ಉತ್ತಮ ಆಹಾರ ಸೇವನೆಯಿಂದಲೂ ತಡೆಗಟ್ಟಬಹುದು ಗರ್ಭಕಂಠದ ಕ್ಯಾನ್ಸರ್!

ಬೆಂಗಳೂರು, ಫೆ. 7: ಆರೋಗ್ಯಕರ ಆಹಾರ ಕ್ರಮ ಅನುಸರಿಸುವುದು ಸಹ ಗರ್ಭಕಂಠದ ಕ್ಯಾನ್ಸರ್ (Cervical Cancer)ತಡೆಗಟ್ಟುವಿಕೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ ಎಂದು ಬೆಂಗಳೂರಿನ ವಾಸವಿ ಆಸ್ಪತ್ರೆಯ ಆಹಾರ ತಜ್ಞರಾದ ಡಾ. ಸುನೀತಾ ಎನ್‌ ಹೇಳಿದ್ದಾರೆ.ಬೊಜ್ಜು, ಕಳಪೆ ನೈರ್ಮಲ್ಯ ಮತ್ತು ಅನಾರೋಗ್ಯಕರ ಆಹಾರ ಪದ್ಧತಿಗಳು ವಿಶೇಷವಾಗಿ 30 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಮಹಿಳೆಯರಲ್ಲಿ ಕ್ಯಾನ್ಸರ್ ಅಪಾಯವನ್ನು ಹೆಚ್ಚಿಸುತ್ತವೆ. ಗರ್ಭಕಂಠದ ಕ್ಯಾನ್ಸರ್‌ ತಡೆಗಟ್ಟುವಿಕೆಯಲ್ಲಿ ಮೂತ್ರ ವಿಸರ್ಜನೆಯ ನಂತರ ಜನನಾಂಗದ ಪ್ರದೇಶವನ್ನು ಕೇವಲ ನೀರಿನಿಂದ ತೊಳೆಯುವುದು, ಅತ್ಯಂತ ಕೆಮಿಕಲ್‌ ನಿಂದ ಕೂಡಿದ ಸೋಪುಗಳ ಬಳಕೆ ತಪ್ಪಿಸುವುದು ಮತ್ತು ಒಟ್ಟಾರೆ ನೈರ್ಮಲ್ಯವನ್ನು ಕಾಪಾಡಿಕೊಳ್ಳುವುದು ಪ್ರಮುಖ ಉಪಕ್ರಮ ಗಳಾಗಿವೆ ಎಂದು ತಜ್ಞರು ತಿಳಿಸಿದ್ದಾರೆ.

ಕ್ಯಾನ್ಸರ್ ವಿರುದ್ಧ ಹೋರಾಡಲು ಸಹಾಯ ಮಾಡುವ ಕೆಲವು ನಿರ್ದಿಷ್ಟ ಆಹಾರಗಳ ಬಗ್ಗೆ ತಜ್ಞರು ವಿವರಿಸುತ್ತಾ, ಸ್ಟ್ರಾಬೆರಿ ಮತ್ತು ಬ್ಲೂಬೆರಿಗಳಂತಹ ಹಣ್ಣುಗಳು ಆಂಥೋಸಯಾನಿನ್ ಮತ್ತು ರೆಸ್ವೆರಾಟ್ರೋಲ್‌ನಂತಹ ಉತ್ಕರ್ಷಣ ನಿರೋಧಕಗಳಿಂದ (Antioxidants) ಸಮೃದ್ಧವಾಗಿದ್ದು, ಇವು ಕ್ಯಾನ್ಸರ್ ಕಾರಕ ಕೋಶಗಳನ್ನು ಹೊರಹಾಕಲು ಸಹಾಯ ಮಾಡುತ್ತವೆ. ಬ್ರೊಕೋಲಿ, ಹೂಕೋಸು ಮತ್ತು ಟರ್ನಿಪ್‌ಗಳಂತಹ ಕ್ರೂಸಿಫೆರಸ್ ತರಕಾರಿಗಳು ಇಂಡೋಲ್-3-ಕಾರ್ಬಿನೋಲ್ ಅನ್ನು ಹೊಂದಿರುತ್ತವೆ, ಇದು ಕ್ಯಾನ್ಸರ್ ವಿರುದ್ಧ ರಕ್ಷಣೆ ನೀಡುತ್ತದೆ.

ಹುರುಳಿಕಾಯಿ ಮತ್ತು ಕಡಲೆಕಾಳಿನಂತಹ ದ್ವಿದಳ ಧಾನ್ಯಗಳ ಜೊತೆಗೆ ಮಿತವಾಗಿ ವಾಲ್‌ನಟ್ ಮತ್ತು ಬಾದಾಮಿಯನ್ನು ಸೇವಿಸುವುದರಿಂದ ಫೈಬರ್ ಮತ್ತು ಒಮೆಗಾ-3 ಅಂಶಗಳು ಹೆಚ್ಚುತ್ತವೆ, ಇದು ದೇಹದ ರಕ್ಷಣಾ ವ್ಯವಸ್ಥೆ ಅಥವಾ ರೋಗನಿರೋಧಕ ಶಕ್ತಿಯನ್ನು ಬಲಪಡಿಸುತ್ತದೆ ಎಂದು ಡಾ. ಸುನಿತಾ ಹೇಳಿದ್ದಾರೆ.

ಮನಸ್ಸೆಂಬ ಯಂತ್ರವನ್ನು ಸುಸ್ಥಿತಿಯಲ್ಲಿಯಿರಿಸಿಕೊಳ್ಳಿ

ಆಹಾರದ ಪ್ರಮಾಣವನ್ನು ನಿಯಂತ್ರಿಸುವುದರ ಜೊತೆಗೆ ಎಣ್ಣೆಯುಕ್ತ, ಅಧಿಕ ಕ್ಯಾಲೋರಿ ಆಹಾರ ಗಳನ್ನು ತಪ್ಪಿಸುವುದು ಮುಖ್ಯ. ಅತಿಯಾದ ದೇಹದ ತೂಕವು ಉರಿಯೂತಕ್ಕೆ (Inflammation) ಕಾರಣವಾಗುತ್ತದೆ, ಇದು ಕ್ಯಾನ್ಸರ್ ಅಪಾಯವನ್ನು ಹೆಚ್ಚಿಸುತ್ತದೆ. ಹೀಗಾಗಿ ಸಾದಾರಣ ತೂಕವನ್ನು ಕಾಪಾಡಿಕೊಳ್ಳುವುದು ಮತ್ತು ಹೆಚ್ಚು ಕೊಬ್ಬಿನಂಶವಿರುವ, ಕರಿದ ಅಥವಾ ಸಂಸ್ಕರಿಸಿದ ಆಹಾರಗಳನ್ನು ಮಿತಿಗೊಳಿಸುವುದು ಅತ್ಯಗತ್ಯ.

ಹಸಿ ಬೆಳ್ಳುಳ್ಳಿ, ಧಾನ್ಯಗಳು ಮತ್ತು ಡಾರ್ಕ್ ಚಾಕೊಲೇಟ್ ಸೇರಿದಂತೆ ಇತರ ಶಿಫಾರಸು ಮಾಡಲಾದ ಆಹಾರಗಳಾಗಿದ್ದು, ಇವು ಉತ್ಕರ್ಷಣ ನಿರೋಧಕಗಳು, ಫೈಬರ್ ಮತ್ತು ಕ್ಯಾನ್ಸರ್ ವಿರೋಧಿ ಸಂಯುಕ್ತಗಳನ್ನು ನೀಡುತ್ತವೆ. ಬೆಳ್ಳುಳ್ಳಿಯನ್ನು ಜಜ್ಜಿದ ನಂತರ ಅದನ್ನು ಬಳಸುವ ಮೊದಲು 10 ನಿಮಿಷಗಳ ಕಾಲ ಹಾಗೆಯೇ ಬಿಡಿ, ಇದು ಅಲಿಸಿನ್ (Allicin) ಉತ್ಪತ್ತಿಯಾಗಲು ಅನುವು ಮಾಡಿ ಕೊಡುತ್ತದೆ. ಇದರಿಂದ ಬ್ಯಾಕ್ಟೀರಿಯಾ ವಿರೋಧಿ ಮತ್ತು ಶಿಲೀಂಧ್ರ ವಿರೋಧಿ ಗುಣಲಕ್ಷಣಗಳು ಹೆಚ್ಚಾಗುತ್ತವೆ ಎಂದು ಆಹಾರ ತಜ್ಞೆ ಡಾ. ಸುನಿತಾ ಹೇಳಿದ್ದಾರೆ.

ನಿಯಮಿತ ಆರೋಗ್ಯ ತಪಾಸಣೆ ಮತ್ತು ಸರಿಯಾದ ಆಹಾರ ಸೇವನೆಯ ಮೂಲಕ ಕ್ಯಾನ್ಸರ್ ತಡೆಗಟ್ಟುವಿಕೆಗೆ ಸಾಧ್ಯವಿದೆ. ಸಮತೋಲಿತ ಪೋಷಣೆಯು ಕರುಳಿನ ಆರೋಗ್ಯವನ್ನು ಬೆಂಬಲಿ ಸುತ್ತದೆ, ಕೊಲೆಸ್ಟ್ರಾಲ್ ಅನ್ನು ಕಡಿಮೆ ಮಾಡುತ್ತದೆ ಮತ್ತು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ, ಇವೆಲ್ಲವೂ ಗರ್ಭಕಂಠದ ಮತ್ತು ಇತರ ಕ್ಯಾನ್ಸರ್‌ಗಳ ಅಪಾಯವನ್ನು ಕಡಿಮೆ ಮಾಡುತ್ತದೆ. ನೈರ್ಮಲ್ಯ, ಉತ್ತಮ ಜೀವನಶೈಲಿಯೊಂದಿಗೆ ಆರೋಗ್ಯಕರ ಆಹಾರ ಪದ್ಧತಿ ಸಂಯೋಜನೆಯು ಮಹಿಳೆಯರಲ್ಲಿ ಗರ್ಭಕಂಠದ ಕ್ಯಾನ್ಸರ್ ಮತ್ತು ಅದರ ಸಂಬಂಧಿತ ಆರೋಗ್ಯ ಸಮಸ್ಯೆಗಳ ಅಪಾಯವನ್ನು ಗಣನೀಯವಾಗಿ ಕಡಿಮೆ ಮಾಡುತ್ತದೆ ಎಂದು ತಜ್ಞರು ತಿಳಿಸಿದ್ದಾರೆ.