ಅಮೆರಿಕ ಸೇನೆಯ ಭರ್ಜರಿ ಕಾರ್ಯಾಚರಣೆ; ಇರಾನ್‌ಗೆ ನುಗ್ಗಿ ಪೈಲಟ್ ರಕ್ಷಣೆ: ಈ ಬಗ್ಗೆ ಡೊನಾಲ್ಡ್‌ ಟ್ರಂಪ್ ಹೇಳಿದ್ದೇನು?

ವಾಷಿಂಗ್ಟನ್, ಏ. 5: ಇರಾನ್ ಹೊಡೆದುರುಳಿಸಿದ ಎರಡನೇ ಅಮೆರಿಕ ಪೈಲಟ್ ಅನ್ನು ರಕ್ಷಿಸಲಾಗಿದೆ (US pilot rescue). ಈಗ ಅವರು ಸುರಕ್ಷಿತವಾಗಿ ಇರಾನ್‌ನಿಂದ (Iran War) ಹೊರಗಿದ್ದಾರೆ ಎಂದು ಉನ್ನತ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಇದು ದಶಕಗಳಲ್ಲಿ ಶತ್ರು ಪ್ರದೇಶದಲ್ಲಿ ಅಮೆರಿಕನ್ ಪಡೆಗಳು ನಡೆಸಿದ ಅತ್ಯಂತ ಸಂಕೀರ್ಣವಾದ ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆಗಳಲ್ಲಿ ಒಂದು ಎಂದು ಬಣ್ಣಿಸಲಾಗಿದೆ.

ನಾವು ಅವರನ್ನು ಪತ್ತೆಹಚ್ಚಿದ್ದೇವೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ (Donald Trump) ಟ್ರೂತ್‌ ಸಾಮಾಜಿಕ ಮಾಧ್ಯಮದಲ್ಲಿ ಘೋಷಿಸಿದರು. ಪತನಗೊಂಡ F-15E ಫೈಟರ್ ಜೆಟ್‌ನ ಎರಡನೇ ಸಿಬ್ಬಂದಿಯನ್ನು ರಕ್ಷಿಸಲಾಗಿದೆ. ಅವರು ಸುರಕ್ಷಿತ ಮತ್ತು ಆರೋಗ್ಯದಿಂದಿದ್ದಾರೆ ಎಂದು ದೃಢಪಡಿಸಿದರು.

ಅಮೆರಿಕ ಪೈಲಟ್‌ನ ರಕ್ಷಣೆ:

ಕಳೆದ ಹಲವು ಗಂಟೆಗಳಲ್ಲಿ, ಅಮೆರಿಕ ಮಿಲಿಟರಿ ಇತಿಹಾಸದಲ್ಲಿ ಅತ್ಯಂತ ಧೈರ್ಯಶಾಲಿ ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆಗಳಲ್ಲಿ ಒಂದನ್ನು ನಡೆಸಿತು. ರಕ್ಷಿಸಲ್ಪಟ್ಟ ಪೈಲಟ್‌ ಅತ್ಯಂತ ಗೌರವಾನ್ವಿತ ಕರ್ನಲ್‌ಗಳಲ್ಲಿ ಒಬ್ಬರು ಎಂದು ಅವರು ಬರೆದುಕೊಂಡಿದ್ದಾರೆ.

ಅಮೆರಿಕದ 2 ಯುದ್ಧ ವಿಮಾನಗಳನ್ನು ಹೊಡೆದುರುಳಿಸಿದ ಇರಾನ್ : ಇಬ್ಬರು ಪೈಲಟ್‌ಗಳ ರಕ್ಷಣೆ, ಓರ್ವ ನಾಪತ್ತೆ

ಐದು ವಾರಗಳ ಹಿಂದೆ ಯುದ್ಧ ಪ್ರಾರಂಭವಾದ ನಂತರದ ಮೊದಲ ಘಟನೆ ಇದಾಗಿದ್ದು, ಶುಕ್ರವಾರ (ಏ. 3) ಅಮೆರಿಕದ ವಾಯು ರಕ್ಷಣಾ ಪಡೆಗಳು ಅದರ F-15E ಸ್ಟ್ರೈಕ್ ಈಗಲ್ ಅನ್ನು ಹೊಡೆದುರುಳಿಸಿವೆ ಎಂದು ಇರಾನಿನ ಅಧಿಕಾರಿಗಳು ಹೇಳಿಕೊಂಡಿದ್ದರು. ಅಮೆರಿಕ ಮತ್ತು ಇರಾನಿನ ಸೇನೆ ಎರಡೂ ಸಿಬ್ಬಂದಿಯನ್ನು ಹುಡುಕಲು ತೀವ್ರ ಹುಡುಕಾಟವನ್ನು ಪ್ರಾರಂಭಿಸಿದವು.

ಒಬ್ಬ ಪೈಲಟ್‌ ಅನ್ನು ತ್ವರಿತವಾಗಿ ರಕ್ಷಿಸಲಾಗಿದ್ದರೂ, ಶಸ್ತ್ರಾಸ್ತ್ರ ವ್ಯವಸ್ಥೆಗಳ ಅಧಿಕಾರಿಯಾಗಿದ್ದ ಇನ್ನೊಬ್ಬ ಪೈಲಟ್‌ಗಾಗಿ ಹುಡುಕಾಟ ಮುಂದುವರಿಯಿತು. ಇರಾನಿನ ಅಧಿಕಾರಿಗಳು ಪೈಲಟ್‌ನ ಸ್ಥಳವನ್ನು ಪತ್ತೆಹಚ್ಚುತ್ತಿದ್ದರೂ, F-15E ಸಿಬ್ಬಂದಿಯು ಶತ್ರು ಪ್ರದೇಶದಲ್ಲಿ ಪತ್ತೆಗೆ ಬಾರದಂತೆ ಉಳಿದುಕೊಳ್ಳುವುದು ತ್ರಾಸದಾಯಕವಾಗಿತ್ತು. ಅಮೆರಿಕ ಪೈಲಟ್ ಅನ್ನು ಜೀವಂತವಾಗಿ ಸೆರೆಹಿಡಿದವರಿಗೆ 60,000 ಡಾಲರ್‌ ಬಹುಮಾನ ನೀಡುವುದಾಗಿ ಇರಾನ್ ಘೋಷಿಸಿತ್ತು.

ಇನ್ನು ಎರಡು ದಿನಗಳ ಕಾಲ ಇರಾನಿನ ಅಧಿಕಾರಿಗಳಿಂದ ತಪ್ಪಿಸಿಕೊಂಡು ನಾಪತ್ತೆಯಾಗಿದ್ದ ವಾಯುಪಡೆಯ ಸಿಬ್ಬಂದಿಯನ್ನು ರಾತ್ರೋರಾತ್ರಿ ಪತ್ತೆಹಚ್ಚಲಾಗಿದೆ ಎಂದು ಅಮೆರಿಕದ ಸರ್ಕಾರಿ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಅಧಿಕಾರಿಯ ಪ್ರಕಾರ, ಸಿಬ್ಬಂದಿ ಎಲ್ಲಿದ್ದಾರೆಂದು ನಮಗೆ ಗೊತ್ತಿದೆ ಎಂದು ಇರಾನಿನ ಅಧಿಕಾರಿಗಳಿಗೆ ತಿಳಿದಿತ್ತು, ಇದರಿಂದ ಕಾರ್ಯಾಚರಣೆ ತೀವ್ರಗೊಂಡಿತು ಎಂದು ಅಮೆರಿಕ ಹೇಳಿದೆ.

ಕಾರ್ಯಾಚರಣೆ ವೇಳೆ ಭಾರಿ ಗುಂಡಿನ ಚಕಮಕಿ ನಡೆದಿದೆ ಎಂದು ಟ್ರಂಪ್ ಹೇಳಿದ್ದಾರೆ. ಪೈಲಟ್‌ಗೆ ಗಾಯಗಳಾಗಿದ್ದವು, ಆದರೆ ಆರೋಗ್ಯವಾಗಿದ್ದಾರೆ ಎಂದು ಟ್ರಂಪ್ ತಿಳಿಸಿದ್ದಾರೆ. ಈ ಕಾರ್ಯಾಚರಣೆಯು ನಾವು ಇರಾನ್‌ನ ಸೇನೆಯನ್ನು ಮೀರಿ ಗುರಿ ಸಾಧಿಸಿದ್ದೇವೆ ಎಂಬುದನ್ನು ತೋರಿಸಿದೆ ಎಂದು ಹೇಳಿದ ಟ್ರಂಪ್‌, ಯಾವುದೇ ಅಮೆರಿಕನ್ನರು ಹತ್ಯೆಯಾಗಿಲ್ಲ ಅಥವಾ ಗಾಯಗೊಂಡಿಲ್ಲ ಎಂದು ಹೇಳಿದರು. ರಕ್ಷಣಾ ಕಾರ್ಯಾಚರಣೆಯ ಬಗ್ಗೆ ಇರಾನ್‌ ಇನ್ನೂ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.