Donald Trump: ಅಮೇರಿಕಾದ ಅಧ್ಯಕ್ಷರ ಸಾಂವಿಧಾನಿಕದತ್ತವಲ್ಲದ ಹಕ್ಕು : ಕಾರ್ಯನಿರ್ವಹಣಾ ಆದೇಶ ಭಾರತಕ್ಕೆ ಟ್ರಂಪ್ ತಂದಿಟ್ಟ ತಲೆನೋವು

ನಾರಾಯಣ ಯಾಜಿ

ಡೊನಾಲ್ಡ್‌ ಟ್ರಂಪ್ ಅವರು ಅಮೇರಿಕಾದ ಅಧ್ಯಕ್ಷರಾದ ತಕ್ಷಣವೇ ಹೊರಡಿಸಿದ ಸುಮಾರು 80 ಕಾರ್ಯನಿರ್ವಹಣಾ ಆದೇಶಗಳು (Executive order) ಜಗತ್ತಿನ ಅನೇಕ ರಾಷ್ಟ್ರಗಳ ನಿದ್ದೆಯನ್ನು ಕೆಡಿಸಿವೆ. ಇಂದು ಅಮೇರಿಕಾದಲ್ಲಿ ಜ್ವರ ಬಂದರೆ ಭಾರತದಲ್ಲಿ ನೆಗಡಿಯಾಗುವಷ್ಟರ ಮಟ್ಟಿಗೆ ನಮ್ಮ ದೇಶದ ಜನರ ಪರಿಸ್ಥಿತಿ ಇದೆ. ಇದಕ್ಕೆ ಕಾರಣ ಅಲ್ಲಿನ ಅಧ್ಯಕ್ಷರು ಹೊರಡಿಸಿದ ಜನ್ಮಾಧರಿತ ನಾಗರಿಕತೆ ಅಥವಾ (Citizenship by birth). ಈ ಕುರಿತು ತಿಳಿಯಬೇಕಾದರೆ ಮೊದಲು “ಕಾರ್ಯನಿರ್ವಹಣಾ ಆದೇಶ” ಹಾಗೂ ಅದರ ಕಾರ್ಯವ್ಯಾಪ್ತಿಯನ್ನು ಮೊದಲು ಗಮನಿಸೋಣ.

ಕಾರ್ಯನಿರ್ವಹಣಾ ಆದೇಶ (executive order) ಹೊರಡಿಸಲು ಅಮೇರಿಕಾದ ಕಾಂಗ್ರೆಸ್‌ನ ಅನುಮೋದನೆಯ ಅಗತ್ಯವಿರುವುದಿಲ್ಲ. ಫೆಡರಲ್ ಸರ್ಕಾರದ
ಕಾರ್ಯಾಚರಣೆಗಳನ್ನು ನಿರ್ವಹಿಸಲು, ಅಸ್ತಿತ್ವದಲ್ಲಿರುವ ಕಾನೂನುಗಳನ್ನು ಜಾರಿಗೊಳಿಸಲುಅಥವಾ ಅವರ ಚಟುವಟಿಕೆಗಳಲ್ಲಿ ನಿರ್ದಿಷ್ಟ ಸರ್ಕಾರಿ ಏಜೆನ್ಸಿಗಳಿಗೆ  ನಿರ್ದೇಶಿಸಲು ಕಾರ್ಯನಿರ್ವಾಹಕ ಆದೇಶಗಳನ್ನು ನೀಡುವ ಅಧಿಕಾರವನ್ನು ಅಧ್ಯಕ್ಷರು ಹೊಂದಿದ್ದಾರೆ. ಮುಖ್ಯವಾದ ವಿಷಯವೆಂದರೆ ಈ ಆದೇಶವು ಭಾರತ ಸರಕಾರ ಹೊರಡಿಸುವ ಸುಗ್ರೀವಾಜ್ಞೆಯ ರೀತಿಯದಲ್ಲ.  ಸುಗ್ರೀವಾಜ್ಞೆಯನ್ನು ಹೊರಡಿಸಿದ ಆರುತಿಂಗಳ ಒಳಗೆ ಅದನ್ನು ಸಂಸತ್ತು ಅನುಮೋದಿಸಬೇಕಾಗುತ್ತದೆ.  ಶಾಸನವನ್ನು ಜಾರಿಗೊಳಿಸುವ ಅಧಿಕಾರವಿರುವುದು ಸಂಸತ್ತಿಗೆ. ಅಧ್ಯಕ್ಷರಿಗೆ ನೇರವಾಗಿ ಆ ಅಧಿಕಾರವಿರುವುದಿಲ್ಲ. ಸಂಸತ್ತಿನ ಶಿಫಾರಸ್ಸನ್ನು ಅಧ್ಯಕ್ಷರು ಒಪ್ಪಬಹುದು ಇಲ್ಲವೇ ತಮಗಿರುವ ವಿವೇಚನೆಯನ್ನು ಬಳಸಿ ಪುನಃ  ಹಿಂದುರಿಗಿಸಬಹುದು ಅಥವಾ ಅಧ್ಯಕ್ಷರಿಗಿರುವ ಪರಮಾಧಿಕಾರವಾದ “ವಿಟೋ” ದ ಮೂಲಕ ತಿರಸ್ಕರಿಸಬಹುದು.  ಕಾರ್ಯನಿರ್ವಹಣಾ ಆದೇಶ ಹಾಗಲ್ಲ; ಅಧ್ಯಕ್ಷ ತನಗನಿಸಿದ್ದನ್ನು ಮಾಡಲು ಇರುವ ಮಹತ್ವದ ಉಪಕರಣ ಇದು. ಇದುತನಕ ಅಮೇರಿಕಾದ ಅಧ್ಯಕ್ಷರುಗಳನೇಕರು ಕಾರ್ಯನಿರ್ವಹಣಾ ಅದೇಶದ ಮೂಲಕವೇ ಅನೇಕ ಮಹತ್ವದ ಆಡಳಿತದ ಸುಧಾರಣೆಯನ್ನು ಜಾರಿಗೆ ತಂದಿದ್ದಾರೆ.

ಅದರಲ್ಲಿ ಮಹತ್ವದ್ದೆಂದರೆ ಅಬ್ರಹಾಂ ಲಿಂಕನ್  ಜನವರಿ 1, 1863 ರಂದು ಜಾರಿಗೆ ತಂದ ಗುಲಾಮಗಿರಿಯ ವಿಮೋಚನಾ ಆದೇಶ (Emancipation Proclamation) ಅತ್ಯಂತ ಮಹತ್ವದ್ದು. ಅದೇರೀತಿ ಹ್ಯಾರಿ ಎಸ್. ಟ್ರೂಮನ್ 1948 ರಲ್ಲಿ  ಅಮೇರಿಕಾದ ಸೇನೆಯಲ್ಲಿದ್ದ ವರ್ಣ, ಲಿಂಗ,  ಜನಾಂಗಿಯ ಬೇಧಗಳನ್ನು ನೀಷೇಸಿದ್ದರು. ಲಿಂಡನ್ ಜಾನ್ಸನ್ ಅವರು 1965 ರಲ್ಲಿ ಹೊರಡಿಸಿದ ಆದೇಶ ಫೆಡರಲ್ ಗುತ್ತಿಗೆದಾರರನ್ನು ವರ್ಣಬೇಧ, ಲಿಂಗ, ರಾಷ್ಟ್ರೀಯತೆಯ ಆಧಾರದಮೇಲೆ ಬೇಧಮಾಡುವುದನ್ನು ನಿಷೇಧಿಸಿ ಎಲ್ಲರಿಗೂ ಸಮಾನ ಉದ್ಯೋಗವಕಾಶವನ್ನು ಒದಗಿಸುವ ನಿಟ್ಟಿನಲ್ಲಿ ಖಚಿತವಾದ ಕ್ರಮವನ್ನು ತೆಗೆದುಕೊಳ್ಳುವ ಅಧಿಕಾರವನ್ನು ನೀಡಿತು.

ಅಮೇರಿಕಾದ ಅಧ್ಯಕ್ಷರುಗಳ ಪೈಕಿ ಅತೀ ಹೆಚ್ಚು ಕಾರ್ಯನಿರ್ವಹಣಾ ಆದೇಶವನ್ನು ಹೊರಡಿಸಿದವರು ಫ್ರಾಂಕ್ಲಿನ್ ಡಿ ರೂಸ್ ವೆಲ್ಟ್. ಅವರು ತಮ್ಮ ಅಧಿಕಾರಾವಧಿಯಲ್ಲಿ ಒಟ್ಟೂ 3,721  ಆದೇಶವನ್ನು ಹೊರಡಿಸಿದ್ದರು. ಆದರೆ 1853 ರಿಂದ 1857 ವರೆಗೆ ಆಳಿದ Franklin Pierce ಅವರು  ಕೇವಲ ಮೂರು  ಆದೇಶವನ್ನು ಹೊರಡಿಸಿದ್ದಾರೆ. ಇಲ್ಲಿಯವರೆಗೆ ಹೊರಡಿಸಿದ ಹೆಚ್ಚಿನ Executive ಆದೇಶಗಳು ಜನಪರವಾಗಿದ್ದು ಅವುಗಳ ವಿಷಯದಲ್ಲಿ ವಿವಾದಕ್ಕೆ ಆಸ್ಪದ ಕಡಿಮೆಯಾಗಿತ್ತು. ಆದರೆ ಟ್ರಂಪ್ ಎರಡನೆಯ ಸಲ ಅಧಿಕಾರ ಸ್ವೀಕರಿಸಿದ ದಿನಗಳಿಂದಲೇ ತಮ್ಮ ಮುಂದಿನ ಗುರಿಯೇನು ಎನ್ನುವದನ್ನು ಸ್ಪಷ್ಟಪಡಿಸುವತ್ತ ಮುನ್ನಡೆದಿದ್ದಾರೆ. ಯಾರು ಏನಾದರೂ ಹೇಳಲಿ, ’ಅಮೇರಿಕಾ ಮೊದಲು’ ಎನ್ನುವ ಅವರ ನಿಲುವಿನಲ್ಲಿ ಯಾವ ರಾಜಿಯೂ ಇಲ್ಲ. ಅವರೋರ್ವ ಚತುರ ವ್ಯಾಪಾರಿಯೂ ಆಗಿರುವುದರಿಂದ   ತಮ್ಮ ದೇಶಕ್ಕೆ ಅನುಕೂಲವಾಗುವಾಗ ಕೆಲ ರಾಜಿಗಳಿಗೂ ಸಿದ್ಧರಾಗುತ್ತಾರೆ ಎನ್ನುವುದನು  ಅವರ ಮೊದಲ ಅವಧಿಯಲ್ಲಿ ಗಮನಿಸಿದ್ದೇವೆ.

ಟ್ರಂಪ್ ತಮ್ಮ ಇದುವರಿಗಿನ ಅಧಿಕಾರಾವಧಿಯಲ್ಲಿ ಮೊದಲ ಸಲ 220 ಮತ್ತು ಈಗಿನ  80 ಸೇರಿ ಒಟ್ಟೂ 300 ಆದೇಶಗಳನ್ನು ಹೊರಡಿಸಿದ್ದಾರೆ. ಇದೀಗ ಅವರು ಹೊರಡಿಸಿದ ಆದೇಶಗಳ ಪೈಕಿ ಮುಖ್ಯವಾದ ಅದರಲ್ಲಿಯೂ ಭಾರತೀಯರನ್ನು ಕಾಡುತ್ತಿರುವ “ಜನ್ಮಾಧರಿತ  ನಾಗರಿಕತೆ” ಯ ಆದೇಶದ ಕುರಿತು ವಿವೇಚಿಸುವುದಾದರೆ ಇದುತನಕ ಅಮೇರಿಕಾದಲ್ಲಿ ಜನಿಸಿದ ಎನ್ನುವ ಕಾರಣಕ್ಕೆ  ಅಲ್ಲಿನ ನಾಗರಿಕರರಾಗಿಬಿಡುಡುತ್ತಿದ್ದರು. ವಿವೇಕ ರಾಮಸ್ವಾಮಿಯವರಂತೆ  ನಂತರದ ದಿನಗಳಲ್ಲಿ ಅಂಥವರು ಅಮೇರಿಕಾದ ಅಧ್ಯಕ್ಷತೆಗೂ ಸ್ಪರ್ಧಿಸಬಹುದು. ಹಾಗೇ ನೋಡಿದರೆ ಅಮೇರಿಕಾ ದೇಶವೇ ವಲಸಿಗರ ನಾಡು. ಮೂಲ ನಿವಾಸಿಗಳು (Native American)  ಅಲ್ಲಿ ನಿರ್ಲಕ್ಷಿತರಾಗಿದ್ದಾರೆ. ಇದೊಂಥರಾ ಬಸ್ಸಿನಲ್ಲಿ ನುಗ್ಗಿ ಸಿಕ್ಕಿದ ಸೀಟುಗಳಲ್ಲಿ ತಮ್ಮವರನ್ನು ಕುಳ್ಳಿರಿಸಿ ನಂತರ ಜಾಗವಿದ್ದರೂ ಕೆಳಗಿದ್ದವರಿಗೆ ಆಸನವಿಲ್ಲವೆಂದು  ಅವರನ್ನು ಬಿಟ್ಟು ಬಸ್ಸನ್ನು ಬಿಡಲು ಒತ್ತಾಯಿಸುವಂತೆ.  ಅಲ್ಲಿ ಈ ಜನ್ಮಾಧರಿತ ನಾಗರಿಕತೆ ಬಂದಿರುವುದು 1868ರಲ್ಲಿ ಅಲ್ಲಿನ ಸಂವಿಧಾನಕ್ಕೆ ತಂದ 14 ತಿದ್ದುಪಡೀಯ ಮೂಲಕ. ಅದರ ಪ್ರಕಾರ "All persons born or naturalized in the United States, and subject to the jurisdiction thereof, are citizens of the United States and of the state wherein they reside."  ಎಂದಿದೆ. ನೆನಪಿಡಿ ಅಮೇರಿಕಾದ ಸಂವಿಧಾನಕ್ಕೆ 249 ವರ್ಷಗಳ ಇತಿಹಾಸವಿದೆ. ಇಲ್ಲಿನತನಕ ಅದರ ಒಟ್ಟೂ ತಿದ್ದುಪಡಿಗಳ ಸಂಖ್ಯೆ 27. ಭಾರತದ ಸಂವಿಧಾನದ ಈ 75 ವರ್ಷಗಳಲ್ಲಿ 106 ಸಲ ತಿದ್ದುಪಡಿಗಳಾಗಿವೆ. ಅಮೇರಿಕಾದಲ್ಲಿ ಸಂವಿಧಾನದ ತಿದ್ದುಪಡಿ ಅಷ್ಟು ಸುಲಭವಲ್ಲ.  ಈಚಿನ ವರ್ಷಗಳಲ್ಲಿ ಅಧ್ಯಕ್ಷರಿಗಿರುವ ಈ ಅಧಿಕಾರದ ಮೇಲೆ ವ್ಯಾಪಕವಾದ ಚರ್ಚೆಯಾಗುತ್ತಿದೆ. ಅದಕ್ಕೆ ಕಾರಣ:-

1.  ಅಮೇರಿಕಾದ ಸಂವಿಧಾನದಲ್ಲಿ ಎಲ್ಲಿಯೂ  ಅಧ್ಯಕ್ಷರಿಗೆ ಸಂವಿಧಾನಾತ್ಮಕವಾಗಿ Executive order ಹೊರಡಿಸುವ ಅಧಿಕಾರವನ್ನು ನೀಡಿಲ್ಲ. ಆದರೆ ನಡಾವಳಿಕೆಯಂತೆ ಈ ಅಧಿಕಾರ ಅಧ್ಯಕ್ಷರ ಹುದ್ದೆಗೆ ಅಂತರ್ಗತವಾಗಿರುವ ಹಕ್ಕು ಎಂದೇ ಸ್ವೀಕೃತವಾಗಿದೆ.

2.  ಅಧ್ಯಕ್ಷರ ವಿವೇಚನೆ: ಅಧಿಕಾರಪತ್ರಗಳು ಸಂವಿಧಾನಿಕ ಅಥವಾ ವರ್ಗಾಯಿಸಿದ ಅಧಿಕಾರಗಳ ಆಧಾರದಲ್ಲಿ ಹೊರಡಿಸಬೇಕಾದರೂ, ಅಧ್ಯಕ್ಷರಿಗೆ ಈ ಆದೇಶಗಳನ್ನು ನೀಡಲು ತುಂಬಾ ಸ್ವತಂತ್ರತೆಯಿದೆ. ಇದು ಕಾಂಗ್ರೆಸ್ಸಿನ ಅನುಮೋದನೆ ಅವಶ್ಯಕವಿಲ್ಲದೆ ಬಹುಮತದಲ್ಲಿ ಕಾರ್ಯಗಳನ್ನು ರೂಪಿಸಲು ಸಾಧ್ಯವಾಗಿಸುತ್ತದೆ. ಇದರಿಂದ  ಅಧ್ಯಕ್ಷರ ಮೇಲಿರುವ Checks and Balances ವ್ಯವಸ್ಥೆಯನ್ನು bypass ಮಾಡಬಹುದು

ಕಾನೂನಿ ಬಲವಿದೆ, ಆದರೆ ಶಾಶ್ವತವಲ್ಲ: ಅಧಿಕಾರಪತ್ರಗಳು ಕಾನೂನಿನ ಬಲವನ್ನು  ಹೊಂದಿದ್ದು, ವೈಶಿಷ್ಟ್ಯಪೂರ್ಣ ನೀತಿಗಳನ್ನು ಅನುಷ್ಠಾನಗೊಳಿಸಬಹುದು. ಆದರೆ ಇವು ಶಾಶ್ವತವಲ್ಲ. ಕಾಂಗ್ರೆಸ್ಸು ಇದನ್ನು ಭಾಗಶಃ ಅಥವಾ ಪೂರ್ಣಪ್ರಮಾಣದಲ್ಲಿ ರದ್ದುಪಡಿಸಬಹುದು. ಅದಕ್ಕೆ ಆರ್ಥಿಕಮೂಲವನ್ನು ಕೊಡದೇ ಇಂತಹ ಆದೇಶವನ್ನು ನಿರುಪಯೋಗಿಮಾಡಬಹುದು.  ನ್ಯಾಯಾಂಗದ ಪ್ರವೇಶ  ಅವುಗಳ ಪರಿಣಾಮವನ್ನು ಸೀಮಿತ ಮಾಡಬಹುದು ಅಥವಾ ರದ್ದುಪಡಿಸಬಹುದು.

ವಿವಾದಾತ್ಮಕ ಸ್ವರೂಪ: ಕಾರ್ಯನಿರ್ವಾಣಾ  ಆದೇಶಗಳು ಸಾಮಾನ್ಯವಾಗಿ ಕಾಂಗ್ರೆಸ್ಸಿನ ಮಹತ್ವವನ್ನು ಕಡಿಮೆಮಾಡುವುದರಿಂದ ಹಾಗೂ ಅಧ್ಯಕ್ಷರಿಗೆ ಅನಿಯಮಿತ ಅಧಿಕಾರಗಳನ್ನು ಕೊಡುವುದರಿಂದ ಪ್ರಜಾಸತತ್ಮಕ ವಿಧಾನಗಳಿಗೆ ವಿರುದ್ಧವಾಗಿದೆ. ಶಾಸಕಾಂಗದ ಪಾತ್ರವನ್ನು ದುರ್ಬಲಮಾಡುತ್ತದೆ ಎಂದು ಟೀಕಾಕಾರರು ವಾದಿಸುತಾರೆ.

ಈ ಎಲ್ಲ ಹಿನ್ನೆಲೆಯಲ್ಲಿ ಮುಖ್ಯವಾಗಿ  ಜನ್ಮಾಧರಿತ ನಾಗರಿಕತೆಯನ್ನು ಗಮನಿಸುವುದಾದರೆ ಮೂಲತಃ ಇದು ಅಕ್ರಮ ವಲಸಿಗರ  ವಿರುದ್ಧ ತಂದಿರುವುದಾಗಿದೆ. ಅಕ್ರಮ ವಲಸೆ ಇಂದು ಅಮೇರಿಕಾ ಮತ್ತು ಯುರೋಪಗಳ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ಅಪರಾಧಗಳ ಸಂಖ್ಯೆ ವಿಪರೀತ ಮೀರಿರುವುದಕ್ಕೆ ಅಕ್ರಮ ವಲಸೆ ಬಹುಮುಖ್ಯ ಕಾರಣ. ಅಮೇರಿಕಾದಲ್ಲಿ ಇವರ ಸಂಖ್ಯೆ ಸುಮಾರು 11.7 ಮಿಲಿಯನ್ ಇರಬಹುದೆನ್ನುವ ಅಂದಾಜಿದೆ. ಇದು ಅಲ್ಲಿನ ಜನಸಂಖ್ಯೆಯ 3.5% ರಷ್ಟಾಗುತ್ತದೆ. ಮಕ್ಕಳ ಕಾರಣದಿಂದ ಅಕ್ರಮ ವಲಸಿಗರಿಗೂ ರಕ್ಷಣೆ ಸಿಕ್ಕು ಈ ಮಕ್ಕಳು ವಯಸ್ಕರಾದಾಗ ಅವರೆಲ್ಲರಿಗೂ ನಾಗರಿಕತೆ ಸಿಗುತ್ತದೆ. ಇನ್ನು  ಅದಕ್ಕೆ ಕಡಿವಾಣ ಬೀಳಲಿದೆ. ಮುಂದಿನ  ಒಂದು ತಿಂಗಳ ನಂತರ ತಂದೆ ತಾಯಿ ಇಬ್ಬರಲ್ಲಿ ಯಾರಾದರೂ ಓರ್ವರು ಅಮೇರಿಕಾದ ಪೌರರಾಗಿದ್ದರೆ  ಅಥವಾ ಗ್ರೀನ್ ಕಾರ್ಡ ಹೊಂದಿದ್ದರೆ ಮಾತ್ರ  ಮಕ್ಕಳಿಗೆ Citizenship by birth ಸಿಗುತ್ತದೆ.  H1-B ಯವರ ಮಕ್ಕಳಿಗೆ  ಈ ಸೌಲಭ್ಯವಿರುವುದಿಲ್ಲ.

ಕಾನೂನು ಸವಾಲುಗಳು ಮತ್ತು ಸಂವಿಧಾನಿಕ ಮಿತಿಗಳು:

ಅನೇಕ ಕಾನೂನು ತಜ್ಞರು ಈಗಾಗಲೇ ಈ ವಿಷಯದಲ್ಲಿ ಸ್ಪಷ್ಟನೆ ನೀಡಿದಂತೆ  ಅಮೇರಿಕಾದ ಅಧ್ಯಕ್ಷರು ಸಂವಿಧಾನದಂತೆ ಕಾರ್ಯ ನಿರ್ವಹಿಸಬೇಕು. ಸಂವಿಧಾನಾತ್ಮಕವಾಗಿ (14 ತಿದ್ದುಪಡಿಯಪ್ರಕಾರ) ಜನ್ಮಾಧರಿತ ನಾಗರಿಕತೆ ಮೂಲಭೂತ ಅಂಶವಾಗಿದ್ದು, ಅದರ ಪೂರ್ತಿಯಾಗಿಯಾಗಲೀ, ಅಥವಾ ಭಾಗಶಃವಾಗಲೀ ಅದರ  ನಿರಾಕರಣೆ  ಸ್ಪಷ್ಟವಾಗಿ ಸಂವಿಧಾನದತ್ತ ಹಕ್ಕಿನ ಉಲ್ಲಂಘನೆಯಾಗಿದೆ. Executive order ಗಳು ಸಂವಿಧಾನ ಮತ್ತು ಅಸ್ತಿತ್ವದಲ್ಲಿರುವ ಕಾನೂನನ್ನು ಮೀರದಂತೆ ಕಾರ್ಯನಿರ್ವಹಿಸಬೇಕು. ಅವು ಸಂವಿಧಾನವನ್ನು ಬದಲಾಯಿಸಲು ಅಥವಾ ಸರಳವಾಗಿ ಸಂವಿಧಾನದ ನಿಯಮಗಳನ್ನು ತಿರಸ್ಕರಿಸಲು ಬಳಸಲಾಗುವುದಿಲ್ಲ. ಹಾಗಾಗಿ ಟ್ರಂಪ್ ಅವರ  ಜನ್ಮಕಾರಣ ನಾಗರಿಕತೆ ಯನ್ನು ನಿರಾಕರಿಸಲು ಕಾರ್ಯನಿರ್ವಹಣಾ ಆದೇಶ 14ನೆಯ ತಿದ್ದುಪಡಿಯ ಸ್ಪಷ್ಟವಾದ ಉಲ್ಲಂಘನೆ ಪ್ರಕ್ರಿಯೆಯಾಗುತ್ತದೆ. ಆದುದರಿಂದ ಯಾವುದೇ ಅಧ್ಯಕ್ಷನ ಆದೇಶವು ಈ ಮೂಲಭೂತ ಹಕ್ಕನ್ನು ನಿರಾಕರಿಸಲು ಸಾಧ್ಯವಿಲ್ಲ ಎಂದು ಕಾನೂನು ತಜ್ಞರು ಭಾವಿಸುತ್ತಾರೆ. 14ನೇ ತಿದ್ದುಪಡಿ ಬದಲಾಯಿಸಲು, ಬದಲಾವಣೆಯು ಸಂವಿಧಾನಿಕ ತಿದ್ದುಪಡಿ ಅಥವಾ ಕಾನೂನು ಬದಲಾವಣೆ ಮೂಲಕ ಆಗಬೇಕಾಗುತ್ತದೆ, ಮತ್ತು ಅವು ಕಠಿಣ ಪ್ರಕ್ರಿಯೆಗಳಾಗಿವೆ.

ಸಂವಿಧಾನದ ತಿದ್ದುಪಡಿ ಅಮೇರಿಕಾದಲ್ಲಿ ಅಷ್ಟು ಸುಲಭವೂ ಅಲ್ಲ. ಶತಮಾನಗಳ ಹಿಂದಿನ ಸಂವಿಧಾನಾತ್ಮಕ 14ನೆಯ ತಿದ್ದುಪಡಿಯು ಅನೇಕಸಲ ನ್ಯಾಯಾಲಯಗಳಿಂದ ಕಾನೂನಾತ್ಮಕ ವಿಮೆರ್ಶೆಗೊಳಪಟ್ಟು ಪ್ರತಿ ಸಂದರ್ಭದಲ್ಲಿ ಸಮರ್ಥವಾಗಿ ನ್ಯಾಯಾಲಯಗಳಿಂದ ಅನುಮೋದಿಸಲ್ಪಟ್ಟಿದೆ, ಮತ್ತು ಯಾವುದೇ ಕಾರ್ಯನಿರ್ವಹಣಾ ಆದೇಶವು ಈ ಹಕ್ಕನ್ನು ತಿರಸ್ಕರಿಸಲು ಯಾವುದೇ ನ್ಯಾಯಾಂಗದ ತೀರ್ಪು ಪಡೆಯುವುದು ಅಷ್ಟು ಸುಲಭವಲ್ಲ. ಈಗಾಗಲೆ ಅಮೇರಿಕಾದಲ್ಲಿನ ಡೆಮೋಕ್ರಾಟಿಕ್ ಮತ್ತು ನಾಗರಿಕ ಹೋರಾಟಗಾರರು ಈ ಆದೇಶದ ವಿರುದ್ಧ ತಿರುಗಿ ಬಿದ್ದಿದ್ದಾರೆ. 22 ಅಮೇರಿಕಾದ ರಾಜ್ಯಗಳು ನ್ಯಾಯಾಲಯದಲ್ಲಿ  ಟ್ರಂಪ್ ನ ವಿರುದ್ಧ ಕೇಸನ್ನು ದಾಖಲಿಸಿವೆ. ಇದೀಗತಾನೇ ಬಂದ ಸುದ್ಢಿಯಂತೆ ಸಿಯಾಟಲ್ಲಿನ ಫೆಡರಲ್ ನ್ಯಾಯಾಲಯದ ನ್ಯಾಯಧೀಶರಾದ ಜಾನ್ ಕಾಫೆನಾರ್ (84 ವರ್ಷ) ಈ ಆದೇಶ ಸಂವಿಧಾನದ ನಿರ್ಲಜ್ಜ ಉಲ್ಲಂಘನೆಯಾಗಿದೆ ಎಂದು ಉದ್ಘರಿಸಿ ಹದಿನಾಲ್ಕು ದಿನಗಳ  ಮಟ್ಟಿಗೆ ತಾತ್ಕಾಲಿಕ ತಡೆ ನೀಡಿದ್ದಾರೆ.   ಟ್ರಂಪ್ ಕೂಡಾ ಘಾಟಿಮನುಷ್ಯ, ಆತನ ವಿರುದ್ಧ ನಿರ್ಧಾರಗಳು ಬಂದರೆ ಆತ ಸುಪ್ರೀಂ ಕೋರ್ಟಿನ ಕದ ತಟ್ಟುತ್ತಾನೆ. ಈ ಹಿಂದೆ ಟ್ರಂಪ್ ಹೊರಡಿಸಿದ “ಕೆಲವೊಂದು ದೇಶದ ಪ್ರವಾಸಿಗರ ನಿರ್ಭಂಧವು” ಫೆಡರಲ್ ಕೋರ್ಟಿನಲ್ಲಿ ವಿರುದ್ಧವಾದರೂ ಸುಪ್ರೀಂ ಕೋರ್ಟ್ ಅದರ ಸಿಂಧುತ್ವವನ್ನು ಎತ್ತಿ ಹಿಡಿದಿತ್ತು.

ಈ ಸುದ್ದಿಯನ್ನೂ ಓದಿ : Self Index: ರಾಜೇಂದ್ರ ಭಟ್‌ ಅಂಕಣ: ನೀವೆಷ್ಟು ಪಾಸಿಟಿವ್ ಥಿಂಕರ್ ಆಗಿದ್ದೀರಿ? ಅದಕ್ಕೊಂದು ಸ್ವಯಂಮಾಪಕ ಇಲ್ಲಿದೆ

ಭಾರತದ ಕೇಂದ್ರ ಸರಕಾರದ ಮುಂದಿರುವ ಆಯ್ಕೆಗಳು:

ಭಾರತ ಅಮೇರಿಕಾದ ಬಹುಮುಖ್ಯ ಭಾಗಿದಾರ ದೇಶವಾಗಿರುವುದರಿಂದ (Stretegic partner) H1-B ಮತ್ತು  ಗ್ರೀನ್ ಕಾರ್ಡ್ ಗಳಮೇಲಿರುವ ದೇಶದ ಮಿತಿಗಳನ್ನು ತೆಗೆದು ಹಾಕಲು ಪ್ರಯತ್ನಿಸಬೇಕು. ಟ್ರಂಪ್ ಕೌಶಲ್ಯಾಧಾರಿತ H1-B  ಮತ್ತು ಗ್ರೀನ್ ಕಾರ್ಡ್ ಗಳಕಡೆ ಒಲವನ್ನು ತೋರುತ್ತಿರುವುದರಿಂದ ಆ ಕುರಿತು ಪ್ರಯತ್ನಿಸಿದರೆ ಗ್ರೀನ್ ಕಾರ್ಡ್ ಆಧಾರದಲ್ಲಿ ಅಲ್ಲಿ ಹುಟ್ಟುವ ಭಾರತೀಯ ಮೂಲದ ಮಕ್ಕಳಿಗೆ ರಕ್ಷಣೆಯನ್ನು ಕೊಡಿಸಬಹುದು. ಈ ಕುರಿತು ಏನಾಗುತ್ತದೆ ಎನ್ನುವುದನ್ನು ಕಾಲವೇ ನಿರ್ಧರಿಸಬೇಕು. ಅಲ್ಲಿಯ ತನಕ ಅಮೇರಿಕಾದಲ್ಲಿರುವ ಭಾರತೀಯ ಮೂಲದವರಿಗೆ ತಲೆಬಿಸಿ ತಪ್ಪಿದ್ದಲ್ಲ.