ಹಾಲಿವುಡ್ನ ‘ಅನಕೊಂಡ’ ಚಿತ್ರದ ಕರ್ನಾಟಕದ ವಿತರಣೆ ಹಕ್ಕುಗಳನ್ನು ಪಡೆದ ಹೊಂಬಾಳೆ ಫಿಲ್ಮ್ಸ್
Hombale Films Update: ಸ್ಯಾಂಡಲ್ವುಡ್ನ ಪ್ರತಿಷ್ಠಿತ ಸಂಸ್ಥೆ ಹೊಂಬಾಳೆ ಫಿಲ್ಮ್ಸ್, ಹಾಲಿವುಡ್ನ ಬಹುನಿರೀಕ್ಷಿತ ‘ಅನಕೊಂಡ’ ಸಿನಿಮಾವನ್ನು ಕರ್ನಾಟಕದಲ್ಲಿ ವಿತರಿಸಲಿದೆ. 1997ರ ಮೂಲ ಚಿತ್ರದ ಮೆಟಾ-ರಿಬೂಟ್ ಆಗಿರುವ ಈ ಸಿನಿಮಾ ಆಕ್ಷನ್-ಕಾಮಿಡಿ ಶೈಲಿಯಲ್ಲಿದ್ದು, ಪಾಲ್ ರಡ್ ಮತ್ತು ಜಾಕ್ ಬ್ಲಾಕ್ ಅಂತಹ ಸ್ಟಾರ್ ನಟರು ಅಭಿನಯಿಸಿದ್ದಾರೆ.
-
ಭಾರತದ ಪ್ರತಿಷ್ಠಿತ ನಿರ್ಮಾಣ ಮತ್ತು ವಿತರಣಾ ಸಂಸ್ಥೆಯಾದ ಹೊಂಬಾಳೆ ಫಿಲ್ಮ್ಸ್, ಇದೀಗ ಅಂತರಾಷ್ಟ್ರೀಯ ಸಿನಿಮಾರಂಗಕ್ಕೆ ತನ್ನ ಹೆಜ್ಜೆ ಗುರುತನ್ನು ವಿಸ್ತರಿಸಿದೆ. ಬಹುನಿರೀಕ್ಷಿತ ಹಾಲಿವುಡ್ನ ‘ಅನಕೊಂಡ’ (Anaconda) ಚಿತ್ರವನ್ನು ಕರ್ನಾಟಕದಾದ್ಯಂತ ಹೊಂಬಾಳೆ ಫಿಲ್ಮ್ಸ್ ವಿತರಿಸಲಿದೆ. ಈ ವಿಚಾರವನ್ನು ಎಂದು ಹೊಂಬಾಳೆ ಸಂಸ್ಥೆಯು ಹೆಮ್ಮೆಯಿಂದ ಘೋಷಿಸಿದೆ.
ಅನಕೊಂಡ ಸಿನಿಮಾ ಬಗ್ಗೆ
1997ರ ಐಕಾನಿಕ್ ಚಿತ್ರದ 'ಮೆಟಾ-ರಿಬೂಟ್' ಆಗಿರುವ ಈ ಹೊಸ ‘ಅನಕೊಂಡ’ ಚಿತ್ರವು ಆಕ್ಷನ್-ಕಾಮಿಡಿ ಶೈಲಿಯಲ್ಲಿದೆ. ಈ ಚಿತ್ರವನ್ನು ಟಾಮ್ ಗೋರ್ಮಿಕನ್ ನಿರ್ದೇಶಿಸಿದ್ದು, ಕೆವಿನ್ ಎಟ್ಟನ್ ಅವರೊಂದಿಗೆ ಸೇರಿ ಚಿತ್ರಕಥೆ ಬರೆದಿದ್ದಾರೆ.
ಚಿತ್ರದಲ್ಲಿ ಹಾಲಿವುಡ್ನ ಘಟಾನುಘಟಿ ಕಲಾವಿದರ ದಂಡೇ ಇದೆ. ಪಾಲ್ ರಡ್, ಜಾಕ್ ಬ್ಲಾಕ್, ಸ್ಟೀವ್ ಝಾನ್, ಥಾಂಡಿವೆ ನ್ಯೂಟನ್, ಡ್ಯಾನಿಯೆಲಾ ಮೆಲ್ಚಿಯರ್, ಸೆಲ್ಟನ್ ಮೆಲ್ಲೋ ಮುಂತಾದವರು ನಟಿಸಿದ್ದಾರೆ.
ಡಿಸೆಂಬರ್ 25ರಂದು ತೆರೆಗೆ
‘ಅನಕೊಂಡ’ ಚಿತ್ರವು ಡಿಸೆಂಬರ್ 25 ರಂದು ಜಾಗತಿಕವಾಗಿ ತೆರೆಕಾಣುತ್ತಿದೆ. ಹೊಂಬಾಳೆ ಫಿಲ್ಮ್ಸ್ನ ತನ್ನ ಬಲಿಷ್ಠ ವಿತರಣಾ ಜಾಲದ ಮೂಲಕ ಕರ್ನಾಟಕದಾದ್ಯಂತ 300ಕ್ಕೂ ಹೆಚ್ಚು ಕಡೆಗಳಲ್ಲಿ ಈ ಸಿನಿಮಾವನ್ನು ಬಿಡುಗಡೆ ಮಾಡಲಿದೆ. ಅಂತರಾಷ್ಟ್ರೀಯ ಮಟ್ಟದ ದೊಡ್ಡ ಚಿತ್ರಗಳನ್ನು ಸ್ಥಳೀಯ ಪ್ರೇಕ್ಷಕರಿಗೆ ತಲುಪಿಸುವ ಮೂಲಕ, ಹೊಂಬಾಳೆ ಫಿಲ್ಮ್ಸ್ ಜಾಗತಿಕ ಕಂಟೆಂಟ್ ಮತ್ತು ಸ್ಥಳೀಯ ಮಾರುಕಟ್ಟೆಯ ನಡುವೆ ಸೇತುವೆಯಾಗಿ ಕೆಲಸ ಮಾಡುತ್ತಿದೆ ಎಂದು ಹೊಂಬಾಳೆ ತಂಡ ಹೇಳಿಕೊಂಡಿದೆ.
2025ರಲ್ಲಿ ಬ್ಲಾಕ್ ಬಸ್ಟರ್ ಕೊಟ್ಟಿರುವ ಹೊಂಬಾಳೆ
ರಿಷಬ್ ಶೆಟ್ಟಿ ಅಭಿನಯದ ʻಕಾಂತಾರ: ಚಾಪ್ಟರ್ 1ʼ ಸಿನಿಮಾವನ್ನು ಹೊಂಬಾಳೆ ಫಿಲ್ಮ್ಸ್ ಸಂಸ್ಥೆಯು ನಿರ್ಮಾಣ ಮಾಡಿತ್ತು. ಈ ಚಿತ್ರವು ಬಾಕ್ಸ್ ಆಫೀಸ್ನಲ್ಲಿ ದೊಡ್ಡಮೊತ್ತವನ್ನು ಕಲೆ ಹಾಕಿತ್ತು. ಸುಮಾರು 900 ಕೋಟಿ ರೂ. ಹಣ ಕಲೆಕ್ಟ್ ಆಗಿತ್ತು. ಇದರ ಜೊತೆಗೆ ಹೊಂಬಾಳೆ ಫಿಲ್ಮ್ಸ್ ವಿತರಣೆ ಜವಾಬ್ದಾರಿ ವಹಿಸಿಕೊಂಡು ಮಲಯಾಳಂನ ಬ್ಲಾಕ್ಬಸ್ಟರ್ 'ಲೂಸಿಫರ್' ಚಿತ್ರದ ಮುಂದುವರಿದ ಭಾಗ L2: ಎಂಪುರಾನ್ ಮತ್ತು 'ಹನುಮಾನ್' ಖ್ಯಾತಿಯ ತೇಜ ಸಜ್ಜ ಅಭಿನಯದ ಫ್ಯಾಂಟಸಿ ಆಕ್ಷನ್ ಸಿನಿಮಾ ಮಿರಾಯ್ ಚಿತ್ರವನ್ನು ರಿಲೀಸ್ ಮಾಡಿತ್ತು. ಪ್ರೆಸೆಂಟರ್ ಆಗಿ ಭಾರತೀಯ ಪುರಾಣದ ಕಥೆಯನ್ನು ಹೊಂದಿರುವ ಮಹಾವತಾರ್ ನರಸಿಂಹ ಆನಿಮೇಷನ್ 3D ಸಿನಿಮಾವನ್ನು ಹೊಂಬಾಳೆ ಫಿಲ್ಮ್ಸ್ ರಿಲೀಸ್ ಮಾಡಿ, ಗೆಲುವು ಕಂಡಿತ್ತು.
