ಕಂಪನಿಯಲ್ಲಿ ಲೈಂಗಿಕ ಕಿರುಕುಳ, ಮತಾಂತರ ಕೇಸ್: ಯಾವುದೇ ಆಂತರಿಕ ದೂರು ಬಂದಿಲ್ಲ ಎಂದ ಟಿಸಿಎಸ್!

ಮುಂಬೈ, ಏ.18: ಟಿಸಿಎಸ್ ನಾಸಿಕ್ ಘಟಕದಲ್ಲಿ ಧಾರ್ಮಿಕ ಮತಾಂತರ (TCS religious conversion case) ಮತ್ತು ಲೈಂಗಿಕ ಕಿರುಕುಳದ ಆರೋಪಗಳ ಕುರಿತು ಪೊಲೀಸ್ ತನಿಖೆ ನಡೆಯುತ್ತಿರುವ ಮಧ್ಯೆ, ಈ ವಿಷಯದ ಬಗ್ಗೆ ತನ್ನ ಆಂತರಿಕ ಮಾರ್ಗಗಳ ಮೂಲಕ ಯಾವುದೇ ದೂರುಗಳು ಬಂದಿಲ್ಲ ಎಂದು ಐಟಿ ದೈತ್ಯ ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್ (TCS) ಹೇಳಿದೆ. ನಾಸಿಕ್ (Nasik) ಘಟಕಕ್ಕೆ ಸಂಬಂಧಿಸಿದ ವ್ಯವಸ್ಥೆಗಳು ಮತ್ತು ದಾಖಲೆಗಳ ಪ್ರಾಥಮಿಕ ಪರಿಶೀಲನೆ ನಡೆಸಿದಾಗ, ಲೈಂಗಿಕ ಕಿರುಕುಳ ಬಗ್ಗೆ ಕೇಳಿಬರುತ್ತಿರುವ ಆರೋಪಗಳ ಬಗ್ಗೆ ಯಾವುದೇ ದೂರುಗಳು ನಮಗೆ ಬಂದಿಲ್ಲವೆಂದು ಟೆಕ್ ದೈತ್ಯ ಕಂಪನಿ ತಿಳಿಸಿದೆ.

ಕಂಪನಿಯು ತನ್ನ ಆಂತರಿಕ ತನಿಖೆಯಲ್ಲಿ ಮೇಲ್ವಿಚಾರಣಾ ಸಮಿತಿಯನ್ನು ರಚಿಸುವುದಾಗಿ ಹಾಗೂ ಬಾಹ್ಯ ಸಂಸ್ಥೆಗಳ ಸಹಭಾಗಿತ್ವವನ್ನು ಕೂಡ ಘೋಷಿಸಿದೆ. ವರದಿಯ ಪ್ರಕಾರ, ಕಂಪನಿ ಮಂಡಳಿಯಲ್ಲಿ ಸ್ವತಂತ್ರ ನಿರ್ದೇಶಕರಾಗಿರುವ ಹಣಕಾಸು ಉದ್ಯಮದ ಅನುಭವಿ ಕೇಕಿ ಮಿಸ್ತ್ರಿ ಅವರು ಮೇಲ್ವಿಚಾರಣಾ ಸಮಿತಿಯ ಅಧ್ಯಕ್ಷತೆ ವಹಿಸಲಿದ್ದಾರೆ.

ಆರು ಪುರುಷರು ಮತ್ತು ಒಬ್ಬ ಮಹಿಳಾ ಎಚ್ಆರ್ ಸೇರಿದಂತೆ ಏಳು ಉದ್ಯೋಗಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಮತ್ತೊಬ್ಬ ಉದ್ಯೋಗಿ ನಿದಾ ಖಾನ್ ತಲೆಮರೆಸಿಕೊಂಡಿದ್ದಾಳೆ ಎನ್ನಲಾಗಿದೆ.

ಗುಲ್ಶನ್ ಆಗಿ ಬದಲಾದ ಗೋಪಾಲ್; ಬಗೆದಷ್ಟು ಬಯಲಾಗ್ತಿದೆ ಟಿಸಿಎಸ್ ಮತಾಂತರದ ಭೂತ!

ಟಿಸಿಎಸ್ ನಾಸಿಕ್ ಪ್ರಕರಣ: ಆರೋಪಗಳೇನು?

2022ರಲ್ಲಿ ಮದುವೆಯಾಗುವುದಾಗಿ ನಂಬಿಸಿ ಸಹೋದ್ಯೋಗಿ ಡ್ಯಾನಿಶ್ ಶೇಖ್ ತನ್ನೊಂದಿಗೆ ದೈಹಿಕ ಸಂಬಂಧ ಬೆಳೆಸಿದ್ದಾನೆ ಎಂದು ಯುವತಿಯೊಬ್ಬರು ಆರೋಪಿಸಿದ ನಂತರ ಈ ಘಟನೆ ಬೆಳಕಿಗೆ ಬಂದಿದೆ. ಆ ಸಮಯದಲ್ಲಿ ಸಹೋದ್ಯೋಗಿ ಇನ್ನೊಬ್ಬ ಮಹಿಳೆಯನ್ನು ಮದುವೆಯಾಗಿದ್ದ.

ಪೊಲೀಸ್ ವರದಿಯ ಪ್ರಕಾರ, ನಿದಾ ಖಾನ್ ಡ್ಯಾನಿಶ್ ಶೇಖ್‍ನ ಸಹೋದರಿ. ದೂರುದಾರರ ನಂಬಿಕೆಯ ಬಗ್ಗೆ ಅವಹೇಳನಕಾರಿ ಹೇಳಿಕೆಗಳನ್ನು ನೀಡಿದ್ದಾರೆ ಮತ್ತು ಆರೋಪಿಗಳು ಅವರ ಧರ್ಮವನ್ನು ಬದಲಾಯಿಸಲು ಒತ್ತಡ ಹೇರಲು ಪ್ರಯತ್ನಿಸಿದ್ದಾರೆ ಎಂದು ಆರೋಪಿಸಲಾಗಿದೆ. ಡ್ಯಾನಿಶ್ ಶೇಖ್ ಈಗಾಗಲೇ ಇನ್ನೊಬ್ಬ ಮಹಿಳೆಯನ್ನು ಮದುವೆಯಾಗಿದ್ದಾನೆ ಎಂಬ ಮಾಹಿತಿಯನ್ನು ಖಾನ್ ಮತ್ತು ತೌಸಿಫ್ ಅಖ್ತರ್ ದೂರುದಾರರಿಂದ ಮರೆಮಾಚಿದ್ದಾರೆ ಎಂದು ಆರೋಪಿಸಲಾಗಿದೆ.

ಪೊಲೀಸರು ಈ ಪ್ರಕರಣದ ಬಗ್ಗೆ ತನಿಖೆ ಆರಂಭಿಸುತ್ತಿದ್ದಂತೆ, ಇನ್ನೂ ಏಳು ಮಹಿಳೆಯರು ಮುಂದೆ ಬಂದು ತಮ್ಮ ಹಿರಿಯ ಸಹೋದ್ಯೋಗಿಗಳು ತಮಗೆ ಮಾನಸಿಕವಾಗಿ ಮತ್ತು ಲೈಂಗಿಕವಾಗಿ ಕಿರುಕುಳ ನೀಡಿದ್ದಾರೆ ಎಂದು ಆರೋಪಿಸಿದರು. ಆದರೆ, ಎಚ್ಆರ್ ವಿಭಾಗವು ಅವರ ದೂರುಗಳನ್ನು ನಿರ್ಲಕ್ಷಿಸಿತು. ಈ ಘಟನೆಗಳು ಫೆಬ್ರವರಿ 2022 ಮತ್ತು ಮಾರ್ಚ್ 2026ರ ನಡುವೆ ನಡೆದಿವೆ ಎಂದು ವರದಿಯಾಗಿದೆ.

ಟಿಸಿಎಸ್ ಕಂಪನಿ ಮತಾಂತರ ಕೇಸ್‌; ಗರ್ಭಿಣಿ ಎಂದು ನಿರೀಕ್ಷಣಾ ಜಾಮೀನು ಕೋರಲು ನಿದಾ ಖಾನ್ ಸಜ್ಜು?

ಟಿಸಿಎಸ್ ಆರೋಪಿ ನಿದಾ ಖಾನ್‌ಗಾಗಿ ಪೊಲೀಸರ ಹುಡುಕಾಟ

ಶುಕ್ರವಾರ (ಏ.17), ನಾಸಿಕ್ ಪೊಲೀಸ್ ಅಪರಾಧ ವಿಭಾಗದ ತಂಡವು ನಿದಾಳನ್ನು ಪತ್ತೆಹಚ್ಚಲು ಥಾಣೆ ಜಿಲ್ಲೆಯ ಮುಂಬ್ರಾಕ್ಕೆ ಆಗಮಿಸಿ, ಆಕೆಯ ಪತಿಯ ಮನೆಯಲ್ಲಿ ಆಕೆ ಎಲ್ಲಿದ್ದಾಳೆಂದು ವಿಚಾರಿಸಿತು. ನಿದಾ ಖಾನ್ ಮುಂಬೈನಲ್ಲಿದ್ದು, ಆಕೆ ಗರ್ಭಿಣಿ ಎಂದು ಅವರ ಕುಟುಂಬ ತಿಳಿಸಿದೆ. ಅವರು ನಿರೀಕ್ಷಣಾ ಜಾಮೀನಿಗಾಗಿ ನಾಸಿಕ್‌ನ ಸ್ಥಳೀಯ ನ್ಯಾಯಾಲಯವನ್ನು ಸಹ ಸಂಪರ್ಕಿಸಿದ್ದಾರೆ. ಗರ್ಭಿಣಿ ಎಂಬ ವಿಚಾರವನ್ನು ಮುಂದಿಟ್ಟುಕೊಂಡು ನಿರೀಕ್ಷಣಾ ಜಾಮೀನು ಸಲ್ಲಿಸಿದ್ದಾಳೆ ಎನ್ನಲಾಗಿದೆ.

ಟಿಸಿಎಸ್ ತನ್ನ ಹೇಳಿಕೆಯಲ್ಲಿ, ನಿದಾ ಖಾನ್ ಮಾನವ ಸಂಪನ್ಮೂಲ ವ್ಯವಸ್ಥಾಪಕಿಯೂ ಅಲ್ಲ ಅಥವಾ ನೇಮಕಾತಿಗೆ ಜವಾಬ್ದಾರಳೂ ಅಲ್ಲ ಎಂದು ಸ್ಪಷ್ಟಪಡಿಸಿದೆ. ಅವರು ಪ್ರಕ್ರಿಯೆ ಸಹವರ್ತಿಯಾಗಿ ಸೇವೆ ಸಲ್ಲಿಸುತ್ತಿದ್ದರು ಎಂದು ತಿಳಿಸಿದೆ.

ಲೈಂಗಿಕ ದೌರ್ಜನ್ಯ ಮತ್ತು ಬಲವಂತದ ಧಾರ್ಮಿಕ ಮತಾಂತರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಎಲ್ಲಾ ಉದ್ಯೋಗಿಗಳನ್ನು ಟಿಸಿಎಸ್ ಅಮಾನತುಗೊಳಿಸಿದೆ. ಲೈಂಗಿಕ ಕಿರುಕುಳ ಪ್ರಕರಣವು ಬಹಳ ಗಂಭೀರ ಹಾಗೂ ಕಳವಳಕಾರಿಯಾಗಿದೆ ಎಂದು ಟಾಟಾ ಸನ್ಸ್ ಅಧ್ಯಕ್ಷ ಎನ್. ಚಂದ್ರಶೇಖರನ್ ಹೇಳಿದರು.