚ್ ಇನ್‌ಸ್ಟಿಟ್ಯೂಟ್‌ನಲ್ಲಿ ಈ ಘಟನೆ ಸಂಭವಿಸಿದೆ. ಮೃತರನ್ನು 28 ವರ್ಷದ ಪ್ರಯೋಗಾಲಯ ತಂತ್ರಜ್ಞೆ ದಾರಿಯಾ ಶಿಪಿಲೋವಾ ಎಂದು ತಿಳಿದು ಬಂದಿದೆ.

ಮಾದರಿಗಳನ್ನು ಪರೀಕ್ಷೆಗಾಗಿ ಸಂಗ್ರಹಿಸುವ ಸಂದರ್ಭದಲ್ಲಿ, ಜೀವಂತ ಬ್ಯಾಕ್ಟೀರಿಯಾ ಹೊಂದಿದ್ದ ಪರೀಕ್ಷಾ ನಳಿಕೆ (Test Tube) ಆಕಸ್ಮಿಕವಾಗಿ ಒಡೆದ ಪರಿಣಾಮ ಅವರು ನ್ಯುಮೋನಿಕ್ ಪ್ಲೇಗ್ ಸೋಂಕಿಗೆ ತುತ್ತಾಗಿದ್ದಾರೆ ಎನ್ನಲಾಗಿದೆ. ತೀವ್ರ ನ್ಯುಮೋನಿಯಾ ಲಕ್ಷಣಗಳಿಂದಾಗಿ ಅವರು ಮೃತಪಟ್ಟಿದ್ದಾರೆ. ಶಿಪಿಲೋವಾ ಅವರನ್ನು ಸೆಪ್ಟೆಂಬರ್ 29 ರಂದು ಶೆಲೆಖೋವ್‌ನಲ್ಲಿ ತೀವ್ರವಾದ ನ್ಯುಮೋನಿಯಾದ ಲಕ್ಷಣಗಳೊಂದಿಗೆ ಆಸ್ಪತ್ರೆಗೆ ದಾಖಲಿಸಲಾಯಿತು ಮತ್ತು ಅಕ್ಟೋಬರ್ 1 ರಂದು ನಿಧನರಾಗುವ ಮೊದಲು ವೆಂಟಿಲೇಟರ್‌ನಲ್ಲಿ ಇರಿಸಲಾಗಿತ್ತು ಎಂದು ವರದಿಯಾಗಿದೆ.

ಆಕೆಯೊಂದಿಗೆ ಸಂಪರ್ಕ ಹೊಂದಿರಬಹುದಾದ 200 ಕ್ಕೂ ಹೆಚ್ಚು ಜನರನ್ನು ಈಗ ಕ್ವಾರಂಟೈನ್‌ನಲ್ಲಿ ಇರಿಸಲಾಗಿದೆ. ಇರ್ಕುಟ್ಸ್ಕ್‌ನಲ್ಲಿ ಸಾರ್ವಜನಿಕ ಕಾರ್ಯಕ್ರಮಗಳನ್ನು ಸಹ ರದ್ದುಗೊಳಿಸಲಾಗಿದೆ ಎಂದು ವರದಿಯಾಗಿದೆ. ರಷ್ಯಾದ ಗ್ರಾಹಕ ಸುರಕ್ಷತಾ ನಿಗಾ ಸಂಸ್ಥೆಯಾದ Rospotrebnadzor ಪ್ರಕಾರ, ಸದ್ಯಕ್ಕೆ ಇರ್ಕುಟ್ಸ್ಕ್ ಪ್ರದೇಶದಲ್ಲಿ ಸಾಂಕ್ರಾಮಿಕ ಪರಿಸ್ಥಿತಿ ಸ್ಥಿರವಾಗಿದೆ. ಮೃತಪಟ್ಟ ಮಹಿಳೆಗೆ "ಅಜ್ಞಾತ ಮೂಲದ ನ್ಯುಮೋನಿಯಾ" ಇತ್ತು ಎಂದು ಪ್ರಾಥಮಿಕವಾಗಿ ತಿಳಿಸಲಾಗಿದ್ದು, ಹೆಚ್ಚಿನ ತನಿಖೆ ಹಾಗೂ ಪರೀಕ್ಷೆಗಳು ನಡೆಯುತ್ತಿವೆ. ಅಮೆರಿಕದ ಆರೋಗ್ಯ ಸಂಸ್ಥೆಗಳು (CDC) ಕೂಡ ರಷ್ಯಾದ ಈ ಪರಿಸ್ಥಿತಿಯನ್ನು ಸೂಕ್ಷ್ಮವಾಗಿ ಗಮನಿಸುತ್ತಿವೆ.

Nostradamus Prediction: 2025ರಲ್ಲಿ ಜಗತ್ತನ್ನು ಬಾಧಿಸುತ್ತಾ ಪ್ಲೇಗ್‌ನಂತಹ ಮಹಾಮಾರಿ? ನಾಸ್ಟ್ರಾಡಾಮಸ್ ಭವಿಷ್ಯವಾಣಿ ಹೇಳೋದೇನು?

ನ್ಯುಮೋನಿಕ್ ಪ್ಲೇಗ್ ಎಂದರೇನು?

ಪ್ಲೇಗ್ ಹೆಚ್ಚು ಸಾಂಕ್ರಾಮಿಕವಾಗಿದ್ದು, ಸೋಂಕಿತ ಚಿಗಟೆಗಳ ಕಡಿತ ಮತ್ತು ಮಾರ್ಮೊಟ್‌ಗಳಂತಹ ಸೋಂಕಿತ ಪ್ರಾಣಿಗಳ ಸಂಪರ್ಕದ ಮೂಲಕ ಪ್ರಾಣಿಗಳು ಮತ್ತು ಮನುಷ್ಯರ ನಡುವೆ ಹರಡುತ್ತದೆ. ವಿಶ್ವ ಆರೋಗ್ಯ ಸಂಸ್ಥೆ (WHO) ಪ್ರಕಾರ, ಶ್ವಾಸಕೋಶ ಆಧಾರಿತ ಪ್ಲೇಗ್ ಎಂದೂ ಕರೆಯಲ್ಪಡುವ ನ್ಯುಮೋನಿಕ್ ಪ್ಲೇಗ್ ಅತ್ಯಂತ ಅಪಾಯಕಾರಿ ರೂಪವಾಗಿದೆ. ಸೋಂಕಿನ ನಂತರ ಲಕ್ಷಣಗಳು ಬೇಗನೆ ಕಾಣಿಸಿಕೊಳ್ಳುತ್ತವೆ, ಕೆಲವೊಮ್ಮೆ 24 ಗಂಟೆಗಳ ಒಳಗೆ, ಮತ್ತು ಉಸಿರಾಟದ ತೊಂದರೆ ಮತ್ತು ಕೆಮ್ಮುವಿಕೆಯಂತಹ ತೀವ್ರವಾದ ಉಸಿರಾಟದ ಲಕ್ಷಣಗಳು, ಹೆಚ್ಚಾಗಿ ರಕ್ತ ಮಿಶ್ರಿತ ಕಫದೊಂದಿಗೆ ಕಾಣಿಸಿಕೊಳ್ಳುತ್ತವೆ.