15 ದಿನಗಳಲ್ಲಿ ವಿಶ್ವಾದ್ಯಂತ 1500+ ಕೋಟಿ ಬಾಚಿಕೊಂಡ ‘ರಾಮಾಯಣ’ ಸಿನಿಮಾ; ಈ ವೀಕೆಂಡ್ ಮತ್ತೆ ಬಾಕ್ಸ್ ಆಫೀಸ್ ಜಾದೂ ನಡೆಯುತ್ತಾ?
ʻರಾಮಾಯಣʼ ಸಿನಿಮಾವು ಬಿಡುಗಡೆಯಾದ ಕೇವಲ 15 ದಿನಗಳಲ್ಲಿ ಜಾಗತಿಕವಾಗಿ 1,547 ಕೋಟಿ ರೂಪಾಯಿಗಳಿಗೂ ಅಧಿಕ ಮೊತ್ತ ಗಳಿಸುವ ಮೂಲಕ ಭಾರತೀಯ ಚಿತ್ರರಂಗದಲ್ಲಿ ಹೊಸ ಇತಿಹಾಸ ಬರೆದಿದೆ. ದೇಶೀಯ ಮಾರುಕಟ್ಟೆಯಲ್ಲೇ ಸಾವಿರ ಕೋಟಿ ಗಡಿ ದಾಟಿರುವ ರಣಬೀರ್ ಕಪೂರ್, ಸಾಯಿ ಪಲ್ಲವಿ ಮತ್ತು ಯಶ್ ಅಭಿನಯದ ಈ ಸಿನಿಮಾಕ್ಕೆ ಪ್ರೇಕ್ಷಕರಿಂದ ಭರ್ಜರಿ ಪ್ರಶಂಸೆ ಸಿಗುತ್ತಿದೆ.
-
ರಣಬೀರ್ ಕಪೂರ್, ಸಾಯಿ ಪಲ್ಲವಿ ಹಾಗೂ ರಾಕಿಂಗ್ ಸ್ಟಾರ್ ಯಶ್ ಮುಖ್ಯಭೂಮಿಕೆಯಲ್ಲಿ ನಟಿಸಿರುವ ಬಹುನಿರೀಕ್ಷಿತ ಪ್ಯಾನ್-ಇಂಡಿಯಾ ಸಿನಿಮಾ ‘ರಾಮಾಯಣ’ ಬಾಕ್ಸ್ ಆಫೀಸ್ನಲ್ಲಿ ತನ್ನ ಜಯಭೇರಿಯನ್ನು ಮುಂದುವರಿಸಿದೆ. ಪ್ರೇಕ್ಷಕರಿಂದ ಅಭೂತಪೂರ್ವ ಪ್ರತಿಕ್ರಿಯೆ ಪಡೆದುಕೊಳ್ಳುತ್ತಿರುವ ಈ ಚಿತ್ರವು ಯಶಸ್ವಿಯಾಗಿ ಎರಡು ವಾರಗಳನ್ನು ಪೂರೈಸಿ, ಇದೀಗ ಚಿತ್ರಮಂದಿರಗಳಲ್ಲಿ ಮೂರನೇ ವಾರಕ್ಕೆ ಕಾಲಿಟ್ಟಿದೆ.
ಬಿಡುಗಡೆಯಾದ ಕೇವಲ 15 ದಿನಗಳಲ್ಲಿಯೇ ವಿಶ್ವಾದ್ಯಂತ 1,500 ಕೋಟಿ ರೂಪಾಯಿಗಳ ಗಡಿ ದಾಟುವ ಮೂಲಕ ‘ರಾಮಾಯಣ’ ಭಾರತೀಯ ಚಿತ್ರರಂಗದ ಇತಿಹಾಸದಲ್ಲಿ ಹೊಸ ಮೈಲಿಗಲ್ಲು ಸ್ಥಾಪಿಸಿದೆ.
ಭಾರತದಲ್ಲೇ ಸಾವಿರ ಕೋಟಿ ಗಳಿಕೆ
ಬಾಕ್ಸ್ ಆಫೀಸ್ ಅಂಕಿಅಂಶಗಳ ವರದಿಯ ಪ್ರಕಾರ, ಬಿಡುಗಡೆಯಾದ ಮೊದಲ 15 ದಿನಗಳಲ್ಲಿ ‘ರಾಮಾಯಣ’ ಚಿತ್ರವು ಭಾರತೀಯ ಮಾರುಕಟ್ಟೆಯೊಂದರಲ್ಲೇ ಒಟ್ಟು 1,032.15 ಕೋಟಿ ರೂಪಾಯಿ ಗ್ರಾಸ್ ಗಳಿಕೆ ಮಾಡುವ ಮೂಲಕ ಸಾವಿರ ಕೋಟಿ ಕ್ಲಬ್ ಸೇರಿದೆ. ಇದರ ಜೊತೆಗೆ ಸಾಗರೋತ್ತರ (ವಿದೇಶಿ) ಮಾರುಕಟ್ಟೆಯಲ್ಲೂ ಭರ್ಜರಿ ಪ್ರದರ್ಶನ ಕಾಣುತ್ತಿರುವ ಈ ಸಿನಿಮಾ ಬರೋಬ್ಬರಿ 515 ಕೋಟಿ ರೂಪಾಯಿ ಗ್ರಾಸ್ ಕಲೆಕ್ಷನ್ ಬಾಚಿಕೊಂಡಿದೆ. ದೇಶೀಯ ಮತ್ತು ವಿದೇಶಿ ಗಳಿಕೆಯನ್ನು ಒಟ್ಟುಗೂಡಿಸಿದರೆ, ಕೇವಲ 15 ದಿನಗಳಲ್ಲಿ ಚಿತ್ರದ ವಿಶ್ವಾದ್ಯಂತ ಒಟ್ಟು ಕಲೆಕ್ಷನ್ 1,547.15 ಕೋಟಿ ರೂಪಾಯಿಗಳಿಗೆ ತಲುಪಿದೆ.
ಹಿಂದಿ ವರ್ಷನ್ನಿಂದಲೇ ಹೆಚ್ಚು ಗಳಿಕೆ
ಈ ಚಿತ್ರದ 15ನೇ ದಿನದ (ಗುರುವಾರ) ಗಳಿಕೆಯ ವಿವರಗಳನ್ನು ಗಮನಿಸಿದರೆ, ದೇಶಾದ್ಯಂತ ಒಟ್ಟು 21,437 ಪ್ರದರ್ಶನಗಳಿಂದ ಅಂದಾಜು 19.35 ಕೋಟಿ ರೂಪಾಯಿ ನೆಟ್ ಕಲೆಕ್ಷನ್ ದಾಖಲಾಗಿದೆ. ಭಾಷಾವಾರು ಗಳಿಕೆಯಲ್ಲಿ ಎಂದಿನಂತೆ ಹಿಂದಿ ಆವೃತ್ತಿಯು 14 ಕೋಟಿ ರೂಪಾಯಿ ಕಲೆಕ್ಷನ್ ಮಾಡುವ ಮೂಲಕ ಅಗ್ರಸ್ಥಾನದಲ್ಲಿ ಮುಂದುವರಿದಿದೆ. ದಕ್ಷಿಣ ಭಾರತದ ಭಾಷೆಗಳಲ್ಲೂ ಚಿತ್ರ ಉತ್ತಮ ಹಿಡಿತ ಸಾಧಿಸಿದ್ದು, 15ನೇ ದಿನದಂದು ಮಲಯಾಳಂ ಆವೃತ್ತಿಯಿಂದ 1.75 ಕೋಟಿ, ತಮಿಳಿನಿಂದ 1.50 ಕೋಟಿ, ಕನ್ನಡದಿಂದ 1.40 ಕೋಟಿ ಹಾಗೂ ತೆಲುಗು ಆವೃತ್ತಿಯಿಂದ ಸುಮಾರು 70 ಲಕ್ಷ ರೂಪಾಯಿ ಗಳಿಕೆ ಹರಿದುಬಂದಿದೆ.
ಕೇರಳದ ಜಟಾಯು ಅರ್ಥ್ ಸೆಂಟರ್ಗೆ ಪ್ರಧಾನಿ ಮೋದಿ ಭೇಟಿ? 'ರಾಮಾಯಣ' ಸಿನಿಮಾ ಬೆನ್ನಲ್ಲೇ ಮಹತ್ವದ ಬೆಳವಣಿಗೆ!
14ನೇ ದಿನದ 23.20 ಕೋಟಿ ರೂಪಾಯಿ ಗಳಿಕೆಗೆ ಹೋಲಿಸಿದರೆ, 15ನೇ ದಿನದ ಕಲೆಕ್ಷನ್ನಲ್ಲಿ ಸುಮಾರು ಶೇ.16.6 ರಷ್ಟು ಅಲ್ಪ ಇಳಿಕೆ ಕಂಡುಬಂದಿದೆ. ಆದರೂ, ವಾರದ ದಿನಗಳಲ್ಲಿಯೂ ಈ ಮಟ್ಟದ ಗಳಿಕೆ ಕಾಯ್ದುಕೊಂಡಿರುವುದು ಮತ್ತು ಕೇವಲ ಎರಡು ವಾರಗಳ ಅವಧಿಯಲ್ಲಿ 1,547 ಕೋಟಿಗೂ ಅಧಿಕ ಮೊತ್ತ ಬಾಚಿಕೊಂಡಿರುವುದು ಚಿತ್ರದ ಬ್ಲಾಕ್ಬಸ್ಟರ್ ಯಶಸ್ಸಿಗೆ ಸಾಕ್ಷಿಯಾಗಿದೆ.
ವೀಕೆಂಡ್ನಲ್ಲಿ ಪುನಃ ಜಾದೂ?
ಇಂದು ಶುಕ್ರವಾರ (ನವೆಂಬರ್ 20) ಚಿತ್ರದ 16ನೇ ದಿನವಾಗಿದ್ದು, ಮೂರನೇ ವೀಕೆಂಡ್ ಆರಂಭವಾಗಿದೆ. ವಾರಾಂತ್ಯದ ರಜಾ ದಿನಗಳ ಲಾಭ ಚಿತ್ರಕ್ಕೆ ಸಿಗಲಿದ್ದು, ಶನಿವಾರ ಮತ್ತು ಭಾನುವಾರದಂದು ಗಳಿಕೆಯಲ್ಲಿ ಮತ್ತೆ ದೊಡ್ಡಮಟ್ಟದ ಏರಿಕೆ ಕಾಣುವ ಬಲವಾದ ನಿರೀಕ್ಷೆಯಿದೆ. ಮೂರನೇ ವಾರಾಂತ್ಯದಲ್ಲೂ ‘ರಾಮಾಯಣ’ ತನ್ನ ಬಾಕ್ಸ್ ಆಫೀಸ್ ಜಾದೂವನ್ನು ಹೇಗೆ ಮುಂದುವರಿಸಲಿದೆ ಮತ್ತು ಹೊಸದಾಗಿ ಯಾವೆಲ್ಲಾ ದಾಖಲೆಗಳನ್ನು ಮುರಿಯಲಿದೆ ಎಂಬ ಕುತೂಹಲ ಸಿನಿರಸಿಕರಲ್ಲಿದೆ.