Saree Trend 2025: ಓಣಂ ಫೆಸ್ಟೀವ್ ಸೀಸನ್‌ನಲ್ಲಿ ಚಾಲ್ತಿಗೆ ಬಂದ ಕಸವು ಸೀರೆ
Saree Trend 2025: ಇದುವರೆಗೂ ಕೇರಳ ಮಹಿಳೆಯರ ಸ್ವತ್ತಾಗಿದ್ದ ಕಸವು ಸೀರೆ ಇದೀಗ ಗಡಿ ದಾಟಿ ನಮ್ಮಲ್ಲೂ ಬಿಡುಗಡೆಗೊಂಡಿದೆ. ಓಣಂ ಫೆಸ್ಟೀವ್ ಸಂಭ್ರಮಕ್ಕೆ ಸಾಥ್ ನೀಡಲು ಎಂಟ್ರಿ ನೀಡಿವೆ. ಇದ್ಯಾವ ಬಗೆಯ ಸೀರೆ? ಇಲ್ಲಿದೆ ಮಾಹಿತಿ.
ಚಿತ್ರಕೃಪೆ: ಪಿಕ್ಸೆಲ್ -
ಶೀಲಾ ಸಿ ಶೆಟ್ಟಿ
Sep 2, 2025 8:00 AM
ಇಲ್ಲಿಯವರೆಗೂ ಕೇರಳ ಮಹಿಳೆಯರ ಸ್ವತ್ತಾಗಿದ್ದ ಕಸವು ಸೀರೆಗಳು ಇದೀಗ ನಮ್ಮ ನೆಲದಲ್ಲೂ ಬಿಡುಗಡೆಗೊಂಡಿದ್ದು, ಓಣಂ ಫೆಸ್ಟೀವ್ ಸೀಸನ್‌ನ ಸಂಭ್ರಮಕ್ಕೆ ಸಾಥ್ ನೀಡಲು ಸಜ್ಜಾಗಿವೆ.
ಫೆಸ್ಟೀವ್ ಸೀಸನ್‌ನಲ್ಲಿ ಟ್ರೆಂಡಿಯಾದ ಶ್ವೇತವರ್ಣದ ಸೀರೆಗಳಿವು
ಓಣಂ ಹಬ್ಬದ ಡ್ರೆಸ್‌ಕೋಡ್ ಎಂದೇ ಗುರುತಿಸಲಾಗುವ ಈ ಕಸವು ಸೀರೆಗಳು ಇದೀಗ ಕೇರಳ ಮಾತ್ರವಲ್ಲ, ಇತರೆಡೆಯು ತನ್ನವ್ಯಾಪ್ತಿಯನ್ನು ವಿಸ್ತರಿಸಿಕೊಂಡಿದ್ದು ಸ್ಥಳೀಯ ಮಾನಿನಿಯರ ಮನ ಗೆದ್ದಿವೆ.
ಗಡಿ ದಾಟಿದ ಫೆಸ್ಟೀವ್ ಸೀರೆ
ಕೇರಳದ ಹಬ್ಬ ಓಣಂ, ಇದೀಗ ಕೇವಲ ಕೇರಳಕ್ಕೆ ಮಾತ್ರ ಸೀಮಿತವಾಗಿಲ್ಲ, ಇತರೇ ಹಬ್ಬಗಳಂತೆ ಈ ಆಚರಣೆಯನ್ನು ಸೆಲೆಬ್ರೇಟ್ ಮಾಡುವವರು ಪ್ರಪಂಚದಾದ್ಯಂತ ಹೆಚ್ಚಾಗಿದ್ದಾರೆ. ಈ ಹಬ್ಬದಂದು ಹೆಣ್ಣುಮಕ್ಕಳು ಶ್ವೇತ ವರ್ಣದ ಗೋಲ್ಡನ್ ಬಾರ್ಡರ್ ಇರುವಂತಹ ಕಸವು ಸೀರೆ ಉಟ್ಟು ಸಂಭ್ರಮಿಸುವುದು ತೀರಾ ಕಾಮನ್. ಹಬ್ಬದ ಡ್ರೆಸ್‌ಕೋಡ್‌ನಲ್ಲಿ ಸೇರಿಹೋಗಿರುವ ಈ ಸೀರೆಯು ಪ್ರತಿ ಸೀರೆ ಪ್ರಿಯ ಮಹಿಳೆಯರ ಕಲೆಕ್ಷನ್‌ನಲ್ಲಿ ಒಂದಾಗಿದೆ ಎನ್ನುತ್ತಾರೆ ಫ್ಯಾಷನ್ ಡಿಸೈನರ್ ರೂಪಾ.
ಕೇರಳದ ಕಸವು ಸೀರೆಗೆ ಹೆಚ್ಚಿದ ಬೇಡಿಕೆ
ಹಬ್ಬಗಳು ಬಂತೆಂದರೆ ಸಾಕು, ಸೀರೆಗಳ ಖರೀದಿ ಆರಂಭವಾಗುತ್ತದೆ. ಸೀರೆ ಭಾರತದ ಸಾಂಪ್ರದಾಯಿಕ ಉಡುಗೆಯಾದರೂ, ಭೌಗೋಳಿಕ, ಸಾಂಪ್ರದಾಯಿಕವಾಗಿ ಆಯಾ ಪ್ರದೇಶಗಳಿಗೆ ಅನುಗುಣವಾಗಿ ಬೇರೆ ಬೇರೆ ರಾಜ್ಯಗಳಲ್ಲಿ ಬೇರೆ ಬೇರೆ ರೀತಿಯ ಸೀರೆಗಳು, ಅದನ್ನು ಉಡುವ ಸ್ಟೈಲ್‌ಗಳು ಬೇರೆಯದೇ ಆಗಿರುತ್ತದೆ. ದೇವರ ನಾಡು ಎಂದು ಖ್ಯಾತಿ ಪಡೆದಿರುವ ಕೇರಳದಲ್ಲಿ ಹೆಚ್ಚು ಮಹತ್ವವಿರುವುದು ಶ್ವೇತವರ್ಣದ ಸೀರೆಗಳಿಗೆ. ಇಲ್ಲಿನ ಸಾಂಪ್ರದಾಯಿಕ ಸೀರೆ ಕೇರಳ ಕಸವು ಸೀರೆ. ಬಿಳಿ ಬಣ್ಣದ ಸೀರೆಗೆ ಗೋಲ್ಡನ್ ಕಲರ್ ಝರಿ ಇರುವ ಈ ಸೀರೆ ನೋಡಲು ಅತ್ಯಂತ ಆಕರ್ಷಕ. ರಾಯಲ್ ಲುಕ್ ನೀಡುವುದರೊಂದಿಗೆ ಎಲ್ಲೆಡೆ ನಿಮ್ಮನ್ನು ಗುರುತಿಸಿಕೊಳ್ಳುವಂತೆ ಮಾಡುತ್ತದೆ ಎಂದು ವಿವರಿಸುತ್ತಾರೆ ಸ್ಟೈಲಿಸ್ಟ್ ಸಹನಾ ವಾರಿಯರ್.
ಬಗೆಬಗೆಯ ಕಸವು ಸೀರೆ
ಕಸವು ಸೀರೆಗಳಲ್ಲೂ ಹಲವಾರು ವಿಧದ ಡಿಸೈನ್‌ಗಳು ದೊರೆಯುತ್ತಿವೆ. ಗೋಲ್ಡನ್ ಕಲರ್ ಝರಿ ಮಾತ್ರವಲ್ಲದೆ ಅವುಗಳಲ್ಲಿ ಹಲವಾರು ರೀತಿಯ ಎಂಬ್ರಾಯ್ಡರಿ ಬಾರ್ಡರ್‌ನ ಸೀರೆಗಳು ನೋಡಲು ಮನಮೋಹಕವಾಗಿರುತ್ತವೆ. ಕಲರ್ ಝರಿ ಪ್ರಿಂಟ್ ಸೀರೆ, ಎಂಬ್ರಾಯ್ಡರಿ, ಪಿಕಾಕ್ ಎಂಬ್ರಾಯ್ಡರಿ, ಫ್ಯಾಬ್ರಿಕ್ ಪ್ರಿಂಟ್ ಕಸವು, ಸಿಲ್ವರ್ ಎಂಬೋಸ್, ಟಿಶ್ಯೂ ಎಂಬೋಸಿಂಗ್, ಫ್ಲವರ್ ಪ್ರಿಂಟ್ಸ್ ಸೇರಿದಂತೆ ನಾನಾ ಬಗೆಯ ಕಸವು ಸೀರೆಗಳು ಈ ಫೆಸ್ಟೀವ್ ಸೀಸನ್‌ಗೆ ಎಂಟ್ರಿ ನೀಡಿವೆ.
ಕಸವು ಸೀರೆ ಪ್ರಿಯರಿಗೆ ಒಂದಿಷ್ಟು ಟಿಪ್ಸ್
- ಸೀರೆಯ ಬಾರ್ಡರ್ ಕಲರ್‌ನ ಬ್ಲೌಸ್ ಧರಿಸಿ, ನೋಡಲು ಸುಂದರವಾಗಿ ಕಾಣುತ್ತದೆ.
- ಬಂಗಾರದ ಅಥವಾ ಗೋಲ್ಡ್ ಕಲವರಿಂಗ್ ಜ್ಯುವೆಲರಿ ಧರಿಸಿದಲ್ಲಿ ಆಕರ್ಷಕವಾಗಿ ಕಾಣುತ್ತದೆ.
- ಈ ಸೀರೆ ಉಡುವ ಮುನ್ನ ಐರನಿಂಗ್ ಮಾಡಿ.
