Astro Tips: ನೀವು ತುಳಸಿ ಮಾಲೆಯನ್ನು ಧರಿಸುತ್ತೀರಾ..?; ಹಾಗಾದ್ರೆ ತಪ್ಪದೇ ಈ ನಿಯಮಗಳನ್ನು ಪಾಲಿಸಿ

ಬೆಂಗಳೂರು: ಪ್ರತಿಯೊಂದು ಹಿಂದೂ ಮನೆಯಲ್ಲೂ ಶಾಸ್ತ್ರಾನುಸಾರ ಪ್ರತಿನಿತ್ಯ ತುಳಸಿಯನ್ನು(Tulasi) ಪೂಜಿಸುವ ಪರಂಪರೆ ಇದೆ. ಆದರೆ ಕೆಲಸದ ಒತ್ತಡ, ಸಮಯದ ಅಭಾವ ಇತ್ಯಾದಿಗಳಿಂದಾಗಿ ಪ್ರತಿದಿನ ಪೂಜೆ ಮಾಡುವುದು ಎಲ್ಲರಿಗೂ ಸಾಧ್ಯವಾಗದೇ ಇರಬಹುದು. ಆದರೂ ಸಹ ಬಹುತೇಕ ಮನೆಗಳಲ್ಲಿ ಬೆಳಿಗ್ಗೆ ಹಾಗೂ ಸಂಜೆ ದೀಪ ಹಚ್ಚುವ ಪದ್ಧತಿ ಕಡ್ಡಾಯವಾಗಿ ಪಾಲನೆಯಲ್ಲಿದೆ. ಮನೆಯ ಮುಂದಿರುವ ತುಳಸಿಗೆ ನೀರು ಹಾಕಿ, ದೀಪ ಹಚ್ಚಿ ನಮಸ್ಕರಿಸುವುದರಿಂದ ಮನೆಗೆ ಶಾಂತಿ, ಸುಖ, ಐಶ್ವರ್ಯ ಹಾಗೂ ಸಕಾರಾತ್ಮಕ ಶಕ್ತಿಯ ವಾಸವಾಗುತ್ತದೆ ಎಂಬ ನಂಬಿಕೆಯಿದೆ. ಮನೆಯ ಮುಂದೆ ತುಳಸಿಯನ್ನು ನೆಟ್ಟು ಪೂಜಿಸುವುದರಿಂದ ಎಷ್ಟು ಪುಣ್ಯ ಫಲ ಸಿಗುತ್ತದೋ, ಅಷ್ಟೇ ಪ್ರಮಾಣದಲ್ಲಿ ತುಳಸಿ ಮಾಲೆಯನ್ನು ಧರಿಸುವುದರಿಂದಲೂ ಆಧ್ಯಾತ್ಮಿಕ ಲಾಭ ದೊರೆಯುತ್ತದೆ ಎಂದು ಶಾಸ್ತ್ರಗಳು ಹೇಳುತ್ತವೆ. ತುಳಸಿ ಮಾಲೆಯನ್ನು ಧರಿಸುವುದರಿಂದ ಮನಸ್ಸಿಗೆ ಶುದ್ಧತೆ, ಭಕ್ತಿಭಾವ, ಆತ್ಮಶಾಂತಿ ಮತ್ತು ದೈವಿಕ ರಕ್ಷಣೆಯ ಅನುಭವ ಉಂಟಾಗುತ್ತದೆ. ಆದರೆ ತುಳಸಿ ಮಾಲೆ ಧರಿಸುವುದಕ್ಕೂ ಕೆಲವು ನಿಯಮಗಳು ಮತ್ತು ಶಿಸ್ತುಗಳಿವೆ. ಅವುಗಳನ್ನು ಸರಿಯಾಗಿ ಪಾಲಿಸದೇ ಇದ್ದರೆ ಲಾಭಕ್ಕಿಂತ ನಷ್ಟವೇ ಹೆಚ್ಚು ಸಂಭವಿಸುತ್ತದೆ ಎಂದು ಹೇಳಲಾಗುತ್ತದೆ. ಹಾಗಾದರೆ ಜ್ಯೋತಿಷ್ಯ ಶಾಸ್ತ್ರ ಸಲಹೆಯಂತೆ(Astro Tips) ತುಳಸಿ ಮಾಲೆ ಧರಿಸುವುದರಿಂದ ಯಾವೆಲ್ಲಾ ಪ್ರಯೋಜನಗಳು ದೊರೆಯುತ್ತವೆ..? ನಾವು ಯಾಕೆ ತುಳಸಿ ಮಾಲೆಯನ್ನು ಧರಿಸಬೇಕು..? ಎಂಬ ಮಾಹಿತಿ ಇಲ್ಲಿದೆ.

ತುಳಸಿ ಮಾಲೆಯನ್ನು ಧರಿಸಲು ಬಯಸುವವರು ಅದರ ಸಂಬಂಧಿಸಿದ ನಿಯಮಗಳನ್ನು ಕಟ್ಟುನಿಟ್ಟಾಗಿ ಅನುಸರಿಸುವುದು ಅತ್ಯಂತ ಮುಖ್ಯ. ತುಳಸಿ ಮಾಲೆ ಧರಿಸಿದ ಬಳಿಕ ಮಾಂಸಾಹಾರ, ಮದ್ಯಪಾನ ಹಾಗೂ ಇತರ ಮಾದಕ ಪದಾರ್ಥಗಳ ಸೇವನೆಯನ್ನು ಸಂಪೂರ್ಣವಾಗಿ ತ್ಯಜಿಸುವುದು ಒಳಿತು. ಸಾಧ್ಯವಾದಷ್ಟು ಇಂತಹ ತಾಮಸಿಕ ಗುಣ ಹೊಂದಿರುವ ಆಹಾರಗಳಿಂದ ದೂರವಿದ್ದು, ಶುದ್ಧ, ಪವಿತ್ರ ಹಾಗೂ ಸಾತ್ವಿಕ ಆಹಾರವನ್ನೇ ಸೇವಿಸುವುದರಿಂದ ದೇಹ ಮತ್ತು ಮನಸ್ಸು ಶುದ್ಧವಾಗುತ್ತದೆ. ಇದರಿಂದ ತುಳಸಿ ಮಾಲೆಯ ದೈವಿಕ ಶಕ್ತಿ ಪೂರ್ಣವಾಗಿ ಕಾರ್ಯನಿರ್ವಹಿಸುತ್ತದೆ ಎಂಬ ನಂಬಿಕೆ ಇದೆ.

ಕೆಲವರು ರುದ್ರಾಕ್ಷಿ ಹಾಗೂ ತುಳಸಿ ಮಾಲೆಯನ್ನು ಒಟ್ಟಿಗೆ ಧರಿಸಿರುವುದನ್ನು ನಾವು ಕೆಲವೊಮ್ಮೆ ಕಾಣಬಹುದು. ಆದರೆ ಶಾಸ್ತ್ರದ ಪ್ರಕಾರ ಇದು ಸರಿಯಾದ ವಿಧಾನವಲ್ಲ. ತುಳಸಿ ಮಾಲೆ ಧರಿಸಿರುವ ವ್ಯಕ್ತಿ ರುದ್ರಾಕ್ಷಿಯನ್ನು ಅಥವಾ ರುದ್ರಾಕ್ಷಿ ಮಾಲೆಯನ್ನು ಒಂದೇ ಸಮಯದಲ್ಲಿ ಧರಿಸಬಾರದು. ಇದರಿಂದ ಶುಭಫಲದ ಬದಲು ಪ್ರತಿಕೂಲ ಪರಿಣಾಮ ಉಂಟಾಗುವ ಸಾಧ್ಯತೆ ಇದೆ. ಶಿವನಿಗೆ ತುಳಸಿ ಎಲೆಗಳು ಇಷ್ಟವಿಲ್ಲ ಎನ್ನುವ ನಂಬಿಕೆಯಿರುವುದರಿಂದ, ಶಿವನ ಪೂಜೆಗೆ ತುಳಸಿಯನ್ನು ಅರ್ಪಿಸುವುದೂ ಸೂಕ್ತವಲ್ಲ. ಹಾಗೆಯೇ ರುದ್ರಾಕ್ಷಿ ಶಿವನ ಸಂಕೇತವಾಗಿರುವುದರಿಂದ, ಅದನ್ನು ತುಳಸಿಯೊಂದಿಗೆ ಸೇರಿಸಿ ಧರಿಸುವುದನ್ನು ತಪ್ಪಿಸಬೇಕು.

Astro Tips: ಮನೆಯಲ್ಲಿ ಸಾಕುವ ಈ ಪ್ರಾಣಿಗಳು ನಿಮ್ಮ ಬದುಕನ್ನು ಬಂಗಾರ ಮಾಡುತ್ತದೆ ಅನ್ನುತ್ತದೆ ಶಾಸ್ತ್ರ..!

ಒಮ್ಮೆ ನೀವು ತುಳಸಿ ಮಾಲೆಯನ್ನು ಧರಿಸಿದ ನಂತರ ಅದನ್ನು ಪದೇ ಪದೇ ತೆಗೆಯುವುದು, ಮತ್ತೆ ಧರಿಸುವುದು ಅಥವಾ ಬೇರೆ ಬೇರೆ ಮಾಲೆಗಳೊಂದಿಗೆ ಬದಲಾಯಿಸುವುದು ಒಳ್ಳೆಯದು ಅಲ್ಲ. ತುಳಸಿ ಮಾಲೆಯನ್ನು ಒಂದು ವ್ರತದಂತೆ, ಶಿಸ್ತು ಮತ್ತು ಭಕ್ತಿಯಿಂದ ನಿರಂತರವಾಗಿ ಧರಿಸಬೇಕು. ಮಧ್ಯೆ ಮಧ್ಯೆ ತೆಗೆದು ಹಾಕುತ್ತಿದ್ದರೆ ಅದರ ಆಧ್ಯಾತ್ಮಿಕ ಶಕ್ತಿ ಕಡಿಮೆಯಾಗುತ್ತದೆ ಹಾಗೂ ನಿರೀಕ್ಷಿಸಿದ ಫಲ ದೊರೆಯುವುದಿಲ್ಲ. ಕೆಲವೊಮ್ಮೆ ಇದರಿಂದ ಅಶುಭ ಪರಿಣಾಮಗಳೂ ಎದುರಾಗಬಹುದು ಎಂಬ ನಂಬಿಕೆಯಿದೆ.

ತುಳಸಿ ಮಾಲೆಯಾಗಲಿ ಅಥವಾ ಬೇರೆ ಯಾವುದೇ ಜಪಮಾಲೆಯಾಗಲಿ, ಧರಿಸುವ ಮೊದಲು ಅದನ್ನು ಶುದ್ಧೀಕರಿಸುವುದು ಅತ್ಯಂತ ಅಗತ್ಯ. ಶುದ್ಧತೆ ಇಲ್ಲದೆ ಯಾವುದೇ ಪವಿತ್ರ ವಸ್ತುವನ್ನು ದೇಹಕ್ಕೆ ಧರಿಸುವುದು ಶಾಸ್ತ್ರಸಮ್ಮತವಲ್ಲ. ತುಳಸಿ ಮಾಲೆಯನ್ನು ಗಂಗಾಜಲದಿಂದ ಅಥವಾ ಶುದ್ಧ ನೀರಿನಿಂದ ಚೆನ್ನಾಗಿ ತೊಳೆಯಬೇಕು. ತೊಳೆಯುವ ನಂತರ ನೀರಿನ ತೇವವಿರುವ ಸ್ಥಿತಿಯಲ್ಲೇ ಧರಿಸಬಾರದು. ಗಂಗಾಜಲ ಸಂಪೂರ್ಣವಾಗಿ ಒಣಗಿದ ನಂತರವೇ ಭಕ್ತಿಭಾವದಿಂದ ಜಪಮಾಲೆಯನ್ನು ಧರಿಸಬೇಕು.

ಜ್ಯೋತಿಷ್ಯ ಹಾಗೂ ಶಾಸ್ತ್ರಗಳ ಪ್ರಕಾರ, ಯಾರಿಗಾದರೂ ಕುತ್ತಿಗೆಗೆ ತುಳಸಿ ಮಾಲೆ ಧರಿಸಲು ಸಾಧ್ಯವಾಗದಿದ್ದರೆ, ಅದನ್ನು ಬಲಗೈಯಲ್ಲಿಯೂ ಧರಿಸಬಹುದು. ಆದರೆ ದಿನನಿತ್ಯದ ಶೌಚಕರ್ಮ, ಸ್ನಾನ ಮುಂತಾದ ಸಮಯದಲ್ಲಿ ಅದನ್ನು ತೆಗೆದು ಹಿಡಬೇಕು. ಸ್ನಾನ ಮಾಡಿದ ನಂತರ ಮತ್ತೊಮ್ಮೆ ಗಂಗಾಜಲದಿಂದ ಶುದ್ಧೀಕರಿಸಿ, ಮಂತ್ರಸ್ಮರಣೆ ಅಥವಾ ಭಕ್ತಿಪೂರ್ವಕ ಪ್ರಾರ್ಥನೆಯೊಂದಿಗೆ ಪುನಃ ಧರಿಸುವುದು ಶ್ರೇಷ್ಠವೆಂದು ಹೇಳಲಾಗಿದೆ.
ಈ ರೀತಿ ಶಿಸ್ತು, ಶುದ್ಧತೆ ಮತ್ತು ಭಕ್ತಿಭಾವದಿಂದ ತುಳಸಿ ಮಾಲೆಯನ್ನು ಧರಿಸಿದರೆ ದೈವಿಕ ಅನುಗ್ರಹ, ಮಾನಸಿಕ ಶಾಂತಿ ಹಾಗೂ ಜೀವನದಲ್ಲಿ ಸಕಾರಾತ್ಮಕ ಬದಲಾವಣೆಗಳು ಖಂಡಿತವಾಗಿಯೂ ದೊರೆಯುತ್ತವೆ ಎನ್ನುವುದು ಶಾಸ್ತ್ರಗಳ ಅಭಿಪ್ರಾಯವಾಗಿದೆ.