ಪ್ರಧಾನಿ ಮೋದಿ ವಿದೇಶ ಪ್ರವಾಸದಿಂದ ಭಾರತಕ್ಕೆ ನೂರೆಂಟು ಲಾಭ

ಪರಶುರಾಮ್‌, ಬೆಂಗಳೂರು

ಪ್ರಧಾನಿ ನರೇಂದ್ರ ಮೋದಿ ಅವರು ನಡೆಸುವ ವಿದೇಶಿ ಪ್ರವಾಸಗಳು ಕೇವಲ ರಾಜತಾಂತ್ರಿಕ ಭೇಟಿಗಳಾಗಿರದೆ, ಭಾರತದ ಆರ್ಥಿಕ, ಆಯಕಟ್ಟಿನ ಮತ್ತು ತಾಂತ್ರಿಕ ಬೆಳವಣಿಗೆಯ ದೃಷ್ಟಿಯಿಂದ ಅತ್ಯಂತ ಮಹತ್ವದ ಪಾತ್ರ ವಹಿಸುತ್ತವೆ. ಭಾರತಕ್ಕೆ ವಿದೇಶಿ ನೇರ ಹೂಡಿಕೆಯನ್ನು ಆಕರ್ಷಿಸುವಲ್ಲಿ ಈ ಪ್ರವಾಸಗಳು ಪರಿಣಾಮಕಾರಿಯಾಗಿವೆ.

ಭಾರತವು ತನ್ನ ತೈಲ ಮತ್ತು ಅನಿಲದ ಶೇ.80ಕ್ಕೂ ಹೆಚ್ಚು ಅಗತ್ಯತೆಗಳಿಗಾಗಿ ವಿದೇಶಗಳ ಮೇಲೆಯೇ ಅವಲಂಬಿತವಾಗಿದೆ. ಜಾಗತಿಕ ಬಿಕ್ಕಟ್ಟುಗಳ ನಡುವೆಯೂ ಭಾರತಕ್ಕೆ ಇಂಧನ ಕೊರತೆಯಾಗದಂತೆ ನೋಡಿಕೊಳ್ಳಲು ಈ ಪ್ರವಾಸಗಳು ನೆರವಾಗಿವೆ. ಭಾರತವನ್ನು ರಕ್ಷಣಾ ವಲಯದಲ್ಲಿ ಸ್ವಾವಲಂಬಿಯನ್ನಾಗಿ ಮಾಡಲು ಸಹಕರಿಸಿವೆ.

ಮೋದಿಯವರು 2026ರ ಮೇನಲ್ಲಿ ಐದು ರಾಷ್ಟ್ರಗಳ ಪ್ರವಾಸವನ್ನು ಕೈಗೊಂಡರು. ಇದು ಸಾಂಪ್ರದಾಯಿಕ ರಾಜತಾಂತ್ರಿಕ ಸಂಬಂಧಗಳ ಸುಧಾರಣೆ ಕುರಿತ ಪ್ರವಾಸವಾಗಿರದೆ, ವ್ಯೂಹಾತ್ಮಕವಾಗಿ ದೀರ್ಘಕಾಲೀನ ಸಂಬಂಧ ವೃದ್ಧಿಯದ್ದಾಗಿತ್ತು. ಪಶ್ಚಿಮ ಏಷ್ಯಾದ ಇಂಧನ ಬಿಕ್ಕಟ್ಟು, ಆಪರೇಷನ್‌ ಸಿಂಧೂರ್‌ ನಂತರ ಜಿಯೊ ಪಾಲಿಟಿಕಲ್‌ ಉದ್ವಿಗ್ನತೆ ಮತ್ತು ಜಾಗತಿಕ ವ್ಯಾಪಾರದಲ್ಲಿನ ಬದಲಾವಣೆಗಳ ನಡುವೆ ಇದರ ಅಗತ್ಯ ಇತ್ತು. ಹಾರ್ಮುಜ್‌ ಜಲಸಂಧಿಯಲ್ಲಿ ಬಿಕ್ಕಟ್ಟಿನಿಂದ ಉಂಟಾಗಿರುವ ಪರಿಣಾಮವನ್ನು ನಿಯಂತ್ರಿಸಲು, ಯುಎಇ ಭೇಟಿ ನೆರವಾಗಲಿದೆ.

ಯುಎಇ ಭೇಟಿಯಿಂದ ತೈಲ ಸಹಕಾರ:

ಯುಎಇ ಭೇಟಿಯಿಂದ ಉಭಯ ದೇಶಗಳ ನಡುವೆ ಹೊಸ ರಕ್ಷಣಾ ಒಪ್ಪಂದ ಮತ್ತು ಸೈಬರ್‌ ಸಹಕಾರಕ್ಕೆ ಸಾಧ್ಯವಾಗಿದೆ. ಮೂಲಸೌಕರ್ಯ, ಬ್ಯಾಂಕಿಂಗ್‌ ಮತ್ತು ಹಣಕಾಸು ಕ್ಷೇತ್ರಗಳಲ್ಲಿ 5 ಶತಕೋಟಿ ಡಾಲರ್‌ ಹೂಡಿಕೆಯಾಗಲಿದೆ. ಎಡಿಐಟಿ, ಇಎನ್‌ಡಿಬಿ ಮತ್ತು ಐಎಚ್‌ಸಿ ನಡುವೆ ಒಪ್ಪಂದ ಆಗಿದ್ದು, ರಕ್ಷಣೆ, ಕೈಗಾರಿಕಾ ಸಹಯೋಗ ಮತ್ತು ಆರ್ಥಿಕ ಬೆಳವಣಿಗೆಯಲ್ಲಿ ಯುಎಇ ಸಹಭಾಗಿತ್ವ ಮುಂದುವರಿಯಲಿದೆ.

ಪ್ರಧಾನಿಯವರ ಯುರೋಪ್‌ ಭೇಟಿಯಿಂದ ಜಾಗತಿಕ ಮಟ್ಟದಲ್ಲಿ ಭಯೋತ್ಪಾದನೆ ವಿರುದ್ಧ ಭಾರತದ ನಿಲುವು ಸ್ಪಷ್ಟವಾಗಿದೆ. ಭಾರತ-ಯುರೋಪ್‌ ಮುಕ್ತ ವ್ಯಾಪಾರ ಒಪ್ಪಂದದಿಂದ ವಾಣಿಜ್ಯ ಚಟುವಟಿಕೆ ಹೆಚ್ಚಲಿದೆ. ಹಸಿರು ತಂತ್ರಜ್ಞಾನ ವಲಯದಲ್ಲಿ ಸಹಭಾಗಿತ್ವ ವೃದ್ಧಿಸಲಿದೆ. ಭಾರತಕ್ಕೆ 500 ಗಿಗಾವ್ಯಾಟ್‌ ಸ್ವಚ್ಛ ಇಂಧನ ಸಾಮರ್ಥ್ಯ ಗಳಿಸಲು ನೆರವಾಗಲಿದೆ. ಅಬುಧಾಬಿ ನ್ಯಾಶನಲ್‌ ಆಯಿಲ್‌ ಕಂಪನಿ (ಎಡಿಎನ್‌ಒಸಿ) ಮತ್ತು ಇಂಡಿಯನ್‌ ಸ್ಟ್ರಾಟಜಿಕ್‌ ಪೆಟ್ರೋಲಿಯಂ ರಿಸರ್ವ್ಸ್‌ ಲಿಮಿಟೆಡ್‌ (ಐಎಸ್‌ಪಿಆರ್‌ಎಲ್)‌ ನಡುವೆ 30 ದಶಲಕ್ಷ ಬ್ಯಾರೆಲ್‌ ಗಳಷ್ಟು ಕಚ್ಚಾ ತೈಲ ಸಂಗ್ರಹಣೆಗೆ ಸಂಬಂಧಿಸಿ ಒಪ್ಪಂದ ಆಗಿದೆ. ಭಾರತದ ವಿಶಾಖಪಟ್ಟಣಂ ಮತ್ತು ಒಡಿಶಾದ ಚಾಂಡಿಖೋಲ್‌ನಲ್ಲಿ ಸ್ಟ್ರಾಟಜಿಕ್‌ ಪೆಟ್ರೋಲಿಯಂ ರಿಸರ್ವ್‌ಗಳಲ್ಲಿ ಇಂಧನ ತುಂಬಿಡಲು ಸಹಕಾರಿಯಾಗಲಿದೆ. ತೈಲ ಪೂರೈಕೆಯಲ್ಲಿ ಕೊರತೆಯಾದಾಗ ಇದು ನಿರ್ಣಾಯಕವಾಗಲಿದೆ.

ಎಐ, ಸೆಮಿಕಂಡಕ್ಟರ್‌ಗೆ ಸ್ವೀಡನ್‌ ನೆರವು:

ಪ್ರಧಾನಿ ಮೋದಿಯವರು ಸ್ವೀಡನ್‌ಗೆ ಭೇಟಿ ನೀಡಿರುವುದರಿಂದ ಉಭಯ ದೇಶಗಳ ವ್ಯೂಹಾತ್ಮಕ ಸಂಬಂಧ ವೃದ್ಧಿಸಿದೆ. ಎಐ, ಕ್ರಿಟಿಕಲ್‌ ಮಿನರಲ್ಸ್‌, ವ್ಯಾಪಾರ ಮತ್ತು ಸಾಂಸ್ಕೃತಿಕ ಸಹಕಾರದಲ್ಲಿ ಹೊಸ ಶಕೆ ಆರಂಭವಾಗಿದೆ. ಐರೋಪ್ಯ ಒಕ್ಕೂಟದ ಅಧ್ಯಕ್ಷರಾದ ಉರ್ಸುಲಾ ವೊನ್‌ ಡೆರ್‌ ಲಿಯಾನ್‌ ಅವರು ಭಾರತ-ಯುರೋಪ್‌ ಮುಕ್ತ ವ್ಯಾಪಾರ ಒಪ್ಪಂದವನ್ನು " ಮದರ್‌ ಆಫ್‌ ಆಲ್‌ ಡೀಲ್ಸ್-‌ ಎಲ್ಲ ಒಪ್ಪಂದಗಳ ಮಹಾ ತಾಯಿʼʼ ಎಂದು ಬಣ್ಣಿಸಿದ್ದಾರೆ. ಮುಂಬರುವ ವರ್ಷಗಳಲ್ಲಿ ಉಭಯ ದೇಶಗಳ ದ್ವಿಪಕ್ಷೀಯ ವ್ಯಾಪಾರ 7.75 ಶತಕೋಟಿ ಡಾಲರ್‌ಗೆ ಏರುವ ನಿರೀಕ್ಷೆ ಇದೆ.

ಸ್ವೀಡನ್‌ ನ ಸಾಬ್‌ ಗ್ರಿಪೆನ್‌ ಯುದ್ಧ ವಿಮಾನಗಳು ಮತ್ತು ಕೊಕುಮ್ಸ್‌ ಜಲಾಂತರ್ಗಾಮಿಗಳು ಅತ್ಯಾಧುನಿಕವಾಗಿದ್ದು, ವಿಶ್ವವಿಖ್ಯಾತವಾಗಿವೆ. ಇವುಗಳನ್ನು ಮೇಕ್‌ ಇನ್‌ ಇಂಡಿಯಾ ಅಡಿಯಲ್ಲಿ ತಯಾರಿಸಲು ತಂತ್ರಜ್ಞಾನ ಸಹಕಾರ ನಡೆಯುವ ನಿರೀಕ್ಷೆ ಇದೆ. ಈ ಬಗ್ಗೆ ಚರ್ಚೆ ನಡೆದಿದೆ. ಎಐ ಸಹಕಾರ, ಬಂದರು ಮೂಲಸೌಕರ್ಯ ಅಭಿವೃದ್ಧಿ, 5ಜಿ/6ಜಿ ಸಹಕಾರಕ್ಕೆ ಒಪ್ಪಂದ ಏರ್ಪಟ್ಟಿದೆ. ಅವರು ನೆದರ್ಲ್ಯಾಂಡ್ಸ್‌ಗೆ ಭೇಟಿ ನೀಡಿ ರಕ್ಷಣೆ, ಹಸಿರು ಹೈಡ್ರೋಜನ್ ಮತ್ತು ಸೆಮಿಕಂಡಕ್ಟರ್ ಕ್ಷೇತ್ರಗಳ ಸಹಭಾಗಿತ್ವಕ್ಕೆ ಚರ್ಚೆ ನಡೆಸಿದರು.

43 ವರ್ಷಗಳ ಬಳಿಕ ನಾರ್ವೆಗೆ ಪ್ರಧಾನಿ ಭೇಟಿ:

ಪ್ರಧಾನಿ ನರೇಂದ್ರ ಮೋದಿಯವರ ನಾರ್ವೆ ಭೇಟಿಯು ಐತಿಹಾಸಿಕ ಮಹತ್ವ ಗಳಿಸಿದೆ. ಕಳೆದ 43 ವರ್ಷಗಳಲ್ಲಿಯೇ ಮೊದಲ ಬಾರಿಗೆ ಭಾರತದ ಪ್ರಧಾನಿಯೊಬ್ಬರು ನಾರ್ವೆಗೆ ಭೇಟಿ ನೀಡಿದಂತಾಗಿದೆ. ಹಸಿರು ಇಂಧನ, ಸಾಗರೋದ್ಯಮ, ಸಾಗರ ಭದ್ರತೆ, ಆರ್ಕಿಟಿಕ್‌ ಸಂಶೋಧನೆ, ಡಿಜಿಟಲ್‌ ತಂತ್ರಜ್ಞಾನ, ಆರೋಗ್ಯ ಮತ್ತು ಬಾಹ್ಯಾಕಾಶ ಕ್ಷೇತ್ರದಲ್ಲಿ ಸಂಶೋಧನೆಗೆ ಒಪ್ಪಂದ ಸಹಕಾರಿಯಾಗಿದೆ. ನಾರ್ವೆಯು ಭಾರತದ ಬಂಡವಾಳ ಮಾರುಕಟ್ಟೆಯಲ್ಲಿ 28 ಶತಕೋಟಿ ಡಾಲರ್‌ ಹೂಡಿಕೆಯನ್ನು ನಾರ್ವೆಯ ಪೆನ್ಷನ್‌ ಫಂಡ್‌ ಈಗಾಗಲೇ ಹೂಡಿಕೆ ಮಾಡಿದೆ. ಮುಂದಿನ ದಿನಗಳಲ್ಲಿ ಇದು ಹೆಚ್ಚುವ ಸಾಧ್ಯತೆ ಇದೆ. 3ನೇ ಭಾರತ-ನಾರ್ಡಿಕ್ ಶೃಂಗಸಭೆ ಎಂಬುದು ಭಾರತ ಮತ್ತು ಯುರೋಪಿನ ನಾರ್ಡಿಕ್ ವಲಯದ 5 ದೇಶಗಳ ನಡುವೆ ನಡೆದ ಅತ್ಯುನ್ನತ ಮಟ್ಟದ ರಾಜತಾಂತ್ರಿಕ ಸಭೆಯಾಗಿದೆ. ಇದು ಮೇ 19 ರಂದು ನಾರ್ವೆಯ ರಾಜಧಾನಿ ಓಸ್ಲೋ ನಗರದಲ್ಲಿ ಜರುಗಿತು.

ಈ ಶೃಂಗಸಭೆಯಲ್ಲಿ ಭಾರತ ಮತ್ತು ಈ ದೇಶಗಳ ನಡುವಿನ ಸಂಬಂಧವನ್ನು "ಗ್ರೀನ್ ಟೆಕ್ನಾಲಜಿ ಅಂಡ್ ಇನ್ನೋವೇಶನ್ ಸ್ಟ್ರಾಟೆಜಿಕ್ ಪಾರ್ಟ್‌ನರ್‌ಶಿಪ್" (ಪರಿಸರಸ್ನೇಹಿ ತಂತ್ರಜ್ಞಾನ ಮತ್ತು ನಾವೀನ್ಯತೆಯ ಕಾರ್ಯತಂತ್ರದ ಪಾಲುದಾರಿಕೆ) ಮಟ್ಟಕ್ಕೆ ಏರಿಸಲಾಗಿದೆ. ಅಂದರೆ, ಹವಾಮಾನ ವೈಪರೀತ್ಯ ತಡೆಯಲು ಬೇಕಾಗುವ ಕ್ಲೀನ್ ಎನರ್ಜಿ (ಹಸಿರು ಇಂಧನ), ನವೀಕರಿಸಬಹುದಾದ ಇಂಧನ, ಗ್ರೀನ್ ಶಿಪ್ಪಿಂಗ್ (ಪರಿಸರಸ್ನೇಹಿ ಹಡಗು ನಿರ್ಮಾಣ) ಮತ್ತು ಕೃತಕ ಬುದ್ಧಿಮತ್ತೆ (AI) ಕ್ಷೇತ್ರಗಳಲ್ಲಿ ಈ ದೇಶಗಳು ಭಾರತದೊಂದಿಗೆ ಜಂಟಿಯಾಗಿ ಕೆಲಸ ಮಾಡಲಿವೆ. TEPA (Trade and Economic Partnership Agreement) ಒಪ್ಪಂದದ ಅಡಿಯಲ್ಲಿ

100 ಬಿಲಿಯನ್ ಡಾಲರ್ ಹೂಡಿಕೆ ಮತ್ತು 1 ಮಿಲಿಯನ್ (10 ಲಕ್ಷ) ಉದ್ಯೋಗಗಳ ಸೃಷ್ಟಿಯ ಮಾತುಕತೆ ನಡೆದಿದೆ. ಜತೆಗೆ 6ಜಿ ತಂತ್ರಜ್ಞಾನ, ರಕ್ಷಣಾ ಇಂಡಸ್ಟ್ರಿ, ಟ್ಯಾಲೆಂಟ್‌ ಮೊಬಿಲಿಟಿ ಮೊದಲಾದ ಕ್ಷೇತ್ರಗಳಲ್ಲಿ ಸಹಕಾರ ಸಿಗಲಿದೆ.

ಇಟಲಿ ಜತೆ ರಕ್ಷಣಾ ಒಪ್ಪಂದ:

ಪ್ರಧಾನಿಯವರ ಇಟಲಿ ಭೇಟಿ ಕೂಡ ಐತಿಹಾಸಿಕ ಮಹತ್ವ ಗಳಿಸಿದೆ. ವ್ಯಾಪಾರ, ರಕ್ಷಣೆ, ಕ್ರಿಟಿಕಲ್‌ ಮಿನರಲ್ಸ್‌, ಸಾಗರ ವಲಯದ ಸಾರಿಗೆ, ಉನ್ನತ ಶಿಕ್ಷಣ ಮತ್ತು ಆರ್ಥಿಕ ಭದ್ರೆತ ವಿಚಾರದಲ್ಲಿ ಒಪ್ಪಂದ ನಡೆದಿದೆ. 2029ರೊಳಗೆ 20 ಶತಕೋಟಿ ಯೂರೊಗಳಷ್ಟು ವ್ಯಾಪಾರ ನಡೆಸುವ ಮಹತ್ವಾಕಾಂಕ್ಷೆಯ ಗುರಿಯನ್ನು ಹೊಂದಲಾಗಿದೆ. ದ್ವಿಪಕ್ಷೀಯ ವ್ಯಾಪಾರ ಈಗಾಗಲೇ 16.77 ಶತಕೋಟಿ ಡಾಲರ್‌ ಮಟ್ಟಕ್ಕೇರಿದೆ. ಹಡಗುಗಳ ನಿರ್ಮಾಣ, ಇಂಧನ ಮತ್ತು ಮೊಬಿಲಿಟಿ ವಲಯದಲ್ಲಿ ಇಟಲಿ ಹೂಡಿಕೆ ಮಾಡಲಿದೆ.

ಪ್ರಧಾನಿ ನರೇಂದ್ರ ಮೋದಿಯವರು 2014ರಿಂದ ಮಾಡಿರುವ ವಿದೇಶ ಪ್ರವಾಸಗಳು ಭಾರತದ ರಾಜತಾಂತ್ರಿಕ ಸಾಮರ್ಥ್ಯವನ್ನು ಹೆಚ್ಚಿಸಿದೆ. ಅಮೆರಿಕ, ಯುರೋಪ್‌, ಪಶ್ಚಿಮ ಏಷ್ಯಾ, ಆಫ್ರಿಕಾ, ಇಂಡೊ ಪೆಸಿಫಿಕ್‌, ಗ್ಲೋಬಲ್‌ ಸೌತ್‌ ನೇಶನ್ಸ್‌ ವಲಯದಲ್ಲಿ ಪ್ರವಾಸಗಳು ಯಶಸ್ವಿಯಾಗಿವೆ. ಜಾಗತಿಕ ಮಟ್ಟದಲ್ಲಿ ಭಾರತವನ್ನು ಪ್ರಭಾವಿಯನ್ನಾಗಿಸಿದೆ. ಈ ಅವಧಿಯಲ್ಲಿ ಭಾರತದ ವಿದೇಶಾಂಗ ನೀತಿಯು ಪ್ರತಿಕ್ರಿಯಾತ್ಮಕ ವಿಧಾನದಿಂದ ರಷನಾತ್ಮಕವಾಗಿ ಭಾಗವಹಿಸುವ ವಿಧಾನಕ್ಕೆ ಬದಲಾಯಿತು. ಆರ್ಥಿಕತೆ, ಭದ್ರತೆ, ಹವಾಮಾನ, ತಂತ್ರಜ್ಞಾನ ಕುರಿತ ಜಾಗತಿಕ ಮಟ್ಟದ ಚರ್ಚೆಗಳಲ್ಲಿ ಭಾರತ ಇಂದು ಸಕ್ರಿಯವಾಗಿ ಭಾಗವಹಿಸುತ್ತಿದೆ. ಭಾರತ-ರಷ್ಯಾ ನಡುವಣ ಬಾಂಧವ್ಯ ಹೊಸ ಎತ್ತರಕ್ಕೇರಿದೆ. ರಷ್ಯಾ ಜತೆಗೆ ಎಸ್‌ 400 ಏರ್‌ ಡಿಫೆನ್ಸ್‌ ಸಿಸ್ಟಮ್‌ ಕುರಿತ ಐತಿಹಾಸಿಕ ಒಪ್ಪಂದ ನಡೆದಿದೆ.

ವಿದೇಶಿ ಹೂಡಿಕೆ ಆಕರ್ಷಣೆ:

ಮೋದಿಯವರ ನೇತೃತ್ವದಲ್ಲಿ ಕಾರ್ಯತಂತ್ರದ ಸ್ವಾಯತ್ತತೆ ಮತ್ತು ಸ್ವತಂತ್ರ ವಿದೇಶಾಂಗ ನೀತಿ ವಿಧಾನವನ್ನು ಉಳಿಸಿಕೊಂಡು ಭಾರತವು ಅಮೆರಿಕ, ರಷ್ಯಾ, ಯುರೋಪ್ ಮತ್ತು ಗಲ್ಫ್ ರಾಷ್ಟ್ರಗಳು ಸೇರಿದಂತೆ ಪ್ರಮುಖ ಶಕ್ತಿಗಳೊಂದಿಗೆ ಸಂಬಂಧಗಳನ್ನು ಯಶಸ್ವಿಯಾಗಿ ಸಮತೋಲನಗೊಳಿಸಿದೆ. ಅದೇ ಸಮಯದಲ್ಲಿ, ಗಲ್ಫ್ ರಾಷ್ಟ್ರಗಳೊಂದಿಗಿನ ಸಂಬಂಧಗಳು ಇಂಧನ ಸಹಕಾರವನ್ನು ಮೀರಿದ ಹೂಡಿಕೆಗಳು, ರಕ್ಷಣೆ, ಮೂಲಸೌಕರ್ಯ ಮತ್ತು ಕಾರ್ಯತಂತ್ರದ ಪಾಲುದಾರಿಕೆಗಳಿಗೆ ವಿಕಾಸವಾಗಿವೆ. ಪಶ್ಚಿಮ ಏಷ್ಯಾದ ರಾಷ್ಟ್ರಗಳೊಂದಿಗೆ ಭಾರತದ ಒಪ್ಪಂದಗಳು, ಇಂಧನ ಹಿತಾಸಕ್ತಿಗಳನ್ನು ಭದ್ರಪಡಿಸಿಕೊಳ್ಳಲು, ಹೂಡಿಕೆಗಳನ್ನು ಆಕರ್ಷಿಸಲು ಮತ್ತು ಈ ಪ್ರದೇಶದಲ್ಲಿ ಭಾರತೀಯ ವಲಸಿಗರ ಪಾತ್ರವನ್ನು ಹೆಚ್ಚಿಸಲು ಸಹಕರಿಸಿದೆ.

"ಮೇಕ್ ಇನ್ ಇಂಡಿಯಾ" ಅಭಿಯಾನವು ಭಾರತವನ್ನು ಆಕರ್ಷಕ ಹೂಡಿಕೆ ತಾಣವನ್ನಾಗಿ ಮಾಡಲು ಕೊಡುಗೆ ನೀಡಿದೆ. ಜಪಾನ್‌ ಜತೆಗೆ ಒಪ್ಪಂದದಿಂದ ಭಾರತವು ಹೈ ಸ್ಪೀಡ್ ರೈಲು ಮತ್ತು ಕೈಗಾರಿಕಾ ಕಾರಿಡಾರ್‌ಗಳಲ್ಲಿನ ಸಹಕಾರದ ಮೂಲಕ ಮೂಲಸೌಕರ್ಯ ಅಭಿವೃದ್ಧಿಯನ್ನು ವೇಗಗೊಳಿಸಲು ಸಹಕರಿಸಿದೆ. ಆದರೆ ಭಾರತದ ಇಂಡೋ ಪೆಸಿಫಿಕ್ ಸಂಪರ್ಕವು ಕಡಲ ಸಹಕಾರವನ್ನು ಬಲಪಡಿಸಿದೆ. ಪ್ರಾದೇಶಿಕ ಭದ್ರತೆ ಮತ್ತು ಸಂಪರ್ಕವನ್ನು ಬಲಪಡಿಸಿದೆ.

ಯುರೋಪ್‌ ಜತೆಗೆ ವ್ಯಾಪಾರ ವೃದ್ಧಿ:

ಯುರೋಪಿಯನ್ ರಾಷ್ಟ್ರಗಳೊಂದಿಗಿನ ದ್ವಿಪಕ್ಷೀಯ ಒಪ್ಪಂದಗಳು ಭಾರತದ ದೀರ್ಘಕಾಲೀನ ತಾಂತ್ರಿಕ ಬೆಳವಣಿಗೆಗೆ ಸಹಕರಿಸುವ ಎಐ, ಕ್ವಾಂಟಮ್ ಕಂಪ್ಯೂಟಿಂಗ್, ಸೆಮಿಕಂಡಕ್ಟರ್‌ಗಳು ಮತ್ತು 6ಜಿ ತಂತ್ರಜ್ಞಾನಕ್ಕೆ ಆದ್ಯತೆ ನೀಡಿದೆ. ಭಾರತದ ಜಾಗತಿಕ ಚಿತ್ರಣವು ಅಭಿವೃದ್ಧಿಶೀಲ ಆರ್ಥಿಕತೆಯಿಂದ ಪ್ರಮುಖ ಭೌಗೋಳಿಕ, ತಾಂತ್ರಿಕ ಮತ್ತು ಆರ್ಥಿಕ ಶಕ್ತಿಯಾಗಿ ವಿಕಸನಗೊಂಡಿದೆ. ರಾಜತಾಂತ್ರಿಕ ಪ್ರಭಾವವು ಭಾರತದ ಭಯೋತ್ಪಾದನಾ ನಿಗ್ರಹ ಸ್ಥಾನವನ್ನು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಬಲಪಡಿಸಿದೆ. ಆಫ್ರಿಕಾ, ಏಷ್ಯಾದ ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲಿ ಭಾರತದ ಪ್ರಭಾವವನ್ನು ವಿಸ್ತರಿಸಿದೆ. ರಕ್ಷಣಾ ರಾಜತಾಂತ್ರಿಕತೆಯು ಕಾರ್ಯತಂತ್ರದ ಪಾಲುದಾರಿಕೆಗಳು, ಜಂಟಿ ಮಿಲಿಟರಿ ಅಭ್ಯಾಸ, ರಕ್ಷಣಾ ಉತ್ಪಾದನೆಗೆ ಒಪ್ಪಂದಗಳು ನಡೆದಿವೆ. ಇದು ಭಾರತದ ರಕ್ಷಣಾ ವಲಯದ ಆಧುನೀಕರಣಕ್ಕೆ ಕೊಡುಗೆ ನೀಡಿದೆ. ಅದೇ ಸಮಯದಲ್ಲಿ, ಅಂತರರಾಷ್ಟ್ರೀಯ ಒಪ್ಪಂದಗಳು ಭಾರತೀಯ ರಫ್ತಿಗೆ ಹೊಸ ಮಾರುಕಟ್ಟೆಗಳನ್ನು ತೆರೆದಿವೆ.

ಅಭಿವೃದ್ಧಿ ಹೊಂದಿದ ಮತ್ತು ಅಭಿವೃದ್ಧಿ ಹೊಂದುತ್ತಿರುವ ರಾಷ್ಟ್ರಗಳ ನಡುವಿನ ಸೇತುವೆಯಾಗಿ ಭಾರತವು ಹೊರಹೊಮ್ಮಿದೆ. ವಿಶೇಷವಾಗಿ ಜಿ20, ಬ್ರಿಕ್ಸ್‌ ಮತ್ತು ಕ್ವಾಡ್ ನಂತಹ ಬಹುಪಕ್ಷೀಯ ವೇದಿಕೆಗಳಲ್ಲಿ ಪ್ರಭಾವಿಯಾಗಿದೆ. ಮೋದಿಯವರ ಇತ್ತೀಚಿನ ಯುರೋಪಿಯನ್ ಪ್ರವಾಸಗಳಿಂದಾಗಿ ಆರ್ಕಟಿಕ್ ಸಂಶೋಧನೆ, ತಂತ್ರಜ್ಞಾನ ಮತ್ತು ನಾವೀನ್ಯತೆ ವಲಯಗಳಲ್ಲಿ ಭಾರತದ ಸಹಕಾರವನ್ನು ಮತ್ತಷ್ಟು ವಿಸ್ತರಿಸಿದೆ.

ಭಾರತ-ಪಶ್ಚಿಮ ಏಷ್ಯಾ-ಯುರೋಪ್‌ ಕಾರಿಡಾರ್‌ ಕುರಿತ ಪ್ರಸ್ತಾಪ, ಚರ್ಚೆಗಳಲ್ಲಿ ಭಾರತ ತೊಡಗಿಸಿಕೊಂಡಿದೆ. ಕಳೆದೊಂದು ದಶಕದಿಂದೀಚೆಗೆ ಭಾರತದ ವಿದೇಶಾಂಗ ನೀತಿಯು ಹೂಡಿಕೆ, ತಂತ್ರಜ್ಞಾನ ವರ್ಗಾವಣೆ, ರಕ್ಷಣಾ ಸಾಮರ್ಥ್ಯ, ಇಂಧನ ಭದ್ರತೆ ಮತ್ತು ನಾನಾ ಜಾಗತಿಕ ಆಯಾಮಗಳನ್ನು ಒಳಗೊಂಡಿದೆ. ಭಾರತದ ಬೆಳವಣಿಗೆಗೆ ಪೂರಕವಾಗಿದೆ.