ಬೆಂಗಳೂರು: ಬೆಳಗಿನ ಆರಂಭವನ್ನು ಬಿಸಿ ಬಿಸಿ ಶುಂಠಿ ಚಹಾದೊಂದಿಗೆ (Ginger Tea) ಮಾಡುವವರು ಅನೇಕರಿದ್ದಾರೆ. ಸೀಸನಲ್ ಜ್ವರ (Seasonal Fever), ಶೀತ, ಕೆಮ್ಮು ಅಥವಾ ಗಂಟಲು ನೋವಿನ ಸಂದರ್ಭದಲ್ಲಿ ಶುಂಠಿ ಚಹಾವನ್ನು ಮನೆ ಮದ್ದಿನಂತೆ(Home Remedies) ಸೇವಿಸುವ ಪದ್ಧತಿಯೂ ಇದೆ. ಶುಂಠಿಯು ಹಲವು ಔಷಧೀಯ ಗುಣಗಳನ್ನು ಹೊಂದಿದ್ದರೂ, ಅದನ್ನು ಅತಿಯಾಗಿ ಸೇವಿಸುವುದು ಎಲ್ಲರಿಗೂ ಸುರಕ್ಷಿತವಲ್ಲ ಎಂದು ಆರೋಗ್ಯ ತಜ್ಞರು ಎಚ್ಚರಿಸಿದ್ದಾರೆ.
ಆರೋಗ್ಯ ತಜ್ಞರ ಪ್ರಕಾರ, ಸಾಮಾನ್ಯವಾಗಿ ಒಬ್ಬ ವಯಸ್ಕ ವ್ಯಕ್ತಿಯು ದಿನಕ್ಕೆ 4 ಗ್ರಾಂಗಿಂತ ಹೆಚ್ಚು ಶುಂಠಿ ಸೇವಿಸದಿರುವುದು ಉತ್ತಮ. ಕೇವಲ ಶುಂಠಿ ಚಹಾದಿಂದ ಈ ಪ್ರಮಾಣವನ್ನು ಮೀರುವುದು ಅಪರೂಪವಾದರೂ, ಆಹಾರ, ಕಷಾಯ, ಹರ್ಬಲ್ ಪಾನೀಯಗಳು ಹಾಗೂ ಮನೆಮದ್ದುಗಳ ಮೂಲಕವೂ ಶುಂಠಿ ಸೇವಿಸಿದರೆ ಒಟ್ಟು ಪ್ರಮಾಣ ಹೆಚ್ಚಾಗುವ ಸಾಧ್ಯತೆ ಇರುತ್ತದೆ.
ಅತಿಯಾಗಿ ಸೇವಿಸಿದರೆ ಏನಾಗುತ್ತದೆ?
ಶುಂಠಿಯನ್ನು ಮಿತಿಮೀರಿ ಸೇವಿಸಿದರೆ ಕೆಲವರಿಗೆ ಎದೆಯುರಿ, ಅಸಿಡಿಟಿ, ಹೊಟ್ಟೆಯಲ್ಲಿ ಉರಿ, ಹೊಟ್ಟೆ ಉಬ್ಬರ, ಅತಿಸಾರ ಅಥವಾ ಜೀರ್ಣಕ್ರಿಯೆಯಲ್ಲಿ ಅಸ್ವಸ್ಥತೆ ಕಾಣಿಸಬಹುದು. ಸಾಮಾನ್ಯವಾಗಿ ಇವು ಶುಂಠಿಯ ಖಾರದ ಸ್ವಭಾವದಿಂದ ಉಂಟಾಗುವ ತಾತ್ಕಾಲಿಕ ಸಮಸ್ಯೆಗಳಾಗಿರುತ್ತವೆ.
ಆದರೆ, ಶುಂಠಿ ಸೇವಿಸಿದ ಬಳಿಕ ಚರ್ಮದ ಮೇಲೆ ದದ್ದು, ತುರಿಕೆ, ತುಟಿ ಅಥವಾ ಮುಖದಲ್ಲಿ ಊತ, ಉಸಿರಾಟದ ತೊಂದರೆ ಅಥವಾ ತೀವ್ರ ಹೊಟ್ಟೆನೋವು ಕಂಡುಬಂದರೆ ತಕ್ಷಣ ವೈದ್ಯರನ್ನು ಸಂಪರ್ಕಿಸಬೇಕು. ಇವು ಅಲರ್ಜಿ ಅಥವಾ ಇತರೆ ಆರೋಗ್ಯ ಸಮಸ್ಯೆಯ ಲಕ್ಷಣಗಳಾಗಿರಬಹುದು.
ನೇರಳೆ ಹಣ್ಣು ತಿಂದ ತಕ್ಷಣ ಹಾಲು ಕುಡಿಯುತ್ತೀರಾ? ಹೊಟ್ಟೆ ಸಮಸ್ಯೆಗೆ ಕಾರಣವಾಗಬಹುದು!
ಈ ಆರೋಗ್ಯ ಸಮಸ್ಯೆ ಇರುವವರು ಎಚ್ಚರಿಕೆ ವಹಿಸಿ
ಪಿತ್ತಕೋಶದ ಸಮಸ್ಯೆ (Gallbladder Disorder) ಇರುವವರು ಶುಂಠಿ ಚಹಾವನ್ನು ನಿಯಮಿತವಾಗಿ ಸೇವಿಸುವ ಮೊದಲು ವೈದ್ಯರ ಸಲಹೆ ಪಡೆಯುವುದು ಉತ್ತಮ. ಶುಂಠಿಯು ರಕ್ತದೊತ್ತಡವನ್ನು ಸ್ವಲ್ಪ ಮಟ್ಟಿಗೆ ಕಡಿಮೆ ಮಾಡುವ ಗುಣ ಹೊಂದಿರುವುದರಿಂದ ಕಡಿಮೆ ರಕ್ತದೊತ್ತಡ ಇರುವವರು ಅಥವಾ ರಕ್ತದೊತ್ತಡದ ಔಷಧಿ ಸೇವಿಸುವವರು ಮಿತವಾಗಿ ಸೇವಿಸಬೇಕು.
ಇದರ ಜತೆಗೆ, ಶುಂಠಿಯು ರಕ್ತವನ್ನು ತೆಳುವಾಗಿಸುವ ಸ್ವಾಭಾವಿಕ ಗುಣವನ್ನು ಹೊಂದಿರುವುದರಿಂದ ರಕ್ತಸ್ರಾವದ ಸಮಸ್ಯೆ ಇರುವವರು ಅಥವಾ ರಕ್ತ ತೆಳುವಾಗಿಸುವ ಔಷಧಿಗಳನ್ನು ಸೇವಿಸುತ್ತಿರುವವರು ವೈದ್ಯರ ಸಲಹೆಯಿಲ್ಲದೆ ಹೆಚ್ಚು ಪ್ರಮಾಣದಲ್ಲಿ ಶುಂಠಿ ಸೇವಿಸುವುದನ್ನು ತಪ್ಪಿಸಬೇಕು. ಗರ್ಭಿಣಿಯರು ಕೂಡ ನಿಯಮಿತವಾಗಿ ಹೆಚ್ಚಿನ ಪ್ರಮಾಣದಲ್ಲಿ ಶುಂಠಿ ಸೇವಿಸುವ ಮೊದಲು ವೈದ್ಯರ ಸಲಹೆ ಪಡೆಯುವುದು ಒಳಿತು.
ಶುಂಠಿ ಚಹಾದ ಆರೋಗ್ಯ ಪ್ರಯೋಜನಗಳೇನು?
ಮಿತವಾಗಿ ಸೇವಿಸಿದರೆ ಶುಂಠಿ ಚಹಾ ಆರೋಗ್ಯಕ್ಕೆ ಹಲವು ರೀತಿಯಲ್ಲಿ ಪ್ರಯೋಜನಕಾರಿಯಾಗಿದೆ. ಇದು ವಾಕರಿಕೆ, ವಾಂತಿ, ಅಜೀರ್ಣ, ಹೊಟ್ಟೆ ಉಬ್ಬರ ಮತ್ತು ಗ್ಯಾಸ್ಟ್ರಿಕ್ ಸಮಸ್ಯೆಗಳನ್ನು ಕಡಿಮೆ ಮಾಡಲು ಸಹಕಾರಿಯಾಗುತ್ತದೆ. ಕೆಲವು ಅಧ್ಯಯನಗಳ ಪ್ರಕಾರ ಶಸ್ತ್ರಚಿಕಿತ್ಸೆ ಅಥವಾ ಕೀಮೋಥೆರಪಿ ಬಳಿಕ ಉಂಟಾಗುವ ವಾಕರಿಕೆಯನ್ನು ನಿಯಂತ್ರಿಸಲು ಕೂಡ ಶುಂಠಿ ನೆರವಾಗಬಹುದು.
ಸೌತೆಕಾಯಿ ಸೇವನೆ ಆರೋಗ್ಯಕ್ಕೆ ಒಳಿತೇ? ತಜ್ಞರು ಹೇಳೋದೇನು?
ಶುಂಠಿಯಲ್ಲಿರುವ ಜಿಂಜೆರಾಲ್ (Gingerol) ಎಂಬ ನೈಸರ್ಗಿಕ ಸಂಯುಕ್ತವು ಉರಿಯೂತ ನಿವಾರಕ (Anti-inflammatory) ಮತ್ತು ಆ್ಯಂಟಿಆಕ್ಸಿಡೆಂಟ್ ಗುಣಗಳನ್ನು ಹೊಂದಿದ್ದು, ದೇಹದ ಉರಿಯೂತವನ್ನು ಕಡಿಮೆ ಮಾಡಲು ಹಾಗೂ ರೋಗನಿರೋಧಕ ಶಕ್ತಿಯನ್ನು ಬೆಂಬಲಿಸಲು ಸಹಾಯ ಮಾಡುತ್ತದೆ. ಶೀತ, ಕೆಮ್ಮು ಮತ್ತು ಗಂಟಲು ನೋವಿನ ಸಮಯದಲ್ಲೂ ಶುಂಠಿ ಚಹಾ ತಾತ್ಕಾಲಿಕ ನೆಮ್ಮದಿ ನೀಡಬಹುದು.
ತಜ್ಞರ ಸಲಹೆ
ಶುಂಠಿ ಆರೋಗ್ಯಪೂರ್ಣ ಆಹಾರ ಪದಾರ್ಥವಾಗಿದ್ದರೂ, "ಹೆಚ್ಚಾದರೆ ಅಮೃತವೂ ವಿಷ" ಎಂಬ ಮಾತಿನಂತೆ ಮಿತಿಯಲ್ಲಿ ಸೇವಿಸುವುದು ಮುಖ್ಯ. ಆರೋಗ್ಯ ಸಮಸ್ಯೆ ಹೊಂದಿರುವವರು ಅಥವಾ ನಿಯಮಿತವಾಗಿ ಔಷಧಿ ಸೇವಿಸುತ್ತಿರುವವರು ಶುಂಠಿ ಸೇವನೆಯನ್ನು ಹೆಚ್ಚಿಸುವ ಮೊದಲು ವೈದ್ಯರ ಸಲಹೆ ಪಡೆಯುವುದು ಉತ್ತಮ. ಸಮತೋಲಿತ ಆಹಾರ ಮತ್ತು ಆರೋಗ್ಯಕರ ಜೀವನಶೈಲಿಯ ಭಾಗವಾಗಿ ಮಿತ ಪ್ರಮಾಣದಲ್ಲಿ ಶುಂಠಿ ಚಹಾ ಸೇವಿಸಿದರೆ ಅದರ ಲಾಭಗಳನ್ನು ಸುರಕ್ಷಿತವಾಗಿ ಪಡೆಯಬಹುದು.