Boycott Turkey: ನಿಷೇಧ ಪ್ರಶ್ನಿಸಿ ದೆಹಲಿ ಹೈಕೋರ್ಟ್‌ ಮೆಟ್ಟಿಲೇರಿದ್ದ ಟರ್ಕಿಗೆ ಭಾರೀ ಮುಖಭಂಗ; ಅರ್ಜಿ ವಜಾ ಆದೇಶ

ನವದೆಹಲಿ: ಟರ್ಕಿಶ್ ಮೂಲದ ನೆಲ ನಿರ್ವಹಣಾ ಸಂಸ್ಥೆ ಸೆಲೆಬಿ ವಿಮಾನ ನಿಲ್ದಾಣ ಸೇವೆಗಳಿಗೆ ನೀಡಿದ್ದ ಭದ್ರತಾ ಅನುಮತಿಯನ್ನು ನಾಗರಿಕ ವಿಮಾನಯಾನ ಭದ್ರತಾ ಬ್ಯೂರೋ (ಬಿಸಿಎಎಸ್) ಮಹಾನಿರ್ದೇಶಕರು (Boycott Turkey) ರದ್ದುಗೊಳಿಸಿದ್ದನ್ನು ಪ್ರಶ್ನಿಸಿ ಸಲ್ಲಿಸಿದ್ದ ಅರ್ಜಿಯನ್ನು ದೆಹಲಿ ಹೈಕೋರ್ಟ್ ಸೋಮವಾರ ವಜಾಗೊಳಿಸಿದೆ. ಮೇ 15 ರಂದು ಬಿಸಿಎಎಸ್ ತನ್ನ ಭದ್ರತೆಯನ್ನು ರದ್ದುಗೊಳಿಸಿತ್ತು. ಇದರಿಂದಾಗಿ ಭಾರತದ ಪ್ರಮುಖ ವಿಮಾನ ನಿಲ್ದಾಣಗಳಲ್ಲಿ ಅದರ ಕಾರ್ಯಾಚರಣೆಯನ್ನು ಸ್ಥಗಿತಗೊಳಿಸಿತು ಮತ್ತು ಕಂಪನಿಯೊಂದಿಗೆ ಕೆಲಸ ಮಾಡುತ್ತಿರುವ 10,000 ಕ್ಕೂ ಹೆಚ್ಚು ಉದ್ಯೋಗಿಗಳಿಗೆ ಅಪಾಯವನ್ನುಂಟುಮಾಡಿತು.

ಆಪರೇಷನ್‌ ಸಿಂದೂರ್‌ದ ಸಮಯದಲ್ಲಿ ಟರ್ಕಿ ಪಾಕಿಸ್ತಾನಕ್ಕೆ ಸಹಾಯ ಮಾಡಿತ್ತು. ಭಾರತ ಮತ್ತು ಟರ್ಕಿ ನಡುವೆ ಹೆಚ್ಚುತ್ತಿರುವ ಉದ್ವಿಗ್ನತೆಯ ನಂತರ ಮೇ 15 ರಂದು ಭದ್ರತಾ ಅನುಮತಿಯನ್ನು ರದ್ದುಗೊಳಿಸಲಾಯಿತು. ಈ ಕಂಪನಿಯು ಭಾರತದ ಪ್ರಮುಖ ವಿಮಾನ ನಿಲ್ದಾಣಗಳಲ್ಲಿ ಪ್ರಯಾಣಿಕರ ನಿರ್ವಹಣೆ, ಲೋಡ್‌ ಕಂಟ್ರೋಲ್‌, ಫ್ಲೈಟ್‌ ಆಪರೇಷನ್ಸ್‌, ಬ್ಯಾಗೇಜ್‌ ನಿರ್ವಹಣೆ, ಸರಕು ಸಾಗಣೆ, ಅಂಚೆ, ವೇರ್‌ ಹೌಸ್ ಇತ್ಯಾದಿ ಸೇವೆಗಳನ್ನು ವಹಿಸುತ್ತಿತ್ತು.‌ ಸೆಲೆಬಿ ಕಂಪನಿಯು ಹತ್ತು ವರ್ಷಗಳ ಹಿಂದೆ ಮುಂಬಯಿ ಇಂಟರ್‌ ನ್ಯಾಶನಲ್‌ ಏರ್‌ ಪೋರ್ಟ್‌ ಸಹಭಾಗಿತ್ವದಲ್ಲಿ ಭಾರತೀಯ ವೈಮಾನಿಕ ಕ್ಷೇತ್ರವನ್ನು ಪ್ರವೇಶಿಸಿತ್ತು. ಮುಂಬಯಿ ಏರ್‌ ಪೋರ್ಟ್‌ನ ಗ್ರೌಂಡ್‌ ಆಪರೇಷನ್ಸ್‌ನ 70% ನಿರ್ವಹಣೆಯನ್ನು ಇದುವೇ ಮಾಡುತ್ತಿತ್ತು. ಸೆಲೆಬಿ ವರ್ಷಕ್ಕೆ 58,000ಕ್ಕೂ ಹೆಚ್ಚು ವಿಮಾನ ಟ್ರಿಪ್‌ಗಳನ್ನು ಮತ್ತು 5,40,000 ಟನ್‌ ಸರಕು ಸಾಗಣೆಯನ್ನು ನಿರ್ವಹಿಸಿತ್ತು. ಟರ್ಕಿಯ ಅಧ್ಯಕ್ಷ ಎರ್ಡೊಗನ್ ಬಹಿರಂಗವಾಗಿಯೇ ಪಾಕಿಸ್ತಾನವನ್ನು ಬೆಂಬಲಿಸಿದ್ದಾರೆ.

ಕೇಂದ್ರವನ್ನು ಪ್ರತಿನಿಧಿಸಿದ ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ, ದೇಶದಲ್ಲಿ ಚಾಲ್ತಿಯಲ್ಲಿರುವ ಸಂದರ್ಭಗಳಲ್ಲಿ ದೇಶದ ವಿಮಾನ ನಿಲ್ದಾಣಗಳಿಗೆ ಸಂಭಾವ್ಯ ಬೆದರಿಕೆಯ ಕಾರಣದಿಂದ ಸೆಲೆಬಿ ಅವರ ಭದ್ರತಾ ಅನುಮತಿಯನ್ನು ರದ್ದುಗೊಳಿಸಲಾಗಿದೆ ಎಂದು ವಾದಿಸಿದ್ದರು. ನವೆಂಬರ್ 2022 ರಲ್ಲಿ ಸೆಲೆಬಿ ತನ್ನ ಭದ್ರತಾ ಅನುಮತಿಯನ್ನು ನವೀಕರಿಸುವಾಗ, ಕಾರಣಗಳನ್ನು ನೀಡದೆಯೇ ಅದರ ಅನುಮತಿಯನ್ನು ರದ್ದುಗೊಳಿಸಬಹುದು ಎಂದು ಹೇಳಲಾಗಿತ್ತು.

ಈ ಸುದ್ದಿಯನ್ನೂ ಓದಿ:Emmanuel Macron: ಅಯ್ಯೋ... ಇದೆಂಥಾ ರಾಜತಾಂತ್ರಿಕ ಭೇಟಿ? ಟರ್ಕಿ-ಫ್ರಾನ್ಸ್‌ ಅಧ್ಯಕ್ಷರ ವಿಚಿತ್ರ ವರ್ತನೆ; ವಿಡಿಯೊ ಫುಲ್‌ ವೈರಲ್‌

ಈಗಾಗಲೇ ದೇಶದಲ್ಲಿ ಬಾಯ್ಕಾಟ್‌ ಟರ್ಕಿ ಅಭಿಯಾನ ಆರಂಭವಾಗಿದೆ. ಟರ್ಕಿಯ ಉತ್ಪನ್ನಗಳನ್ನು ಖರೀದಿಸದಂತೆ ಮತ್ತು ಅಲ್ಲಿಗೆ ಪ್ರವಾಸಕ್ಕೆ ತೆರಳದಂತೆ ಆಗ್ರಹಿಸಲಾಗುತ್ತಿದೆ. ಈಗಾಗಲೇ ಹಲವರು ಟರ್ಕಿಯ ಪ್ರವಾಸವನ್ನು ರದ್ದುಪಡಿಸಿದ್ದಾರೆ. ಇದು ಟರ್ಕಿ ಆರ್ಥಿಕತೆಯ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ.