ಮುಂಬೈ: ನವರಾತ್ರಿ ಹಬ್ಬದ (Navratri festival) ವೇಳೆ ನಡೆಸಲಾಗುವ ಗರ್ಭ- ದಂಡಿಯಾ ಕಾರ್ಯಕ್ರಮದಲ್ಲಿ (Maharashtra garba- dandiya rules) ಮುಸ್ಲಿಂ ಸಮುದಾಯದ ಸದಸ್ಯರು ಭಾಗವಹಿಸುವುದನ್ನು ತಡೆಯಲು ಮುಂದಾಗಿರುವ ವಿಶ್ವ ಹಿಂದೂ ಪರಿಷತ್ ( Vishva Hindu Parishad), ನವರಾತ್ರಿ ಹಬ್ಬವು ಹಿಂದೂ ದೇವತೆಯನ್ನು ಪೂಜಿಸುವುದರ ಮೇಲೆ ಕೇಂದ್ರೀಕೃತವಾಗಿದೆ. ಹೀಗಾಗಿ ಇದರಲ್ಲಿ ಮುಸ್ಲಿಂ ಸಮುದಾಯದ ಸದಸ್ಯರು ಭಾಗವಹಿಸುವುದನ್ನು ತಡೆಯಲು ಸಂಘಟನೆ ನಿರ್ಧರಿಸಿದೆ ಎಂದು ವಿಶ್ವ ಹಿಂದೂ ಪರಿಷತ್ ವಕ್ತಾರ ಮತ್ತು ಜಂಟಿ ಕಾರ್ಯದರ್ಶಿ ಶ್ರೀರಾಜ್ ನಾಯರ್ ತಿಳಿಸಿದ್ದಾರೆ.
ಅಕ್ಟೋಬರ್ ತಿಂಗಳಲ್ಲಿ ಮಹಾರಾಷ್ಟ್ರದಾದ್ಯಂತ ನಡೆಯಲಿರುವ ನವರಾತ್ರಿ ಉತ್ಸವದ ಸಮಯದಲ್ಲಿ ಮುಸ್ಲಿಮರನ್ನು ಗರ್ಭ ಮತ್ತು ದಾಂಡಿಯಾ ಕಾರ್ಯಕ್ರಮಗಳಿಂದ ಹೊರಗಿಡುವಂತೆ ಕರೆ ನೀಡಿರುವ ವಿಶ್ವ ಹಿಂದೂ ಪರಿಷತ್, ಇದಕ್ಕಾಗಿ ಗುರುತು ಪರಿಶೀಲಿಸುವಂತೆ ಸಂಘಟಕರನ್ನು ಒತ್ತಾಯಿಸುವ ಮಾರ್ಗಸೂಚಿಗಳನ್ನು ಹೊರಡಿಸಿದೆ.
ಜನ್ಮಾಷ್ಟಮಿ ಆಚರಣೆ ವೇಳೆ ದುರಂತ; ಮುಂಬೈಯಲ್ಲಿ ಬಾಲಕ ಸೇರಿ ಇಬ್ಬರು ಸಾವು, 212 ಮಂದಿ ಗಾಯ
ಅಕ್ಟೋಬರ್ 11 ರಂದು ನವರಾತ್ರಿ ಉತ್ಸವ ಪ್ರಾರಂಭವಾಗಲಿದ್ದು, ಇದರಲ್ಲಿ ಭಾಗವಹಿಸುವವರ ಆಧಾರ್ ಕಾರ್ಡ್ಗಳನ್ನು ಕಡ್ಡಾಯವಾಗಿ ಪರಿಶೀಲಿಸಿ ಅವರ ಹಣೆಯ ಮೇಲೆ ತಿಲಕ ಇಡುವಂತೆ ಶ್ರೀರಾಜ್ ನಾಯರ್ ಹೇಳಿದ್ದಾರೆ.
ನವರಾತ್ರಿ ಹಬ್ಬದ ಸಮಯದಲ್ಲಿ ಮುಸ್ಲಿಮರು ಗರ್ಭ-ದಂಡಿಯಾ ನೃತ್ಯದಲ್ಲಿ ಭಾಗವಹಿಸಲು ಅವಕಾಶ ನೀಡದಿರಲು ನಾವು ನಿರ್ಧಾರ ಮಾಡಿದ್ದೇವೆ. ನವರಾತ್ರಿ ಕೇವಲ ಹಾಡು ಮತ್ತು ನೃತ್ಯಗಳ ಬಗ್ಗೆ ಅಲ್ಲ. ಈ ಹಬ್ಬವು ದೇವಿಯನ್ನು ಪೂಜಿಸುವ ಬಗ್ಗೆಯಾಗಿದೆ. ವಿಗ್ರಹಾರಾಧನೆಯನ್ನು ವಿರೋಧಿಸುವ ಮುಸ್ಲಿಮರು ಉತ್ಸವದಲ್ಲಿ ಏಕೆ ಭಾಗವಹಿಸಬೇಕು? ಎಂದು ಅವರು ಪ್ರಶ್ನಿಸಿದರು.
ಹಿಂದೂ ಹಬ್ಬಗಳ ಸಾಂಸ್ಕೃತಿಕ ಸ್ವರೂಪವನ್ನು ಪರಿಗಣಿಸಿ ಇದನ್ನು ಸಂರಕ್ಷಿಸಲು ಮುನ್ನೆಚ್ಚರಿಕೆ ಕ್ರಮಗಳಾಗಿ ಈ ನಿರ್ಬಂಧಗಳನ್ನು ವಿಎಚ್ಪಿ ವಿಧಿಸಿದೆ. ಈ ಕ್ರಮವು ಯಾವುದೇ ನಿರ್ದಿಷ್ಟ ಸಮುದಾಯದ ವಿರುದ್ಧ ನಿರ್ದೇಶಿಸಲ್ಪಟ್ಟಿಲ್ಲ. ಧಾರ್ಮಿಕ ಮತಾಂತರ ಮತ್ತು ಗೋಹತ್ಯೆ ವಿರೋಧಿ ತನ್ನ ಮೂಲ ಕಾರ್ಯಸೂಚಿಯಲ್ಲಿ ರಾಜಿ ಮಾಡಿಕೊಳ್ಳಲು ಸಾಧ್ಯವಿಲ್ಲ. ಅಂತೆಯೇ ಹಬ್ಬಗಳು ಹಿಂದೂಗಳ ಸಾಂಸ್ಕೃತಿಕ ಪರಂಪರೆಯ ಅವಿಭಾಜ್ಯ ಅಂಗವಾಗಿದೆ. ಅದನ್ನು ದುರ್ಬಲಗೊಳಿಸಲು ಅನುಮತಿಸುವುದಿಲ್ಲ ಎಂದರು.
ವಿಶ್ವ ಹಿಂದೂ ಪರಿಷತ್ ನ ಮಾರ್ಗಸೂಚಿಗಳು ವಿರೋಧ ಪಕ್ಷಗಳು ಮತ್ತು ನಾಯಕರಿಂದ ಟೀಕೆಗೆ ಗುರಿಯಾಗಿದೆ. ಆರ್ಎಸ್ಎಸ್ ನಾಯಕರು ಇದನ್ನು ಅನುಮೋದಿಸುತ್ತಾರೆಯೇ ಎಂದು ಪ್ರಶ್ನಿಸಿದ್ದಾರೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಶಿವಸೇನೆ (ಯುಬಿಟಿ) ಸಂಸದ ಸಂಜಯ್ ರಾವತ್, ನ್ಯೂಯಾರ್ಕ್ನಲ್ಲಿ ಆರ್ಎಸ್ಎಸ್ ಮುಖ್ಯಸ್ಥ ಮೋಹನ್ ಭಾಗವತ್ ಅವರು ಸಾರ್ವತ್ರಿಕ ಏಕತೆ ಮತ್ತು ಘನತೆಯ ಬಗ್ಗೆ ಮಾತನಾಡಿದ್ದರು. ಆದರೆ ಇದೀಗ ವಿಎಚ್ಪಿ ಮುಸ್ಲಿಮರನ್ನು ತನ್ನ ಆಚರಣೆಗಳಿಂದ ದೂರವಿರಿಸುತ್ತಿದೆ. ಈ ಬಗ್ಗೆ ಆರ್ ಆರ್ ಎಸ್ ಏನು ಹೇಳುತ್ತದೆ ಎಂದು ಕೇಳಿದ್ದಾರೆ.
ಕಾಂಗ್ರೆಸ್ ಶಾಸಕ ಅಮೀನ್ ಪಟೇಲ್, ವಿಎಚ್ಪಿಯ ಈ ಕ್ರಮ ಅಸಂವಿಧಾನಿಕ. ಹಬ್ಬಗಳು ಸಾಂಪ್ರದಾಯಿಕವಾಗಿ ಕೋಮು ಸಾಮರಸ್ಯವನ್ನು ಪ್ರೋತ್ಸಾಹಿಸುತ್ತವೆ. ಈದ್ ಮತ್ತು ರಂಜಾನ್ನಂತೆ ದಾಂಡಿಯಾ ಮತ್ತು ನವರಾತ್ರಿ ಕಾರ್ಯಕ್ರಮಗಳಿಗೆ ಇತರ ಸಮುದಾಯದವರನ್ನು ಸದ್ಭಾವನೆಯಿಂದ ಆಹ್ವಾನಿಸಲಾಗುತ್ತದೆ ಎಂದರು.
ಎನ್ಸಿಪಿ (ಎಸ್ಪಿ) ವಕ್ತಾರ ಕ್ಲೈಡ್ ಕ್ರಾಸ್ಟೊ ಕೂಡ ವಿಎಚ್ಪಿಯ ಮಾರ್ಗಸೂಚಿಗಳನ್ನು ಟೀಕಿಸಿದ್ದು, ಇದು ಮಹಾರಾಷ್ಟ್ರದಲ್ಲಿ ಶಾಂತಿ ಮತ್ತು ಸಾಮರಸ್ಯವನ್ನು ಕದಡಬಹುದು ಎಂದು ಹೇಳಿದರು. ಈ ಕ್ರಮಕ್ಕೆ ಬಿಜೆಪಿ ನೇತೃತ್ವದ ರಾಜ್ಯ ಸರ್ಕಾರ ಏನು ಹೇಳುತ್ತದೆ ಎಂದು ಪ್ರಶ್ನಿಸಿದರು.
ಮಹಾರಾಷ್ಟ್ರ ರಾಜ್ಯ ಅಲ್ಪಸಂಖ್ಯಾತ ಆಯೋಗದ ಅಧ್ಯಕ್ಷ ಪ್ಯಾರೆ ಖಾನ್ ಮಾತನಾಡಿ, ಪ್ರತಿಯೊಬ್ಬರಿಗೂ ತಮ್ಮ ನಂಬಿಕೆಗೆ ಅನುಗುಣವಾಗಿ ಹಬ್ಬಗಳನ್ನು ಆಚರಿಸುವ ಹಕ್ಕಿದೆ. ಸಾರ್ವಜನಿಕ ಹಬ್ಬಗಳಿಂದ ಮುಸ್ಲಿಮರನ್ನು ಸಂಪೂರ್ಣವಾಗಿ ಹೊರಗಿಡುವುದು ಸರಿಯಲ್ಲ ಎಂದು ತಿಳಿಸಿದರು.
ಭಾಗವಹಿಸುವಿಕೆಯು ಕೋಮು ನಿರ್ಬಂಧಗಳ ಮೇಲೆ ಅಲ್ಲ, ಜನರನ್ನು ಆಹ್ವಾನಿಸಲಾಗಿದೆಯೇ ಎಂಬುದರ ಮೇಲೆ ಅವಲಂಬಿತವಾಗಿರಬೇಕು, ಯಾರಾದರೂ ಅವರಿಗೆ ಕರೆ ಮಾಡಲು ಬಯಸದಿದ್ದರೆ ಅವರಿಗೆ ಕರೆ ಮಾಡಬೇಡಿ. ಯಾರೂ ಅಲ್ಲಿಗೆ ಬಲವಂತವಾಗಿ ಹೋಗುವುದಿಲ್ಲ. ಜನರು ಪ್ರೀತಿಯಿಂದ ಕರೆದಾಗ ಹೋಗುತ್ತಾರೆ ಎಂದರು.