Health Tips: ಪ್ರೇಮಿಗಳ ದಿನಕ್ಕೆ ಮಾತ್ರವಲ್ಲ, ವರ್ಷವಿಡೀ ಇರಲಿ ಕೆಂಪು ಬಣ್ಣದ ಆಹಾರಗಳು!

ಬೆಂಗಳೂರು: ಲೋಕವೆಲ್ಲ ಕೆಂಪಾಗುವ ದಿನವಿದು. ಅರೆ! ಬೇಸಿಗೆಯಿನ್ನೂ ಬಂದಿಲ್ಲ, ಆಗಲೇ ಎಲ್ಲಾ ಒಣಗಿ ಕೆಂಪಾಯಿತೇ ಎಂದು ಈ ದಿನ ಯಾರೂ ಯೋಚಿಸುವುದಿಲ್ಲ. ಎಲ್ಲರಿಗೂ ಪ್ರೇಮಿಗಳ ದಿನದಂದು ಕಾಣುವ ಕೆಂಪು ಹೊಸದೇನಲ್ಲ. ಗುಲಾಬಿಯಿಂದ ಹಿಡಿದು, ಟೆಡ್ಡಿಬೇರ್‌, ಕೇಕ್‌, ಉಡು ಗೊರೆ, ಕೆನ್ನೆಯವರೆಗೆ ಎಲ್ಲವೂ ಕೆಂಪೇ. ಹೀಗಿರುವಾಗ ನಾವು ತಿನ್ನುವ ಆಹಾರವೂ ಕೆಂಪಾಗಿದ್ದಿದ್ದನ್ನೇ ಆಯ್ಕೆ ಮಾಡಬಹುದೇ? ಅಂದರೆ ಕೆಂಪು ಕ್ಯಾಂಡಿ, ವೆಲ್ವೆಟ್‌ ಕೇಕ್‌ನಂಥವಲ್ಲ, ನೈಸರ್ಗಿಕವಾಗಿ ಕೆಂಪಾಗಿರುವ ಆರೋಗ್ಯಕರ ಆಹಾರಗಳನ್ನು ತಿನ್ನಬಹುದೇ? ಹಾಗಾದರೆ ವರ್ಷವಿಡೀ ಆರೋಗ್ಯದಿಂದ ಕೆಂಪಾಗಿ ನಳನಳಿಸುತ್ತಿರಬಹುದಲ್ಲವೇ? ಕೆಂಪು ಬಣ್ಣದ ಆಹಾರಗಳಲ್ಲಿ ಇರಬಹುದಾದ ಸತ್ವಗಳು ಯಾವುವು?(Health Tips)

ಇಷ್ಟಕ್ಕೂ ಬಣ್ಣಕ್ಕೇಕೆ ಅಷ್ಟು ಪ್ರಾಮುಖ್ಯತೆ ನೀಡಬೇಕು? ಎಲ್ಲ ತರಕಾರಿ-ಹಣ್ಣುಗಳೂ ಒಂದಿಲ್ಲೊಂದು ಬಣ್ಣದಲ್ಲಿ ಇರಲೇಬೇಕಲ್ಲವೇ? ಯಾವುದಾದ ರೊಂದು ಬಣ್ಣ ಇವುಗಳಿಗೆ ಇರಲೇಬೇಕೆಂಬುದು ನಿಜವಾದರೂ, ಕೆಂಬ ಣ್ಣದ ಹಣ್ಣು-ತರಕಾರಿಗಳಲ್ಲಿ ಇರುವ ಲೈಕೋಪೇನ್‌, ಆಂಥೋ ಸಯನ್ ನಿನ್ ಮತ್ತು ಬೆಟಲೈನ್‌ಗಳು ನಮ್ಮ ಆರೋಗ್ಯ ರಕ್ಷಣೆಯಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತವೆ. ಬಣ್ಣ ಗಾಢವಾಗಿ ಇದ್ದಷ್ಟೂ ಅವುಗಳಲ್ಲಿನ ಸತ್ವಗಳ ಸಾಂದ್ರತೆ ಹೆಚ್ಚಿರುವುದಕ್ಕೆ ಸಾಧ್ಯ. ಯಾವ ಆಹಾರಗಳವು ಎಂಬುದನ್ನು ನೋಡೋಣ.

ಯಾವ ಆಹಾರಗಳು?

ಟೊಮೇಟೊ, ಸ್ಟ್ರಾಬೆರಿ, ಚೆರ್ರಿ, ಕೆಂಪು ಕ್ಯಾಪ್ಸಿಕಂ, ಕಲ್ಲಂಗಡಿ, ಕೋಕಂ, ದಾಳಿಂಬೆ, ಕೆಂಪು ಸೇಬುಗಳು, ಕ್ರೇನ್‌ಬೆರಿ… ಇಂಥ ಯಾವುದೇ ಕೆಂಬಣ್ಣದ ಹಣ್ಣು, ತರಕಾರಿಗಳು ಬಳಕೆಗೆ ಒಳ್ಳೆಯವು. ಇವುಗಳನ್ನು ತರಹೇವಾರಿ ಅಡುಗೆಗಳಲ್ಲಿ- ಸಲಾಡ್‌, ಸೂಪ್‌, ಸ್ಮೂದಿ, ಹಣ್ಣಿನ ಚಾಟ್‌ಗಳು, ಜ್ಯೂಸ್‌ಗಳು, ಟ್ರೇಲ್‌ ಮಿಕ್ಸ್‌ಗಳು, ಹಾಗೆಯೇ ಬಾಯಾಡಲು, ಮಕ್ಕಳಿಗೆ ಸ್ಟ್ರಿಂಗ್‌ ರೋಲ್‌ಗಳು, ಸ್ಯಾಂಡ್‌ವಿಚ್‌ ಫಿಲ್ಲಿಂಗ್‌ಗಳು … ಹೀಗೆ ಯಾವುದೇ ರೀತಿಯಲ್ಲಿ ಸೇವಿಸಬಹುದು.

ಏನು ಸತ್ವಗಳು?

ವಿಟಮಿನ್‌ ಕೆ, ಎ, ಸಿ, ನಾರು, ಪೊಟಾಶಿಯಂ, ಕ್ಯಾಲ್ಶಿಯಂನಂಥ ಹಲವಾರು ಖನಿಜಗಳು, ಲೈಕೋಪೇನ್‌ ಮತ್ತು ಆಂಥೋ ಸಯನಿನ್‌ಗಳಂಥ ತರಹೇವಾರಿ ಉತ್ಕರ್ಷಣ ನಿರೋಧಕಗಳು ಈ ಕೆಂಬಣ್ಣದ ಅಹಾರಗಳಲ್ಲಿ ಪ್ರಧಾನವಾಗಿವೆ.

ಏನು ಉಪಯೋಗ?

ಹೃದಯದ ಆರೋಗ್ಯಕ್ಕೆ ಉತ್ತಮ: ಟೊಮೇಟೊದಂಥ ಕೆಂಪು ತರಕಾರಿಗಳಲ್ಲಿರುವ ಲೈಕೋಪೇನ್‌ ಅಂಶಗಳು ಹೃದಯದ ಆರೋಗ್ಯಕ್ಕೆ ಅತ್ಯಂತ ಉಪಕಾರಿ ಯಾದವು. ರಕ್ತದೊತ್ತಡವನ್ನು ನಿಯಂತ್ರಿಸಿ, ಹೃದಯಕ್ಕೆ ಬೀಳಬಹುದಾದ ಬರೆಯನ್ನು ತಪ್ಪಿಸುವಲ್ಲಿ ಇವು ಅಗತ್ಯ. ಕಲ್ಲಂಗಡಿಯಲ್ಲಿರುವ ಪೊಟಾ ಶಿಯಂ ಅಂಶವೂ ರಕ್ತದೊತ್ತಡ ನಿಯಂತ್ರಣದಲ್ಲಿ ಗಮನಾರ್ಹ ಕೆಲಸವನ್ನು ಮಾಡುತ್ತದೆ.

ಪ್ರತಿರೋಧಕತೆ ಹೆಚ್ಚು: ವಿಟಮಿನ್‌ ಸಿ ಹೆಚ್ಚಿರುವ ಆಹಾರಗಳಿಂದ ದೇಹದ ಪ್ರತಿರೋಧಕ ಶಕ್ತಿ ಪ್ರಬಲವಾಗುತ್ತದೆ. ಇದರಿಂದ ಋತುಮಾನ ಬದಲಾಗುವ ದಿನಗಳಲ್ಲಿ, ವಾತಾವರಣದ ಏರುಪೇರಿನ ಸಂದರ್ಭಗಳಲ್ಲಿ ಸಾಮಾನ್ಯವಾಗಿ ಕಾಡುವ ಸೋಂಕುಗಳ ಬಾಧೆಯನ್ನು ಹತ್ತಿಕ್ಕಲು ಸುಲಭ ಸಾಧ್ಯವಾಗುತ್ತದೆ.

ಉರಿಯೂತ ಶಮನ: ಉತ್ಕರ್ಷಣ ನಿರೋಧಕಗಳು ಆಹಾರದಲ್ಲಿ ಹೆಚ್ಚೆಚ್ಚು ಇದ್ದಷ್ಟೂ, ದೇಹದಲ್ಲಿ ಉರಿಯೂತಗಳನ್ನು ಶಮನ ಮಾಡುವಲ್ಲಿ ಸಹಕಾರಿಯಾಗುತ್ತದೆ. ಆರ್ಥರೈಟಿಸ್‌ನಂಥ ಉರಿಯೂತ ಸಂಬಂಧಿ ತೊಂದರೆಗಳಿದ್ದಲ್ಲಿ, ಯಾವುದೇ ಉತ್ಕರ್ಷಣ ನಿರೋಧಕಗಳು ಪ್ರಯೋಜನಕಾರಿ. ಹಣ್ಣು-ತರಕಾರಿಗಳ ಬಣ್ಣ ಗಾಢವಾದಷ್ಟೂ ಈ ಸತ್ವಗಳ ಸಾಂದ್ರತೆ ಹೆಚ್ಚು.

ಜೀರ್ಣಕಾರಿ: ಚೆರ್ರಿ, ರಾಸ್ಪ್‌ಬೆರಿಯಂಥ ಕೆಂಪು ಹಣ್ಣುಗಳಲ್ಲಿ ನಾರು ಹೇರಳವಾಗಿದೆ. ಇದು ಜೀರ್ಣಾಂಗಗಳ ಕಾರ್ಯಕ್ಷಮತೆಯನ್ನು ವೃದ್ಧಿಸುವಂಥದ್ದು. ನಾರು ಸಾಕಷ್ಟಿದ್ದರೆ, ಕರುಳಿನ ಬ್ಯಾಕ್ಟೀರಿಯಗಳ ಸಮತೋಲನವನ್ನು ಕಾಯ್ದುಕೊಳ್ಳುವುದು ಕಷ್ಟವಲ್ಲ. ಜೊತೆಗೆ, ಮಲಬದ್ಧತೆಯೂ ದೂರವಾಗಿ ಹೊಟ್ಟೆ ಸ್ವಚ್ಛವಾಗುತ್ತದೆ.

ಕ್ಯಾನ್ಸರ್‌ ದೂರ: ಇದರಲ್ಲಿರುವ ಹಲವು ರೀತಿಯ ಉತ್ಕರ್ಷಣ ನಿರೋಧಕಗಳು ಕ್ಯಾನ್ಸರ್‌ನಂಥ ಮಾರಕ ರೋಗಗಳ ತಡೆಗೆ ನೆರವು ನೀಡುತ್ತವೆ. ದೇಹದಲ್ಲಿರುವ ಮುಕ್ತ ಕಣಗಳನ್ನು ನಿರ್ಬಂಧಿಸಿ, ರೋಗವನ್ನು ಹತೋಟಿಗೆ ತರುವಲ್ಲಿಯೂ ಅಗತ್ಯ ನೆರವನ್ನು ನೀಡುತ್ತವೆ. ಸ್ತನ ಮತ್ತು ಪ್ರೊಸ್ಟೇಟ್‌ ಕ್ಯಾನ್ಸರ್‌ಗಳ ಭೀತಿಯನ್ನು ಕಡಿಮೆ ಮಾಡುವಲ್ಲಿ ಈ ಉತ್ಕರ್ಷಣ ನಿರೋಧಕಗಳು ಗಣನೀಯ ಕೆಲಸ ಮಾಡುತ್ತವೆ

ಇದನ್ನು ಓದಿ: Wipro GE Healthcare: ವಿಪ್ರೋ ಹೆಲ್ತ್ ಕೇರ್‌ನಿಂದ ರಾಜ್ಯದಲ್ಲಿ 8,000 ಕೋಟಿ ರೂ. ಹೂಡಿಕೆ

ಹೆಚ್ಚಿನ ಲಾಭ: ಇವುಗಳಲ್ಲಿರುವ ವಿಟಮಿನ್‌ ಸಿ ಅಂಶಗಳಿಂದ ಚರ್ಮದ ಕೊಲಾಜಿನ್‌ ಉತ್ಪಾದನೆಗೆ ಸಹಾಯ ದೊರೆಯುತ್ತದೆ. ಇದರಿಂದ ಸುಕ್ಕಿಲ್ಲದಂಥ, ನಯವಾದ ಚರ್ಮವನ್ನು ಹೊಂದಲು ಸಾಧ್ಯ. ಈ ಉತ್ಕರ್ಷಣ ನಿರೋಧಕಗಳಿಂದ ದೃಷ್ಟಿಯ ರಕ್ಷಣೆಗೆ ಪೂರಕವಾದ ಅಂಶಗಳು ದೊರೆಯುತ್ತವೆ. ಅದರಲ್ಲೂ ವಯಸ್ಸಾದಂತೆ ದೃಷ್ಟಿ ಮಂದವಾಗುವುದನ್ನು ಮುಂದೂಡುವಲ್ಲಿ ಇವೆಲ್ಲ ಮಹತ್ವದ ಪೋಷಕಾಂಶಗಳು.