Health Tips: ಅಲರ್ಜಿ; ಎಚ್ಚರ ತಪ್ಪಿದರೆ ಅಪಾಯ ಗ್ಯಾರಂಟಿ

ಬೆಂಗಳೂರು: ನಮ್ಮದಲ್ಲದ ಹೊರಗಿನ ವಸ್ತುಗಳಿಗೆ ನಮ್ಮ ದೇಹ ತೋರಿಸುವ ಪ್ರತಿರೋಧಕ ಪ್ರತಿಕ್ರಿಯೆಯನ್ನೇ ಅಲರ್ಜಿ (Allergy) ಎನ್ನಬಹುದು. ಹೊರಗಿನ ವಸ್ತುಗಳು ಅಥವಾ ಅಲರ್ಜನ್‌ಗಳು ನಮಗೆ ಹಾನಿಕಾರಕವೇನೂ ಆಗಿರದಿದ್ದರೂ ಕೆಲವೊಮ್ಮೆ ಸ್ವಲ್ಪ ʻಅಧಿಕʼ ಎನ್ನಬಹುದಾದ ಪ್ರತಿಕ್ರಿಯೆಯನ್ನು ದೇಹ (Health tips) ತೋರಿಸುತ್ತದಷ್ಟೆ. ಬಂದಿರುವ ಅಲರ್ಜನ್‌ ಯಾವುದು ಎಂಬುದರ ಮೇಲೆ ದೇಹ ತೋರಿಸುವ ಪ್ರತಿಕ್ರಿಯೆ ಏನು ಮತ್ತು ಎಷ್ಟು ತೀವ್ರ ಎಂಬುದು ನಿರ್ಧಾರವಾಗುತ್ತದೆ. ಉದಾ: ಕೆಮ್ಮು, ಸೀನು, ನೆಗಡಿ, ಉಸಿರಾಟದ ತೊಂದರೆ, ಉರಿಯೂತ, ಕಣ್ಣುರಿ, ಚರ್ಮದ ಮೇಲೆ ನವೆ, ಗುಳ್ಳೆಗಳು ಇತ್ಯಾದಿ. ಕೆಲವೊಮ್ಮೆ ಪ್ರಾಣಾಪಾಯ ಆಗುವ ಮಟ್ಟಕ್ಕೂ ಅಲರ್ಜಿ ಕಾಣಿಸಬಹುದು. ಅಂದರೆ ಕೆಲವು ಆಹಾರ, ಔಷಧ ಇತ್ಯಾದಿಗಳಿಗೆ ಅತಿರೇಕದ ಪ್ರತಿಕ್ರಿಯೆಯನ್ನು ದೇಹ ತೋರಿಸುತ್ತದೆ. ಉದಾ, ತೀವ್ರ ಉಸಿರಾಟದ ತೊಂದರೆ, ಎಚ್ಚರ ತಪ್ಪುವುದು ಆದಾಗ ತಕ್ಷಣವೇ ವೈದ್ಯರನ್ನು ಕಾಣಬೇಕಾಗುತ್ತದೆ.

ಏನೆಲ್ಲ ಅಲರ್ಜಿಗಳು?

ಆಹಾರದ ಅಲರ್ಜಿಗಳು: ಹಾಲು, ಗೋಧಿ, ಅಣಬೆ, ಈಸ್ಟ್‌, ಮೊಟ್ಟೆ, ಶೇಂಗಾ, ಗೋಡಂಬಿ ಮತ್ತಿತರ ಒಣಹಣ್ಣು, ಬೀಜ... ಹೀಗೆ ಹಲವಾರು ರೀತಿಯ ಆಹಾರಗಳನ್ನು ದೇಹ ʻತನಗಲ್ಲʼ ಎಂಬಂತೆ ತಿರಸ್ಕರಿಸಬಹುದು. ಅದನ್ನು ಅಲರ್ಜನ್‌ ಎಂದು ಭಾವಿಸಿ ಪ್ರತಿರೋಧ ತೋರಬಹುದು. ಇಂಥ ಆಹಾರಗಳನ್ನು ತಿಂದ ತಕ್ಷಣ ಉರಿಯೂತ, ಚರ್ಮ ಕೆಂಪಾಗಿ ತುರಿಕೆಯಾಗುವುದು, ಬಾಯಿ-ಗಂಟಲು ಬಿಗಿಯುವುದು, ಹೊಟ್ಟೆ ತೊಳೆಸಿದ ಅನುಭವ, ವಾಂತಿ, ಆಯಾಸ, ತಲೆಸುತ್ತು, ಉಸಿರಾಟದ ತೊಂದರೆಯಂಥ ಹಲವು ಪ್ರತಿಕ್ರಿಯೆಗಳನ್ನು ದೇಹ ತೋರಿಸುತ್ತದೆ. ಯಾವ ಆಹಾರಕ್ಕೆ ಹೀಗಾಗುತ್ತಿದೆ ಎಂಬುದನ್ನು ತಿಳಿದುಕೊಳ್ಳುವುದು ಬಹಳ ಮುಖ್ಯ. ಇಲ್ಲದಿದ್ದರೆ ಚಿಕಿತ್ಸೆ ಸಾಧ್ಯವಿಲ್ಲ. ಈ ಬಗ್ಗೆ ಹೆಚ್ಚಿನ ಅರಿವು-ಚಿಕಿತ್ಸೆಗಾಗಿ ವೈದ್ಯರನ್ನು ಕಾಣುವುದು ಸೂಕ್ತ.

ಋತುಮಾನದ ಅಲರ್ಜಿಗಳು: ಚಳಿಗಾಲ ಆರಂಭವಾಗುತ್ತಿದ್ದಂತೆಯೇ ಎದೆ ಬಿಗಿಯುವುದು, ವಿಪರೀತ ನೆಗಡಿ, ಕೆಮ್ಮು, ಅಸ್ತಮಾ… ಹೀಗೆಲ್ಲಾ ತೊಂದರೆ ಅನುಭವಿಸುವವರ ಸಂಖ್ಯೆ ಅಪಾರ. ಅಲರ್ಜಿ ಪ್ರಮಾಣ ಕಡಿಮೆಯಿದ್ದರೆ ಸ್ವಲ್ಪ ಮನೆಮದ್ದುಗಳೂ ಉಪಶಮನ ನೀಡಬಹುದು. ಹೆಚ್ಚಿದ್ದರೆ ಮಾತ್ರ ಅನಾರೋಗ್ಯದ ಲಕ್ಷಣಗಳು ಆರಂಭವಾಗುವ ಮುನ್ನವೇ ವೈದ್ಯರು ಔಷಧಿಯನ್ನು ಆರಂಭಿಸಲು ಹೇಳುತ್ತಾರೆ. ಇದರಿಂದ ನರಳುವ ಪ್ರಮಾಣವನ್ನು ಗಣನೀಯವಾಗಿ ಕಡಿಮೆ ಮಾಡಬಹುದು.

ಚರ್ಮದ ಮೇಲಿನ ಅಲರ್ಜಿ

ಗುಳ್ಳೆಗಳು: ಚರ್ಮದ ಕೆಲವು ಭಾಗ ಕೆಂಪಾಗಿ, ತುರಿಕೆ, ಉರಿ, ಗುಳ್ಳೆ, ಊತ ಕಾಣಿಸಿಕೊಳ್ಳಬಹುದು.

ಎಕ್ಸೀಮ: ಚರ್ಮದ ಕೆಲವು ಭಾಗದಲ್ಲಿ ಊರಿಯೂತ ಎದ್ದು, ತುರಿಕೆ ಹೆಚ್ಚಾಗಿ ವ್ರಣವಾಗಬಹುದು. ಇದನ್ನು ನಿರ್ಲಕ್ಷಿಸುವಂತಿಲ್ಲ.

ಕಾಂಟ್ಯಾಕ್ಟ್‌ ಡರ್ಮಟೈಟಿಸ್: ಯಾವುದೇ ಅಲರ್ಜನ್‌ ಚರ್ಮಕ್ಕೆ ನೇರವಾಗಿ ತಾಗಿದಾಗ ಆಗುವಂಥ ಪರಿಣಾಮಗಳು. ಉದಾ: ಪ್ರಾಣಿಗಳ ರೋಮ, ಹೂವಿನ ಪರಾಗ, ಯಾವುದಾದರೂ ರಾಸಾಯನಿಕ… ಇಂಥವು.

ಕಣ್ಣುರಿ: ಕಣ್ಣು ಕೆಂಪಾಗಿ, ಉರಿಯಾಗಿ, ಊದಿಕೊಂಡಂತಾಗಿ ನೀರು ಸುರಿಯುವುದು.

ಹೀಗೆಲ್ಲ ಆಗುವುದೇಕೆ?

ಅಲರ್ಜಿ ಆಗುವುದಕ್ಕೆ ಕಾರಣಗಳು ನೂರಾರು. ಒಂದಿಷ್ಟು ಪಟ್ಟಿ ಮಾಡುವುದಾದರೆ…

ಪ್ರಾಣಿಜನ್ಯ: ಜಿರಳೆ, ಸಾಕು ಪ್ರಾಣಿಗಳ ರೋಮ, ಕಣ್ಣಿಗೆ ಕಾಣದಂಥ ಡಸ್ಟ್‌ ಮೈಟ್‌ಗಳು, ಸೊಳ್ಳೆ, ಜೇನ್ನೊಣ ಮುಂತಾದವು.

ಔಷಧ: ಪೆನಿಸಿಲಿನ್‌ ಮತ್ತು ಸಲ್ಫರ್‌ ಹೊಂದಿದ ಔಷಧಗಳ ಬಗ್ಗೆ ಸ್ವಲ್ಪ ಹೆಚ್ಚೇ ಜಾಗ್ರತೆ ಬೇಕು.

ಸಸ್ಯಜನ್ಯ: ಹುಲ್ಲು, ಕಳೆ, ಹೂವಿನ ಪರಾಗ, ತುರುಚೆಯಂಥ ಗಿಡಗಳು

ಇತರ: ತೇವದಿಂದ ಮುಗ್ಗುಲು ಬಂದಿರುವ ಸ್ಥಳಗಳಲ್ಲಿ ಗಾಳಿಯಲ್ಲಿರುವ ಅಲರ್ಜನ್‌ಗಳು, ನಿಕ್ಕಲ್‌ನಂಥ ಲೋಹಗಳು, ಲೇಟೆಕ್ಸ್‌ ವಸ್ತುಗಳು

ಇದನ್ನೂ ಓದಿ: Health Tips: ಪುಪ್ಪುಸ ಕ್ಯಾನ್ಸರ್‌ ಜಾಗೃತಿ ದಿನ: ಹೊಗೆಯೇ ನಮ್ಮ ಆರೋಗ್ಯದ ಹಗೆ!

ಏನು ಮಾಡಬೇಕು?

ಚಿಕಿತ್ಸೆಗಾಗಿ ಮೊದಲಿಗೆ ವೈದ್ಯರು ನೀಡುವುದು ಆಂಟಿಹಿಸ್ಟಮೈನ್‌ಗಳನ್ನು, ಅದರಲ್ಲಿ ಪರಿಣಾಮ ಕಾಣದಿದ್ದರೆ ಸ್ಟಿರಾಯ್ಡ್‌ ನೀಡಬೇಕಾಗಬಹುದು. ಕೆಲವು ಅಲರ್ಜಿಗಳಿಗೆ ದೀರ್ಘ ಕಾಲದ ನಿರೋಧಕ ಚಿಕಿತ್ಸೆಗಳು (ಇಮ್ಯುನೋಥೆರಪಿ) ಪರಿಣಾಮ ಬೀರಬಹುದು. ಇವುಗಳನ್ನು ಪತ್ತೆಗಾಗಿ ನಾನಾ ರೀತಿಯ ಪರೀಕ್ಷೆಗಳು ಲಭ್ಯವಿವೆ. ಚರ್ಮದ ಮೇಲೆ ಚಿಕ್ಕ ಪ್ಯಾಚ್‌ಗಳನ್ನು ಹಾಕಿ ಯಾವುದಕ್ಕೆ ಅಲರ್ಜಿ ಇದೆ ಎಂಬುದನ್ನು ಪತ್ತೆ ಮಾಡುವುದು, ರಕ್ತ ಪರೀಕ್ಷೆ ಇತ್ಯಾದಿಗಳು. ಅಲರ್ಜಿ ಇರುವ ಕೆಲವು ವಸ್ತುಗಳಿಂದ ದೂರವಿರಲೂ ವೈದ್ಯರು ಸೂಚಿಸಬಹುದು.