ಕಾಶ್ಮೀರ ಉಗ್ರರ ದಾಳಿ: ಹಿಜ್ಬುಲ್ ಭಯೋತ್ಪಾದಕ ಇಮ್ತಿಯಾಜ್ ವಿರುದ್ಧ ಇಂಟರ್‌ಪೋಲ್ ರೆಡ್ ಕಾರ್ನರ್ ನೋಟಿಸ್ ಜಾರಿ

ಕಾಶ್ಮೀರ: 2013ರ ತರ್ಜೂ (ಹೈಗಾಮ್) ಭಯೋತ್ಪಾದಕ ದಾಳಿಯ ತನಿಖೆಯಲ್ಲಿ ಜಮ್ಮು-ಕಾಶ್ಮೀರ(Jammu-Kashmir)ದ ರಾಜ್ಯ ತನಿಖಾ ಸಂಸ್ಥೆ (SIA) ಮಹತ್ವದ ಯಶಸ್ಸು ಸಾಧಿಸಿದೆ. ನಾಲ್ವರು ಪೊಲೀಸರು ಹುತಾತ್ಮರಾಗಲು ಕಾರಣವಾಗಿದ್ದ ಈ ಹೊಂಚುದಾಳಿಯ ಪ್ರಮುಖ ಸಂಚುಗಾರ, ಹಿಜ್ಬುಲ್ ಮುಜಾಹಿದ್ದೀನ್ (Hizbul Mujahideen) ಉಗ್ರ ಇಮ್ತಿಯಾಜ್ ಅಹ್ಮದ್ ಕಂಡೂ (Imtiyaz Ahmad Kandoo) ವಿರುದ್ಧ ಇಂಟರ್‌ಪೋಲ್ ಮೂಲಕ 'ರೆಡ್ ಕಾರ್ನರ್ ನೋಟಿಸ್' (RCN) ಜಾರಿಗೊಳಿಸಲಾಗಿದೆ. ಪ್ರಸ್ತುತ ಪಾಕಿಸ್ತಾನ(Pakistan)ಕ್ಕೆ ಪಲಾಯನ ಮಾಡಿದ್ದಾನೆ ಎನ್ನಲಾದ ಇಮ್ತಿಯಾಜ್‌ನನ್ನು ಜಾಗತಿಕ ಪೊಲೀಸ್ ಜಾಲದ ಮೂಲಕ ಪತ್ತೆಹಚ್ಚಲು ಮತ್ತು ಭಾರತಕ್ಕೆ ಹಸ್ತಾಂತರಿಸಲು ಇದು ನೆರವಾಗಲಿದೆ.

2013ರ ಏಪ್ರಿಲ್ 26ರಂದು ಸೋಪೋರ್‌ನ ಹೈಗಾಮ್‌ನಲ್ಲಿ ಸ್ವಯಂಚಾಲಿತ ಶಸ್ತ್ರಾಸ್ತ್ರಗಳನ್ನು ಹೊಂದಿದ್ದ ಉಗ್ರರು ಪೊಲೀಸ್ ಪಡೆಯ ಮೇಲೆ ದಾಳಿ ನಡೆಸಿದ್ದರು. ಸಮಗ್ರ ತನಿಖೆ ಕೈಗೆತ್ತಿಕೊಂಡ ಎಸ್‌ಐಎ, ಸಾಕ್ಷ್ಯಗಳ ಆಧಾರದ ಮೇಲೆ 2024ರ ಜುಲೈನಲ್ಲಿ ಆರು ಮಂದಿ ಆರೋಪಿಗಳ ವಿರುದ್ಧ ಚಾರ್ಜ್‌ಶೀಟ್ ಸಲ್ಲಿಸಿತ್ತು. ಇವರಲ್ಲಿ ಇಬ್ಬರು ಉಗ್ರರು ಈಗಾಗಲೇ ಪ್ರತ್ಯೇಕ ಎನ್‌ಕೌಂಟರ್‌ಗಳಲ್ಲಿ ಹತರಾಗಿದ್ದರೆ, ಮತ್ತಿಬ್ಬರು ಜಾವೇದ್ ಮಟ್ಟೂ ಮತ್ತು ರೌಫ್ ನಜಾರ್ ಸೇರಿದಂತೆ ಮೂವರನ್ನು ಬಂಧಿಸಿ ವಿಚಾರಣೆ ನಡೆಸಲಾಗುತ್ತಿದೆ.

ಮಹಾರಾಷ್ಟ್ರದ ಕುಖ್ಯಾತ ಡಾನ್ ಬಾಬಾ ಫರ್ಜಾನ್ ನಿವಾಸದ ಮೇಲೆ ದಾಳಿ; ನಗದು, ಆಯುಧಗಳ ರಾಶಿ ಕಂಡು ಅಧಿಕಾರಿಗಳು ಸುಸ್ತು

ಸೋಪೋರ್ ನಿವಾಸಿಯಾದ ಇಮ್ತಿಯಾಜ್ ಅಹ್ಮದ್ ಕಂಡೂ 2010ರಿಂದ ಭಯೋತ್ಪಾದಕ ಚಟುವಟಿಕೆಗಳಲ್ಲಿ ಸಕ್ರಿಯನಾಗಿದ್ದು, ಭಾರತ ಸರ್ಕಾರ ಆತನನ್ನು 2022ರ ಅಕ್ಟೋಬರ್‌ನಲ್ಲೇ 'ವೈಯಕ್ತಿಕ ಭಯೋತ್ಪಾದಕ' ಎಂದು ಘೋಷಿಸಿತ್ತು. ಕೇವಲ ಹೈಗಾಮ್ ದಾಳಿ ಮಾತ್ರವಲ್ಲದೆ, ಕಣಿವೆಯಲ್ಲಿ ನಡೆದ ಕನಿಷ್ಠ 10ಕ್ಕೂ ಹೆಚ್ಚು ಉಗ್ರಗಾಮಿ ಪ್ರಕರಣಗಳಲ್ಲಿ ಈತ ಬೇಕಾಗಿದ್ದಾನೆ. ಇದರಲ್ಲಿ ಅಮಾಯಕರ ಟಾರ್ಗೆಟ್ ಕಿಲ್ಲಿಂಗ್, ಶಸ್ತ್ರಾಸ್ತ್ರ ಕಳ್ಳಸಾಗಣೆ ಮತ್ತು ನಾರ್ಕೋ-ಟೆರರ್ ಹಣಕಾಸು ಒದಗಿಸುವಿಕೆ ಸೇರಿದ್ದು, ಒಟ್ಟಾರೆಯಾಗಿ 15ಕ್ಕೂ ಹೆಚ್ಚು ಜನರು ಪ್ರಾಣ ಕಳೆದುಕೊಂಡಿದ್ದಾರೆ.

ಜಮ್ಮು ಮತ್ತು ಕಾಶ್ಮೀರದಲ್ಲಿ ಶಾಂತಿ ಕದಡಲು ಹೊಂಚು ಹಾಕುತ್ತಿರುವ ಪಾಕಿಸ್ತಾನ ಪ್ರೇರಿತ ಭಯೋತ್ಪಾದಕ ಜಾಲವನ್ನು ಬೇರುಸಹಿತ ಕಿತ್ತೆಸೆಯಲು ಭಾರತೀಯ ತನಿಖಾ ಸಂಸ್ಥೆಗಳು ಕಠಿಣ ಕ್ರಮಗಳನ್ನು ಕೈಗೊಳ್ಳುತ್ತಿವೆ. ಈ ರೆಡ್ ಕಾರ್ನರ್ ನೋಟಿಸ್ ಜಾರಿಯು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಓಡಿಹೋಗಿರುವ ಅಪರಾಧಿಗಳ ವಿರುದ್ಧ ಕಠಿಣ ಕಾನೂನು ಹೋರಾಟ ನಡೆಸಲು ಎಸ್‌ಐಎಗೆ ಸಿಕ್ಕ ಪ್ರಮುಖ ಶಸ್ತ್ರವಾಗಿದೆ. ವಿದೇಶಿ ನೆಲದಲ್ಲಿ ಅಡಗಿರುವ ಉಗ್ರರನ್ನು ಸದೆಬಡಿಯಲು ಜಾಗತಿಕ ಪೊಲೀಸ್ ಸಹಯೋಗದೊಂದಿಗೆ ಭಾರತ ನಡೆಸುತ್ತಿರುವ ಪ್ರಯತ್ನಗಳು ತೀವ್ರಗೊಂಡಿವೆ ಎಂಬುದಕ್ಕೆ ಇದು ಸಾಕ್ಷಿಯಾಗಿದೆ.

ಗಡಿಯಾಚೆಗಿನ ಭಯೋತ್ಪಾದನೆಗೆ ಆಶ್ರಯ ನೀಡುತ್ತಿರುವ ಶಕ್ತಿಗಳ ವಿರುದ್ಧ ಭಾರತ ತಳೆದಿರುವ ರಾಜತಾಂತ್ರಿಕ ಹಾಗೂ ತನಿಖಾ ಕಠಿಣ ನಿಲುವು ಜಾಗತಿಕ ಮಟ್ಟದಲ್ಲಿ ಮನ್ನಣೆ ಪಡೆಯುತ್ತಿದೆ. ತಲೆಮರೆಸಿಕೊಂಡಿರುವ ಇಂತಹ ಕ್ರೂರ ಅಪರಾಧಿಗಳನ್ನು ಎಷ್ಟೇ ವರ್ಷಗಳಾದರೂ ಬಿಡದೆ ಕಾನೂನಿನ ಕಟಕಟೆಗೆ ತಂದು ನಿಲ್ಲಿಸಲು ಎಸ್‌ಐಎ ಮತ್ತು ಭದ್ರತಾ ಸಂಸ್ಥೆಗಳು ಬದ್ಧವಾಗಿವೆ ಎಂಬ ಸಂದೇಶವನ್ನು ಈ ಇಂಟರ್‌ಪೋಲ್ ನೋಟಿಸ್ ರವಾನಿಸಿದೆ.