Osama Bin Laden: ಲಾಡೆನ್‌ ಸಾವಿನ ಬಳಿಕ ಆತನ ಪತ್ನಿಯರು ಏನಾದರು?‌ ಮಾಜಿ ಅಧ್ಯಕ್ಷನ ಆಪ್ತ ಬಿಚ್ಚಿಟ್ಟ ಆ ಶಾಕಿಂಗ್ ಸಂಗತಿ ಏನು?

ಇಸ್ಲಮಾಬಾದ್‌: ಮೇ 2, 2011 ಇತಿಹಾಸದಲ್ಲಿ ಅಚ್ಚಳಿಯದೇ ಉಳಿಯವ ದಿನ. ಅದರಲ್ಲೂ ಅಮೆರಿಕ ಸೇನೆಯ ಇತಿಹಾಸದ ಪುಟಗಳಲ್ಲಿ ಶಾಶ್ವತವಾಗಿ ನೆನಪುಳಿಯುವ ದಿನ. ಅಂದು ಪಾಕಿಸ್ತಾನದ ಅಬೋಟಾಬಾದ್‌ನಲ್ಲಿ 40 ನಿಮಿಷಗಳ ತ್ವರಿತ ದಾಳಿಯಲ್ಲಿ, ಅಮೆರಿಕ ಸೇನೆ 9/11 ದಾಳಿಯ ಮಾಸ್ಟರ್ ಮೈಂಡ್ ಮತ್ತು ಅಲ್-ಖೈದಾ ಮುಖ್ಯಸ್ಥ ಒಸಾಮಾ ಬಿನ್ ಲಾಡೆನ್(Osama Bin Laden) ಅನ್ನು ನಿರ್ನಾಮ ಮಾಡಿದರು. ಈ ಕಾರ್ಯಾಚರಣೆಯು ಜಗತ್ತನ್ನು ದಿಗ್ಭ್ರಮೆಗೊಳಿಸಿದ್ದಲ್ಲದೆ, ಉಗ್ರ ಪೋಷಕ ಪಾಕಿಸ್ತಾನದ ಮುಖವಾಡ ಜಗತ್ತಿನ ಮುಂದೆ ಕಳಚಿ ಬಿದ್ದಿತ್ತು.

ನಂತರ ಇಡೀ ಜಗತ್ತಿಗೆ ಕಾಡಿದ ಅತಿ ದೊಡ್ಡ ಪ್ರಶ್ನೆಯೆಂದರೆ ಬಿನ್ ಲಾಡೆನ್ ಪಾಕಿಸ್ತಾನದ ಮಿಲಿಟರಿ ಕೇಂದ್ರದಿಂದ ಕೇವಲ ಒಂದು ಕಲ್ಲು ಎಸೆಯುವ ದೂರದಲ್ಲಿರುವ ಗ್ಯಾರಿಸನ್ ಪಟ್ಟಣದಲ್ಲೇ ಇದ್ದರೂ ಅಷ್ಟು ವರ್ಷಗಳ ಕಾಲ ಯಾರ ಕಣ್ಣಿಗೂ ಬೀಳದೇ ಪತ್ತೆಯಾಗದೆ ಹೇಗೆ ಬದುಕಲು ಸಾಧ್ಯವಾಯಿತು ಎಂಬುದು. ಇನ್ನು ಅಷ್ಟೇ ನಿಗೂಢವಾಗಿ ಮುಚ್ಚಿಹೋದ ಮತ್ತೊಂದು ಸಂಗತಿ ಎಂದರೆ ಅವನ ಮರಣದ ನಂತರ ಅವನ ಕುಟುಂಬ ಏನಾಯ್ತು? ಆತನ ಹೆಂಡತಿಯರು, ಮಕ್ಕಳು ಏನದರು ಎಂಬ ಪ್ರಶ್ನೆ ಇನ್ನೂ ಹಾಗೆಯೇ ಉಳಿದಿದೆ. ಇದೀಗ ಈ ಪ್ರಶ್ನೆಗೆ ಪಾಕಿಸ್ತಾನದ ಮಾಜಿ ಅಧ್ಯಕ್ಷರ ಆಪ್ತರೊಬ್ಬರು ಶಾಕಿಂಗ್‌ ಸಂಗತಿಯೊಂದನ್ನು ಬಹಿರಂಗಪಡಿಸಿದ್ದು, ಈದು ಭಾರೀ ಚರ್ಚೆಗೆ ಕಾರಣವಾಗಿದೆ

ಮಾಜಿ ಅಧ್ಯಕ್ಷ ಆಸಿಫ್ ಅಲಿ ಜರ್ದಾರಿಯವರ ಮಾಜಿ ವಕ್ತಾರ ಫರ್ಹತುಲ್ಲಾ ಬಾಬರ್ ಬರೆದ "ದಿ ಜರ್ದಾರಿ ಪ್ರೆಸಿಡೆನ್ಸಿ: ನೌ ಇಟ್ ಮಸ್ಟ್ ಬಿ ಟೋಲ್ಡ್" ಎಂಬ ಪುಸ್ತಕವು ಈಗ ಒಸಾಮಾ ಬಿನ್ ಲಾಡೆನ್‌ ಕುಟುಂಬದ ಕುರಿತ ಪ್ರಶ್ನೆಗಳ ಮೇಲೆ ಹೊಸ ಬೆಳಕು ಚೆಲ್ಲಿದೆ. ಬಾಬರ್ ಪ್ರಕಾರ, ಪಾಕಿಸ್ತಾನದ ಅಧಿಕಾರಿಗಳು ಬಿನ್ ಲಾಡೆನ್ ಹತ್ಯೆಯ ನಂತರ ಅವನ ಹೆಂಡತಿಯರನ್ನು ಕಸ್ಟಡಿಗೆ ತೆಗೆದುಕೊಂಡರು. ಆದಾಗ್ಯೂ, ಅತ್ಯಂತ ಆಶ್ಚರ್ಯಕರವಾದ ಸಂಗತಿಯೆಂದರೆ, ಕೆಲವೇ ದಿನಗಳಲ್ಲಿ, ಸಿಐಎ ತಂಡವು ಅಬೋಟಾಬಾದ್ ಕಂಟೋನ್ಮೆಂಟ್‌ಗೆ ನೇರ ಪ್ರವೇಶವನ್ನು ಪಡೆದು ಮಹಿಳೆಯರನ್ನು ವಿಚಾರಣೆ ನಡೆಸಿತು. ಇದು ಪಾಕಿಸ್ತಾನದ ಸಾರ್ವಭೌಮತ್ವದ ಬಗ್ಗೆ ಗಂಭೀರ ಕಳವಳವನ್ನು ಹುಟ್ಟುಹಾಕಿತು.

ಈ ಘಟನೆಯು ಇಡೀ ದೇಶಕ್ಕೆ ಬಹುದೊಡ್ಡ ಅವಮಾನ ಎಂದು ಕರೆದಿರುವ ಬಾಬರ್‌, ಅಮೆರಿಕದ ಏಜೆಂಟರು ಪಾಕಿಸ್ತಾನದ ನೆಲದಲ್ಲಿ ಗಮನಾರ್ಹ ಸ್ವಾತಂತ್ರ್ಯದೊಂದಿಗೆ ಕಾರ್ಯನಿರ್ವಹಿಸುತ್ತಿದ್ದರೂ, ದೇಶದ ನಾಯಕತ್ವ ಮತ್ತು ಮಿಲಿಟರಿ ಕೈಲಾಗದಂತೆ ಸುಮ್ಮನೆ ನೋಡಿಕೊಂಡು ನಿಂತಿದ್ದವು ಎಂದು ಅವರು ಬರೆಯುತ್ತಾರೆ. ಈ ಘಟನೆಯು ಪಾಕಿಸ್ತಾನದ ಬಹುದೊಡ್ಡ ವೈಫಲ್ಯ ಎಂದು ಅವರು ಕರೆದಿದ್ದಾರೆ.

ದಾಳಿಯ ನಂತರ, ಆಗಿನ ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಹಿಲರಿ ಕ್ಲಿಂಟನ್ ಮತ್ತು ಸೆನೆಟರ್ ಜಾನ್ ಕೆರ್ರಿ ಸೇರಿದಂತೆ ಹಿರಿಯ ಅಮೇರಿಕನ್ ವ್ಯಕ್ತಿಗಳು ಪಾಕಿಸ್ತಾನಕ್ಕೆ ಹೇಗೆ ಬಂದರು ಎಂಬುದನ್ನು ಪುಸ್ತಕವು ಮತ್ತಷ್ಟು ವಿವರಿಸುತ್ತದೆ. ದಾಳಿಗೆ ಬಹಳ ಹಿಂದೆಯೇ ಸಿಐಎ ಬಿನ್ ಲಾಡೆನ್‌ನ ಅಬೋಟಾಬಾದ್ ಅಡಗುತಾಣದ ಬಗ್ಗೆ ಸಂಕೀರ್ಣವಾದ ಗುಪ್ತಚರ ಮಾಹಿತಿಯನ್ನು ಸಂಗ್ರಹಿಸಿತ್ತು. ವಿಶ್ವದ ಅತ್ಯಂತ ಬೇಕಾಗಿರುವ ಭಯೋತ್ಪಾದಕ ಆಶ್ರಯ ಪಡೆದಿದ್ದ ಕಾಂಪೌಂಡ್ ಅನ್ನು ನಿರ್ಮಿಸಿದ ಗುತ್ತಿಗೆದಾರನ ಗುರುತು ಕೂಡ ಆ ಸಂಸ್ಥೆಗೆ ತಿಳಿದಿತ್ತು ಎಂದು ಬಾಬರ್ ಹೇಳಿಕೊಂಡಿದ್ದಾರೆ.