Russia-Ukraine War: ಉಕ್ರೇನ್‌ನ ಕ್ಯಾಬಿನೆಟ್‌ ಕಟ್ಟಡದ ಮೇಲೆ ದಾಳಿ ಮಾಡಿದ ರಷ್ಯಾ; ಗರ್ಭಿಣಿ ಸೇರಿ ಹಲವರಿಗೆ ಗಾಯ

ಕೀವ್‌: ರಷ್ಯಾ ಹಾಗೂ ಉಕ್ರೇನ್‌ ನಡುವಿನ ಯುದ್ಧ ನಿರಂತರವಾಗಿ ನಡೆಯುತ್ತಲೇ ಇದೆ. ಭಾನುವಾರ ರಷ್ಯಾದ ಪಡೆಗಳು ಕೇಂದ್ರ (Russia-Ukraine War) ಕೈವ್‌ನಲ್ಲಿರುವ ಉಕ್ರೇನ್‌ನ ಕ್ಯಾಬಿನೆಟ್ ಅನ್ನು ಹೊಂದಿರುವ ಸರ್ಕಾರಿ ಕಟ್ಟಡಗಳ ಮೇಲೆ ದಾಳಿ ಮಾಡಿವೆ. ದಾಳಿಯಲ್ಲಿ ಒಂದು ವರ್ಷದ ಮಗು ಸೇರಿದಂತೆ ಕನಿಷ್ಠ ಮೂವರು ಸಾವನ್ನಪ್ಪಿದ್ದಾರೆ. ಪ್ರತೀಕಾರವಾಗಿ, ಉಕ್ರೇನ್ ಬ್ರಿಯಾನ್ಸ್ಕ್ ಪ್ರದೇಶದಲ್ಲಿ ರಷ್ಯಾದ ಡ್ರುಜ್ಬಾ ತೈಲ ಪೈಪ್‌ಲೈನ್ ಅನ್ನು ಹೊಡೆದುರುಳಿಸಿತು. ಕಳೆದ ಕೆಲವು ತಿಂಗಳುಗಳಲ್ಲಿ ನಡೆದ ಅತ್ಯಂತ ಗಂಭೀರ ದಾಳಿ ಇದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ದಾಳಿಯ ನಂತರ, ಕೈವ್‌ನ ಪೆಚೆರ್ಸ್ಕಿ ಜಿಲ್ಲೆಯ ಕ್ಯಾಬಿನೆಟ್ ಕಟ್ಟಡದ ಛಾವಣಿ ಮತ್ತು ಮೇಲಿನ ಮಹಡಿಗಳಿಂದ ದಟ್ಟವಾದ ಕಪ್ಪು ಹೊಗೆ ಹೊರಹೊಮ್ಮಿದೆ.

ಮೊದಲ ಬಾರಿಗೆ, ಸರ್ಕಾರಿ ಕಟ್ಟಡವು ಶತ್ರುಗಳ ದಾಳಿಯಿಂದ ಹಾನಿಗೊಳಗಾಗಿದೆ. ನಾವು ಕಟ್ಟಡಗಳನ್ನು ಪುನಃಸ್ಥಾಪಿಸುತ್ತೇವೆ, ಆದರೆ ಕಳೆದುಹೋದ ಜೀವಗಳನ್ನು ಹಿಂತಿರುಗಿಸಲು ಸಾಧ್ಯವಿಲ್ಲ. ಅದಕ್ಕೆ ವಿಷಾದವಿದೆ ಎಂದು ಉಕ್ರೇನಿಯನ್ ಪ್ರಧಾನಿ ಯೂಲಿಯಾ ಸ್ವೈರಿಡೆಂಕೊ ಸಂತಾಪ ಸೂಚಿಸಿದ್ದಾರೆ. ಡ್ರೋನ್‌ಗಳ ಅಲೆಯೊಂದಿಗೆ ದಾಳಿ ಪ್ರಾರಂಭವಾಯಿತು ಮತ್ತು ನಂತರ ಕ್ಷಿಪಣಿಗಳು ಬಂದವು ಎಂದು ಮೇಯರ್ ವಿಟಾಲಿ ಕ್ಲಿಟ್ಸ್ಕೊ ದಾಳಿ ಕುರಿತು ತಿಳಿಸಿದ್ದಾರೆ.

ಸ್ವಿಯಾಟೋಶಿನ್ಸ್ಕಿ ಮತ್ತು ಡಾರ್ನಿಟ್ಸ್ಕಿಯಲ್ಲಿನ ವಸತಿ ಪ್ರದೇಶಗಳು ಸಹ ಹಾನಿಗೊಳಗಾದವು, ಬೀಳುವ ಅವಶೇಷಗಳು ಬೆಂಕಿಯನ್ನು ಹೊತ್ತಿಸಿ ಬಹುಮಹಡಿ ಕಟ್ಟಡಗಳಲ್ಲಿ ಭಾಗಶಃ ಕುಸಿತಕ್ಕೆ ಕಾರಣವಾಗಿದೆ. ಅಗ್ನಿಶಾಮಕ ದಳದವರು ರಾತ್ರಿಯಿಡೀ ಬೆಂಕಿ ನಂದಿಸಿವೆ. ಕೆಲವೇ ಗಂಟೆಗಳಲ್ಲಿ, ಉಕ್ರೇನ್ ರಷ್ಯಾದ ಇಂಧನ ಸೌಲಭ್ಯಗಳ ಮೇಲೆ ಪ್ರತಿದಾಳಿ ನಡೆಸುವ ಮೂಲಕ ಪ್ರತೀಕಾರ ತೀರಿಸಿಕೊಂಡಿತು. ಹಂಗೇರಿ ಮತ್ತು ಸ್ಲೋವಾಕಿಯಾಕ್ಕೆ ನಿರ್ಣಾಯಕ ಪೂರೈಕೆ ಮಾರ್ಗವಾದ ಬ್ರಿಯಾನ್ಸ್ಕ್‌ನಲ್ಲಿರುವ ಡ್ರುಜ್ಬಾ ತೈಲ ಪೈಪ್‌ಲೈನ್‌ನಲ್ಲಿ ಉಕ್ರೇನಿಯನ್ ಪಡೆಗಳು ನಾಶಪಡಿಸಿವೆ.

ಈ ಸುದ್ದಿಯನ್ನೂ ಓದಿ: Donald Trump: ಚೀನಾಗೆ ಬುದ್ಧಿ ಕಲಿಸಲು ಹೋಗಿ ನಾನು ಭಾರತ-ರಷ್ಯಾವನ್ನು ಕಳೆದುಕೊಂಡೆ; ಬೇಸರದಿಂದ ಟ್ವೀಟ್‌ ಮಾಡಿದ ಟ್ರಂಪ್‌

ಉಕ್ರೇನ್‌ನ ಇತರ ನಗರಗಳು ಸಹ ದಾಳಿಗೆ ಒಳಗಾದವು. ಕ್ರೆಮೆನ್‌ಚುಕ್‌ನಲ್ಲಿ, ಸ್ಪೋಟಗಳು ಸಂಭವಿಸಿವೆ. ನಗರದ ಕೆಲವು ಭಾಗಗಳಿಗೆ ವಿದ್ಯುತ್ ಸಂಪರ್ಕ ಕಡಿತಗೊಂಡಿದೆ. ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿಯವರ ನಗರವಾದ ಕ್ರಿವಿ ರಿಹ್‌ನಲ್ಲಿ, ಕ್ಷಿಪಣಿಗಳು ಸಾರಿಗೆ ಮತ್ತು ಮೂಲಸೌಕರ್ಯವನ್ನು ಹಾನಿಗೊಳಿಸಿವೆ ಎಂದು ನಗರದ ರಕ್ಷಣಾ ಮಂಡಳಿಯ ಮುಖ್ಯಸ್ಥ ಒಲೆಕ್ಸಾಂಡರ್ ವಿಲ್ಕುಲ್ ಹೇಳಿದ್ದಾರೆ. ರಷ್ಯಾದ ರಾಜ್ಯ ಮಾಧ್ಯಮವು ವಾಯು ರಕ್ಷಣಾ ಘಟಕಗಳು ರಾತ್ರೋರಾತ್ರಿ 69 ಉಕ್ರೇನಿಯನ್ ಡ್ರೋನ್‌ಗಳನ್ನು ನಾಶಪಡಿಸಿವೆ ಎಂದು ಹೇಳಿಕೊಂಡಿವೆ. ರಷ್ಯಾ ಸರ್ಕಾರ ಇದುವರೆಗೂ ಅಧಿಕೃತವಾಗಿ ಹೇಳಿಕೆ ನೀಡಿಲ್ಲ.